,

VHF/UHF LEIKARNIR 2022

Sælir kæru félagar!

VHF/UHF leikjahelgin er að renna upp 1.-3. júlí n.k.

Þetta verður hrikalega gaman. Allir upp með græjurnar, upp á heiðar, fjöll og út í eyjar. Eða bara láta fara vel um sig heima í sjakknum. Frábært tækifæri til að prófa nýja dótið – eða gamla dótið. Það besta er, það þarf ekki að vera með rándýrar græjur. Einföld handstöð frá Kína er allt sem þarf. Oft koma bestu sögurnar af afrekum með litlum búnaði. Upptekin(n)? Öll þátttaka bætir leikinn og stök QSO eru betri en engin!

Gerum þetta með stæl, sýnum á Facebook hvað við erum virkir amatörar. Allir grobbpóstar úr leiknum kærkomnir. Viðurkenningar fyrir skemmtilegustu myndirnar/færslurnar.

Eins og venjulega verður “on-line” leikjavefur þar sem þátttakendur skrá sig til leiks. Hægt verður að skrá sig inn í leikinn allan tímann þangað til leikurinn endar. Slóð á leikjavefinn: http://leikar.ira.is/2022

Endilega skráið ykkur til leiks og fiktið og finnið villur fyrir mig 😊 Þar er einnig að finna nánari leiðbeiningar. Blásið verður til leiks kl. 18 föstudaginn 1. júlí og leikurinn stendur til kl. 18 sunnudaginn 3. júlí.

73 de TF8KY.

Myndin er frá VHF/UHF leikunum í fyrra (2021) þegar Magnús Ragnarsson TF1MT var staddur á fjallinu Þríhyrningi í 678 metra hæð yfir sjávarmáli með Yaesu VX-8R 5W handstöð í QSO‘i við TF2MSN á Akranesi. Loftnetið er 4 staka Yagi handloftnet frá Arrow Antennas fyrir VHF/UHF böndin. Ljósmynd: TF1MT.
/by
,

ENDURNÝJUN 50 MHZ HEIMILDAR

Bent er á að mikilvægt er að leyfishafar sem hafa áhuga á að stunda fjarskipti á auknu afli á 50 MHz tíðnisviðinu (6 metrum) í sumar, sendi beiðni þess efnis til Fjarskiptastofu áður en sendingar eru hafnar. Hafi verið fengin heimild í fyrra (2021) gildir hún ekki í ár.

Leyfishafar þurfa að sækja sérstaklega um heimild hjá FST á sama hátt og verið hefur t.d. um 70 MHz tíðnisviðið. Póstfang: hrh(hjá)fjarskiptastofa.is  Tilgreina skal að sótt sé um aukið afl á 50 MHz.

Forsenda þessa er, að ÍRA barst jákvætt svar frá Fjarskiptastofu 13. maí s.l. við ósk félagsins um endurnýjun aukinna heimilda á 6 metra bandi og veitir stofnunin íslenskum leyfishöfum auknar aflheimildir í 50-50,5 MHz tíðnisviðinu frá og með 1. júní 2022. Gildistími er 4 mánuðir eða til 31. september. G-leyfishafar fá heimild til að nota allt að 1kW og N-leyfishafar allt að 100W.

Afar ánægjulegt er, að gildistími heimildarinnar er lengri í ár heldur en í fyrra, eða út septembermánuð. Sjá nánar innsetningu á heimasíðu ÍRA og FB síður 13. maí s.l.

Stjórn ÍRA.

Mynd úr fjarskiptaherbergi TF3IRA í félagsaðstöðunni í Skeljanesi. Ljósmynd: TF3JB.
/by
,

GLEÐILEGAN ÞJÓÐHÁTÍÐARDAG

Íslenski þjóðhátíðardagurinn er haldinn hátíðlegur 17. júní ár hvert.

17. júní var fæðingardagur Jóns Sigurðssonar, sem var helsti leiðtogi Íslendinga í sjálfstæðisbaráttunni á 19. öld.

Til þess að minnast hans var fæðingardagurinn valinn sem þjóðhátíðardagur Íslendinga þegar lýðveldið Ísland var stofnað þann 17. júní árið 1944.

Hátíðarkveðjur til félagsmanna og fjölskyldna þeirra á þjóðhátíðardaginn 2022.

Stjórn ÍRA.

/by
,

FRÁ OPNUN Í SKELJANESI 16. JÚNÍ

Opið hús var í félagsaðstöðu ÍRA í Skeljanesi fimmtudaginn 16. júní.

Skemmtilegt kvöld og góðar umræður á báðum hæðum. Sérstakur gestur okkar var Alex, UT4EK frá Úkraínu. Hann flutti til landsins í síðasta mánuði og á von á að dvelja hér á landi í allt að eitt ár. Hann er DX-maður og áhugasamur um keppnir og er m.a. félagi í Ukrainian Contest Club (UCC). Alex var mjög hrifinn af aðstöðu félagsins í Skeljanesi og sagðist vera ánægður með að hitta svo marga íslenskra leyfishafa.

Mikið var rætt um skilyrðin, bæði á HF og á 4 og 6 metrum. Menn voru einnig áhugasamir um VHF/UHF leikana sem fara fram helgina 1.-3. júlí n.k.  Þá var rætt um Ham Radio sýninguna í Friedrichshafen sem nálgast, en hún verður haldin 24.-26. júní. Benedikt Sveinsson, TF3T færði okkur tvö Kathrein VHF húsloftnet sem stoppuðu stutt við.

Vel heppnað fimmtudagskvöld í sumarveðri í vesturbænum í Reykjavík. Alls 26 félagar og 4 gestir í húsi.

Stjórn ÍRA.

Óskar Sverrisson TF3DC og Björgvin Víglundsson TF3BOI í fjarskiptaherbergi TF3IRA.
Benedikt Sveinsson TF3T og Alex Senchurov UT4EK.
Sigurbjörn Þór Bjarnason TF3SB og Bernhard M. Svavarsson TF3BS.
Kristján Benediktsson TF3KB, Yngvi Harðarson TF3Y, Benedikt Guðnason TF3TNT og Guðjón Egilsson TF3WO. Ljósmyndir: TF3JB.
/by
,

5BWAZ VIÐURKENNINGARSKJAL Í HÚSI

Jónas Bjarnson, TF3JB hefur fengið í hendur 5 banda Worked All Zones (5BWAZ) viðurkenningarskjal frá CQ tímaritinu. Töluverður dráttur varð á afgreiðslu skjalsins, en hann hafði sent inn umsókn í lok árs 2020 þegar hann náði tilskildum lágmarksfjölda staðfestra svæða (e. zones), eða alls 150.

Til að geta sótt um 5BWAZ þurfa menn að hafa áður sótt um og fengið, a.m.k. eitt WAZ viðurkenningarskjal. 5BWAZ viðurkenningin þykir með þeim erfiðari sem radíóamatörar geta unnið að.

Miðað við 1. júní 2022 eru eftirfarandi TF leyfishafar handhafar 5BWAZ:

Þorvaldur Stefánsson, TF4M (skjal nr. 1718; 188 svæði).
Óskar Sverrisson, TF3DC (skjal nr. 1964; 165 svæði).
Brynjólfur Jónsson, TF5B (skjal nr. 2053; 160 svæði).
Jónas Bjarnason, TF3JB (skjal nr. 2257; 154 svæði).

Hamingjuóskir til TF3JB.

Stjórn ÍRA.

–

Til fróðleiks: Vefslóð á glærur frá erindi um viðurkenningar radíóamatöra sem flutt var í Skeljanesi 17.11.2019.

https://drive.google.com/file/d/1xVpo8UxpBLv3_29oyLQ48Z6ePAKmuOO1/view

/by
,

ALL ASIAN CW DX KEPPNIN 2021

63. All Asian DX keppnin – morshluti, verður haldinn helgina 18.-19. júní.

Keppnin fer fram á 160, 80, 40, 20, 15 og 10 metrum. Skilaboð í keppninni eru RST+aldur. Ef þátttakandi er t.d. 25 ára eru skilaboðin: 59925 o.s.frv.

Flestir QSO punktar eru fyrir sambönd á lægri böndum en margfaldarar ráðast af fjölda stöðva sem haft er sambönd við á meginlandi Asíu (alls 44 einingar; sami listi er notaður til viðmiðunar og er í CQ WPX keppnum).

Sjá keppnisreglur á þessari vefslóð:

https://www.jarl.org/English/4_Library/A-4-3_Contests/2022AA_rule.htm

JARL, landsfélag radíóamatöra í Japan stendur fyrir keppninni.

Með ósk um gott gengi!

Stjórn ÍRA.

–

Sýnishornið af viðurkenningu í keppninni er fengið að láni frá PD1DX.

/by
,

OPIÐ HÚS Í SKELJANESI 16. JÚNÍ

Opið verður í félagsaðstöðu ÍRA í Skeljanesi fimmtudaginn 16. júní kl. 20-22. Félagsmenn og gestir eru velkomnir. Fundarsalur, fjarskiptaherbergi og QSL stofa á 2. hæð verða opin.

Nýjustu tímaritin fyrir radíóamatöra liggja frammi. Mathías Hagvaag, QSL stjóri kortastofunnar verður búinn að fara í pósthólfið og flokka kortasendingar. Kaffiveitingar.

Verið velkomin í Skeljanes!

Stjórn ÍRA.

Félagsaðstaða Íslenskra radíóamatöra er í þessu húsi í Skeljanesi. Ljósmynd: TF3JB.
/by
,

EFNI Í CQ TF

Skilafrestur á efni í nýja blaðið er til mánudagsins 20. júní.

Allt efni um áhugamálið er vel þegið – frásagnir, ljósmyndir, eða jafnvel aðeins punktar og ábendingar um efni sem vinna má úr.

Netfang ritstjóra: tf3sb@ox.is

73 – Sigurbjörn Þór Bjarnason, TF3SB,
ritstjóri CQ TF.

CQ TF er ávallt vinsælt umræðuefni. Frá vinstri: Vilhjálmur Í. Sigurjónsson TF3VS, Sigurbjörn Þór Bjarnason TF3SB, Kjartan H. Bjarnason TF3BJ og Sæmundur E. Þorsteinsson TF3UA. Ljósmynd: TF3JB.
/by
,

FRÉTTIR AF VIÐTÆKJUM YFIR NETIÐ

KiwiSDR viðtækin yfir netið á Bjargtöngum, Galtastöðum og Raufarhöfn eru í góðu lagi. En Airspy R2 SDR viðtækið Perlunni er úti. Unnið er að viðgerð.

Unnið var að uppsetningu KiwiSDR viðtækis til prufu í fjarskiptaherbergi ÍRA í vikunni, sbr. ljósmyndir. Þess er að vænta að það verði QRV á næstunni.

Bjargtangar. KiwiSDR (10 Khz – 30 MHz): http://bjarg.utvarp.com
Galtastaðir í Flóa. KiwiSDR (10 kHz – 30 MHz): http://floi.utvarp.com/
Perlan.  Airspy R2 SDR (24 MHz til 1800 MHz). http://perlan.utvarp.com
Raufarhöfn. KiwiSDR (10 kHz – 30 MHz):  http://raufarhofn.utvarp.com

Stjórn ÍRA.

Georg Kulp TF3GZ og Ari Þórólfur Jóhannesson TF1A í fjarskiptaherbergi ÍRA. KiwiSDR viðtækið er í litla járnlitaða kassanum á borðinu með VHF/UHF stöðvunum.
Ari Þórólfur Jóhannesson TF1A sækir hugbúnað fyrir KiwiSDR viðtækið á netinu. Ljósmyndir: TF3JB.
/by
,

MÁLAÐ YFIR VEGGJAKR0T

Drifið var í að mála langa bárujárnsvegginn við húsið í Skeljanesi fimmtudaginn 9. júní. „Þetta er svipað og í fyrra“ sagði Baldvin Þórarinsson, TF3-Ø33 sem hefur fylgst með umhverfinu hjá okkur og séð um að mála yfir ósómann.

Baldi átti ekki heimangengt í dag, en var með í ráðum þegar TF1JI og TF3JB mættu á staðinn eftir hádegið og unnu gott verk, samanber meðfylgjandi ljósmyndir.

Stjórn ÍRA.

Skeljanesi 9.6. Bárujárnsveggurinn áður en hafist var handa við yfirmálun.
Skeljanesi 9.6. Verkefninu lokið. Mun snyrtilegra að líta yfir vegginn. Ljósmyndir: TF3JB.
/by