,

TF3DX fór á kostum í Skeljanesi

Vilhjálmur Þór Kjartansson TF3DX var með erindi á fyrstu sunnudagsopnun félagsins 12. febrúar.

Vilhjálmur Þór Kjartansson, TF3DX, var með fyrsta sunnudagserindið á yfirstandandi vetrardagskrá þann 12. febrúar. Vilhjálmur kynnti erindið eftirfarandi: Ætlunin er að fjalla um það sem heitir “duality” á ensku, sem ég hef lengi þýtt sem “tvídd” við kennslu. Þá er skoðuð samsvörun í jöfnum og rásum þegar víxlað er spennu og straumi.

Þó hægt sé að komast af án þessa hugtaks, víkkar það sjónarhornið og eykur skilning. Greining á einni rafrás gildir líka um aðra rás, sem er þá “tví” (dual) hinnar og öfugt. Það munar um minna en að helminga þann aragrúa af rásum sem við viljum skilja. Að sama skapi kann maður í raun 2 jöfnur fyrir hverja sem maður lærir, og getur stundum valið jöfnu sem gefur einfaldari útreikninga en sú sem annars þyrfti að nota.

Erindið hófst stundvíslega kl. 10:00. Vilhjálmur fór á kostum í yfirferð sinni og voru umræður fjörugar og stóðu fram yfir kl. 13:00. Alls mættu 18 félagsmenn í Skeljanesið að þessu sinni.

Stjórn Í.R.A. þakkar Vilhjálmi Þór Kjartanssyni, TF3DX, vel heppnað og áhugavert erindi og Guðmundi Sveinssyni, TF3SG, fyrir undirbúninginn.

Vilhjálmur fjallaði m.a. um “praktísk” atriði fyrir radíóamatöra sem stunda smíðar.

 

/by
,

Vel heppnað fimmtudagserindi TF3CW og TF3Y

Yngvi Harðarson TF3Y og Sigurður R. Jakobsson TF3CW í Skeljanesi 9. febrúar 2012.

Sigurður R. Jakobsson, TF3CW og Yngvi Harðarson, TF3Y fluttu vel heppnað erindi um alþjóðlegar keppnir í félagsaðstöðunni í Skeljanesi fimmtudaginn 9. febrúar. Þetta var þriðja árið í röð sem þeir félagar halda tölu um viðfangsefnið (enda víðfemt) og að þessu sinni var lögð áhersla á undirbúningsþáttinn.

Þeir félagar komu víða við og fjölluðu um allt frá því hvernig best er að greina fjarskiptadagbækur frá fyrri keppnum til matarræðis og hvíldar. Það síðastnefnda er afar mikilvægt þar sem sumar keppnir heimila þátttöku (án hvíldar) í allt að tvo sólarhringa. Þá er ekki síður nauðsynlegt að tækin og allur
búnaður séu vel yfirfarinn og ef hægt er, að hafa tæki við vara.

Erindið var geysivel heppnað og skörunglega flutt. Í fyrirspurnum og umræðum kom í ljós mikill áhugi félagsmanna á efninu og er við því að búast að þeim fjölgi sem taka þátt í keppnnum frá TF á næstu misserum. Á þriðja tug félagsmanna hlýddu á erindið sem stóð til kl. 22:30.

Stjórn Í.R.A. þakkar þeim Sigurði R. Jakobssyni, TF3CW og Yngva Harðarsyni, TF3Y, fyrir vel heppnað og áhugavert erindi og Jóni Svavarssyni, TF3LMN, fyrir myndatökuna.

Power Point skyggnur frá erindinu má sækja á vefslóðina: http://www.ira.is/itarefni/

Það kom mörgum á óvart þegar þeir félagar bentu á að mikil kaffidrykkja væri varasöm í keppnum.

Á Íslandi er norðurljósavirkni að meðaltali 243 daga á ári. Sjá samanburðinn við nágrannalöndin.

Þeir Sigurður og Yngvi lögðu áherslu á menn kynni sér og noti skilyrðaspár sem þátt í undirbúningi.

Þeir félagar fóru að lokum yfir siðareglur keppenda í alþjóðlegum keppnum.

/by
,

Sunnudagsopnun og rafmagnsfræði

Ráðgert er að hafa til umfjöllunar rafmagnsfræði í næstu sunnudagsopnun félagsins að morgni þess 12. febrúar, ca. kl. 10.00 og mun Vilhjálmur Kjartansson, TF3DX leiða umræðuna. Þetta er hugsað sem viðbót við þá rafmagnsfræði sem kennd hefur verið á námskeiðum félagsins og farið vandlega ofan í fræðilega en afmarkaða hluti. Ráðgert að þetta verði með léttu sniði, skrifað á töfluna yfir kaffibolla.

73
Guðmundur de TF3SG

/by
,

TF3CW og TF3Y verða með fimmtudagserindið

Sigurður R. Jakobsson, TF3CW.

Yngvi Harðarson, TF3Y.

 

 

 

 

 

 

 

 

 

Sigurður R. Jakobsson, TF3CW og Yngvi Harðarson, TF3Y, verða með næsta erindi á vetrardagskrá félagsins. Það verður haldið fimmtudaginn 9. febrúar n.kí félagsaðstöðunnni við Skeljanes.

Þeir félagar munu fjalla um þátttöku í alþjóðlegum keppnum og hve mikilvægt er að viðhafa markvissan undirbúning sem þátt í keppnisferlinu. Erindið hefst hefst stundvíslega kl. 20:30.

Félagar, fjölmennum! Kaffiveitingar verða í boði félagsins.

 

/by
,

Kortastofa auglýsir hækkun QSL þjónustu

Kortastofa ÍRA tilkynnir hækkun á þjónustu. Frá og með deginum i dag kostar kr. 9,50 pr. kort, sem sent er í gegnum kortastofu ÍRA. Frá ármótum hefur ný gjaldskrá Íslandspósts verið í gildi. Rétt að geta þess að póstburðargjöld Íslandspósts hafa hækkað frá síðustu hækkun kortastofu ÍRA um 53,16% á bréfum til Evrópu og 50,88% utan Evrópu. Verð Íslandspósts á 250 gramma bréfi til Evrópu sem kostaði kr. 380 kostar eftir hækkun kr. 520 og verð á 250 gramma bréfi utan Evrópu sem kostaði kr. 570 kostar nú kr. 860.

73
Guðmundur, TF3SG

/by
,

SteppIR Yagi loftnet TF3IRA komið í lag

Baldvin Þórarinsson TF3-033 og Benedikt Sveinsson TF3CY tengja AlfaSpid rótor félagsins 4. febrúar. Niðri, til hægri: Guðmundur Sveinsson TF3SG og Sigurður R. Jakobsson TF3CW.

Undanfarið hefur verið beðið tækifæris til að setja upp AlfaSpid rótor félagsins aftur í loftnetsturninn í Skeljanesi. Tækifærið gafst síðan í dag, þann 4. febrúar og var ákveðið í morgun kl. 11 að hittast kl. 12 á hádegi og ráðast í verkefnið. Það gekk að óskum og um kl. 13:30 var allt komið í gang og SteppIR 3E loftnet TF3IRA farið að snúast.

Bestu þakkir til þeirra Benedikts Sveinssonar, TF3CY, stöðvarstjóra TF3IRA, sem gerði við rótorinn og hafði umsjón með verkinu. Einnig þakkir til Sigurðar R. Jakobssonar, TF3CW; Baldvins Þórarinssonar, TF3-033; og Guðmundar Sveinssonar, TF3SG. Aðrir á staðnum: Reynir Björnsson, TF3RL og Jónas Bjarnason, TF2JB.

Fyrirtaksveður var til framkvæmda í Skeljanesi 4. febrúar eins og myndin ber með sér; logn og 5°C lofthiti.

Benedikt TF3CY og Sigurður TF3CW “taka út” AlfaSpid rótorinn í fjarskiptaherbergi TF3IRA.

Glatt á hjalla í fjarskiptaherbergi félagsins enda búið að laga kaffi og rótorinn kominn upp. Frá vinstri: Oddur “okkar” Helgason, Guðmundur Sveinsson TF3SG, Baldvin Þórarinsson TF3-033 og Sigurður R. Jakobsson TF3CW.

/by
,

Bætt aðgengi að tímaritaeign í Skeljanesi

Bókaskápurinn eins og hann lítur út eftir breytingu. Hvert tímarit hefur nú sína eigin hillu.

Nýlega bárust félaginu að gjöf 40 vandaðar innstungumöppur úr harðplasti. Í tilefni þess, brettu stjórnarmenn upp ermar um nýliðna helgi og var komið á skipulagi og nýrri uppröðun tímaritaeignar félagsins í bókaskáp í samkomusal á 1. hæð í félagsaðstöðunni í Skeljanesi.

Eftir breytingu, hefur hvert tímarit eigin hillu sem er merkt með nafni þess. Árgangar tímaritanna CQ DL, QST, RadCom og norrænu tímaritanna OZ, Amatør Radio og QTC liggja frammi fyrir árin 2008-2012, en tímaritin Radioamatööri, Radio REF og Radio Rivista liggja frammi fyrir árin 2010-2012. Eldri áragangar hafa verið fluttir í geymslu. Sjá nánar lista yfir tímaritin hér á eftir:

Tímarit

Útgefandi

Tungumál

Útgáfutíðni
CQ TF ÍRA, Íslenskir radíóamatörar Íslenska Ársfjórðungslega
OZ EDR, Experimenterende Danske Radioamatører Danska Mánaðarlega
Amatør Radio NRRL, Norsk Radio Relæ Liga Norska Mánaðarlega
QTC SSA, Föreningen Sveriges Sändareamatörer Sænska Mánaðarlega
Radioamatööri SRAL, Suomen Radioamatööriliitoo OY Finnska Mánaðarlega
QST ARRL, American Radio Relay League Enska Mánaðarlega
RadCom RSGB, Radio Society of Great Britain Enska Mánaðarlega
CQ DL DARC, Deutscher Amateur-Radio-Club e.V. Þýska Mánaðarlega
Radio REF REF Réseau des Émetteurs Français Franska Mánaðarlega
Radio Rivista ARI, Associazone Radioamatori Italiani Ítalska Mánaðarlega

Hver hylla er sérmerkt viðkomandi tímariti, sem auðveldar aðgengi. Hver mappa inniheldur heilan árgang.

Þessi breyting gerir tímaritin aðgengilegri, auk þess sem merkingar eru samræmdar. Líkt og fram kemur í töflunni að ofan, eru það alls 9 erlend tímarit sem félaginu berast reglulega í hverjum mánuði. Í þessu felast verðmæti sem er ánægjulegt að félagsmenn geti nýtt sem best.

Benda má á, að ljósritunarvél félagsins er í góðu lagi og gefst mönnum kostur á að taka ljósrit upp úr tímaritunum frítt, m.a. í stærðinni A3 sem nær til dæmis að taka heila opnu í QST á eitt blað.

Sérhver innstungumappa rúmar heilan árgang og eru þær vel merktar eins og sjá má á myndinni.

/by
,

Vel heppnað fimmtudagserindi TF3GL

Guðmundur Löve TF3GL fjallaði um væntanlega VHF leika og útbreiðslu radíóbylgna í VHF/UHF sviðunum.

Fimmtudagserindið þann 26. janúar var í höndum Guðmundar Löve, TF3GL, og nefndist það VHF leikar 2012; möguleikar á VHF/UHF samböndum; og sögur og staðreyndir um útbreiðslu merkja í þessum tíðnisviðum.

Guðmundur fór yfir tillögur að reglum og stigagjöf í VHF-leikum sem hugmyndin er að halda fyrstu helgina í júlí í sumar. Í umræðum komu fram ýmis sjónarmið og virtust flestir sammála því að hafa reglurnar og stigagjöfina sem einfaldasta. Sem stendur, er keppnin hugsuð sem “fully assisted” og aðeins vegalengd telur til stiga, en hafa má mest sex sambönd við hverja stöð á hverju bandi.

Seinni hluti erindisins fjallaði um bylgjuútbreiðslu og bylgjuhegðan á VHF og UHF, og um hjálparforrit til að skoða og reikna útbreiðslumyndir og radíólinka. Glærukynningu hefur verið komið fyrir á vefsíðu VHF-leikanna (http://www.ira.is/vhf-leikar/), þar sem einnig er að finna Google Earth-skrár sem sýndar voru. Glærukynninguna er einnig að finna á vefsíðu fræðslukvölda á heimasíðunni, sjá vefslóð (http://www.ira.is/itarefni/).

Í lok erindisins fóru fram fjörlegar umræður og svaraði Guðmundur greiðlega fjölmörgum fyrirspurnum. Þrátt fyrir mikið vetrarríki í höfuðborginni og erfiða færð mættu á þriðja tug félagsmanna í Skeljanesið.

Stjórn Í.R.A. þakkar Guðmundi Löve, TF3GL vel heppnað og áhugavert erindi og Jóni Svavarssyni, TF3LMN, fyrir myndatökuna.

Mynd úr sal. Frá vinstri: Ari Þ. Jóhannesson TF3ARI, Andrés Þórarinsson TF3AM, Mathías Hagvaag TF3-035 Haraldur Þórðarson TF3HP, Höskuldur Elíasson TF3RF og Óskar Sverrisson TF3DC. Fjær: M.a. Sæmundur E. Þorsteinsson TF3UA og Gísli G. Ófeigsson TF3G.

/by
,

Viðtæki fyrir 80 metra bandið eftir TF3KJ

Carl Jóhann Lilliendahl, TF3KJ, við einkabílinn á sólríkum sumardegi. Takið eftir númeraplötunni.

Samantekt TF3KJ um smíði á lágsláttarviðtæki fyrir 80 metra bandið sem vinnur á AM, CW og SSB hefur verið sett á heimasíðuna. Kalli smíðaði tækið árið 1978 með það í huga að auðvelda nýliðaleyfishöfum að koma sér upp góðu tæki til viðtöku á bandinu, en eins og höfundur segir sjálfur, er tækið mjög einfalt
í smíðum.

Allar teikningar og leiðbeiningar eru framúrskarandi vel unnar, auk þess sem hann hannaði prentrásarplötur fyrir smíðina. Þá fylgja greinargóðar upplýsingar um kassann sem hann hannaði og smíðaði sjálfur utan um viðtækið. Líkt og höfundur getur um, er viðtækið smíðað eftir upphaflegri teikningu frá Kristjáni Benediktssyni,
TF3KB.

/by
,

Morsæfing miðvikudag fellur niður

Fyrirhuguð morsæfing sem átti að vera miðvikudaginn 25. janúar fellur niður. Minnt er á æfinguna í kvöld kl. 21.00 a ca 3.540 KHz.

73
Guðmundur de TF3SG

/by
,

Stöðutaka í morsi í febrúar – skráning

Ráðgert er að bjóða upp á stöðutöku í móttöku og sendingu á morsi í febrúar. Þeir sem áhuga hafa eru beðnir að skrá þáttöku fyrir lok janúar. Undirritaður tekur á móti skráningum.

73
Guðmundur de TF3SG

/by
,

Radíófjarskiptaráðstefnan WRC-2012 er hafin

Alþjóðleg radíófjarskiptaráðstefna ITU, WRC-12 (World Radiocommunication Conference 2012) er hafin í Genf og fer hún fram dagana 23. janúar til 17. febrúar. Kristján Benediktsson, TF3KB, IARU tengiliður félagsins, gerði ráðstefnuna að umtalsefni í grein í janúarhefti CQ TF 2012. Hér á eftir er birtir hlutar úr greininni, en þar segir Kristján m.a.:

„Það er á ráðstefnum sem þessum, sem ný amatörbönd geta ORÐIÐ TIL eða HORFIÐ. Því skiptir undirbúningur radíóamatöra fyrir þessar ráðstefnur mjög miklu máli. Þó eiga radíóamatörar enga formlega aðild að ráðstefnunum. Þeir ráða ekki yfir neinum atkvæðum. Atkvæðin eru í höndum stjórnvalda í hverju landi.

Hvað radíóamatöra varðar, fer mikið af undirbúningnum í að fylgjast með öllu sem allir eru að taka afstöðu til og gera, og beita síðan áhrifum sínum radíóamatörum til góða. Fyrir ráðstefnur eins og WRC-12 fer undirbúningurinn fyrst og fremst fram innan alþjóðasamtakanna, IARU, í samvinnu við kjörna fulltrúa í stjórnum svæðissamtakanna í Svæðum 1, 2 og 3. og aðildarfélögin.

Árangurinn á undanförnum árum hefur verið ótrúlegur, hvað varðar ný tíðnisvið sem radíóamatörar hafa heimild til að nota. Þetta byggir á þrotlausri vinnu IARU manna. Aldrei má þó taka fengnar tíðnir sem gefnar, því stöðugt þarf að verja þær ásókn annarrar þjónusta, ekki síst á tímum þar sem farið er að selja tíðnir eða bjóða þær hæstbjóðanda. Ein spennandi spurning fyrir radíóamatöra nú á WRC-12 er hvort samþykkt verður aukning á tíðnisviði amatöra á 600 metra bandinu”.

Sérfræðingar Póst- og fjarskiptastofnunar sækja ráðstefnuna fyrir hönd Íslands.


Upplýsingar um ráðstefnuna má sjá á eftirfarandi vefslóð: http://www.itu.int/ITU-R/index.asp?category=conferences&rlink=wrc-12%3C=en

/by