Íslenskir radíóamatörar – allar fréttir

Opið hús var í Skeljanesi fimmtudaginn 26. febrúar. Þetta var skemmtilegt kvöld. Menn hressir, góður andi í húsinu og mæting alls 27 manns að meðtöldum 1 gesti.

Mikið var rætt um stöðvar, m.a. Elecraft K4 línuna, FlexRadio 8600 og nýju FlexRadio Aurora 500 línuna sem notar m.a. CESSB (RF Compression). Einnig rætt um Icom 7300, en af þeirri tegund og gerð eru komin yfir 200 tæki til landsins – allt frá því sú stöð kom fyrst á markað í apríl 2016. Nú er komin ný uppfærsla hennar, IC-7300MK2 sem þegar eru komnar a.m.k. 9 stöðvar af til landsins. Einnig rætt um Yaesu FTdx10 sem hefur fengið umsagnir um að vera erfið í notkun m.a. vegna hönnunar á stjórnborði, staðsetningar á tökkum og valmyndakerfis (e. menus). Einar Kjartansson, TF3EK kom með TX-500 Discovery stöðina frá LAB599 og sýndi okkur á staðnum. Ótrúlega skemmtileg stöð sem býður upp á mikla möguleika og sem hann notar í SOTA. https://www.hamradio.com/images_managed/misc/H0-017255_Lab599-TX500-User-Manual-EN-v03-2021.pdf

 Benedikt Sveinsson, TF3T spurði um aðgang félagsmanna að búnaði félagsstöðvarinnar með það að markmiði að geta náð sambandi við Bouvet DX leiðangurinn. Fram kom, að almenna reglan væri sú að nota eingöngu kallmerki félagsins, en þegar um væri að ræða svo sjaldgæfan DX viðburð eins og Bouvet væri sjálfsagt að gera undirtekningu, þ.e. að menn gætu notað eigin kallmeki í því skyni að ná sambandi við 3YØK.

Sigurður Harðarson, TF3WS mætti í Skeljanes með fullan bíl af margskonar radíódóti sem hann og þrír hjálparmenn báru inn í ganginn niðri. Þakkir góðar til Sigga, TF3WS fyrir að hugsa vel til félagsins. Alls mættu 27 (að meðtöldum 1 gesti) þetta ágæta vetrarkvöld í snjófjúki og -4°C frosti í vesturbænum í Reykjavík.

Stjórn ÍRA.

.

Opið var í félagsaðstöðu ÍRA í Skeljanesi fimmtudaginn 19. febrúar. Á dagskrá var 2. erindið á fræðsludagskrá félagsins vorið 2026 sem var í umsjá Benedikts Sveinssonar, TF3T og nefndist: „Sólgos og skilyrði á HF“.

Benedikt, sem hefur verið leyfishafi í yfir 30 ár hefur að baki ótrúlega fjölskrúðugan feril sem slíkur.  Fyrir mörgum er það fjarskiptastöð þeirra bræðra (hans og Guðmundar, TF3SG) skammt frá Eyrarbakka sem heldur merki hans á lofti. Eða EME samböndin sem hann hafði úr skotti bíls síns í Skerjafirði. En, eins og þessi fyrirlestur bar með sér, þá heillast Benedikt af því sem er erfitt og ófyrirsjáanlegt.  EME sambönd eru það ekki, þau má skipuleggja með fyrirvara, og þegar stundin er runnin upp þá fæst endurvarp frá tunglinu og það er einhver á hinum endanum.

Það sem Benedikt þykir heillandi er allt þetta ófyrirséða, öll þessi óáran sem hoppar til og frá með litlum fyrirvara. Hér er átt við áhrif vegna sólgosa, og tilheyrandi norðurljósa, og truflana í háloftunum sem stjórna því hvert er hægt að ná sambandi hverju sinni og á hvaða bandi. F-lögin koma þar við sögu, og styrkur sólgosa, og K-stuðullinn, og hvar á sólgosahringum við erum staddir.

Þá voru nefndir töfrar grálínunnar sem gera möguleg talsambönd á litlu afli langar leiðir, svo fremi sem grálínan liggi um báða staðina. Þannig verður um Bouvet-eyjuna í Suðurhöfum, þangað sem Guðmundur bróðir stefnir í þessum töluðu orðum. Svo ótrúlegt sem það er þá liggur grálínan um ísland og Bouvet-eyju á sama tíma á þessum tíma árs, og því er vonast til að allt gangi upp og þeir bræður fái samband á litlu afli og á tali sín á milli.

Það eru reyndar margir aðrir stuðlar sem koma við sögu sem gera málið flóknara og því er öllum bent að horfa á myndbandið þar sem Benedikt skýrir mál sitt svo vel og kynnir að auki fjölda hugbúnaðarkerfa sem sem birta þetta flökkt allt saman svo ágætlega. Það var gerður góður rómur að erindi Benedikts og hann fékk fjölda fyrirspurna. Alls voru um 20 manns mættir sem höfðu mikla ánægju af erindi Benedikts.

Sérstakar þakkir til Benedikts Sveinssonar, TF3T fyrir fróðlegt, áhugavert og vel flutt erindi. Þakkir einnig til Georgs Kulp, TF3GZ fyrir ljósmyndir og Sveins Goða Sveinssonar, TF3ID fyrir kaffi og meðlæti.

Þess má geta að erindið var tekið upp, sbr. eftirfarandi vefslóð: https://youtu.be/YRVN78hT6ek

Stjórn ÍRA.

Félagsaðstaða ÍRA í Skeljanesi verður opin fyrir félagsmenn og gesti fimmtudaginn 26. febrúar kl. 20:00-22:00.

Fundarsalur, fjarskiptaherbergi TF3IRA og QSL stofa á 2. hæð verða opin. Góður félagsskapur og nýjustu amatörtímaritin liggja frammi.

QSL stjóri verður búinn að fara í pósthólf félagsins, flokka kort og raða í hólfin. Sveinn Goði Sveinsson, TF3ID annast kaffiveitingar.

Verið velkomin í Skeljanes!

Stjórn ÍRA.

Fjarskiptastofa hefur úthlutað Ara Þórólfi Jóhannessyni, TF1A kallmerkinu TF3WPR. Heimildin nær til rekstrar radíóvita á QRG 14,0971 MHz, með 23 dBm útgeisluðu afli. Vitinn er hluti af WSPRnet upplýsingakerfi radíóamatöra fyrir stafrænar sendingar til að kortleggja skilyrði til fjarskipta um heiminn. Staðsetning sendis er við Bústaðavegi í Reykjavík. Ábyrgðamaður og eigandi er Ari Jóhannesson TF1A.

WSPRnet upplýsingakerfið er rekið af radíóamatörum sem nota „MEPT_ JT“ forrit K1JT fyrir stafrænar sendingar til að kortleggja skilyrði til fjarskipta um heiminn. Kerfið notar merki frá radíóvitum radíóamatöra sem senda út allan sólarhringinn, allt árið um kring á QRP/QRPp afli á tilgreindum tíðnisviðum á 80, 40, 20, 15 og 10 met rum.

Þótt WSPRnet sé tiltölulega nýlegt verkefni (stofnað 17. maí 2021) er fyrsti áfanginn í þróun þess langt kominn. TF3D var gerist þátttakandi í WSPRnet kerfinu 16. ágúst 2022. TF4M í Vesturbyggð gerðist þátttakandi nokkru fyrr. WSPRnet kerfið veitir íslenskum sem og erlendum leyfishöfum sem áhuga hafa á útbreiðslu radíóbylgna mikilvægar upplýsingar sem nýtast í fjarskiptum radíóamatöra um allan heim.

Þakkir til Ara Þórs Jóhannessonar, TF1A fyrir uppsetningu radíóvitans.

Stjórn ÍRA.

http://www.youtube.com/watch?v=FVNH37vH80Y
https://www.wsprnet.org/drupal/wsprnet/map
https://www.wsprnet.org/olddb/drupal/wsprnet/map