Archive for category: Fréttir

TF2LL staddur suður í höfum skrifaði á póstlistann í morgun:

Sælir félagar,

ég setti fram spurningu hér á grúppuna fyrir nokkrum mánuðum. Hef pláss á milli mastra ca 25 metra, hvaða loftnet gæti komið til greina. Þá var ég að hugsa um að nýta lengdina sem best og hafa sem flest bönd. Slatti af tillögum komu fram. Niðurstaðan hjá mér var sú að setja saman hjámiðju fæddann dípól. Sem næst plássinu sem er til staðar. En að endingu setti ég saman dípól úr jökla vír sem ég gat vélað út úr TF3IG og 1:4 balun ættuðu frá HRO í usa. 17,38 m og 3,65 m. Pælingin á bak við OFC er jú að hafa sem mestan möguleika á banda fjölda og einnig og ekki síst aðstæður hér um borð í skipinu. Með OFC liggur fæðilínan nánast lóðrétt niður og inn um glugga inn í íbúðina hjá mér. Við loftnetið er svo tengdur blár kassi sem á stendur Flex 3000. Flexinn er með innbyggðan tuner eða loftnetsaðlögunartæki sem margir vilja kalla svo.  Skemmst er frá því að segja að þetta svínvirkar. Flex tækið stillir sig sjálft út í loftnetið og það þarf ekki mikið og ekkert að hugsa um það en ég hef tekið eftir því að útgeislað afl fer ekki mikið yfir 50 wött. Ég var áður með Icom 706 um borð og á gamla skipinu mínu miklu lengra loftnet, nær 100 metrum en það kom mér verulega á óvart hversu þetta loftnet virkar vel. Sem er svo miklu styttra. Þessa stundina er ég staddur fyrir utan Kýpur og er nú þegar búinn að hafa samband við TF stöðvar á 10 metrunum og núna síðast samband við TF3JB á 20 m er hann var í gríðarmikilli “kös” en náði samt að lesa mig.  CW kallinn JB kemur nefnilega ekki oft á SSB og kannski var kösin þess vegna ! En kvað um það. Það sem ég vildi segja að það þarf ekki stór eða merkileg loftnet til þess að komast í loftið. Ekki pæla of mikið í kringumstæðum fram og til baka. Henda út vír og koma sér í loftið. Mig nefnilega rennur grun í að einhverjir eigi kallmerki en komi sér ekki til þess að fara í loftið.Ég hef áður sagt að félagið eigi að styðja nýliða til þess að yfirstíga míkrafónfælnina. Félagið á að styðja við nýliða fram og til baka. En niðurstaðan er: hengja upp vír og koma sér í loftið.
73 de TF2LL

Virka svæðið AR 12192 á sólinni gaus fyrst 24. október með mikilli eldtungu…

AR 12192 er búinn að fá nýtt nafn og heitir núna, þegar bletturinn er kominn aftur í ljós, AR 12209. Bletturinn er ennþá stór og 10 jarðir kæmust fyrir í honum. Bletturinn er 33. að stærð frá því byrjað var að halda skrá um sólbletti á árinu 1874. Á því herrans ári kom Kristján níundi til Íslands og afhenti okkur nýja stjórnarskrá.

TF3EO skrifar í morgun:

Þessi sólblettur kom fram “vinstra megin” á sólardisknum og er búinn að fara næstum  einn hring á sólinni. Hann er nýkominn fram “jarðarmegin” á sólinni aftur og styttist í að hann miði þráðbeint á jörðu. Hann hefur ekki framkallað neitt ennþá en það hlýtur að vera tímaspursmál, en vonum það besta.

vísun á umfjöllun risasólblettur og önnur umfjöllun

Sælir félagar.

Þann 18.apríl 2013, skilaði nefnd ÍRA um fjaraðgang af sér skýrslu um, sem nefnd var áfangaskýrsla, þar sem hún fjallaði einvörðungu um fjarstýringu íslenskra leyfishafa á eigin stöð eða stöð annars radíóamatörs hér á landi. Stjórn ÍRA hafði áður beðið þá Vilhjálm Kjartansson, TF3DX,  Kristján Benediktsson, TF3KB og Yngva Harðarson, TF3Y að vinna í málinu. Í greinargerð til stjórnar  ÍRA, mæltu  nefndarmenn með því að skýrslan yrði kynnt PFS. Skýrslan var send þangað 21.11. 2014.

Svohljóðandi svar barst 03.12.2014:

Sæll Bjarni

Póst- og fjarskiptastofnun (PFS) hefur farið yfir áfangaskýrslu 1 frá nefnd ÍRA um stefnumótun í fjaraðgangsmálum dags 18.4.2013. PFS er sammála niðurstöðum nefndarinnar í skýrslunni að öllu leyti og er radíóáhugamönnum því hér með heimilað að starfa skv. niðurstöðum skýrslunnar.

Með kveðju,

Skýrsla nefndar um fjaraðgang má finna á http://www.ira.is/itarefni/

Á sama stað má finna staðfestingarbréf frá PFS.

Eftirfarandi barst frá Sigurbirni, TF3SB:
Heinz George Stroebel, TF3XG / WA9UZM, Leyfi nr. 238, sem var mörgum íslenskum amatörum af góðu kunnur, er látinn. George var fæddur í Þýskalandi 18. ágúst 1931. Hann lést 17. nóvember 2014. Útförin hefur farið fram í kyrrþey. Eftirlifandi er eiginkona hans Ásdís Lillý Snorradóttir, TF3LST. Við vottum Ásdísi og aðstandendum okkar dýpstu samúð.
Bjarni, TF3GB, ritari ÍRA.

ÍRA hefur sótt um og fengið framlengt sérheimildum íslenskra radíóamatöra til notkunar eftirtalinna tíðnisviða:

1850 – 1900 KHz    til notkunar í tilgreindum alþjóðlegum keppnum samkvæmt töflu undir liðnum “Tíðnisvið radíóamatöra” á heimasíðunni. Gildir til 31.12. 2015.

5260 – 5410 KHz    60 m bandið. Gildir til 31.12. 2016.

70 – 70,2 MHz         4m bandið.  Gildir til 31.12. 2016.

Skilmálar eru þeir sömu og áður, en þá má sjá undir liðnum: “Félagið/Tíðnisvið radíóamatöra” á heimasíðunni.

Þeir sem hyggjast nýta sér heimildirnar þurfa að sækj um til PFS fyrir nýja tímabilið.

Bjarni, TF3GB, ritari ÍRA.