Námskeiðið „Fyrstu skrefin, farið í loftið með leiðbeinanda“ verður endurtekið í Skeljanesi 7. og 14. nóvember n.k. Ath. að nú er það haldið á fimmtudegi kl. 17-19, bæði kvöldin.

Námskeiðið er hugsað til að aðstoða menn við að byrja í loftinu, hvort heldur þeir eru með nýtt eða nýlegt leyfisbréf eða eldri leyfishafar. Hugmyndin er að skapa andrúmsloft sem er afslappað þar sem menn geta spurt spurninga og prófað sig áfram með reyndum leiðbeinanda til að öðlast öryggi í að fara í loftið. Farið verður í loftið á CW, SSB, RTTY eða FT8, allt eftir óskum þátttakenda.

Í boði er að menn taki með sér eigin búnað og fái kennslu á hann. Fimmtudaginn viku síðar (14. nóvember) verður framhald þar sem nemendur ráða ferðinni og spyrja spurninga eftir að hafa prófað sig áfram í millitíðinni.

Ath. að fjöldi er takmarkaður og námskeiðið er frítt. Áhugasamir beðnir um að skrá sig sem fyrst hjá leiðbeinanda, Óskari Sverrissyni, TF3DC, í síma 862-3151.

Námskeiðið er að þessu sinni haldið í fjórða skipti og eru menn hvattir til að nýta sér þetta vinsæla námskeið. Myndin hér að ofan var tekin á fyrsta námskeiðinu sem haldið var 17. nóvember 2018. Eins og sjá má, var mikið fjör. Frá vinstri: Wilhelm Sigurðsson TF3AWS, Óskar Sverrisson TF3DC, Mathías Hagvaag TF3MH og Þorvaldur Bjarnason TF3TB. Ljósmynd: Jónas Bjarnason TF3JB.

Opið hús verður í félagsaðstöðu ÍRA í Skeljanesi, fimmtudaginn 31. október.

Nýjustu tímaritin, góður félagsskapur, kaffi og meðlæti.

Ný sending af QSL kortum er komin í hús.

Stjórn ÍRA.

Úr félagsstarfinu. Frá vinstri: Kristján Benediktsson TF3KB, Yngvi Harðarson TF3Y, Guðmundur Ingi Hjálmtýsson TF3IG, Ársæll Óskarsson TF3AO, Vilhjálmur Í. Sigurjónsson TF3VS, Mathías Hagvaag TF3MH, Ólafur Örn Ólafsson TF1OL, Reynir Björnsson TF3JL og Jón Björnsson TF3PW. Myndin var tekin á Arduino grunnnámskeiði 6. apríl 2019. Ljósmynd: TF3JB.

Svokallaður „opinn laugardagur“ var endurtekinn í dag, 26. október. Ari Þórólfur Jóhannesson, TF1A, mætti í Skeljanes kl. 10 árdegis og hugmyndin var að hafa opið til kl. 14 – en tíminn leið hratt og fóru þeir síðustu ekki úr húsi fyrr en um kl. 16:30.

Hluti morgunsins fór í kynningu, en síðan aðstoðaði Ari menn við að fara í loftið frá TF3IRA um Es’Hail-2/P4A / Oscar 100 gervitunglið. Flestir (sem fóru í loftið) prófuðu hljóðnemann, en ekki var notað mors eða stafrænar tegundir útgeislunar að þessu sinni.

Umsagnir eins og „spennandi“, „skemmtilegt“ og „hvenær hittumst við næst“ heyrðust á ganginum þegar húsinu var lokað. Alls mættu 11 félagar og 2 gestir í Skeljanes þennan heiðskíra og frostmilda fyrsta vetrardag í Reykjavík.

Stjórn ÍRA þakkar Ara fyrir vel heppnaðan viðburð.

Ari Þórólfur Jóhannesson TF1A notaði góðan tíma til að fræða menn um í hverju fjarskipti um gervitungl væru helst frábrugðin fjarskiptum á HF böndunum. Menn kunnu vel að meta upplýsingarnar og spurðu margra spurninga.
Jón G. Guðmundsson TF3LM var áhugasamur og tók sín fyrstu sambönd um tunglið.
Sigurður Óskar Óskarsson TF2WIN var einnig að taka sín fyrstu sambönd um OSCAR 100. “Þetta er skemmtilegt…” sagði Sigurður.
Eftir kaffiveitingar í hádeginu, var talað um að gaman væri að sjá líka borðskjá við ICOM IC-7610 HF stöðina (eins og er við KENWOOD TS-2000 gervihnattastöðina). Þannig að þá var einfaldlega hafist handa og drifið í því. Frá vinstri: Sigurður Óskar Óskarsson TF2WIN, Jón G. Guðmundsson TF3LM, Ari Þórólfur Jóhannesson TF1A og Wilhelm Sigurðsson TF3AWS.
Sigurður Óskar Óskarsson TF2WIN og Ari Þórólfur Jóhannesson TF1A leggja síðustu handtökin á tengingu borðskjánna við ICOM IC-7610 stöðina. Ljósmyndir: Jónas Bjarnason TF3JB.

Anna Henriksdóttir TF3VB og Vala Dröfn Hauksdóttir TF3VD mættu í Skeljanes fimmtudaginn 24. október og sögðu ferðasögu þeirra og Elínar Sigurðardóttur TF2EQ á SYLRA fundinn í Noregi 6.-8. september s.l.

Þær stöllur sögðu frá ferðinni í máli og myndum og tókst afburða vel upp. Ferðasagan var fróðleg, skemmtileg, krydduð léttum húmor og veitti góða innsýn í heim kvenamatöra.

Í ferðinni var m.a. haldið upp á 20 ára afmæli SYLRA, boðið upp á erindisflutning, farið í heimsókn til Morokulien og klúbbstöðin LG5LG virkjuð, farið á sögusafnið á herragarðinum í Eidsvoll (þar sem stjórnarskrá Noregs var samin 1814), farið skoðunarferð til Charlotteborg (í Svíþjóð) og margt fleira.

Þær Anna, Vala og Elín voru í hópi 26 YL‘s frá 9 þjóðlöndum. Næsta SYLRA ráðstefna verður haldin eftir tvö ár (2021) í Finnlandi,

Vel var klappað í lok erindisins. Alls mættu 24 félagar og 1 gestur í Skeljanes þetta vel heppnaða fimmtudagskvöld.

Skeljanesi 24. október. Vala Dröfn Hauksdóttir TF3VD og Anna Henriksdóttir TF3VB sögðu ferðasöguna frá SYLRA fundinum í Noregi í september s.l. Ljósmynd: Sigurbjörn Þór Bjarnason TF3SB.
Frá vinstri: Baldvin Þórarinsson TF3-033, Kristján Benediktsson TF3KB, Óskar Sverrisson TF3DC og Jónas Bjarnason TF3JB. Ljósmynd: Sigurbjörn Þór Bjarnason TF3SB.
Frá vinstri: Óskar Sverrisson TF3DC og Kristján Benediktsson (aftast). Fremst til vinstri: Þórður Adolfsson TF3DT, Valtýr Einarsson TF3VG , Yngvi Harðarson TF3Y og Mathías Hagvaag TF3MH. Ljósmynd: Sigurbjörn Þór Bjarnason TF3SB.
Frá vinstri: Ari Þórólfur Jóhannesson TF1A, Vilhjálmur Í. Sigurjónsson TF3VS, Yngvi Harðarson TF3Y (snýr baki), Baldvin Þórarinsson TF3-033, Anna Henriksdóttir TF3VB og Sigurbjörn Þór Bjarnason TF3SB. Ljósmynd: Jónas Bjarnason TF3JB.
Að loknum vel heppnuðum erindisflutningi. Frá vinstri: Guðrún Hannesdóttir TF3GD, Anna Henriksdóttir TF3VB og Vala Dröfn Hauksdóttir TF3VD. Ljósmynd: Sigurbjörn Þór Bjarnason TF3SB.

Við endurtökum „opinn laugardag“ á morgun, 26. október kl. 10-14 – sérstaklega fyrir þá félagsmenn sem ekki  gátu ekki mætt í Skeljanes s.l. laugardag – en að sjálfsögðu eru allir velkomnir!

Ari Þórólfur Jóhannesson, TF1A, mætir í Skeljanes og kynnir búnað, tækni og tól til fjarskiptanna og aðstoðar félagsmenn við að fara í loftið gegnum Es’Hail-2/P4A / Oscar 100 gervitunglið á tali, morsi og stafrænum tegundum útgeislunar.

Menn voru sammála um s.l. laugardag, að þessi fjarskipti væru sérstök upplifun; sterk merki, engar truflanir og góður DX.

Félagsmenn eru hvattir til að koma við í Skeljanesi og fara í loftið. Kaffi verður á könnunni.

Stjórn ÍRA.

Stefán Arndal TF3SA hafði fyrstu samböndin á morsi um gervitunglið frá TF3IRA (og frá Íslandi) s.l. laugardag. Ljósmynd: TF3JB.

Næsti viðburður á vetrardagskrá ÍRA er að þær Anna Henriksdóttir TF3VB og Vala Dröfn Hauksdóttir TF3VD heimsækja okkur í Skeljanes fimmtudaginn 24. október.

Þær segja okkur ferðasöguna frá SYLRA fundinum í Lillestrøm 6.-8. september s.l., í máli og myndum. Þar voru þær stöllur í hópi 26 annarra YL‘s frá 9 þjóðlöndum og virkjuðu m.a. LG5LG í Morokulien.

Félagsmenn fjölmennið, dagskráin hefst stundvíslega kl. 20:30. Vandaðar kaffiveitingar.

Stjórn ÍRA.

Anna Henriksdóttir TF3VB og Vala Dröfn Hauksdóttir TF3VD. Myndin var tekin í október í fyrra í fjarskiptaherbergi TF3IRA. Ljósmynd: Sigurbjörn Þór Bjarnason TF3SB.

CQ World Wide DX SSB keppnin 2019 verður haldin 26.-27. október. CQ WW er 48 klst. keppni og hefst kl. 00:00 á laugardag og lýkur kl. 23:59 á sunnudag.

Keppnin fer fram á 160, 80, 40, 20, 15 og 10 metrum. Í boði eru fjölmargir keppnisriðlar, bæði fyrir einmennings- og fleirmenningsþátttöku (sjá reglur).

Stjórn ÍRA óskar félagsmönnum góðs gengis.

Keppnisreglur: https://www.cqww.com/rules.htm
Heimasíða keppninnar: http://www.cqww.com/

Námskeið ÍRA til amatörprófs 2019 var sett í Háskólanum í Reykjavík föstudaginn 18. október. Jón Björnsson, TF3PW, umsjónarmaður setti námskeiðið að viðstöddum Vilhjálmi Þór Kjartanssyni, TF3DX, formanni prófnefndar. Alls eru 19 þátttakendur skráðir að þessu sinni.

Námskeiðið hófst sama kvöld (18. október) og lýkur með prófi Póst- og fjarskiptastofnunar laugardaginn 14. desember. Vilhjálmur Þór Kjartansson, TF3DX, formaður prófnefndar, setti upp og vann skipulag námskeiðsins. Ýmist er kennt tvo eða þrjá daga í viku, þ.e. mánudag og miðvikudag eða mánudag, þriðjudag og miðvikudag kl. 18:30-21:30. Kennarar eru tíu talsins:

Andrés Þórarinsson, TF3AM; Ágúst Úlfar Sigurðsson, TF3AU; Haukur Konráðsson, TF3HK; Henry Arnar Hálfdánarson, TF3HRY; Hörður Mar Tómasson, TF3HM; Jón Björnsson, TF3PW; Kristinn Andersen, TF3KX; Sæmundur Þorsteinsson, TF3UA; Vilhjálmur Þór Kjartansson, TF3DX og Þór Þórisson, TF1GW.

Stjórn ÍRA þakkar prófnefnd, umsjónarmanni og kennurum aðkomu að þessu mikilvæga verkefni, að ógleymdum rektor og stjórnarmönnum Háskólans í Reykjavík, fyrir aðgang að glæsilegu kennslurými skólans.

Stjórn ÍRA óskar þátttakendum góðs gengis.

Námskeiðs ÍRA til amatörprófs 2019 var sett í Háskólanum í Reykjavík 18. október. Ljósmynd: Jón Svavarsson TF3JON.

Ari Þórólfur Jóhannesson, TF1A, mætti í Skeljanes laugardaginn 19. október og kynnti búnað, tækni og tól til fjarskipta um OSCAR 100 gervitunglið, auk þess sem hann aðstoðaði félagsmenn við að fara í loftið frá félagsstöðinni TF3IRA í gegnum tunglið.

Í boði var svokallaður „opinn laugardagur“ sem þýðir að félagsaðstaðan var opin yfir allan daginn frá kl. 10-16 til að gefa sem flestum tækifæri til að nýta viðburðinn. Þetta fyrirkomulag heppnaðist vel og var mikil ánægja með það.

Skemmtilegt er að skýra frá því að á meðal gesta var Stefán Arndal, TF3SA, sem fór í loftið og varð þar með fyrstur leyfishafa til að hafa samband um OSCAR 100 á morsi frá Íslandi. Það var við DL4ZAB, OM Bernd í Kassel í Þýskalandi. Flestir (sem fóru í loftið) prófuðu þó hljóðnemann og voru menn sammála um, að þessi upplifun væri mjög sérstök; sterk merki, engar truflanir og góður DX.

Alls mættu 19 félagsmenn og 4 gestir í Skeljanes þennan ágæta og veðurmilda laugardag.

Stjórn ÍRA þakkar Ara fyrir áhugaverðan og vel heppnaðan viðburð.

Skeljanesi 19. október. Ari Þórólfur Jóhannesson TF1A útskýrir sérstöðu gervihnattabúnaðarins fyrir Stefáni Arndal TF3SA.
Stefán Arndal TF3SA tekur fysta sambandið frá Íslandi á morsi í gegnum Es’Hail-2/P4A / Oscar 100 gervitunglið. QSO við DL4ZAB; þá var klukkan 13:55. Jón Björnsson TF3PW fylgist með.
Ari er QRV um OSCAR 100 heimanað frá sér í Reykjavík. Á ferðalögum notar hann hins vegar þennan búnað sem hann útskýrði fyrir viðstöddum sem spurðu margra spurninga. Hann hefur m.a. þegar notað búnaðinn til að hafa sambönd um tunglið frá Norðurlandi og Suðurlandi.
Óskar Sverrisson TF3DC fylgdi í fótspor Stefáns TF3SA og hafði sambönd um OSCAR 100 á morsi.
Wilhelm Sigurðsson TF3AWS prófaði búnaðinn og hafði sambönd á SSB um gervitunglið.
Erling Guðnason TF3EE hafði sambönd á SSB um OSCAR 100.
Jónas Bjarnason TF3JB prófaði stöðina einnig á SSB og fyrsta sambandið var til Suður-Afríku. Ljósmynd: Stefán Arndal TF3SA. Aðrar myndir: Jónas Bjarnason TF3JB.

Á morgun, laugardaginn 19. október verður svokallaður „opinn laugardagur“ í boði í félagsaðstöðunni í Skeljanesi, sem er nýjung á yfirstandandi vetrardagskrá.

Félagsmenn hafa – undir styrkri stjórn Ara Þórólfs Jóhannessonar, TF1A, VHF stjóra ÍRA – unnið að uppsetningu og frágangi gervihnattabúnaðar félagsins til fjarskipta um Es’Hail-2/P4A / Oscar 100 gervitunglið. Stöðin er nú frágengin og verður til sýnis og prófunar á laugardag frá kl. 10:30-16:00 á tali, morsi og stafrænum tegundum útgeislunar.

Ari mun fræða okkur um þessa tegund fjarskipta og ennfremur sýna færanlega stöð til sambanda um tunglið, sem hann hefur m.a. prófað frá Akureyri og um síðustu vitahelgi, frá Knarrarósvita.

Félagsmenn eru hvattir til að koma við í Skeljanesi og fara í loftið. Kaffi verður á könnunni.

Stjórn ÍRA.

Glæsileg gervihnattastöð félagsins uppsett og tilbúin fyrir Es’Hail-2/P4A / Oscar 100 gervitunglið. Verkefninu lauk formlega 16. október s.l. Ljósmynd: Ari Þórólfur Jóhannesson TF1A.

Myndin ver tekin í Skeljanesi 1. október s.l. eftir vinnu þegar þeir Ari Þórólfur Jóhannesson TF1A, VHF stjóri félagsins og Georg Kulp TF3GZ settu upp, tengdu og stilltu nýjan og stærri loftnetsdisk fyrir OSCAR 100 gervitunglið vegna fjarskipta frá TF3IRA. Ný diskurinn er úr trefjagleri (fíber) og 120cm að stærð. Ljósmynd: Óskar Sverrisson TF3DC.

Axel Sölvason, TF3AX, hefur haft sitt síðasta QSO; merki hans er hljóðnað.

Bergur Axelsson, TF3BX, sonur hans, lét félaginu í té þær upplýsingar að Axel hafi látist á Hrafnistu í Reykjavík 15. október. Hann var á 88. aldursári, leyfishafi nr. 81.

Jarðarförin fer fram í Lindakirkju í Kópavogi 30. október kl. 11 árdegis.

Um leið og við minnumst Axels með þökkum og virðingu færum við fjölskyldu hans innilegustu samúðarkveðjur.

Fyrir hönd stjórnar,

Jónas Bjarnason, TF3JB,
formaður.

Einar Kjartansson, TF3EK, umsjónarmaður leikanna kynnti helstu niðurstöður og úrslit í Skeljanesi 17. október. Þar kom m.a. fram, að alls tóku 14 stöðvar þátt í ár, samanborið við 15 á síðasta ári (2018).

Jónas Bjarnason, TF3JB, formaður ÍRA, þakkaði TF3EK undirbúning og umsjón leikanna. Síðan voru afhent veðlaun. Í tilefni 40. TF útileikanna voru 1. verðlaun glæsilegur verðlaunabikar (til eignar) og viðurkenningarskjöl  fyrir fimm efstu sætin:

1. sæti, Hrafnkell Sigurðsson, TF8KY, 425 heildarstig.
2. sæti, Georg Magnússon, TF2ll,  252 heildarstig.
3. sæti, Jónas Bjarnason, TF3JB, 123 heildarstig.
4. sæti, Einar Kjartansson, TF3EK, 104 heildarstig.
5. sæti, Íslenskir radíóamatörar, TF3IRA, 96 heildarstig.

Alls mættu 26 félagar og 1 gestur í Skeljanes þetta ágæta fimmtudagskvöld í blíðviðri í Vesturbænum.

(Niðurstöður verða birtar í heild ásamt ljósmyndum í 1. tbl. CQ TF sem kemur út 26. janúar 2020).

Einar Kjartansson TF3EK, umsjónarmaður, kynnti helstu niðurstöður og úrslit í TF útileikunum 2019. Ljósmynd: TF3jB.
Jónas Bjarnason TF3JB formaður ÍRA afhenti Hrankeli Sigurðssyni TF8KY glæislegan verðlaunabikar og verðlaunaskjal fyrir bestan árangur í leikunum 2019. Ljósmynd: Jón Svavarsson TF3JON.
Vilhjálmur Þór Kjatansson TF3DX og XYL Guðrún Hannesdóttir TF3GD fylgdust með verðlaunaafhendingunni. Þess má geta, að Vilhjálmur er líklega sá leyfishafi sem hefur tekið þátt í flestum TF útileikum frá upphafi (í 40 ár) og sagðist hann líklega bara hafa misst af tveimur útileikum. Hann tók að sjálfsögðu þátt í útileikunum 2019. Ljósmynd: Jón Svavarsson TF3JON.
Eftir verðlaunaafhendingu og kaffi var fjarskiptaherbergi TF3iRA vinsælt. Á myndinni má sjá aöstöðu félagsins til gervitunglafjarskipta. Næst stöðinni eru þeir Ari Þórólfur Jóhannesson TF1A og Georg Kulp TF3GZ. Aðrir sem sjást á mynd (frá vinstri): Guðmundur Sigurðsson TF3GS, Þorvaldur Bjarnson TF3TB og Badvin Þórarinsson TF3-033. LJósmynd: TF3JON.
Þórður Adolfsson TF3DT og Óskar Sverrisson TF3DC sögðu að skilyrðin á 40 metrum væru góð. Ljósmynd: Jón Svavarsson TF3JON.