Íslenskir radíóamatörar – allar fréttir

Opið var í félagsaðstöðu ÍRA í Skeljanesi fimmtudaginn 6. febrúar. Kristján Benediktsson, TF3KB mætti með erindi kvöldsins, um „Alþjóðastarf radíóamatöra, m.a. IARU, NRAU og ITU“. Þetta var fyrsta erindið á nýrri vordagskrá ÍRA fyrir tímabilið febrúar-maí 2025.

Kristján sagði í upphafi að ekki gerðu sér allir grein fyrir því hversu mikið árangur radíóamatöra í tíðnimálum byggir á þeim grunngildum sem framsýnir forystumenn þeirra mótuðu í upphafi. Fram kom m.a. að tíðnisvið [til ráðstöfunar] er takmarkað og það eru margir um hituna. Skipulag amatörfélaganna og landssamtaka þeirra sem og mikil vinna í alþjóðaráðum, hefur skilað þeim árangri í gegnum áratugina þannig að síður hefur verið þrengt að radíóamatörum, heldur hafa tíðniheimildir jafnvel rýmkast.

Kristján sagði, að árangri hafi verið náð fyrir ötult starf innan alþjóðasamtaka radíóamatörfélaga, IARU sem og í starfi landsfélaganna þar sem málin eru rædd vandlega, sameinast um tillögur og talað fyrir breytingum hjá fjarskiptayfirvöldum hvers lands, og þannig undirbúin frumvörp sem náðst hafa í gegn á alþjóðlegum tíðniákvörðunarráðstefnum ITU, “World Radio Conferences, WRC“ sem eru skuldbindandi fyrir aðildarríkin (e. plenipotentiary).

Einungis fyrir faglegt og vandað undirbúningsstarf hafa fjarskiptayfirvöld samþykkt margar tillögur radíóamatöra og fært inn í alþjóðareglugerðir. Hér á landi er það Fjarskiptastofa sem er stjórnvald fjarskipta og er tengiliður okkar við stofnunina formaður ÍRA, Jónas Bjarnason TF3JB, sem hefur unnið vel að þessum málum í mörg ár. Radíóamatörar eiga IARU sem og landsfélögunum mikið að þakka. Gerður var góður rómur að erindi Kristjáns sem svaraði mörgum fyrirspurnum.

Sérstakar þakkir til Kristjáns Benediktssonar, TF3KB fyrir vel flutt erindi, fróðlegt og áhugavert. Þess má geta að erindið var tekið upp og verður til niðurhals fljótlega. Sjá má glærur frá erindi Kristjáns á heimasíðu ÍRA: https://www.ira.is/erindi-tf3kb-i-skeljanesi-6-februar-2025/

Alls mættu 19 félagar þetta ágæta fimmtudagskvöld í stilltu vetrarveðri í vesturbænum í Reykjavík.

Stjórn ÍRA.

(Texti: Andrés Þórarinsson, TF1AM varaformaður ÍRA).

Laugardaginn 25. janúar var ÍRA með móttöku í Skeljanesi fyrir nýja leyfishafa sem sem tóku þátt í námskeiði félagsins til amatörprófs haustið 2024 og náðu prófi Fjarskiptastofu til amatörleyfis 2. nóvember s.l.

Meðal efnis sem nýjum leyfishöfum var bent á að gæti verið nytsamlegt, var samantekt greina sem birtust [einkum] í félagsblaðinu CQ TF á árunum 2028-2024.

Mikil ánægja var með þessa samantekt og hefur verið ákveðið að bjóða öllum félagsmönnum að nýta sér þessar upplýsingar ef áhugi er fyrir hendi, sbr. meðfylgjandi vefslóð á heimasíðu ÍRA.

Fyrst er smellt á vefslóðina: https://www.ira.is/valid-efni-ur-cq-tf-2018-2024/
Síðan má smella á slóðina sem er allra neðst til vinstri: „new.laugard.25.1.2025“ og kalla fram skjalið í heild.

Stjórn ÍRA.

Laugardaginn 25. janúar var móttaka fyrir nýja leyfishafa sem sem tóku þátt í námskeiði ÍRA til amatörprófs haustið 2024 og náðu prófi Fjarskiptastofu til amatörleyfis 2. nóvember s.l. Allir 14 hafa fengið úthlutað kallmerki hjá stofnuninni. Dagskráin var vel sótt; allir þeir nýliðar sem áttu heimangengt komu, alls 9 manns.

Birgir Freyr Birgisson, TF3BF;
Daníel Smári Hlynsson, TF3GOD;
Guðjón Már Gíslason, TF3GMG;
Gunnar B. Guðlaugsson, TF5NN;
Helgi Gunnarsson, TF3HG;
Óskar Ólafur Hauksson, TF3OH;
Ríkharður Þórsson, TF8RIX,
Róbert Svansson, TF3RS og
Sæmundur Árnason, TF3NEI.

Erindi fluttu þessir:

Yngvi Harðarson, TF3Y um aðstöðu félagsins í Skeljanesi og um starf ÍRA, (m.a. um fræðsludagskrá, fundi og námskeið (þ.m.t. til amatörprófs), heimasíðu, FaceBook síður, félagsritið CQ TF, ársskýrslu, árlega fjarskiptaviðburði, alþjóðlegar keppnir, endurvarpa, stafvarpa, radíóvita, gervihnattafjarskipti og helstu innanlandstíðnir á HF, VHF og UHF.

Kristján Benediktsson TF3KB tók síðan við og flutti glærukynningu og kynnti alþjóðastarf radíóamatöra, m.a. um IARU, NRAU og ITU. Undir dagskárliðnum fór fram afhending ítarefnis, þ.e. listi yfir valdar greinar sem birst hafa í CQ TF (einkum árin 2018-2024).

Vilhjálmur Í. Sigurjónsson, TF3VS fjallaði um loggforrit, mikilvægi þeirra og möguleika og tók sem dæmi Logger32 rafræna dagbókarforritið sem hann sýndi með skjávörpunni. Síðan fjallaði hann almennt um QSL kort, notkun þeirra og sýndi sem dæmi ýmis kort frá sér og öðrum.

Eftir kaffi og spjall var farið upp í fjarskiptaherbergi þar sem Vilhjálmur og fleiri kynntu nýliðum tækin og útskýrðar voru hefðir í fjarskiptum radíóamatöra; hvernig farið er að því að hafa samband á SSB, og síðan fóru þeir allir níu í loftið, hver af fætur öðrum, og tóku nokkur sambönd hver á 10 metra bandinu. Ennfremur ræddi TF3KB bandskipan. Þetta var mjög vel heppnað.

Á eftir var farið í fundarsalinn, bætt á með kaffi. Þar sýndi Vilhjálmur, TF3VS hvernig FT8 fjarskipti fara fram. Til þess notaði hann tölvu og framendann/stjórnborðið á FlexRadio 6600 stöð (Maestro Control Console) sem  gerði honum kleift að vera í fjarsambandi yfir netið við stöðvarhlutann heima í Kópavogi. Þetta heppnaðist vel og spunnust fjörugar umræður. 

Þegar klukkan var að verða 15:00 var húsið yfirgefið. Ánægjulegur og vel heppnaður dagur. Þökk sé öllum fyrirlesurum, Andrési Þórarinssyni, TF1AM varaformanni fyrir að fyrir að stjórna dagskrá dagsins af röggsemi og Matthíasi TF3MH fyrir húsgæsluna og Sveini Goða TF3ID fyrir veitingar.

Stjórn ÍRA.