Almennt

Góð mæting var í Skeljanes fimmtudagskvöldið 9. júlí.

Hrafnkell Sigurðsson, TF8KY, umsjónarmaður VHF/UHF leikana leiddi umræður. Helsta breytingin í ár er að nú hefjast leikarnir fyrr og enda fyrr, þ.e. á föstudag 10. júlí kl. 18:00 og lýkur á sunnudag 12. júlí kl. 18:00.

Keli fór vel yfir reglurnar og kynnti leikjavefinn sem er kominn á netið og í raun er ekkert því til fyrirstöðu að menn skrái sig strax.

Allar upplýsingar um VHF/UHF leikana 2020 eru á vefslóðinni: http://leikar.ira.is/2020

Umræður stóðu fram yfir kl. 22:30 á báðum hæðum þetta ágæta sumarkvöld í Skeljanesi. Alls mættu 24 félagar á staðinn.

Orðsending frá Hrafnkeli Sigurðssyni, TF8KY, umsjónarmanni VHF/UHF leikanna:

Sælir kæru félagar!

VHF/UHF leikjahelgin er að renna upp. Þetta verður hrikalega gaman. Allir upp með græjurnar, upp á heiðar, fjöll og út í eyjar. Eða bara láta fara vel um sig heima í „sjakknum“. Frábært tækifæri til að prófa nýja dótið, eða gamla dótið. Það besta er, það þarf ekki að vera með rándýrar græjur. Einföld handstöð frá Kína er allt sem þarf. Oft koma bestu sögurnar frá afrekum með litlum búnaði.

Upptekin(n)?  Öll þátttaka bætir leikinn, stök QSO eru betri en engin QSO. Gerum þetta með stæl, sýnum einnig á Facebook að við erum virkir amatörar. Allir grobbpóstar úr leiknum kærkomnir. Viðurkenningar verða einnig veittar fyrir bestan árangur og fyrir skemmtilegustu myndirnar/færslurnar.

Eins og venjulega verður “online” leikjavefur þar sem þátttakendur skrá sig til leiks. Hægt verður að skrá sig inn í leikinn allan tímann þangað til leikurinn endar. Slóð á leikjavefinn auglýst síðar. Þar verður einnig að finna nánari leiðbeiningar.

ATH ATH ATH! Breyttur tími. Blásið verður til leiks kl. 18 föstudaginn 10. júlí og leikurinn stendur til kl. 18 sunnudaginn 12. júlí.

Verð í félagsaðstöðunni í Skeljanesi á fimmtudag 9. júlí kl. 20:00; svara spurningum og sýni leikjavefinn.

73 de Keli, TF8KY.

Sigurður R. Jakobsson, TF3CW, virkjaði Miðfell við Flúðir í Hrunamannahreppi (SOTA TF/SL215) 3. júlí s.l. Tindurinn er í 251 metra hæð yfir sjávarmáli í reit HP94uc. Þau Björg Óskarsdóttir (XYL) gengu á fjallið og voru mjög ánægð með ferðina, en þegar upp var komið var lengst af logn með sól á köflum.

Þetta var fyrsta SOTA ferð Sigga og jafnframt í fyrsta skipti sem þessi tindur er virkjaður. Hann hafði 10 QSO á morsi, vítt og breitt um Evrópu, allt niður til Ísrael. Hann notar þriggja banda Mountain Topper MTR-3B stöð frá LNR Precesion fyrir 40/30/20m böndin. Sendiafl er mest 5W. Loftnet var svokallað „V-á hvolfi“ sem var haldið uppi með 6m hárri glertrefjastöng.

SOTA (Summits On The Air) verkefnið var stofnað 2002. Málið snýst um að fara á fjöll með fjarskiptatæki og búnað og hafa sambönd við aðra leyfishafa á amatörböndunum. Fjallatindar eru skilgreindir sérstaklega í hverju landi og hérlendis eru þeir alls 910.

TF3DX varð fyrstur til að „virkja“ fjallatind samkvæmt verkefninu, þann 1. september 2016 þegar Ísland gerist aðili. Þeir TF3EO, TF3EK og TF5PX settu kerfið upp hér á landi.

Baldvin Þórarinsson, TF3-Ø33, mætti í Skeljanes eftir hádegi sunnudaginn 28. júní. Á dagskrá var að hreinsa til og gera snyrtilegt við húsið og innganginn. Verkið gekk hratt og vel fyrir sig svo nú er orðið boðlegt fyrir félagsmenn og gesti að mæta á staðinn. Leigumarkaður BYKO í Breidd sá okkur fyrir Honda sláttuorfi með öflugum bensínmótor (eins og í fyrra), en Baldvin kom færandi hendi með stunguskóflu og önnur garðáhöld heiman að frá sér.

En þar var ekki látið við sitja, því eins og fram kom í 4. tbl. CQ TF 2019, þegar Baldvin snyrti síðast til fyrir utan Skeljanes, var haft eftir honum að: „…hann hafi verið nokkuð ánægður [með unnið verk þá] en benti á að næst mætti huga að því að mála, a.m.k. trévegginn þar sem TF3IRA skiltið er fest“. Og í framhaldi af garðvinnunni, tók Baldvin sér málningarpensil og rúllu í hönd og málaði í snatri tvær umferðir á trévegginn og í kring. Veggurinn, sem síðast var málaður 7. apríl 2018 lítur nú út sem nýr. Bestu þakkir til Baldvins fyrir gott framtak vel unnin verk!

Í dag, 27. júní, bættist við innanlandsviðtæki til hlustunar yfir netið af KiwiSDR gerð, sömu tegundar og þau tvö sem eru fyrir. Nýja viðtækið er staðsett í Bláfjöllum í 690 metra hæð. Það hefur fyrst um sinn til afnota, láréttan tvípól fyrir 80 og 40 metrana.

KiwiSDR viðtækin vinna frá 10 kHz upp í 30 MHz. Hægt er að hlusta á AM, FM, SSB og CW sendingar og má velja bandbreidd sem hentar hverri mótun. Allt að átta notendur geta verið skráðir inn á viðtækið samtímis. Ari Þórólfur Jóhannesson TF1A stóð að uppsetningu tækisins í dag, en það er í eigu Georgs Kulp, TF3GZ. Vefslóðin er: http://blafjoll.utvarp.com

Hin tvö viðtækin sem eru virk í dag, eru staðsett á Bjargtöngum í Vesturbyggð, vestasta tanga Íslands og ysta oddi Látrabjargs og á Raufarhöfn. Vefslóðir:

Bjargtangar: http://bjarg.utvarp.com
Raufarhöfn: http://raufarhofn.utvarp.com

Stjórn ÍRA þakkar þeim Ara og Georg fyrir verðmætt framlag. Hér um að ræða mikilvæga viðbót fyrir radíóamatöra sem gera tilraunir í þessum tíðnisviðum, auk hlustara og allra sem hafa áhuga á útbreiðslu radíóbylgna.