,

5 metra og 8 metra böndin á Írlandi

Írskir radíóamatörar hafa fengið tíðnisviðin 30-49 MHz (8 metra) og 54-69.9 MHz (5 metra) til afnota. Heimildin miðast við 50W og er á víkjandi grundvelli. Engar skorður eru settar við tegund útgeislunar.

Landsfélag radíóamatöra á Írlandi, IRTS, hefur sett upp sérstakt bandplan fyrir þessi nýju bönd.

Stjórn ÍRA ræddi þróun tíðnimála hér á landi og á Írlandi á fundi sínum þann 8. ágúst og var m.a. samþykkt að fylgjast náið með þróun mála hjá Írunum.

Sjá nánar upplýsingar um nýju böndin í IARU Region 1 VHF-UHF-µW Newsletter; 16. júlí 2018. Vefslóð:

https://www.iaru-r1.org/images/VHF/newsletters/Newsletter_78.pdf

/by
,

Vita- og vitaskipahelgin 2018

Alþjóðlega vita- og vitaskipahelgin verður haldin 18.-19. ágúst. Hún er tveggja sólarhringa viðburður og er haldin á vegum Ayr Amateur Radio Group í Skotlandi. Miðað er við að flestir sem ætla að verða QRV frá (eða í nálægð við) vita, hafi komið sér fyrir upp úr hádegi á laugardag.

ÍRA stendur ekki fyrir þátttöku í Vitahelginni en hefur stutt við félagsmenn sem vilja starfrækja stöð frá tilteknum vita. Sjá nánari upplýsingar um Vitahelgina í 2. tbl. CQ TF 2018, bls. 45.


Knarrarósviti austan við Stokkseyri. Hópur leyfishafa mun starfrækja stöð þaðan helgina 18.-19. ágúst.

/by
,

Norðmenn fá 1kW á 50 MHz

Ný reglugerð tók gildi í Noregi þann 10. ágúst. Meðal breytinga er heimild til norskra radíóamatöra fyrir allt að 1kW á 50 MHz. Jafnframt breytist aðgangur þeirra að tíðnisviðinu í ríkjandi úr víkjandi. Þeir fá ennfremur heimild til að nota allt að 1kW í EME og MS vinnu á 2 metra, 70 cm og 23 cm böndunum.

ÍRA hefur fylgst náið með breytingunum í Noregi og fagnar árangri NRRL. Samþykkt var á fundi stjórnar félagsins þann 8. ágúst að undirbúið verði erindi til Póst- og fjarskiptastofnunar um samsvarandi uppfærslu íslensku reglugerðarinnar (og fleira) hið fyrsta.

Félagsmenn verða upplýstir um málið jafn óðum.

/by
,

Fréttir af félagsaðstöðu í Skeljanesi

Um verslunarmannahelgina var haldið áfram við að bæta félagsaðstöðuna í Skeljanesi, á milli þess sem TF3IRA var starfrækt í TF útileikunum.

Lokið hefur verið við tiltekt í herbergi á 2. hæð sem sem notast fyrir kortastofu félagsins, vísi að smíðaaðstöðu og bókaskápa fyrir handbækur ÍRA. Félagar hafa á ný góðan aðgang að QSL skáp kortastofunnar.

Þá hefur Yaesu FT-7900E VHF/UHF stöð félagsins hefur verið tengd á ný. Ari Þór Jóhannesson, TF1A, VHF stjóri ÍRA, tengdi stöðina um helgina og uppfærði tíðnir í minnum hennar. TF3IRA er nú QRV á ný á 2 metrum og 70 sentímetrum, en stöðin hafði ekki verið tengd s.l. þrjú ár.

Stjórn félagsins þakkar framlag þeirra TF1A, TF3MH, TF3SB og stjórnarmanna við þessa vinnu og óskar félagsmönnum til hamingju með bætta aðstöðu.

–


TF1A, VHF stjóri ÍRA, stimplar inn tíðnir í Yaesu FT-7900 stöð félagsins. TF3MH fylgist með.


Aðgangur að QSL skáp kortastofunnar og bókaskápum er mjög góður á ný.


Vísir að smíðaaðstöðu. Takið eftir lóðboltanum lengst til hægri á borðinu.

/by
, ,

Tíðnir á útileikum og 60m bandið

Þótt reglur útileikanna séu óbreyttar frá því 2017, þá hefur orðið breyting á heimildum íslenskra radíóamatöra á 60 m bandinu. Áður var hægt að sækja um heimild til Póst og Fjarskiptastofnunar til þess að senda með allt að 100 W afli. Nú þarf ekki að sækja sérstaklega um heimild til þess að nota 60 m bandið, en tíðnisviðið er þrengra en áður og hámarks sendiafl er nú 15 W. Tíðnin 5350 sem oft hefur verið notuð, er t.d. ekki lengur innan þess bands leyfilegt er að senda á, en það er frá 5351.5 til 5366.5 kHz.

Eftir taldar tíðnir má nota á Útileikunum:

160 m 1845 kHz LSB
80 m 3637 kHz LSB
60 m 5363 kHz USB
40 m 7120 kHz LSB

Reglur útileikanna eru á vef ÍRA.
Vefsíða sem nota má til að slá inn logga er hér.
Frekari upplýsingar má finna á glærum frá kynningu í Skeljanesi þann 26. júlí s.l..

/by
,

TF útileikarnir eru um helgina

TF útileikarnir 2018 verða haldnir um verslunarmannahelgina, 4.-6. ágúst.

Hafa má sambönd á 4 böndum: 160 m, 80 m, 60 m og 40 m. Sambönd á hærri tíðnum teljast eins og sambönd á 40 m.

Tilgreind tímabil hér að neðan eru einungis til að þétta virknina en sambönd utan þeirra skrást jafnt til stiga. Þátttökutímabil:

 17-19 laugardag
 09-12 sunnudag
 21-24 sunnudag
 08-10 mánudag

Dagbækur má senda í tölvupósti eða skila með því að fylla út eyðublað á netinu (eik.klaki.net/cgi-bin/utileikar). Frestur til að ganga frá dagbókum rennur út á miðnætti næsta mánudag eftir verslunarmannahelgi.

Nánari upplýsingar í 2. tbl. CQ TF, bls. 44.

Stjórn ÍRA hvetur félagsmenn til þátttöku og óskar þeim góðs gengis.

/by
,

ÞAKKIR TIL FÉLAGSMANNA

Margir hafa haft samband eftir að 2. tbl. CQ TF kom út og þakkað fyrir blaðið.

Gjarnan er um leið spurt um vefslóð á 1. tbl. sem kom í apríl, og er hún birt neðar á síðunni.

Næsta CQ TF (3. tbl. 2018) kemur út þann 7. október n.k. og er síðasti skiladagur efnis 22. september.

Stjórn ÍRA er hvatning að finna fyrir þessum jákvæðu viðbrögðum og þakkar stuðninginn.

Við munum halda áfram að gera okkar besta.

73, Jónas Bjarnason, TF3JB, formaður.

http://www.ira.is/wp-content/uploads/2018/04/cqtf_32arg_2018_01tbl.pdf

http://www.ira.is/wp-content/uploads/2018/07/cqtf_32arg_2018_02tbl.pdf

 

/by
,

Vel heppnuð laugardagsopnun

Laugardagsopnum var í Skeljanesi 28. júlí. Ari Þórólfur Jóhannesson, TF1A, mætti á staðinn með mælitæki. Byrjað var á að rannsaka skemmdan kóaxkapal. Með því að nota Rigexpert AA-1400 loftnetsgreini tókst fljótt að staðsetja bilunina. Þá voru sérstaklega tekin til skoðunar loftnet á VHF/UHF handstöðvum. Í ljós kom að loftnet handstöðva frá þekktum framleiðendum reyndust í lagi, en loftnet á kínverskum handstöðvum þörfnuðust styttingar við og beitti Ari klippunum af nákvæmi. Ávinningur af klippingunni var staðreyndur með samanburðarmælingum – fyrir og eftir.

TF3LM lýsti þessu ágætlega á FB í dag: „Besta (styttra) loftnetið fyrir Baofeng stöðina á amatörtíðni er sem fyrr Kenwood loftnet en ef lengd er ekki vandamál er það Nagoya 771. Á 4X4 rásunum með Standard Horizon HX400 stöðinni var silfurlita Nagoya 701 best og „original“ loftnetið kom næst, 2 dB neðar. „Original“ netið var langbest á endurvarparásunum. Það var upp og ofan hvað gerðist ef maður setti lausan míkrófón á stöðvarnar. Á Baofeng stöðinnni jókst aflið út um 1-2 dB en á HX400 töpuðust stundum allt að 3 dB. Þessar mælingar voru staðfestar í dag niðri í Skeljanesi hjá ÍRA. Þar var notuð ICOM IC-9100 heimastöð og var notast við hugbúnað frá ICOM, RS-BA1 með fjarstýringu frá heimastöðinni sem var staðsett í Breiðholti. Svo var sent frá Skeljanesi, en það eru 6,7 Km á milli staða“.

Mæting var annars góð, alls 19 félagar. Viðburðurinn hafði verið  auglýstur frá kl. 14 en þeir fyrstu mættu upp úr kl. 13 og var staðurinn yfirgefinn kl. 17. Á milli mælinga var í boði ilmandi Lavazza kaffi og vínarbrauðslengjur frá Björnsbakaríi. Því miður hafði sá sem þetta ritar gleymt að hlaða myndavélarrafhlöðuna þannig að myndir fylgja af færri en fleirum að þessu sinni. Bestu þakkir til Ara, TF1A, fyrir áhugaverðan laugardag í Skeljanesi.

Frá vinstri (sitjandi): TF3MH, TF1A og TF3DT. Frá vinstri (standandi): TF3PW, TF3LM, TF3-Ø33, TF1OL og TF3EE. Ljósmynd: TF3JB.

/by
,

LAUGARDAGUR Í SKELJANESI

Opið verður í Skeljanesi laugardaginn 28. júlí frá kl. 14:00. TF1A mætir á staðinn með mælitækin.

Menn eru velkomnir með VHF/UHF handstöðvar og fá mælingu til fullvissu um gæðin.

Verkefnið er, að komast að því fyrir hvaða tíðni það loftnet er sem fylgir með stöðinni. Sumum kínverskum handstöðvum fylgja t.d. loftnet sem eru merkt 136-174 MHz. Það þýðir yfirleitt að þau þarf að „klippa“ fyrir amatörbandið vegna þess að þau koma stillt fyrir lægstu tíðnina (136 MHz). TF1A verður með sérstakan búnað til að klippa loftnetin, auk þess að gera tæknilegar mælingar á stöðvunum.

Heitt verður á könnunni.

 

Mynd frá vel heppnuðum mælingadegi í Skeljanesi 30. júní s.l. Á myndinni eru þeir TF3LM, TF1OL og TF1A, sem stjórnaði aðgerðum. Ljósmynd: TF3JB.

/by
,

TF útileikarnir, kynning TF3EK.

Einar Kjartansson, TF3EK, umsjónarmaður leikanna, mætti í félagsaðstöðuna í Skeljanesi 26. júlí og kynnti reglurnar, en TF útileikarnir verða haldnir um verslunarmannahelgina, 4.-6. ágúst n.k.

Hann fór vel yfir reglurnar sem voru uppfærðar fyrir leikana í fyrra. Hann útskýrði m.a. stigagjöf og margfaldara, en margfaldararnir (e. Maidenhead locator) eru notaðir til að reikna endanlegan stigafjölda. Þá kynnti Einar loftnetalausnir sem henta vel fyrir lægri böndin í útileikunum og sýndi myndir af hentugum loftnetum sem hann hefur sjálfur notað í leikunum.

Hann benti á, að dagbækur má senda í tölvupósti eða skila með því að fylla út eyðublað á netinu (eik.klaki.net/cgi-bin/utileikar). Frestur til að ganga frá dagbókum rennur út á miðnætti næsta mánudag eftir verslunarmannahelgi.

Töluverðar umræður urðu eftir kynninguna og svaraði Einar greiðlega framkomnum spurningum. Þeim félögum sem ekki áttu heimangengt á kynninguna er bent á grein hans í 2. tbl. CQ TF 2018 (bls. 44).

 

Einar Kjartansson, TF3EK, útskýrir reglur TF útileikana í Skeljanesi 26. júlí. Arnþór Wilhelm Sigurðsson, TF3AWS, fylgist með af áhuga. Ljósmynd: TF3JB.

/by