Almennt

Jónas Bjarnason, TF2JB, fjallaði m.a. um að nú á tímum væri einfaldara og auðveldara að fara í loftið erlendis.

Jónas Bjarnason, TF2JB, flutti fróðlegt erindi í félagsaðstöðu Í.R.A. fimmtudaginn 7. apríl. Erindið nefndi hann QRV á amatörböndum erlendis? Erindið var með sama heiti og fyrirsögn greinar sem hann skrifaði og birtist í 4. tbl. CQ TF í fyrra (2010). Í meginatriðum var gengið út frá efni sem birtist í greininni, sem og nýju efni úr handriti að framhaldsgrein sem er í vinnslu til birtingar í blaðinu.

Leitast var við að setja fram helstu forsendur núgildandi CEPT reglna (tilmæla), sem gera það m.a. að verkum að íslenskir G-leyfishafar geta farið erlendis og verið QRV á amatörböndum í 50 löndum Evrópu; N-leyfishöfum standa til boða 17 lönd í álfunni (eins og er). Einnig var fjallað um þau lönd utan Evrópu sem hafa tileinkað sér CEPT tilskipanir og þar með opnað landamæri sín gagnvart íslenskum og öðrum evrópskum leyfishöfum. Þá var bent á leiðir til að afla heimilda til að fara í loftið í löndum, sem þar standa utan. Ennfremur var fjallað um íslensku reglugerðina í ljósi umræðuefnisins.

Sveinn Guðmundsson, TF3T og fleiri höfðu áhugaverðar spurningar fram að færa um málefnið.

Stjórn Í.R.A. þakkar Jónasi Bjarnasyni, TF2JB, fyrir vel heppnað erindi og Jóni Svavarssyni, TF3LMN, fyrir myndatökuna.

Hér má finna glærur fyrirlestra http://www.ira.is/itarefni/

Félagsaðstaða Í.R.A. er til húsa að Skeljanesi í Reykjavík. Ljósmynd: Vilhjálmur Í. Sigurjónsson, TF3VS.

Þann 7. apríl s.l. var útbúin sérstök aðstaða vegna uppsetningar á sambyggðri stafavarpa- og internetgátt fyrir skilaboða- og ferilvöktunarkerfið APRS (Automatic Packet Reporting System) í fjarskiptaaðstöðu félagsins í Skeljanesi. Aðstaðan er á sérstöku borði sem sett var upp á milli fjarskiptaborða A og B í stöðvarherbergi. Stafavarpinn (e. digipeter) mun nota kallmerkið TF3RPG og vinna á 144.800 MHz og verður QRV á næstunni. Fyrir er stafavarpi sem staðsettur er í Hraunbæ í Reykjavík og settur var upp til reynslu sumarið 2010 með kallmerkið TF3RPF og verður hann rekinn áfram. Að auki, er rekin sambyggð stafavarpa- og internetgátt af TF8TTY í Reykjanesbæ, sem einnig verður rekin áfram. Ennfremur er fyrirhugað að setja upp APRS stafavarpa á Akureyri.

Meginrök fyrir uppsetningu kerfisins í fjarskiptaaðstöðu Í.R.A., er að tryggja fyrirkomulagið til frambúðar með öruggari samfellu í rekstri kerfisins. Sá hópur félagsmanna, sem einkum stendur að baki APRS verkefninu, eru þeir Jón Þóroddur Jónsson, TF3JA; Ársæll Óskarsson, TF3AO; Haraldur Þórðarson, TF3HP, Samúel Þór Guðjónsson, TF2SUT, Róbert Harry Jónsson, TF8TTY, Þórður Ívarsson, TF5PX og Þór Magnússon, TF3TON. Að auki hafa þeir LA6IM (TF8BK) og TF3WP (DF8WP) komið að verkefninu.

Nánari upplýsingar um APRS: http://en.wikipedia.org/wiki/Automatic_Packet_Reporting_System
Til að fylgjast með umferð: http://aprs.fi/

TF2JB

Henry Arnar Hálfdánarson, TF3HRY, fjallaði um tíðnisviðin frá 600 metrum og neðar. Ljósmynd: TF3LMN.

Henry Arnar Hálfdánarson, TF3HRY, flutti áhugavert og fróðlegt erindi í félagsaðstöðu Í.R.A. fimmtudaginn 31. mars s.l. Erindið nefndi hann Loftnet og útgeislun á lægri böndum. Hann fjallaði að mestu um 500 kHz bandið (600 metrana). Eftir inngang um loftnetafræðina, benti Henry á áhugaverðar loftnetslausnir fyrir leyfishafa sem áhugasamir eru um bandið (og jafnvel um enn lægri bönd), þótt þeir hafi ekki góðar aðstæður til uppsetningar loftneta. Í ljós kom, að margt er hægt að gera í þeim efnum þótt verið sé að kljást við “reactive” loftnet, háa spennu, litla nýtni o.s.frv. Hann hafði ýmsa áhugaverða íhluti meðferðis sem notast til smíða á loftnetum á þessum tíðnum. Henry Arnar svaraði fjölda spurninga í lok erindisins. Alls mættu um 25 manns í Skeljanesið að þessu sinni.

Stjórn Í.R.A. þakkar Henry Arnari Hálfdánarsyni, TF3HRY, fyrir vel heppnað erindi og Jóni Svavarssyni, TF3LMN, fyrir myndatökuna.

Myndin var tekin skömmu áður en erindi hófst á ný eftir kaffihlé. Sjá má umræður og áhuga í hverju andliti.

Margt forvitnilegt kom upp úr tösku fyrirlesara. Valdemar G. Valdemarsson, skoðar einn þeirra hluta.

TF3SA og TF3RF. TF3RF: “Já, spólurnar eru engin smásmíði þegar komið er svona langt niður á böndin…”.

TF2JB

Yngvi Harðarson, TF3Y.

Í.R.A. gengst fyrir síðara hraðnámskeiði vetrardagskrár til kynningar á “Win-Test” keppnisdagbókarforritinu þriðjudaginn 5. apríl n.k. kl. 18:30-21:00. Námskeiðið er tveggja kvölda og verður síðari námskeiðsdagurinn viku síðar, eða 12. apríl á sama stað og tíma. Leiðbeinandi verður sem áður, Yngvi Harðarson, TF3Y. Áhugasamir eru beðnir um að skrá sig sem fyrst á póstfangið “ira hjá ira.is” þar sem fjöldi er takmarkaður og síðast var full bókað. Námskeiðið er ókeypis fyrir skuldlausa félaga Í.R.A.

Win Test forritið.

Hlekkur á heimasíðu Win-Test: http://www.win-test.com/

TF2JB

Henry Arnar Hálfdánarson, TF3HRY, stillir Collins 75S-3C viðtækið í fjarskiptaherberginu. Ljósmynd: TF3AM.

Næsta erindi á vetrardagskrá félagsins verður haldið fimmtudaginn 31. mars n.k., kl. 20:30 í félagsaðstöðunni í Skeljanesi. Fyrirlesari kvöldsins er Henry Arnar Hálfdánarson, TF3HRY, og nefnist erindið Loftnet og útgeislun á lægri böndum. Henry mun einkum fjalla um amatörböndin frá 500 kHz og neðar. Hugmyndin er, að velta fyrir sér “praktískum” lausnum á því hvað meðal radíóamatörinn getur gert á þessum böndum, þar sem verið er að kljást við “reactive” loftnet, háa spennu, litla nýtni o.s.frv. Henry mun fjalla um þann ramma sem takmarkar hvað flestir leyfishafar geta gert í garðinum hjá sér og sýna fram á að í raun er ýmislegt hægt að gera.

Stjórn Í.R.A. hvetur félagsmenn til að taka frá næstkomandi fimmtudagskvöld og mæta stundvíslega í Skeljanesið. Kaffiveitingar verða í boði félagsins.

TF2JB

Vilhjálmur Þór Kjartansson, TF3DX, fjallaði af innlifun um loftnetafræðina og fangaði hugi viðstaddra.

Vilhjálmur Þór Kjartansson, TF3DX, flutti síðari hluta erindis síns um Sendiloftnet á 160 metrum; sjónarmið við hönnun fimmtudagskvöldið 17. mars s.l. Þeir sem lögðu leið sína í Skeljanesið urðu ekki fyrir vonbrigðum frekar en þegar fyrri hluti erindisins var fluttur þann 24. febrúar s.l. Vilhjálmur fór á kostum og beinlínis fangaði hugi viðstaddra með faglegri og áhugaverðri framsetningu. Umfjöllunarefnið, var sem fyrr, sprottið af hönnun hans á sendiloftneti fyrir Þorvald Stefánsson, TF4M á 1,8 MHz.

Vilhjálmur setti efnið þannig fram, að hvorutveggja hentaði byrjendum og þeim sem lengra eru komnir í fræðunum.

Fyrst rifjaði Villi upp helstu niðurstöður úr fyrri hlutanum, síðan hvernig útgeislað svið er í réttu hlutfalli við flatarmálið undir straumferlinum. Það skýrði hvers vegna geislunarviðnám í stuttum loftnetum stígur með lengd þeirra í öðru veldi. Því næst fjallaði hann um raunhæfa straumgleypa og hvernig hallandi vírar í topphatti vinna að hluta gegn straumnum í lóðrétta leggnum. Það leiðir til þess geislunarviðnámið fer að falla aftur ef þeir eru síkkaðir of mikið. Síðan útskýrði Villi kúplað tapsviðnám frá jörð í mótvægisvíra, og hvernig það minnkar þegar þeim er lyft. Hann tók dæmi af 1,8 MHz loftneti TF4M um öll þessi atriði, og sýndi að nóg var að nota 2 víra uppi og aðra 2 niðri ef rétt væri farið að. Mælingar í haust (2010) bentu til að nýtnin væri milli 80 og 90%.

Myndin sýnir aðeins hluta þeirra sem gerðu sér ferð í Skeljanesið þetta fimmtudagskvöld; mæting var alls 28 manns.

Stjórn Í.R.A. þakkar Vilhjálmi, TF3DX, fyrir afar vel heppnað erindi og Gísla G. Ófeigssyni, TF3G, fyrir myndatökuna.

TF2JB