Íslenskir radíóamatörar – allar fréttir

Stjórn Í.R.A. óskar félagsmönnum og fjölskyldum þeirra farsældar á nýju ári.

Skilafrestur efnis í janúarhefti félagsblaðsins okkar, CQ TF, 1. tbl. 2013 er nk. sunnudag, 30. desember. Félagsmenn eru hvattir til að leggja til efni, annaðhvort með því að skrifa sjálfir, senda ritstjóra línu eða slá á þráðinn. Hér eru dæmi um nokkur atriði sem áhugavert væri að heyra um frá félögum okkar…

• Áhugavert samband í loftinu nýlega?
• Athyglisverð vefsíða, góð tímaritsgrein eða góð bók sem tengist amatör radíói?
• Uppháhaldstækið í “sjakknum”? Radíótæki, mælitæki, verkfæri, eitthvað ómissandi?
• Radíótækin, loftnet og bíllinn fyrir sumarið og ferðalög um landið.
• Starfið í félaginu okkar, þjónusta við félagsmenn – hvað er gott og hvað má bæta?
• Myndir, myndir, myndir,… lífga alltaf upp á blaðið.

73 – Kiddi, TF3KX – ritstjóri CQ TF. Netfang: cqtf@ira.is

Fyrirhugað er að haldið verði námskeið til amatörprófs eftir áramót á vegum Í.R.A.

Fyrirhugað er að Í.R.A. bjóði upp á námskeiðið til amatörprófs, sem standi yfir frá
febrúar til apríl n.k. og ljúki með prófi Póst- og fjarskiptastofnunar laugardaginn 4.
maí 2013.

Námskeiðið verður kvöldnámskeið og verður kennt tvö kvöld í viku, 2 kennslustundir
í senn. Það verður opið öllum og ekki eru gerðar kröfur um sérstaka menntun eða
undirbúning. Tekið skal fram, að stjórnvöld gera ekki lengur kröfur um morskunnáttu
þannig að morskennsla er ekki hluti af námskeiðinu.

Áhugasamir eru beðnir um að skrá nafn sitt og tölvupóstfang á “ira hjá ira.is”. Ath.
að skráningu fylgir engin skuldbinding, en veitir félaginu mikilvægar upplýsingar um
fyrirhugaðan fjölda nemenda. Fyrirspurnum má beina á sama töluvpóstfang.

Skráning verður opin til og með 28. desember n.k. Félagið setur þann fyrirvara,
að lágmarksþátttaka fáist. Námskeiðsgjald verður 14 þúsund krónur fyrir félagsmenn
en 19 þúsund krónur fyrir aðra. Inni í þessu verði eru öll námsgögn.

Athygli leyfishafa er vakin á því að sækja þarf sérstaklega um heimild(ir) til notkunar á eftirtöldum tíðnisviðum sem eru til tímabundinnar úthlutunar, ýmist á árinu 2013 eða á árunum 2013-2014. Leyfishöfum sem hafa heimildir Póst- og fjarskiptastofnunar til að vinna í einhverju eða öllum þessara tíðnisviða (sem renna út þann 31. desemeber n.k.) er góðfúslega bent á, að PFS fer þess á leit að leyfishafar sendi inn nýjar umsóknir fyrir þessi tíðnisvið fyrir ofangreind tímabil. Umrædd tíðnisvið eru:

• 1850-1900 kHz (á 160 metrum) í tilgreindum alþjóðlegum keppnum. Heimild dags. 9.11.12 gildir fyrir almanaksárið 2013.
• 5260-5410 kHz (á 60 metrum). Heimild dags. 13.11.12 gildir fyrir almanaksárin 2013 og 2014.
• 70.000-70.200 MHz (á 4 metrum). Heimild dags. 14.11.12 gildir fyrir almanaksárin 2013 og 2014.

Bent er á, að senda má umsóknir í tölvupósti á póstföngin hrh(hjá)pfs.is eða pfs(hjá)pfs.is Sækja má um heimild til notkunar á einu eða á öllum ofangreindum tíðnisviðum í sama tölvupósti. Leyfishöfum er jafnframt bent á, að kynna sér skilyrði stofnunarinnar fyrir leyfisveitingum; sbr. tilgreindar vefslóðir neðar á síðunni.

F.h. stjórnar Í.R.A.,

Jónas Bjarnason, TF3JB,
formaður.

Síðasti viðburður á yfirstandandi vetrardagskrá er jólakaffi Í.R.A. sem haldið verður í félagsaðstöðunni í Skeljanesi fimmtudaginn 13. desember næstkomandi. Húsið verður opnað kl. 20:00 að venju.

Þetta verður jafnframt síðasta opnun félagsaðstöðunnar á þessu ári en hún verður næst opin fimmtudaginn 3. janúar 2013.

Stjórn Í.R.A. hvetur félagsmenn til að mæta tímanlega.