Íslenskir radíóamatörar – allar fréttir

Ágætu félagsmenn!

Því fylgir ánægja að tilkynna um útkomu félagsblaðsins okkar, CQ TF 2. tbl. 2023. Það kemur út á stafrænu formi hér á heimasíðunni í dag, sunnudaginn 2. apríl.

Slóðin á blaðið sjálft er: http://www.ira.is/wp-content/uploads/2023/04/2023-2.pdf

Félagskveðjur og 73,

Sæmundur E. Þorsteinsson, TF3UA
ritstjóri CQ TF

.

Ágúst H. Bjarnason, TF3OM, mætti í Skeljanes fimmtudaginn 29. nóvember með með erindið: „Fjarstýring á amatörstöð yfir netið“.

Ágúst flutti afar greinargott og fróðlegt erindi um reynslu sína í þessum efnum, en hann hefur aðstöðu fyrir loftnet og búnað í sumarhúsi sínu sem er í u.þ.b. 100 km fjarlægð frá heimili hans í Garðabæ.

Hann notar Kenwood TS-480 stöð og tengibúnað frá RemoteRig. https://www.remoterig.com/wp/  og
https://shop.microbit.se/webshop/catalog Stöðin er með laustengdu stjórnborði, þannig að RF hlutinn er hafður í sumarhúsinu og stjórnborðið heima. Kosturinn við þetta fyrirkomulag er, að ekki þarf sérstaka tölvu í sveitinni. Ágúst nefndi, að sambærilegt fyrirkomulag sé í boði fyrir fleiri gerðir af stöðvum sem eru með laustengd stjórnborð, t.d. Icom IC-7100, en Kenwood hefur hætt framleiðslu á TS-480. Hefðbundnar stöðvar þurfa hins vegar flestar tölvur á báðum endum.

Meginkosturinn við þessa lausn að nota RemoteRig boxin, er að þetta eru litlar sérhæfðar tölvur sem sjá sjálfvirkt um öll samskipti og merkjaflutning milli staða. Nóg er að setja 12VDC á boxin og þá tengja þau sjáfvirkt stjórnborðið á stöðinni heima og RF hlutann í sveitinni. Meginvandinn var til að byrja með léleg netþjónusta þar sem sumarhúsið er staðsett. Aukin samkeppni og þróun í netbúnaði hefur hins vegar auðveldað málið og gat Ágúst þess, að í dag sé tengingin yfir netið hnökralaus og kostnaður ásættanlegur. Hann notar 4G í sveitinni og ljósleiðara heima í Garrðabæ, hvort tveggja frá Mílu/Símanum.

Ágúst sýndi forritið Ping Plotter sem hentar vel til að greina hnökra í netsambandinu.

Ágúst kynnti einnig CATSync forritið sem má nota til að vera í loftinu með hlustun gegnum KiwiSDR viðtækin sem eru í boði hér á landi yfir netið. Áhugaverð lausn fyrir þá sem eru með miklar truflanir. https://catsyncsdr.wordpress.com/  og https://swling.com/blog/2020/09/catsync-control-web-sdr-tuning-from-your-rig/

Ágúst hafði með sér fjarstýribúnað í fundarsal og sýndi virkan hans eftir erindið og mátti greinilega heyra að truflanir eru litlar sem engar í sveitinni. Hann fékk fjölda fyrirspurna sem hann leysti greiðlega úr.

Sérstakar þakkir til Ágústar fyrir vel flutt og vandað erindi. Alls mættu 30 félagar og 1 gestur í Skeljanes þetta regnmilda fimmtudagskvöld í vesturbænum í Reykjavík.

Stjórn ÍRA.

ÍRA hefur borist jákvætt svar frá Fjarskiptastofu við ósk félagsins um endurnýjun aukinna heimilda á 6 metra bandi og veitir stofnunin íslenskum leyfishöfum auknar aflheimildir í 50-50,5 MHz tíðnisviðinu frá og með 1. júní 2023. Gildistími er 4 mánuðir eða til 31. september. G-leyfishafar fá heimild til að nota allt að 1kW og N-leyfishafar allt að 100W.

Hámarks bandbreidd sendinga er 18 kHz. Heimildin er með þeim fyrirvara að komi til truflana á annarri fjarskiptastarfsemi af völdum sendinganna þá skal þeim hætt. Æskilegt er að sendingar fari fram utan byggðar.

Ánægjulegt er, að gildistími heimildarinnar er jafn langur og á síðasta ári (2022) eða út septembermánuð.

Bent er á, að leyfishafar sem hafa áhuga á að stunda fjarskipti á auknu afli á 50 MHz tíðnisviðinu (6 metrum) í sumar, þurfa að senda beiðni þess efnis til Fjarskiptastofu áður en sendingar eru hafnar. Hafi verið fengin heimild í fyrra (2022) gildir hún ekki í ár. Póstfang: hrh(hjá)fjarskiptastofa.is  Tilgreina skal að sótt sé um aukið afl á 50 MHz.

Stjórn ÍRA.

Ari Þórólfur Jóhannesson, TF1A mætir í Skeljanes laugardaginn 25. mars á staðinn og kynnir ódýrar lausnir til sendingar merkja um QO-100 gervihnöttinn. Kynningin hefst kl. 13:30.

Hann sýnir hve einfalt, ódýrt og fljótlegt er að koma upp búnaði til sendinga um gervitunglið.

Kaffi og bakkelsi frá Björnsbakaríi.

Hvetjum félagsmenn að láta þetta tækifæri ekki framhjá sér fara.

Stjórn ÍRA.

Meðfylgjandi myndir eru frá fyrri hluta kynningarinnar sem fram fór 21. janúar s.l.
og fjallaði um viðtöku merkja frá QO-100 gervitunglinu.

Andrés Þórarinsson, TF1AM mætti í Skeljanes 23. mars með erindið „Íslensku radíóleikarnir; hagnýt ráð“.

Hann flutti okkur frábært erindi þar sem hann útskýrði og fór yfir reglur árlegra fjarskiptaviðburða félagsins (páskaleika, VHF/UHF leika og TF útileika). Inntak erindisins var að hvetja félagana til að vera með sem t.d. megi auðveldlega gera með handstöð heima í stofu, jafnvel þótt menn hafi takmarkaðan tíma; aðalatriðið sé að vera með.

Andrés sagði okkur frá reynslu sinni af að taka í þessum viðburðum undanfarin ár, þar sem hann hefur yfirleitt verið í einu af efstu sætunum. Hann fjallaði um og útskýrði vel eigin tæki og búnað, sem eru m.a. stefnuvirk loftnet á VHF og UHF og vírnet á lægri böndunum. Hann útskýrði hve auðvelt er að nota GSM símann sem „Portable Wi-Fi Hotspot“ og þar með tengja fartölvu við netið og skrá sambönd beint inn á leikjavefi þeirra TF8KY og TF3EK.

Hann sýndi okkur líka „góða“ staði til fjarskipta á Reykjanesskaganum, stór-Reykjavíkursvæðinu, Vesturlandi og Suðurlandi – sem hann hefur notað þegar hann hefur verið á ferðinni í bifreið sinni á keppnistímanum og kryddaði frásögnina með skemmtilegum sögum af sjálfum sér í mismunandi veðrum frá mismunandi stöðum. Í eitt skipti tók það hann t.d. þrjár klukkustundir að setja upp loftnet og gera sig kláran, en náði aðeins örfáum samböndum. En eins og hann sagði: „Maður lærir af slíku!“

Erindið tók um klukkustund í flutningi og var farið yfir margar glærur með texta og ljósmyndum. Mikið var spurt og Andrés svaraði fyrirspurnum strax og eftir erindið var áfram rætt yfir kaffinu. Sérstakar þakkir til Andrésar Þórarinssonar, TF1AM fyrir vel flutt, áhugavert og fróðlegt erindi í máli og myndum.

Alls mættu 32 félagsmenn og 2 gestir í Skeljanes þetta ágæta og milda síðvetrarkvöld í vesturbænum í Reykjavík þegar vorið nálgast og þar með páskaleikarnir 7.-9. apríl n.k.

Stjórn ÍRA.