,

Fjarskiptaáætlun 2011-2014 og 2011-2022

Póst- og fjarskiptastofnun kynnti á vef sínum í dag, 27. október, um drög að nýrri fjarskiptaáætlun sem eru til umsagnar hjá innanríkisráðuneytinu, en ráðherra hefur ákveðið að leggja nýja fjarskiptaáætlun fyrir Alþingi á 140. löggjafarþingi nú í haust. Verkefnið var unnið í innanríkisráðuneytinu með aðkomu Póst- og fjarskiptastofnunar, auk vinnuhópa úr stjórnkerfinu í umsjón verkefnisstjórnar um endurskoðun fjarskiptaáætlunar.

Hluti framsettra draga varða radíóamatöra, sem skilgreinda fjarskiptaþjónustu, en drögin hafa að öðru leyti mjög víðtæka skírskotun. Frestur til að skila inn athugasemdum er til og með 10. nóvember n.k. Stjórn Í.R.A. mun fjalla um drögin á fundi sínum þann 3. nóvember nk. Sjá nánar meðfylgjandi texta sem fenginn er á heimasíðu ráðuneytisins:

____________


Innanríkisráðherra hefur ákveðið að leggja nýja fjarskiptaáætlun fyrir Alþingi á 140. löggjafarþingi nú í haust. Verkefnið var unnið í ráðuneytinu með aðkomu Póst- og fjarskiptastofnunar, auk vinnuhópa úr stjórnkerfinu í umsjón verkefnisstjórnar um endurskoðun fjarskiptaáætlunar.

Hér á vefnum er að finna drög að þingsályktun um tólf ára fjarskiptaáætlun og drög að fjögurra ára framkvæmdaáætlun. Fjarskiptaáætlun mun ná til sama tímabils og samgönguáætlun, þ.e. tólf ára stefnumótunar auk fjögurra ára framkvæmdaáætlunar. Efnistökum áætlunarinnar er ætlað að vera víðtækari en í fyrri fjarskiptaáætlun sem gilti fyrir árin 2005-2010 og er meðal annars fjallað um póstmál, rafræn samskipti, stafræna miðlun og samspil allra þessara málaflokka. Grundvallarmarkmið fjarskiptaáætlunar verða hliðstæð markmiðum samgönguáætlunar sem ásamt samræmdum tímasetningum greiða fyrir samþættingu við hana. Þessi markmið eru.

Aðgengileg og greið fjarskipti
Hagkvæm og skilvirk fjarskipti
Umhverfisvæn fjarskipti
Örugg fjarskipti.

Innanríkisráðuneytið auglýsir hér með þingsályktun um tólf ára fjarskiptaáætlun fyrir árin 2011-2022 og þingsályktun (framkvæmdaáætlun) til fjögurra ára frá 2011-2014. Frestur til að skila inn athugasemdum er til og með 10. nóvember 2011. Athugasemdir skal senda bréfleiðis á innanríkisráðuneytið, Sölvhólsgötu 7, 150 Reykjavík eða með tölvupósti á netfangið postur@irr.is.

____________


Vefslóð fyrir drög að þingsályktun um fjarskiptaáætlun fyrir 2011-2014 og fjarskiptaáætlun 2011-2022:

http://www.innanrikisraduneyti.is/frettir/nr/27320

/by
,

Ný tíðni fyrir TF8SDR, 144.550 MHz

Ari Þór Jóhannesson, TF3ARI.

Í samtali við Ara Þórólf Jóhannesson, TF3ARI, á þriðjudag (25. október) kom m.a. fram, að þeir Sigurður Smári Hreinsson, TF8SM, hafi sett upp Windom loftnet (í stað eldra LW loftnets) til viðtöku merkja suður á Garðskaga um s.l. helgi. Truflanir í viðtöku eru þó enn í ca. S5 á mæli og á eftir að finna upptök þeirra. Ari sagði, að búið væri að skipta um viðskiptaaðila fyrir nettengingu en nýlega var gerður samningur við Nova. Þá hefur verið sett upp loftnet fyrir TF8SDR á 2 metra bandinu sem það var til á staðanum. Um er að ræða 5/8-? loftnet sem áður hefur líklega verið notað fyrir radíóvita á vegum félagsins þar á staðnum.

Í ljósi ábendinga þess efnis, að „packet” merki hafa verið send út á vegum Í.R.A. undir kallmerkinu TF3NOS í gegnum tíðina á tíðninni á 144.650 MHz (sem TF8SDR hafði fengið úthlutað) hafði stjórn félagins frumkvæði að því að hafa samband við Ara, með tillögu um nýja tíðni í stað þeirrar fyrrnefndu. Félagið gerði tillögu um tíðnina 144.550 MHz og gerði hann ekki athugasemdir við það. Í framhaldi var erindi sent til Póst- og fjarskiptastofnunar með ósk um úthlutun á 144.550 MHz fyrir TF8SDR. Erindi barst frá stofnuninni í dag (26. október) það sem það mál gekk eftir. Ari sagði, að hugmyndin væri að hefja 2 metra sendingarnar með merkjum af 3637 kHz jafnvel um komandi helgi eða strax og aðstæður leyfa.

Stjórn Í.R.A. þakkar Ara gott samstarf og óskar honum góðs gengis með áhugavert verkefni.

/by
,

Truflanir í segulsviðinu

Mælingahús háloftadeildar Raunvísindastofnunar H.Í. í Leirvogi. Mælingar hafa verið gerðar frá árinu 1957.

Miklar truflanir eru í segulsviðinu um þessar mundir. Þær hófust í gær (24. október) um kl. 18:30, sbr. meðfylgjandi línurit. Á línuritunum
hér fyrir neðan má sjá stöðuna kl. 09 í morgun (25. október). Spáin er þess efnis að truflanir haldi áfram í dag og að ójafnvægis muni
gæta jafnvel fram á fimmtudag (27. október).

Efsta ritið (Z) sýnir styrkleika segulsviðs jarðar í stefnu lóðrétt niður, næsta línurit (H) sýnir láréttan styrkleika sviðsins og neðsta línuritið
(D) sýnir áttavitastefnuna. Z og H eru sýnd í einingunum nanotesla (nT), en D er sýnt í gráðum sem reiknast sólarsinnis frá norðri
um austur upp í 360°. Ef D er t.d. 346° merkir það að misvísun áttavitans í Leirvogi er 346° til austurs eða 14° til vesturs (360-346=14).
Meðalmisvísun á Reykjavíkursvæðinu er um 2° meiri til vesturs og væri þá um 16° V í þessu dæmi.

Gögn eru endurnýjuð á tíu mínútna fresti. Sjá nánar vefslóð: http://www.raunvis.hi.is/~halo/leirvogur.html

/by
,

Vilhjálmur TF3DX verður með fimmtudagserindið

Vilhjálmur Þór Kjartansson, TF3DX.

Vilhjálmur Þór Kjartansson, TF3DX, flytur fimmtudagserindið á vetrardagskrá félagsins í þessari viku, þann 27. október n.k. Umræðuefnið er „Merki og mótun” og byggir á kennsluefni sem hann útbjó fyrir námskeið Í.R.A. til amatörprófs s.l. vor.

Það er vaxandi gróska í merkjafræðilegri þróun amatörfjarskipta, og því heppilegra að leggja fremur áherslu á grunnhugmyndir þeirra fræða en sögulega röð mótunaraðferða. Vilhjálmur mun t.d. útskýra DSB-SC (e. double sideband, suppressed carrier) á undan AM, en ekki öfugt, eins flestir hafa alist upp við til þessa.

Stjórn Í.R.A. hvetur félagsmenn til að fjölmenna. Kaffiveitingar verða í boði félagssjóðs.

/by
,

Frábær árangur hjá TF3DX úr bílnum

Vilhjálmur og John við bifreið Vilhjálms (sjá aðlögunarrásina fyrir 160m fyrir miðri framrúðu). Ljósmynd: TF3LMN.

Vilhjálmur Þór Kjartansson, TF3DX, hefur náð þeim frábæra árangri úr bílnum að undanförnu, að hafa haft sambönd við stöðina T32C, sem er staðsett á Austur-Kiribati í norðurhluta Line eyjaklasans í Kyrrahafi, á samtals 9 böndum, þ.e. 1.8 – 3.5 – 7 – 10 – 14 – 18 – 21 – 24 og 28 MHz. Vilhjálmur sagði, aðspurður, að þetta hafi verið mjög spennandi og bætti við, “…að hefði stöðin mín haft 6 metra bandið, hefði verið mjög gaman að prófa þar líka…”. Þess má geta, að fjarlægðin á milli TF og T32 er tæplega 12 þúsund kílómetrar. Öll samböndin voru höfð á morsi.

Árangur Vilhjálms er einkar athyglisverður hvað varðar lægri böndin, þ.e. 3.5 MHz og 1.8 MHz þar sem sambönd úr farartækjum á þessum tíðnisviðum eru erfið enda bylgjulegndin 80 metrar annarsvegar og 160 metrar hinsvegar og loftnet þar af leiðandi stutt og tapsmikil. Loftnet Vilhjálms eru heimasmíðuð og hann hefur sjálfur sagt að sér reiknist til að nýtnin sé um 2,5% á 160 metrum sem er mjög góð útkoma.

Hann segir nánar um loftnetsbúnaðinn: “Ég er með 2 toppa í takinu, sá styttri er tæpir 2m og sá lengri 3,3m. Með þeim styttri sleppur spólan ein í aðlögunartækinu niður á 160 m, ekki nauðsynlegt að hafa spólu úti þó það sé betra. Með þeim lengri er loftnetið 4,75 m að lengd og nær upp í 6 m yfir götu, um 0,3 m betur ef spóla er í stönginni. Það eru smellitengi á þessu öllu, svo það tekur bara augnablik að breyta loftnetinu”. Þess má geta að lokum, að Vilhjálmur notar 100W stöð í bílnum. Sjá nánar bráðskemmtilega grein eftir hann (með ljósmyndum) um TF3DX/M sem birtist í 1. tbl. CQ TF 2010, bls. 9-11.

Stjórn Í.R.A. óskar Vilhjálmi til hamingju með árangurinn.

Vefslóð fyrir T32C DX-leiðangurinn: http://www.t32c.com/

 

/by
,

Gervitunglafjarskipti, kynningardagur laugardag 22. okt

Kristinn Andersen, TF3KX; Sveinn Bragi Sveinsson, TF3SNN; Erling Guðnason, TF3EE og Jón Ingvar Óskarsson, TF1JL.

Vetrardagskrá félagsins hefur gengið með afbrigðum vel það sem af er. Næsti viðburður fer fram á morgun, laugardaginn 22. október í Skeljanesi, kl. 14-17. Þá verður Benedikt Sveinsson, TF3CY, með kynningu á því hvernig DX sambönd fara fram um gervitungl og býður upp á sýnikennslu frá félagsstöðinni, TF3IRA. Þetta er spennandi viðburður, þar sem stöðin er nú að fullu QRV til fjarskipta á 2 metrum og 70 sentímetrum.

Stutt yfirlit yfir gervihnattabúnað TF3IRA:
VHF/UHF hringpóluð Yagi loftnet frá M2. VHF loftnetið netið er af 2MCP14 gerð; 14 staka með 10.2 dBdc ávinningi. UHF netið er af 436CP30 gerð; 30 staka með 14.15 dBdc ávinningi. Rótor er Yaesu G-5400B (í láni frá TF3BJ) er sambyggður fyrir lóðréttar og láréttar stillingar. Með honum fylgir fjölstillikassi (e. Elevation Azimuth Dual Controller) stýranlegur frá tölvu. VHF og UHF formagnarar eru frá SSB-Electronic GmbH. Mögnun er 20 dB/0,8 dB suðhlutfall á VHF og 20 dB/0,9 dB suð-hlutfall á UHF. Kenwood TS-2000 sendi-/móttökustöð félagsins er notuð til fjarskipta um gervitungl. Hún 100W á 144-146 MHz og 50W á 430-440 MHz.

Fyrir þá sem ekki eiga heimangengt á morgun, verður viðburðurinn endurtekinn laugardaginn 12. nóvember n.k.

/by
,

Vel heppnað fimmtudagserindi TF3ZA

Jón Ágúst, TF3ZA, sagði að flest sambönd frá JX50 hafi verið höfð á 30, 20 og 17m böndunum.

Jón Ágúst Erlingsson, TF3ZA, flutti afar fróðlegt erindi félagsaðstöðu Í.R.A. í Skeljanesi þann 20. október í máli og myndum
um 10 daga DX-leiðangur sem farinn var til Jan Mayen fyrri hluta júlímánaðar í sumar (2011). Jón var í hópi átta leyfishafa frá
alls sex þjóðlöndum, Bandaríkjunum, Grikklandi, Íslandi, Póllandi, Sviss og Svíþjóð. Kallmerkið JX5O var starfrækt og þrátt
fyrir tiltölulega óhagstæð skilyrði náðu leiðangursmenn alls 17.844 samböndum.

Erindið var vel sótt (28 félagar) líkt eins og sjá má á meðfylgjandi myndum. Margt fróðlegt kom fram, m.a. að meðalhitinn
var um 2°C og kaldara að nóttu til. Veður var yfirleitt rólegt og rakt, en gat verið það rysjótt sem hvorutveggja hafði í för með
sér sandrok og kulda. Tjöldin fuku t.d. ofan af leiðangursmönnum þrisvar sinnum. Jón Ágúst sýndi mikinn fjölda mynda og
fengu fundarmenn góða hugmynd um náttúru eyjarinnar og vakti athygli hversu “æpandi” gróðursnauð hún er. Leiðangurinn
tók sér far með skútu frá Íslandi og tók siglingin um 50 klukkustundir. Aðspurður um hvort hvítabirnir væru ekki algengir á
Jan Mayen, svaraði Jón því til að svo hafi ekki verið undanfarna áratugi. Á hinn bóginn væri ekki hægt að útiloka neitt og
kvaðst hann hafa verið feginn að leiðangurinn hafi verið laus við slíka gesti á meðan dvalið var á eyjunni.

Líkt og áður segir, voru skilyrði fremur léleg, sbr. að aðeins náðust 4 QSO á 6m, ekkert á 10m, 1 QSO á 12m (við TF3EE),
auk þess sem lægri böndin (80 og 160m voru lokuð). 20m bandið gaf bestan árangur, svo og 30m og 17m, auk nokkurra
opnana síðdegis á 15m. Leiðangurinn tók með sér 4 Icom sendistöðvar og 2 Yaesu sendistöðvar, auk 400W RF magnara.
Einnig 2 ljósavélar og 300 lítra af eldsneyti. Loftnet voru 2 HexBeam og lóðrétt stangarloftnet (e. verticals).

Stjórn Í.R.A. þakkar Jóni Ágúst TF3ZA fyrir ánægjulega og fróðlega kvöldstund í Skeljanesi.

Fram kom m.a. að alls náðust 35 QSO við TF-stöðvar, þar af eina sambandið sem náðist á 12 metra bandinu.

Fram kom m.a. að tjöld fuku ofan af leiðangursmönnum í þrígang í miklu hvassviðri og kulda, en hitastig var 2°C.

Erindið var vel sótt og ekki voru til sæti handa öllum líkt og greinilega má sjá á myndinni.

/by
,

Jón Ágúst, TF3ZA, verður með fimmtudagserindið

Jón Ágúst Erlingsson, TF3ZA.

Jón Ágúst Erlingsson, TF3ZA, var einn af átta leyfishöfum sem fóru í DX-leiðangur til Jan Mayen sumarið 2011 og starf-
ræktu kallmerkið JX5O. Aðrir leyfishafar (auk Jóns) voru: Stan SQ8X; Vicky SV2KBS/LA7VPA; Bernhard HB9ASZ;
Leszek NI1L; Björn SM0MDG; Tom SQ9C; og Pete SQ9DIE. Þrátt fyrir tiltölulega óhagstæð skilyrði hafði hópurinn alls
17.844 QSO.

Hópurinn sigldi með skútu frá Dalvík og kom til Jan Mayen að morgni 6. júlí. Nokkru fyrr var haldið heim til Íslands á ný
en áætlað var (vegna slæms veðurútlits) og var síðasta sambandið frá JX50 haft þann 14. júlí kl. 14:10. Skútan kom svo
í höfn á Ísafirði tveimur dögum síðar. Hópurinn upplifði ekki einvörðungu slæm skilyrði í stuttbylgjusviðinu (6, 10 og 12
metra böndin voru t.d. einfaldlega lokuð…) heldur lentu þeir einnig í leiðindar veðri (kulda og hvassviðri) með tilheyrandi
erfiðleikum þar sem tjöld hópsins fuku ofan af þeim í þrígang.

Jón Ágúst mun sýna myndir úr leiðangrinum og lýsa því hvernig það er að sigla um borð í skútu til Jan Mayen og þurfa
að taka allt með sér, en hópurinn þurfti að taka með sér allan búnað, þ.m.t. ljósavélar og eldsneyti (en enga þjónustu af
neinu tagi er að fá á eyjunni). Þá mun hann lýsa upplifuninni hvernig það er að starfrækja stöð frá JX landi og lýsa kös-
unum (e. pile-ups) á lægri böndunum. Einnig mun hann lýsa náttúrunni á eyjunni. Þess má geta, að Jón Ágúst er sonur
Erlings Guðnasonar, TF3EE.

Stjórn Í.R.A. hvetur félagsmenn til að fjölmenna. Veglegar kaffiveitingar verða í boði félagsins.

Alls fara átta leyfishafar til Jan Mayen; hér eru fimm þeirra. Jón Ágúst, TF3ZA, er fjórði frá vinstri. Ljósm.: TF3ARI.

Fróðleikur um Jan Mayen. Eyjan er í um 600 km fjarlægð norðaustur af Íslandi, um 500 km frá austurströnd Grænlands
og um 1000 km í vestur frá Noregi. Hún er 55 km á lengd og alls um 370 ferkílómetrar að stærð. Jan Mayen er eldfjalla-
eyja og jöklar þekja um þriðjung hennar. Meðalhitinn í júlí er 5°C og víst ekki óalgengt að hitastigið sé við frostmark um
nætur.

Norski herinn og norska veðurstofan halda úti bækistöðvum á eyjunni og þar búa að staðaldri um 20 manns, en yfir
sumartímann fjölgar, bæði af vísindamönnum sem stunda rannsóknir og tjaldferðalöngum (líkt og DX-leiðangursmönnum).
Nánast engin aðstaða er þó fyrir ferðamenn þannig að ferðamenn þurfa að láta berast fyrir í tjöldum. Norski herinn annast
flug til Jan Mayen frá Bodö í Noregi og er flogið með vistir og búnað ca. á 6 vikna fresti.

/by
,

Vel heppnaður flóamarkaður í Skeljanesi

Vilhjálmur Í. Sigurjónsson, TF3VS, býður upp “pöllurnar” góðu (spaðalykilinn) frá Speed-Paddles U.S.A.

Flóamarkaður Í.R.A. að hausti fór fram sunnudaginn 16. október 2011. Alls mættu yfir 35 manns á viðburðinn sem hófst  stundvíslega kl. 13 og stóð yfir fram til kl. 16. Framboð var ágætt, m.a. notaðar UHF stöðvar, mikið af smíðaefni, íhlutir, kassar til smíða, ýmis mælitæki og margs konar aukahlutir, m.a. frá MFJ og Yaesu, auk loftneta fyrir HF, VHF, UHF og SHF böndin frá Mosley, New-Tronics, M2, WiMo og J-Beam. Þá var ágætt framboð af LCD tölvuskjám og sérhæfðum tölvuhlutum. Óhætt er að fullyrða að þeir sem gerðu viðskipti á flóamarkaðnum hafi undantekningarlaust gert góð kaup.

Hápunktur viðburðarins var uppboð á dýrari hlutum og búnaði sem haldið var stundvíslega kl. 14 og annaðist Vilhjálmur Í. Sigurjónsson, TF3VS, það af einskærri snilld. Alls voru 14 “númer” á uppboðinu og sala með ágætum, en hvað mest var boðið í New-Tronics Hustler 6-BTV stangarloftnet fyrir HF-sviðið og valinkunnar gullhúðaðar “pöllur” (spaðalykil) frá Speed-Paddles. Stórt Mosley TA-53-M 4 staka Yagi loftnet fyrir HF-böndin (sem nýtt) seldist þó ekki, þrátt fyrir sanngjarnt ásett verð og sumir uppboðshlutir seldust jafnvel eftir uppboðið, þegar þeir sem komu seint höfðu náð að kynna sér nánar hlutina, sbr. t.d. nýjan Comtex PS30SW-I 13.8VDC/30A spennugjafa (sem færri fengu en vildu). Stefnt er að því að halda flóamarkað að vori í apríl n.k., en félagið á von á umtalsverðu magni af gefins búnaði, tækjum og íhlutum upp úr áramótunum.

Stjórn Í.R.A. þakkar félagsmönnum fyrir góða þátttöku og Jóni Svavarssyni TF3LMN fyrir myndatökuna.

Margt áhugavert og nýtilegt gat leynst í kössunum. Sigurður Smári Hreinsson, TF8SM, kannar málið.

Jón Gunnar Harðarson, TF3PPN; Haraldur Þórðarson, TF3HP; og Gunnar Svanur Hjálmarsson, TF3FIN.

Guðmundur Ingi Hjálmtýsson, TF3IG; Bjarni Magnússon, TF3BM; og Kjartan H. Bjarnason, TF3BJ.

Andrés Þórarinsson, TF3AM; Vilhjálmur Sigurjónsson, TF3VS; Jónas Bjarnason, TF2JB; og Kjartan H. Bjarnason, TF3BJ, skoða “roller” spólur, einangrara, hverfiþétta og fleira áhugavert.

Gísli G. Ófeigsson, TF3G, gjaldkeri félagsins þótti harður í verðlagningunni, en sanngjarn þegar upp var staðið.

Nokkuð magn var eftir af UHF-stöðvum, borðhleðslutækjum og fleiru.

Hluti af dýrari tækjum og búnaði sem voru til uppboðs á flóamarkaðnum.

Eldri mælitæki og margskonar tæki sem flestallt seldist við vægu verði.

/by
,

Vel heppnað fimmtudagserindi TF3KX

Kristinn Andersen TF3KX flutti erindi um virkan “Faros” forritsins sem býður sjálfvirka vöktun HF-skilyrða.

Fyrsta fimmtudagserindið á vetrardagskrá félagsins 2011 var haldið fimmtudaginn 13. október. Fyrirlesari kvöldsins var Kristinn Andersen, TF3KX, og nefnist erindið: „Faros”; sjálfvirk vöktun HF-skilyrða með radíóvitum. Kristinn útskýrði vel forsendur og nytsemi “Faros” forritsins. Sem dæmi um nytsemi upplýsinganna (en skoða má útbreiðslu eftir tíðnisviðum eftir dögum aftur í tímann) gat hann þess, að við undirbúning fyrir keppnir mætti t.d. skoða skilyrðin eins og þau voru 28 dögum fyrir tiltekna keppni og nota sem vísbendingu um væntanleg skilyrði um tiltekna keppnishelgi. Kerfið notar Windows stýrikerfið (ME, 2000, XP eða Windows 7) og þarf að lágmarki 16 bita hljóðkort ásamt tengingu við viðtæki. Faros” forritið kom fram árið 2006, var hannað af kanadískum radíóamatör, Alex Shovkoplyas, VE3NEA og er ókeypis fyrir radíóamatöra.

Alls eru 18 radíóvitar (dreifðir um heiminn) sem senda upplýsingar, allan sólarhringinn, allt árið um kring.

Faros nemur sjálfvirkt móttekið merki frá radíóvitum NCDXF (Northern California DX Foundation) í 14, 18, 21 24 og 28 MHz tíðnisviðunum. Ekki er þó nauðsynlegt að hafa viðtæki fyrir öll fimm tíðnisviðin, Faros getur hæglega unnið á einu bandi (en ef það á að vakta fleiri, þarf tölva að geta stýrt viðtækinu). Faros ákveður hvort tiltekinn viti næst eða ekki, metur S/N, QSB og leiðartöfina (gefur upp LP eða SP). Forritið heldur utan um gögnin og getur líka stýrt viðtæki sem hefur hefðbundið tölvuviðmót og þannig skannað böndin (öll fimm ef vill). Útsending frá hverjum radíóavita tekur 10 sekúndur. Á þeim tíma er kallmerki sent út ásamt stuttri burðarbylgju, fyrst á 100W, þá 10W, 1W og 0,1W. “NCDXF” vitakerfið hefur verið við lýði í núverandi mynd frá árinu 1995, en lengi vel hlustuðu íslenskir radíóamatörar (sem aðrir) einfaldlega (og gera enn) eftir eyranu. Líkt og fram kemur að ofan, greinir forritið á milli “SP” og “LP” (e. short and long path). Mælingar sýna m.a. styrk merkis yfir suði og styrkbreytigar í %. Þessar upplýsingar (og fleiri) eru settar upp myndrænt fyrir notendur og eru uppfærðar reglulega. Í erindi sínu, sýndi Kristinn sýndi mjög skemmtilegar myndir þessu til staðfestingar. Meðal vöktunarstöðva sem sent hafa upplýsingar inn í kerfið er TF4M.

Ágæt mæting var á fimmtudagskvöldið þrátt fyrir hífandi rok og rigningu (22 félagsmenn). Bestu þakkir til Kristins Andersen, TF3KX, fyrir ánægjulega og fróðlega kvöldstund í Skeljanesi.

G. Svanur Hjálmarsson TF3FIN og Ari Þór Jóhannesson TF3ARI. Þeir eru báðir áhugasamir um Faros.

Kristinn Andersen TF3KX og Bjarni Sverrisson TF3GB veltu fyrir sér hinu ýmsu möguleikum sem bjóðast í Faros.

Óskar Sverrisson TF3DC og Sigurður Óskarsson TF2WIN. Sigurður sagðist hafa áhuga á að koma upp vita frá TF.

/by