Archive for category: Almennt

Nýtt kallmerki ÍRA, TF3WARD, var virkjað í fyrsta skipti á Alþjóðadag radíóamatöra 18. apríl í ár.  Viðskeytið stendur fyrir World Amateur Radio Day. Kallmerkið var starfrækt til að halda upp á stofndag alþjóðasamtaka landsfélaga radíóamatöra, IARU, sem stofnuð voru í París, árið 1925.

Með virkjun þessa kallmerkis fetuðum við í fótspor systurfélaganna á Norðurlöndum (og víðar) sem starfrækja sérstök kallmerki með hliðstæðum viðskeytum til að halda upp á stofndag IARU.

QSL kort hefur nú verið hannað fyrir TF3WARD. Það er Vilhjálmur Í. Sigurjónsson, TF3VS sem á heiðurinn af því. Mathías Hagvaag, TF3MH, QSL stjóri félagins var með í ráðum og Ársæll Óskarsson, TF3AO mun hafa milligöngu með prentun hjá Gennady, UX5UO. Áður hafði Óskar Sverrisson, TF3DC annast innsetningu á LoTW og Yngvi Harðarsson, TF3Y innsetningu á QRZ.

Bestu þakkir til allra viðkomandi.

Stjórn ÍRA.

Landsfélag radíóamatöra í Frakklandi (REF) hefur ákveðið að bjóða radíóamatörum um allan heim opinn aðgang að greinasafni félagsins.

Um er að ræða mikið af áhugaverðu efni, m.a. um fræðin og fjarskiptin, s.s. skilyrðin, loftnet (á HF, VHF og hærri tíðnum), fæðilínur, mismunandi tegundir útgeislunar, fjarskipti um gervitungl, m.a. QO-100 og margt fleira.

Greinasafnið er á frönsku, en einnig má kalla það fram í enskri þýðingu með því að slá inn meðfylgjandi vefslóð. Þess má geta að systurfélag okkar í Frakklandi, L’association Réseau des Émetteurs Français (REF) var stofnað árið 1925.

ÍRA þakkar REF fyrir boðið sem hér með er komið á framfæri við félagsmenn.

Stjórn ÍRA.

https://publications.r-e-f.org/

https://tinyurl.com/FranceREF

Einar Kjartansson, TF3EK hefur náð 1001 stigi í SOTA verkefninu. Þessi frábæri árangur byggist á virkjun alls 186 íslenskra fjallatinda.

SOTA (Summits On The Air) verkefnið var stofnað árið 2002. Málið snýst um að fara á fjöll með fjarskiptatæki og búnað og hafa sambönd við aðra leyfishafa á amatörböndunum. Fjallatindar eru skilgreindir sérstaklega í hverju landi; hérlendis eru þeir alls 910.

Auk Einars, hafa eftirtaldir leyfishafar skráningu með stig á heimasíðu SOTA: TF3DX (212); TF3Y (38); TF3CW (14); TF3GD (8); TF3EO (5); TF3EE (4); TF3WJ (1) og TF8KY (1). Alls hafa 20 TF kallmerki skráningu í gagnagrunni SOTA. Heimasíða: https://www.sota.org.uk/

Egill Íbsen TF3EO, Einar Kjartansson TF3EK og Þórður Ívarsson TF5PX settu kerfið upp hér á landi. Vilhjálmur Þór Kjartansson TF3DX varð fyrstur til að „virkja“ fjallatind á Íslandi samkvæmt verkefninu, þann 1. september 2016 þegar Ísland gerist aðili.

Hamingjuóskir til Einars með árangurinn.

Stjórn ÍRA.

Scandinavian Activity Contrest (SAC) keppnin 2020 á morsi fór fram helgina 19.-20. september s.l. Tvær TF stöðvar skiluðu inn keppnisgögnum.

Samkvæmt bráðabirgðaniðurstöðum (claimed score) eru niðurstöður eftirfarandi:

3. sæti – TF3W (TF3CW op.); einmenningsflokkur, 14 MHz, háaafl.
9. sæti – TF3JB; einmenningsflokkur, 14 MHz, háafl, aðstoð.

SSB hluti keppninnar fer fram helgina 10.-11. október n.k. (nánar auglýst síðar).