,

Tiltekt lokið í Skeljanesi

Það tókst að ljúka stórum áfanga skömmu fyrir opnun félagsaðstöðunnar í Skeljanesi þann 20. september. Fyrr um daginn lauk vinnu við uppröðun húsgagna og tækja í fjarskiptaherbergi félagstöðvarinnar, TF3IRA, samkvæmt nýju skipulagi.

Þessi dagur, 20. september, markar á vissan hátt tímamót því þar með er lokið vinnu á vegum nýrrar stjórnar ÍRA við þrif, tiltekt, fegrun og endurskipulagningu innanhúss í Skeljanesi.

Fjarskiptaherbergi TF3IRA 20. september eftir tiltekt. Líkt og myndin ber með sér hefur orðið mikil breyting í herberginu. 

Fjarskiptaherbergið, séð í austur. Yaesu FT-1000 stöðin er nú staðsett á sér borði ásamt Ten-Tec 238 loftnetsaðlögunarrásinni.

Fjarskiptaherbergið, séð í vestur. Sigurður Óskar Óskarsson, TF2WIN er við Icom IC-7610 stöðina.

/by
,

Námskeið til amatörprófs

Í samræmi við starfsáætlun stjórnar ÍRA og að höfðu samráði við Prófnefnd og Umsjónarmann námskeiða, hefur verið ákveðið að kanna áhuga á þátttöku í námskeiði til amatörprófs.

Fyrirhugað er að námskeiðið hefjist 12. október og ljúki með prófi Póst- og fjarskiptastofnunar 15. desember. Kennt verður tvo daga í viku í húsnæði Háskólans í Reykjavík, kl. 17-22. Námskeiðið er öllum opið og ekki eru gerðar kröfur um sérstaka menntun eða undirbúning.

Áhugasamir eru beðnir um að skrá nafn sitt og tölvupóstfang á “ira hjá ira.is”. Ath. að skráningu fylgir engin skuldbinding, en veitir félaginu mikilvægar upplýsingar um fyrirhugaðan fjölda nemenda.

Fyrirspurnum má beina á sama tölvupóstfang. Námskeiðsgjald verður 19 þúsund krónur fyrir félagsmenn, en 29 þúsund krónur fyrir aðra. Inni í þessu verði eru öll námsgögn.

Skráning er opin til 25. september n.k. Félagið setur þann fyrirvara um námskeiðshald, að lágmarksþátttaka fáist.

Háskólinn í Reykjavík er staðsettur við Menntaveg í Öskjuhlíðinni skammt frá Reykjavíkurflugvelli.

 

/by
,

CQ TF – NÝTT TÖLUBLAÐ Í SJÓNMÁLI

Sigurbjörn Þór Bjarnason, TF3SB, ritstjóri CQ TF.

Ágætu félagsmenn!

3. tbl. CQ TF 2018 er framundan.

Félagsmenn eru hvattir til að leggja til efni, annaðhvort með því að skrifa sjálfir, eða senda ritstjóra línu og fá aðstoð.

Skilafrestur efnis er til 22. september n.k.  Netfang: tf3sb@ox.is

CQ TF kemur síðan út sunnudaginn 7. október á stafrænu formi á heimasíðu félagsins.

73 de TF3SB.

/by
,

TM64YL var með 5.000 QSO

TM64YL var kallmerki YL DX-leiðangurs sem var QRV frá eyjunni Noirmoutier í Frakklandi 25.-31. ágúst s.l.

Þær Anna Henriksdóttir, TF3VB og Vala Dröfn Hauksdóttir, TF3VD voru hluti af 14 kvenna hópi frá Frakklandi, Þýskalandi, Sviss og Íslandi sem virkjuðu IOTA EU-064 að þessu sinni.

Þrátt fyrir óhagstæð skilyrði framan af, hafði hópurinn 5000 QSO.

QSL er í boði gegnum OQRS á Clublog, vefslóð: https://clublog.org/logsearch/TM64YL
Í bígerð er að setja samböndin fljótlega inn á LoTW. Þá má senda kort beint á Christine Carreau, F4GDI, 13 Chemin aux Boeufs, F72230, Guecelard, France.

Félagsstöðin okkar, TF3IRA, hafði samband við leiðangurinn. Það var Óskar, TF3DC, sem talaði við þær á morsi.

Hamingjuóskir til Önnu og Völu Drafnar með vel heppnaða ferð.

YL hópurinn sem starfrækti TM64YL frá Noirmoutier í Frakklandi dagana 25.-31. ágúst 2018. Ljósmynd: QRZ.COM

/by
,

MÆLINGAVERKEFNI Á LAUGARDEGI

Laugardagsopnum var í Skeljanesi 1. september. Ari Þórólfur Jóhannesson, TF1A, mætti á staðinn með sérhæfð mælitæki og búnað.

Að þessu sinni voru skoðaðar 19 VHF og/eða VHF/UHF handstöðvar og 2 VHF bílstöðvar. Áhersla var lögð á sendigæði, þ.m.t. yfirsveiflur. Jón G. Guðmundsson, TF3LM, aðstoðaði Ara með skráningu upplýsinga. Gerð verður grein fyrir mælingum í 3. tbl. CQ TF sem kemur út þann 7. október n.k.

Mæting var góð, alls 20 manns. Á milli mælinga var í boði Gevalia kaffi og vínarbrauðslengjur frá Bakarameistaranum, auk Baklava hunangshnetukonfekts. Bestu þakkir til Ara, TF1A, fyrir áhugaverðan laugardag í félagsaðstöðunni.

Mæliaðstaðan gerð klár. Frá vinstri: Óskar Sverrisson TF3DC, Ari Þórólfur Jóhannesson TF1A og Jón G. Guðmundsson TF3LM.

Hver segir að mælingar séu ekki skemmtilegt verkefni? Frá vinstri: Arnþór Wilhelm Sigurðsson TF8AWS, Ari Þórólfur Jóhannesson TF1A, Elín Sigurðardóttir TF2EQ, Jón Björnsson TF3PW og Þórður Adolfsson TF3DT og Jón G. Guðmundsson TF3LM (snúa baki í myndavélina).

Skeggrætt um mælingarnar. Frá vinstri: Jón Björnsson TF3PW, Ari Þórólfur Jóhannesson TF1A, Jón G. Guðmundsson TF3LM, Heimir Konráðsson TF1EIN, Arnór Wilhelm Sigurðsson TF3AWS, Mathías Hagvaag TF3MH og Einar Þór Ívarsson TF3PON. Ljósmyndir: Jónas Bjarnason TF3JB.

/by
,

GÓÐIR GESTIR Í SKELJANESI

Sven-Torstein Gigler, DL1MHJ og XYL Doris, DH4GIG, komu í heimsókn í félagsaðstöðuna í Skeljanesi 30. ágúst. Hjónin eru „OM-YL team“ frá München í Þýskalandi.

Torstein er áhugamaður um þátttöku í alþjóðlegum keppnum frá eigin stöð, en hefur einnig tekið þátt í keppnum m.a. frá DK65DARC / DL65DARC og DKØMN, klúbbstöð radíóamatöra í „Ortsverband München-Nord C12.“ Hann segist eiga sambönd við a.m.k. 20 TF stöðvar í dagbókinni.

Hjónin eru mikið áhugafólk um Ísland og segja að náttúrufegurðin hér sé einstök og eru þegar farin að skipuleggja næstu ferð.

Í fjarskiptaherbergi TF3IRA. Sigurður Óskar TF2WIN, Óskar TF3DC, Þórður TF3DT (við stöðina) og Sven-Torsten DL1MHJ.

Skeggrætt m.a. um alþjóðlegar keppnir. Sven-Torsten DL1MHJ, Þórður TF3DT (við stöðina), Doris DH4GIG og Óskar TF3DC. Ljósmyndir: TF3JB.

/by
,

LAUGARDAGUR 1. SEPTEMBER Í SKELJANESI

Opið verður í Skeljanesi laugardaginn 1. september frá kl. 13:30. TF1A mætir á staðinn með mælitækin.

Ari ætlar að þessu sinni að skoða sendigæði VHF/UHF handstöðva og gera „grófa“ tegundarprófun. Stenst stöðin CE kröfur?

Menn eru velkomnir með VHF/UHF handstöðvar og fá fullvissu um gæðin. Bent er á að hafa þær fullhlaðnar og taka með SMA-tengi.

Lavazza kaffi og meðlæti frá Björnsbakaríi verður í boði á milli mælinga.

P.s. Menn eru líka velkomnir til að koma og fylgjast með.

Jón G. Guðmundsson TF3LM, Ólafur Örn Sigurðsson TF1OL og Ari Þórólfur Jóhannesson TF1A. Myndin var tekin á mælingalaugardegi þann 30. júní s.l. Ljósmynd: TF3JB.

/by
,

UPPFÆRSLU LOKIÐ HJÁ KORTASTOFU ÍRA

Mathías Hagvaag, TF3MH, QSL stjóri ÍRA, lauk við uppfærslu á merkingum QSL kassa kortastofunnar sunnudaginn 26. ágúst. Hann lét þess getið, að eftir að tiltekt lauk á efri hæðinni fyrr í mánuðinum, hafi hann ekki getað láti sitt eftir liggja og drifið í að uppfæra merkingarnar.

Alls eiga 107 kallmerki/hlustmerki nú merkt hólf hjá kortastofunni. Mathías sagðist vilja geta þess að kallmerki fái sérmerkt hólf um leið og kort byrja að berast. Pósthólf ÍRA væri tæmt vikulega (á miðvikudögum) og eru sendingar flokkaðar strax sama dag.

Félagsmenn geti því gengið að því sem vísu að þegar þeir koma í félagsaðstöðuna á fimmtudagskvöldi, að hafi borist kortasending daginn áður, þá bíði þeirra ný kort á staðnum.

Aðspurður, sagðist Mathías vera mjög ánægður með viðbrögð félagsmanna við grein hans í 2. tbl. CQ TF 2018, sem fjallaði almennt um QSL Bureau og kortastofu ÍRA og þá þjónustu þar er í boði til félagsmanna.
Mathías Hagvaag, TF3MH, QSL stjóri kortastofu ÍRA. Myndin var tekin í Skeljanesi sunnudaginn 26. ágúst þegar vinnu við uppfærslu merkinga var lokið. Ljósmynd: TF3JB.

/by
,

5 metra og 8 metra böndin á Írlandi

Írskir radíóamatörar hafa fengið tíðnisviðin 30-49 MHz (8 metra) og 54-69.9 MHz (5 metra) til afnota. Heimildin miðast við 50W og er á víkjandi grundvelli. Engar skorður eru settar við tegund útgeislunar.

Landsfélag radíóamatöra á Írlandi, IRTS, hefur sett upp sérstakt bandplan fyrir þessi nýju bönd.

Stjórn ÍRA ræddi þróun tíðnimála hér á landi og á Írlandi á fundi sínum þann 8. ágúst og var m.a. samþykkt að fylgjast náið með þróun mála hjá Írunum.

Sjá nánar upplýsingar um nýju böndin í IARU Region 1 VHF-UHF-µW Newsletter; 16. júlí 2018. Vefslóð:

https://www.iaru-r1.org/images/VHF/newsletters/Newsletter_78.pdf

/by
,

Vita- og vitaskipahelgin 2018

Alþjóðlega vita- og vitaskipahelgin verður haldin 18.-19. ágúst. Hún er tveggja sólarhringa viðburður og er haldin á vegum Ayr Amateur Radio Group í Skotlandi. Miðað er við að flestir sem ætla að verða QRV frá (eða í nálægð við) vita, hafi komið sér fyrir upp úr hádegi á laugardag.

ÍRA stendur ekki fyrir þátttöku í Vitahelginni en hefur stutt við félagsmenn sem vilja starfrækja stöð frá tilteknum vita. Sjá nánari upplýsingar um Vitahelgina í 2. tbl. CQ TF 2018, bls. 45.


Knarrarósviti austan við Stokkseyri. Hópur leyfishafa mun starfrækja stöð þaðan helgina 18.-19. ágúst.

/by