Almennt

Námskeiðið ÍRA til amatörprófs haustið 2023 hófst í Háskólanum í Reykjavík mánudaginn 25. september. Jónas Bjarnason, TF3JB formaður félagsins setti námskeiðið.

Alls er 31 þátttakandi skráður. Þar af mættu 13 í kennslustofu, 15 voru í netsambandi og 3 voru fjarverandi. Fjartengingar gengu vel innan lands og utan (en tveir tveir þátttakendur eru erlendis). 

Eftir setningu tók Kristinn Andersen, TF3KX við og hóf kennsluna. Hann verður einnig með kennslu í kvöld (þriðjudag) en Njáll H. Hilmarsson, TF3NH tekur við á miðvikudag. Kennsla verður síðan samkvæmt tímaplani. Námskeiðinu lýkur 7. nóvember n.k. Próf Fjarskiptastofu til amatörleyfis verður haldið 11 nóvember.

Bestu óskir um gott gengi og þakkir til allra sem koma að verkefninu.

Stjórn ÍRA.

Í gær (22. september) bættist við innanlandsviðtæki til hlustunar yfir netið. Það er sömu tegundar og þau fyrri, þ.e. af KiwiSDR gerð, staðsett á Stapa á Reykjanesi. Viðtækið hefur afnot af 20 metra löngu vírloftneti. Daggeir Pálsson, TF7DHP lánaði loftnetsspenni.

KiwiSDR viðtækin vinna frá 10 kHz upp í 30 MHz. Hægt er að hlusta á AM, FM, SSB og CW sendingar og má velja bandbreidd sem hentar hverri mótun. Allt að átta notendur geta verið skráðir inn á viðtækið samtímis.

Ari Þórólfur Jóhannesson, TF1A stóð að uppsetningu viðtækisins ásamt Georg Kulp, TF3GZ. Georg er eigandi tækisins (sem var áður í notkun á Raufarhöfn þegar það var tekið niður 8. ágúst s.l.).
Vefslóð: http://stapi.utvarp.com/?fbclid=IwAR03fRWcTOvwTCy2JCSo_N1RjbWtBbTjto8HTk3DxT36J4ZcMWwyDp1Sfkc

Stjórn ÍRA þakkar fyrir verðmætt framlag. Hér um að ræða mikilvæga viðbót fyrir radíóamatöra sem gera tilraunir í þessum tíðnisviðum, auk hlustara og allra sem hafa áhuga á útbreiðslu radíóbylgna.

Stjórn ÍRA.

–

Bent er á fróðlega grein Ara Þórólfs Jóhannessonar, TF1A um KiwiSDR viðtækin sem birtist í 4. tbl. CQ TF 2020; bls. 41: „Aðgengileg viðtæki á Íslandi yfir netið“. Vefslóð: http://www.ira.is/wp-content/uploads/2020/09/cqtf_34arg_2020_04tbl.pdf

Félagsaðstaða ÍRA í Skeljanesi verður opin fimmtudaginn 21. september fyrir félagsmenn og gesti frá kl. 20:00 til kl. 22:00.

Fundarsalur, fjarskiptaherbergi og QSL stofa á 2. hæð verða opin. Góður félagsskapur og nýjustu amatörtímaritin.

QSL stjóri verður búinn að fara í pósthólfið, flokka kortasendingar og raða í hólfin. Kaffiveitingar.

Verið velkomin í Skeljanes!

Stjórn ÍRA.

Scandinavian Activity keppnin (SAC) – CW hluti – verður haldinn um næstu helgi, 16.-17. september.

Þetta er 24 klst. keppni sem hefst á laugardag á hádegi og lýkur á sunnudag á hádegi.

Radíóamatörar í Danmörku, Íslandi, Finnlandi, Noregi og Svíþjóð keppa ásamt radíóamatörum á Svalbarða, Bjarnareyju, Álandseyjum, Market Reef, Grælandi og í Færeyjum á móti heiminum og innbyrðis.

Svalbarði og Bjarnareyja – JW
Jan Mayen – JX
Noregur – LA – LB – LC – LG – LI – LJ – LN
Finnland – OF – OG – OH – OI
Álandseyjar –  OFØ – OGØ – OHØ
Market Reef – OJØ
Grænland – OX – XP
Færeyjar – OW – OY
Danmörk – 5P – 5Q – OU – OV – OZ
Svíþjóð – 7S – 8S – SA – SB – SC – SD – SE – SF – SG – SH – SI – SJ – SK – SL – SM

Ísland – TF

Mikilvægt er að sem flestar TF-stöðvar taki þátt!

Stjórn ÍRA.

Scandinavian Activity Contest 2023 Rules

Félagsaðstaða ÍRA í Skeljanesi var opin fimmtudaginn 7. september. Umræður voru á báðum hæðum, menn hressir og TF3IRA var QRV á 7 og 14 MHz.

Yfir kaffinu var mikið rætt um loftnet, tæki og búnað og skilyrðin á böndunum. Margir velta fyrir sér uppsetningu á nýjum loftnetum, en stærstu alþjóðlegu keppnir ársins eru framundan. Einnig komu góðir gestir í hús sem íhuga að taka þátt í námskeiði félagsins sem hefst 25. september n.k. í HR, bæði í stað- og fjarnámi. Þá hafði töluvert borist af góðu radíódóti frá þeim TF3TV og TF3WS.

Alls mættu 25 félagar og 2 gestir í Skeljanes þetta ágæta fimmtudagskvöld í kyrru síðsumarveðri í vesturbænum í Reykjavík.

Stjórn ÍRA.

Ein af stóru keppnum ársins er Worked All Europe (WAE) keppnin. SSB hlutinn er haldinn nú um helgina 9.-10. september. Þetta er 48 klst. keppni, en þátttaka er leyfð í mest 36 klst.

Markmiðið er að hafa sambönd við stöðvar utan Evrópu, þ.e. sambönd innan Evrópu gilda ekki í keppninni.  Skilaboð: RS+raðnúmer. Í keppninni gefa QTC skilaboð punkta aukalega.

Sambönd við hverja nýja DXCC einingu (e. entity) gilda sem margfaldarar, auk sambanda við hvert nýtt kallsvæði í Bandaríkjunum, Kanada, Ástralíu, Nýja Sjálandi, Suður-Afríku,  Japan og Brasilíu, auk kallsvæðanna RA8 og RA9.

Margfaldarar hafa aukið vægi eftir böndum; á 80 metrum fjórir, á 7 MHz þrír og á 14/21/28 MHz tveir.

Með ósk um gott gengi.

Stjórn ÍRA.

Sjá nánar í reglum:  https://www.darc.de/der-club/referate/conteste/wae-dx-contest/en/

.

UM QTC Í WAE KEPPNUM
Í WAE keppnunum má fá aukapunkta með því að skiptast á skilaboðum (QTC) við aðra keppendur. Gilt QTC þarf að innihalda tíma, kallmerki og raðnúmer. Dæmi: „1307 W1AW 431“. Það þýðir að haft hafi verið samband við W1AW kl. 13.07 GMT og að sent raðnúmer var 431.

Aðeins má nota QSO einu sinni sem QTC og ekki er heimilt að senda QSO sem QTC til stöðvar sem samband var haft við í keppninni. Sérhvert rétt móttekið QTC gefur sendanda og móttakanda 1 stig. Tvær stöðvar geta mest skipst á 10 QTC. Viðkomandi stöðvar mega hafa fleiri en eitt samband til að ná þeim QTC fjölda.

QTC eru send sem raðir (e. series). QTC er skilgreint sem runa (e. block) sem samanstendur að lágmarki af einu QTC en að hámarki 10. QTC raðir eru númeraðar á eftirfarandi hátt: Fyrri tölustafurinn er hækkandi raðnúmer og sá síðari táknar fjölda QTC í röð. Dæmi: „QTC 3/7“ táknar þriðju QTC röð sem inniheldur 7 QTC“. Sérhverja QTC röð sem er send eða móttekin þarf að færa í keppnisdagbók, þ.e. „QTC númer, tíma og band“ þess sambands sem er að baki QTC sendingarinnar.

(Ath. Að þessar upplýsingar eiga við mors- og talhluta WAE keppnanna).