Íslenskir radíóamatörar – allar fréttir

Opið hús verður í félagsaðstöðu ÍRA í Skeljanesi fimmtudaginn 2. september fyrir félagsmenn og gesti frá kl. 20:00.

Fjarskiptaherbergi TF3IRA og QSL stofa á 2. hæð verða opin. QSL kort eru tekin að berast aftur og hafa verið flokkuð í hólf félagsmanna. Kaffi og meðlæti verður í fundarsal. Nýjustu tímaritin liggja frammi.

Vegna Covid-19 er þess farið á leit, að félagar sem hafa hug á að mæta í Skeljanes fresti því ef þeir kenna lasleika af einhverju tagi, af virðingu við aðra.

Verið velkomin í Skeljanes!

Stjórn ÍRA.

.

Leitað var til ráðgefandi opinberra aðila í tilefni nýrrar reglugerðar um samkomutakmarkanir vegna kórónaveirufaraldurs. Niðurstaða er að okkur er heimilt að bjóða upp á kaffiveitingar, enda sé búnaður til að sótthreinsa hendur áður en áhöld eru notuð. Gæta beri að 1 metra nálægðarreglu og góðri loftræstingu. Fram kom ennfremur, að jákvætt er talið að nota andlitsgrímur.

Rúm vika er síðan men urðu varir við að á ný var búið að mála fleiri en eitt „listaverk“ á langa bárujárnsvegginn á lóðinni við Skeljanes. Félagsmaður okkar, Baldvin Þórarinsson, TF3-Ø33 var óhress með þennan verknað enda síðast í byrjun júní s.l. sem hann málaði yfir samskonar „listverknað“.

Rigningardagar undanfarið hafa hamlað málningarvinnu utanhúss, en í dag, 24. ágúst mættu menn í Skeljanes og var rennt yfir bárujárnsveginn með málningarkústi. Aðkoman að húsinu er nú allt önnur, sbr. meðfylgjandi ljósmyndir. Þakkir til Flügger lita sem útvegaði málninguna.

Þakkir til Baldvins, TF3-Ø33 fyrir dugnað og góða aðstoð.

Stjórn ÍRA.

Alþjóðlega vita- og vitaskipahelgin stendur yfir þessa helgi, 21.-22. ágúst.

Svanur Hjálmarsson, TF3AB virkjaði Knarrarósvita að þessu sinni. Andrés Þórarinsson, TF3AM heimasótti hann í kaffi í gær (21. ágúst) og fylgir frásögn hans sem hann birti á FB hér á eftir.

“Vitahelgin er um þessa helgi. Svanur, TF3AB var mættur við Knarrarósvita með sitt hjólhýsi og fortjald og hafði sett upp þessa fínu stöð. Tækin eru öll í færanlegum og sterkbyggðum skáp og þarf einungis að tengja 230V og loftnet við og þá er allt tilbúið.  Úti var vertikall með SGC 230 „autótjúner“ svo og dípóll á priki.  Á myndinni situr Svanur við tækin og unir sér hið besta. 

Aðrir gestir á þessum tíma voru Þór, TF1GW svo og Benedikt, TF3T sem skaust sem snöggvast frá sinni fínu stöð í Mýri.  Þetta var góður  hópur.  Ekki má láta hjá líða að nefna þetta fína spjall, svo og kaffi „und alles“; já og skonsur sem Þór kom með og hafði sjálfur og í eigin persónu útbúið fyllinguna sem var ekkert venjuleg. Ég þakka góðar móttökur”.

Þakkir til Andrésar Þórarinssonar, TF3AM fyrir þessa skemmtilegu frásögn ásamt ljósmynd.

Stjórn ÍRA.

Ari Þórólfur Jóhannesson, TF1A og Georg Kulp, TF3GZ gerðu fleira heldur en bara að setja upp nýjan 1,2 GHz endurvarpa í Bláfjöllum 19. ágúst, því þeir uppfærðu um leið móttökuna á KiwiSDR viðtækinu yfir netið sem sett var upp á fjallinu þann 30. júlí s.l.

Tækið hafði virkað mjög vel frá því það var tengt aftur í Bláfjöllum…nema að hvimleiðar truflanir heyrðust á 80 metrum, sérstaklega í kringum innanlandstíðnina 3637 kHz.

Ari sagðist hafa gert viðhlítandi ráðstafanir og þegar gerð var prufa 20. ágúst var allt 80 metra bandið tandurhreint. Vel gert hjá þeim félögum því viðtækið er mikið notað og margir voru búnir að benda á þessar truflanir.

Stjórn ÍRA.

Bláfjöll, vefslóð:  http://bla.utvarp.com:8080/

Tvö önnur KiwiSDR viðtæki yfir netið eru virk, þ.e. á Bjargtöngum í Vesturbyggð og á Raufarhöfn.
Bjargtangar, vefslóð: http://bjarg.utvarp.com
Raufarhöfn, vefslóð: http://raufarhofn.utvarp.com