Almennt

Félagsaðstaða ÍRA í Skeljanesi opnar á ný fimmtudaginn 17. september.

Eftir lokun í réttar sex vikur, frá 6. ágúst til 10. september vegna COVID-19 faraldursins, er stjórn ÍRA ánægja að tilkynna, að félagsaðstaðan verður opnuð á ný fimmtudaginn 17. september n.k.

Ákvörðunin um opnun félagsaðstöðunnar var samþykkt á stjórnarfundi í félaginu þann 8. september s.l., og byggir á reglugerð heilbrigðisráðherra dags. 3. þ.m., þar sem fjöldatakmörkun er rýmkuð og almenn nálægðartakmörkun miðast við að hægt sé að tryggja a.m.k. 1 metra á milli einstaklinga. Ákvæði eru ennfremur um að nota skuli andlitsgrímu þar sem þeirri fjarlægð á milli einstaklinga verður ekki við komið.

Stjórn ÍRA þakkar félagsmönnum stuðning á þessum tíma faraldurs – sem vonandi er brátt að baki. Áfram gilda þau tilmæli, að félagar sem hafa hug á að mæta í Skeljanes á fimmtudagskvöldum, fresti því ef þeir kenna lasleika af einhverju tagi, af virðingu við aðra. Handspritt (70%) og andlitsgrímur af viðurkenndri tegund eru á staðnum.

Velkomin í Skeljanes!

Stjórn ÍRA.

Næsta tölublað CQ TF, 4. hefti þessa árs, kemur út sunnudaginn 27. september n.k.

Í nýja blaðinu verður m.a. umfjöllun um úrslit VHF/UHF leikana og TF útileikana í sumar, grein um „Útgáfusögu ÍRA 1946-2020“, grein og KiwiSDR viðtækin hér á landi (sem tengjast má um netið), grein um prófun á VHF loftnetum, grein um ALC stillingar og margt fleira.

Í vinnsluferlinu eru ávallt teknar frá blaðsíður fyrir óinnkomið efni. Frestur er til 15. september n.k. Netfang: tf3sb@ox.is

73,

TF3SB, ritstjóri CQ TF

Nú styttist í septemberhefti CQ TF, 4. tbl. 2020, sem kemur út sunnudaginn 27. september n.k.

Allt efni um áhugamálið er vel þegið í blaðið, t.d. frásagnir af athyglisverðum samböndum í loftinu og skilyrðunum, minniháttar teikningar og tækjabreytingar, jafnvel stuttar gamansögur svo ekki sé minnst á kveðskap – frásagnir, ljósmyndir, eða jafnvel aðeins punkta og ábendingar um efni sem vinna má úr. Allt þetta og meira til væri kærkomið.

Skilafrestur efnis er til 15. september n.k. Netfang ritstjóra: tf3sb@ox.is

73,

TF3SB, ritstjóri CQ TF

.

.

1. Alþjóðlega vita- og vitaskipahelgin er nú um helgina, 22.-23. ágúst. Tveir íslenskir vitar höfðu verið skráðir, en Svanur Hjálmarsson, TF3AB segir, að hópurinn hafi ákveðið að fella niður áður auglýsta þátttöku frá Knarrarósvita vegna Covid-19. Einn viti verður því starfræktur frá TF um helgina, Selvogsviti, sem Ólafur Örn Ólafsson, TF1OL virkjar.

2. Gjöf frá Raunvísindastofnun. Félaginu bárust í dag, 20. ágúst, eftirfarandi tæki frá stofnuninni:

General Electric Delco MD-129A/GR; mótari og aflgjafi.
Stewart-Warner T-282D/GR; 100W sendir.
Hewlett-Packard; Model 6068 VHF Signal generator (10-420 MHz).

TF3JB og TF3GS tóku á móti tækjunum fyrir hönd félagsins. Bestu þakkir til Raunvísindastofnunar.

3. Endurvarpamál. Áhugi er fyrir að setja upp á ný VHF endurvarpa á Garðskaga. VHF hópurinn vinnur í málinu og er Motorola endurvarpi fyrir hendi. Endurvarpinn TF8RPH (Garri) var QRV frá Garðskaga í 4 mánuði árið 2012 og hafði góða útbreiðslu.
3.a Morsauðkennið á endurvarpatíðninni 145.650 MHz, sem hefur verið bilað um tveggja mánaða skeið, verður lagfært á næstunni.

4. KiwiSDR viðtækið í Bláfjöllum sem tekið var í notkun 27. júní s.l., er bilað. Ari Þórólfur Jóhannesson, TF1A sagðist hafa reynt að endurræsa tækið (og uppfæra) sem ekki hafi gengið. Þeir Georg Kulp, TF3GZ, ætla að gera ferð á fjallið fljótlega. Vefslóðin er: http://blafjoll.utvarp.com

Selvogsviti er staðsettur þar sem rauði depillinn er á kortinu til vinstri.

Stjórn ÍRA ákvað í morgun, 17. ágúst, að félagsaðstaðan í Skeljanesi verði lokuð áfram, a.m.k. næstu tvo fimmtudaga, 20. og 27. ágúst. Engin starfsemi verður í húsnæðinu á okkar vegum á þessum tíma, þar til annað verður ákveðið.

Ástæðan er auglýsing heilbrigðisráðherra um takmörkun á samkomum vegna farsóttar, sem tók gildi 14. ágúst og gildir til 27. ágúst, en fjöldatakmörkun er óbreytt frá fyrri ákvörðun sem og almenn nálægðartakmörkun um að tryggja skuli að hægt sé að hafa a.m.k. 2 metra á milli einstaklinga.

Meginvandinn er að tryggja áskilda 2 metra fjarlægð milli einstaklinga, sem ekki er gerlegt í Skeljanesi. Ef allt fer vel á besta veg verður auglýst opnun á ný 3. september n.k.

Það er von okkar að þessari ákvörðun fylgi ríkur skilningur.

Stjórn ÍRA.

Alþjóðasamtök landsfélaga radíóamatöra, IARU, hafa skipað sérhæfðan vinnuhóp til endurskoðunar á tíðniplönum á HF böndunum með sérstöku tilliti til fjarskipta á stafrænum tegundum útgeislunar.

Verkefnið er að endurskoða staðsetningu fjarskipta fyrir stafrænar tegundir útgeislunar, með það í huga að auka tíðnisviðið. Ástæðan er, mikil aukning í fjarskiptum þar sem notaðir eru t.d. FT4 og FT8 samskiptahættir sem eru samskiptareglur undir MFSK mótun. Þátttakendur í þessu starfi eru sérfræðingar í tíðninefndum frá öllum IARU Svæðum I, II og III.

Tíðniplön/tíðniskipan eru einskonar „umferðarreglur“ radíóamatöra á böndunum, sem við setjum okkur sjálfir innan ríkjandi tíðniheimilda stjórnvalda.

Starfið hófst í byrjun þessa mánaðar (ágúst) og hafa þegar verið haldnir góðir fundir, m.a. með Joseph H. Taylor, K1JT sem fer fyrir WSJT hópnum sem þróaði FT8 og FT4 samskiptahættina. Fleiri fundir eru framundan en þess er vænst að tillögur hópsins liggi fyrir í vetrarbyrjun.

Stjórn ÍRA fagnar frumkvæði IARU í málinu.