Stjórn ÍRA samþykkti á fundi sínum í gær, 27. maí, að félagsaðstaðan í Skeljanesi verði opin frá og með fimmtudeginum 11. júní n.k. Þá verða liðnir réttir 3 mánuðir frá því síðast var opið, þann 12. mars s.l.

Ákvörðunin byggir á minnisblaði sóttvarnalæknis varðandi afléttingu takmarkana á samkomum vegna COVID-19 dags. 25. maí 2020. Ný skilgreining á tveggja metra reglu er, að hún geti verið val fólks. Þannig má fólk sitja eða standa þétt en bjóða þarf þeim sem það vilja að halda tveggja metra fjarlægð. Allir einstaklingar eru engu að síður hvattir til að viðhalda tveggja metra fjarlægðarreglu í samskiptum við aðra, eftir því sem aðstæður leyfa.

Um leið og við fögnum því að veiran er á undanhaldi og að óhætt er talið að opna félagsaðstöðuna á ný, eru það eru tilmæli stjórnar að félagar sem hafa hug á að mæta í Skeljanes á fimmtudagskvöldum, fresti því ef þeir kenna lasleika af einhverju tagi, af virðingu við aðra.

Velkomin í Skeljanes.

Stjórn ÍRA.

Elín Sigurðardóttir, TF2EQ, ungmennafulltrúi ÍRA vill koma því á framfæri, að vinnuhópur um málefni ungmenna innan IARU Svæðis 1, kynnir nýtt verkefni undir heitinu „YOTA online“. Á mánaðarlegum fundum á netinu, er markmiðið að kynna YOTA hugsunina og þar með vekja athygli á því að ungt fólk er þátttakendur í amatör radíói.

Hópur ungra virkra radíóamatöra mun kynna mismunandi hliðar áhugamálsins, samtímis því að svara spurningum á netinu. Ennfremur mun verða boðið upp á umfjöllun þar sem leyfishafar sem staðið hafa í forsvari fyrir hina ýmsu YOTA viðburði munu skýra frá reynslu sinni, ásamt því að svara spurningum.

Ástæða þess að farið er af stað með þetta málefni nú er vegna áhrifa Covid-19 faraldursins, sem hefur m.a. haft þau áhrif að öllum YOTA viðburðum á IARU Svæðum 1, 2 og 3 hefur verið aflýst eða frestað, sem og YOTA verkefninu sem fyrirhugað var að halda á Ham Radio sýningunni í Friedrichshafen í sumar.

Fyrsti „YOTA online“ viðburðurinn fer fram í kvöld, fimmtudaginn 28. maí, kl. 18:00 GMT. Fyrirhugað er, að viðburðurinn (livestream) mun standa yfir í u.þ.b. klukkustund. Gerð verður upptaka sem síðan má kalla fram á netinu. Þátttaka er opin öllum, allsstaðar í heiminum. Vefslóðin á viðburðinn:  https://www.facebook.com/hamyota/posts/2787529188035538

Nánar á vefslóðinni:  https://www.ham-yota.com/

Fylgist með frá byrjun. Góða skemmtun!

73, Elín, TF2EQ.

Elín Sigurðardóttir TF2EQ í fjarskiptaherbergi ÍRA í Skeljanesi þegar hún virkjaði kallmerkið TF3YOTA í desember s.l. Ljósmynd: TF3JB.

Landsfélag radíóamatöra á Spáni (URE), hefur ákveðið að bjóða radíóamatörum um allan heim opinn aðgang að júníhefti félagsblaðsins RadioAficionados 2020. Blaðið er á spænsku, en smella má á neðri vefslóðina til að fá enska þýðingu.

ÍRA þakkar URE fyrir boðið sem hér með er komið á framfæri við félagsmenn.

Stjórn ÍRA.

Smellið á “Descargas” (hægra megin) og síðan á “Junio 2020 – Revista”
https://www.ure.es/descargas/

Google þýðing á ensku:
https://tinyurl.com/SpainURE

Morshluti CQ World Wide WPX keppninnar fer fram 30.-31. maí n.k. Markmiðið er að hafa sambönd við kallmerki með eins mörg mismunandi forskeyti (e. prefixes) og mögulegt er, á 1.8, 3.5, 7, 14, 21 og 28 MHz.

Keppnin stendur yfir í 48 klst., en einmenningsstöðvar mega mest taka þátt í 36 klst. Á þátttökutímanum má taka eins mörg hlé og menn vilja, en hvert miðast að lágmarki við 60 mínútur.

  • Samband við hverja stöð gefur punkta einu sinni á bandi.
  • Sambönd við stöðvar í Evrópu (en utan Íslands) gefa 1 punkt á 14, 21 og 28 MHz; en 2 punkta á 1.8, 3.5 og 7 MHz.
  • Sambönd við stöðvar utan Evrópu gefa 3 punkta á 14, 21 og 28 MHz; en 6 punkta á 1.8, 3.5 og 7 MHz.
  • Margfaldari er summa fjölda mismunandi forskeyta sem haft er samband við og reiknast einu sinni, burtséð frá fjölda sambanda eða fjölda banda.

Í boði eru 9 mismunandi þátttökuflokkar fyrir einmenningsstöðvar, auk 5 flokka fleirmenningsstöðva.

Þess má geta til fróðleiks, að fimm TF stöðvar tóku þátt í keppninni í fyrra (2019): TF3AO, TF3DC, TF3GB, TF3VS og TF3Y.

Vefslóð á keppnisreglur: https://www.cqwpx.com/rules.htm

IEC (International Electrotechnical Commission) hefur hafnað frumvarpi WPT (Wireless Power Transfer) sem hefði geta haft í för með sér mengun í RF sviðinu upp í 30 MHz.

IARU sendi frumvarpið til aðildarfélaganna til kynningar. Stjórn ÍRA fjallaði um það á stjórnarfundum nr. 3 og 5 starfsárið 2018/19. Það var í framhaldi sent EMC nefnd félagsins til nánari umfjöllunar. Íslenskir radíóamatörar fagna þessari niðurstöðu sem er jákvæð fyrir radíóamatöra sem og aðra notendur sviðsins.

Stjórn ÍRA.

Vefslóð á kynningu IARU: http://rsgb.org/main/files/2018/06/WPT-for-MS_v2brief.pdf

Upplýsingar hafa komið fram um sex ný TF kallmerki sem voru handhafar DXCC viðurkenningarinnar þegar fyrir 67 árum. Þetta kemur m.a. fram í viðtali sem birtist í Alþýðublaðinu 10. janúar 1953 við þáverandi formann ÍRA, Ásgeir Magnússon, TF3AB. Nöfn og kallmerki:

Árni Egilsson, TF3AR.
Einar Pálsson, TF3EA.
Hannes Thorsteinsson, TF3ZM.
Sigurður Finnbogason, TF3SF.
Ingi Sveinsson, TF5SV (síðar TF3SV og TF3C).
Þórhallur Pálsson, TF5TP.

Í 2. tbl. CQ TF 2020 er birt uppfærð DXCC staða TF stöðva 7. mars 2020. Þar koma fram alls 17 íslensk kallmerki. Í ljósi þessara nýju upplýsinga er ljóst, að heildarfjöldi TF kallmerkja, sem eru handhafar DXCC, er a.m.k. 23 talsins. Þakkir til Kristjáns Benediktssonar, TF3KB, fyrir þessar upplýsingar.

Meðfylgjandi lJósmynd er af Einari Pálssyni TF3EA, fyrsta formanni ÍRA, í fjarskiptaherbergi sínu árið 1955. Sjá má m.a. áhugaverðar fjarskiptaviðurkenningar sem prýða herbergið.

Dagur upplýsingasamfélagsins (World Information Society Day) er á sunnudag, 17. maí. Margir radíóamatörar muna eflaust eftir fyrra heiti hans, sem var Alþjóða fjarskiptadagurinn (World Telecommunication and Information Society Day) en nafninu var breytt á vettvangi Sameinuðu þjóðanna árið 2005.

Radíóamatörar um allan heim starfrækja þennan dag stöðvar með “ITU” viðskeytum, með 4U1ITU í aðalstöðvum Alþjóðafjarskiptasambandsins ITU í Genf í fararbroddi. Gott tækifæri fyrir þá sem safna sjaldgæfum forskeytum.

https://www.itu.int/en/wtisd/2020/Pages/default.aspx

Póst- og fjarskiptastofnun hefur heimilað uppsetningu APRS stafvarpa, TF1APB, með staðsetningu á Reynisfjalli (63,41417 og 19,02833V). QRG er 144.800 MHz og útgeislað afl er heimilað allt að 25W. Ábyrgðarmenn eru Samúel Þór Guðjónsson, TF2SUT og Magnús Ragnarsson, TF1MT. Þess er vænst að stafvarpinn verði QRV fljótlega, en að sögn TF1MT, hefur búnaður verið gerður klár.

Notuð var ein af Motorola GM-300 VHF stöðvunum sem APRS hópurinn fékk að gjöf, ásamt Microsat WX3in1 Mini APRS Digipeater/I-gate og PLXDigi – APRS Digi-peater búnaðinum frá Póllandi, en félagssjóður ÍRA fjármagnaði tvö slík sett í fyrra (2019).

Hamingjuóskir til APRS hópsins með ósk um gott gengi.

Stjórn ÍRA.

Microsat WX3in1 Mini APRS Digipeater/I-gate og PLXDigi – APRS Digipeater búnaðinum sem keyptur var í fyrra (2019). Ljósmynd: Magnús Ragnarsson TF1MT.

Landsfélag radíóamatöra í Belgíu (UBA), hefur ákveðið að bjóða radíóamatörum um allan heim opinn aðgang að maí- júníhefti félagsblaðsins CQ QSO. Blaðið er bæði á hollensku og frönsku.

ÍRA þakkar REF fyrir boðið sem hér með er komið á framfæri við félagsmenn.

Stjórn ÍRA.

https://www.uba.be/sites/default/files/uploads/actual/cq-qso-05-2020.pdf

L’association Réseau des Émetteurs Français (REF), landsfélag radíóamatöra í Frakklandi, hefur ákveðið að bjóða radíóamatörum um allan heim opinn aðgang að apríl og maíheftum félagsblaðsins Radio-REF.

ÍRA þakkar REF fyrir boðið sem hér með er komið á framfæri við félagsmenn.

Stjórn ÍRA.

ttps://www.r-e-f.org/images/flippingbook/2020_04/2020_04.pdf
https://www.r-e-f.org/images/flippingbook/2020_05/2020_05.pdf

Frumvarpi til til nýrra fjarskiptalaga var dreift á Alþingi í dag, 7. maí. Það er m.a. til innleiðingar á nýjum fjarskiptapakka ESB, auk kynningar á uppfærslu reglugerðar ESB um samstarfsvettvang evrópskra eftirlitsaðila, svonefndar BEREC og TSM reglugerðir ásamt uppfærslu eldri gerða samkvæmt tilskipun ESB nr. 2018/1972.

Uppkast að frumvarpinu var til umfjöllunar á stjórnarfundi í ÍRA þann 3. febrúar s.l. Niðurstaða var, að ekki væri sérstök ástæða til umsagnar eða afskipta félagsins, enda áhyggjur manna um að ferlið hreyfði við CE merkingum og undanþágum fyrir radíóamatöra óþarfar, þar sem ekkert væri fjallað um þau mál í frumvarpsdrögunum.

Fundargerðin er birt í heild á bls. 40-42 í 2. tbl. CQ TF 2020 sem kom út 22. mars s.l., vefslóð: http://www.ira.is/…/2020/03/cqtf_34arg_2020_02tbl.pdf…

Þýskir radíóamatörar fengu bráðabirgðaheimild (e. preliminary provisional implementation) til notkunar á 50 MHz bandinu í gær (6. maí) sem gildir úr árið 2020. Heimildin  byggir á samþykkt radíótíðniráðstefnu ITU (WRC-19).

Heimildin nær til tíðnisviðsins 50.000-52.000 MHz, er á víkjandi grundvelli og leyfir allar tegundir útgeislunar með mest 12 kHz bandbreidd. Skilyrt er að nota loftnet sem senda út lárétt póluð merki.

Aflheimild er tvískipt: 750W fyrir hærra leyfi og 100W fyrir lægra leyfi á tíðnisviðinu 50.000 MHz til 50.400 MHz og mest 25W á tíðnisviðinu fyrir báða leyfisflokka á 50.400-52.000 MHz.

Stjórn ÍRA á í viðræðum við Póst- og fjarskiptastofnun um útfærslu heimilda á 50 MHz hér á landi.