Almennt

Athygli er vakin á að skráning á námskeið Í.R.A. til amatörprófs er opin til 5. febrúar n.k. Námskeiðið hefst þann 12. febrúar n.k. og lýkur með prófi Póst- og fjarskiptastofnunar þann 4. maí. Kennt verður á þriðjudögum og föstudögum kl. 18:30-20:30 í Háskólanum í Reykjavík.

Áhugasamir eru beðnir um að skrá þátttöku á ira (hjá) ira.is Námskeiðsgjald er 14 þúsund krónur fyrir félagsmenn en 19 þúsund krónur fyrir aðra. Inni í því verði fylgja öll námskeiðsgögn. Greiða má gjaldið beint inn á bankareikning Í.R.A. sem er: 0116-26-7783; kennitala: 610174-2809. Beðið er um, að láta fylgja í athugasemdadálki frá hverjum greiðslan er (þ.e. nafn og kennitölu).

Námskeiðgögn verða til afgreiðslu til þeirra sem greitt hafa námskeiðsgjald frá 7. febrúar n.k. í félagsaðstöðu Í.R.A. við Skeljanes eða til sendingar í pósti. Ábyrgðarmaður námskeiðsins fyrir hönd Í.R.A. er Jónas Bjarnason, TF3JB. Tölvupóstfang: jonas (hjá) hag.is / GSM sími: 898-0559.

Stjórn Í.R.A. þakkar forráðamönnum Póst- og fjarskiptastofnunar, forráðamönnum Háskólans í Reykjavík og Prófnefnd Í.R.A. fyrir stuðning og góða aðstoð við undirbúning námskeiðsins.

Næsti viðburður á vetrardagskrá félagsins er stöðutaka í morsi, sem fram fer laugardaginn 2. febrúar n.k. kl. 15:00-17:00 í félagsaðstöðu Í.R.A. við Skeljanes. Þeir Stefán Arndal, TF3SA og Guðmundur Sveinsson, TF3SG, annast viðburðinn.

Félagsmenn geta skráð þátttöku með því að senda töluvpóst á Guðmund. Tölvupóstfang hans er: dn (hjá) hive.is eða haft samband við hann í GSM síma 896-0814. Líkt og áður hefur komið fram, er stöðutakan fyrir alla leyfishafa, þ.e. jafnt fyrir þá sem eru rétt að byrja sem og þá sem lengra eru komnir.

Svipað fyrirkomulag verður og síðast, þ.e. upphitunaræfingar með texta í fimm stafa “grúppum” annarsvegar, og á mæltu máli, hinsvegar. Menn geta valið um að slá textann inn á lyklaborð (tölvu) eða að skrá niður á pappír. Þá er val um að hlusta á sendingarnar í gegnum hátalara eða heyrnartól (og eru menn hvattir til að koma með eigin heyrnartól sem það vilja). Stöðutaka í morsi var síðast haldin þann 13. október s.l. og var mikil ánægja með viðburðinn.

Stjórn Í.R.A. hvetur félagsmenn til að nýta sér þetta tækifæri.

Póst- og fjarskiptastofnunin, PFS hefur nýlega úthlutað eftirtöldum nýjum kallmerkjum:

Stjórn Í.R.A. óskar hlutaðeigandi til hamingju með ný kallmerki.

___________

Kallmerki radíóamatöra

Kallmerkið er einkenni hverrar amatörstöðvar. Engar tvær stöðvar radíóamatöra í heiminum hafa sama kallmerki og er því sérhvert kallmerki einstakt. Öll íslensk kallmerki radíóamatöra byrja á TF sem er alþjóðlegt forskeyti fyrir Ísland samkvæmt úthlutun Alþjóða fjarskiptastofnunarinnar, ITU. Sem dæmi um forskeyti kallmerkja radíóamatöra í öðrum löndum, má nefna í OZ í Danmörku, LA í Noregi og LU í Argentínu.

Íslensk kallmerki eru yfirleitt á bilinu 4-6 stafir að lengd. Þau eru samsett af forskeyti og síðan 1-3 persónubundnum bókstöfum (ath. að stafurinn N bætist aftan við tveggja bókstafa viðskeyti þegar um N-leyfi er að ræða). Landið skiptist í 10 kallsvæði, frá 0-9. Algengasti tölustafur í forskeytum íslenskra kallmerkja er tölustafurinn 3 (höfuðborgarsvæðið) annarsvegar, og tölustafurinn 8 (Suðurnes) hinsvegar. Þannig hafa flest íslensk kallmerki radíóamatöra forskeytin TF3 og TF8.

Uppbygging kallmerkja. Dæmi: TF3IRA. Forskeytið í kallmerkinu TF stendur fyrir Ísland. Tölustafurinn 3 (sem er hluti forskeytisins) hefur landfræðilega tilvísan og merkir að stöðin hafi lögheimili á höfuðborgarsvæðinu. Viðskeytið IRA stendur fyrir Íslenskir radíóamatörar. Í sumum þjóðlöndum hefur tölustafur/tölustafir í forskeyti kallmerkis ekki landfræðilega skírskotun; þau lönd eru þó í minnihluta í heiminum.

Í.R.A. boðar til sérstaks fimmtudagsfundar í félagsaðstöðunni við Skeljanes fimmtudaginn
24. janúar 2013 kl. 20:30. Dagskrá verður sem hér segir:

1. Setning fundar. Andrés Þórarinsson TF3AM, varaformaður Í.R.A.
2. Afhending verðlauna í TF VHF leikunum 2012. Guðmundur Löve TF3GL, umsjónarmaður leikanna.
3. VHF og UHF málefni. Inngangserindi (10-15 mín. hvert): Jón Þ. Jónsson TF3JA, Guðmundur Löve TF3GL, og Benedikt Guðnason TF3TNT.
4. Umræður. Fundarstjóri, Kjartan H. Bjarnason TF3BJ, gjaldkeri Í.R.A.
5. Samantekt umræðna og fundarlok.

Stjórn Í.R.A. hvetur félagsmenn til að mæta tímanlega. Kaffiveitingar í boði félagssjóðs.

Fyrsta Worked All Zones (WAZ) viðurkenningarskjal félagsins (af þremur) barst til félagsins þann
13. desember s.l. Ekki reyndist unnt að koma því í innrömmun þá vegna annríkis á innrömmunarverkstæði félagsins fyrir jólin. Nú hefur verkefnastaðan lagast og er þess að vænta að sækja megi skjalið fljótlega, finna því stað í fjarskiptaherbergi félagsins og negla á vegg, í samráði við Benedikt Guðnason, TF3TNT, stöðvarstjóra.

Það var Mathías Hagvaag, TF3-Ø35, sem hafði veg og vanda af undirbúningi umsóknarinnar en
Jónas Bjarnason, TF3JB (trúnaðarmaður CQ tímaritsins vegna viðurkenningaskjala þeirra hér á landi), yfirfór kort og kom gögnum í hefðbundið umsóknarferli. Ástæða er til að taka fram, að WAZ viðurkenningarskjalið er félagssjóði að kostnaðarlausu, þ.e. CQ tímaritið felldi niður umsóknargjöld, auk þess sem annar kostnaður en án útgjalda fyrir félagssjóð. Viðkomandi eru færðar bestu þakkir.

CQ Worked All Zones Award (WAZ) viðurkenningarskjalið og mismunandi útgáfur þess eru gefnar út til radíóamatöra, sem geta framvísað gögnum sem staðfesta að þeir hafi haft sambönd við stöðvar í sérhverju 40 skilgreindra landssvæða í heiminum (e. zones). WAZ hefur verið til frá því fyrir seinni heimstyrjöld og skipast því í flokk með elstu viðurkenningarskjölum radíóamatöra. Þótt DXCC einingar (e. entities) séu vissulega þáttur sem menn þurfa að hafa í huga þegar unnið er að skjalinu, þá er áherslan fyrst og fremst landfræðileg og í því felst áskorunin. WAZ er því í flokki með erfiðustu viðurkenningarskjölum radíóamatöra sem eru í boði í dag.

Reglur fyrir WAZ hafa verið þýddar á íslensku og má lesa þær með að smella á eftirfarandi hlekk:
http://www.cq-amateur-radio.com/cq_awards/cq_waz_awards/cq_waz_rules_icelandic.pdf

Jón Ágúst Erlingsson, TF3ZA, hefur lagt upp í sex mánaða bifreiðaferðalag um Afríkulönd.
Um er að ræða 16 manna ferðahóp sem ferðast saman og notar uppgerðan 4X4 hertrukk af
gerðinni Bedford MK. Hópurinn lét úr höfn með ferjunni Norröna frá Seyðisfirði í gær, miðviku-
daginn 9. janúar og er takmarkið að enda ferðina í Cape Town í S-Afríku í lok júnímánaðar.

Jón Ágúst hefur í hyggju að vera QRV á amatörböndum á ferðalaginu og er ágætlega birgur af
tækjum og búnaði (en hann er eini leyfishafinn í hópnum). Jón er þegar kominn með leyfisbréf
í eftirtöldum DXCC löndum: CN, 5T, 6W, 3X, TU, 9G, 5V, TY, 5N, TJ, TR, TN, 9Q, 9J, Z2, A2
og ZS. Hann áætlar að verða QRV á 160-6 metrum, bæði á morsi og tali.

Stjórn Í.R.A. óskar Jóni Ágúst góðrar ferðar og hvetur félagsmenn til að fylgjast með merkjum
frá honum á tilgreindum tímum og böndum, sbr. upplýsingar á vefsíðu hans sem sérstaklega
var sett upp vegna ferðarinnar.

Heimasíða ferðarinnar:
http://www.dxacrossafrica.com/about/

Sjá einnig þessa vefslóð:
http://my1stimpressions.com/2013/01/08/vikings-across-africa-across-the-southern-coast-o-iceland/