,

Endurvarpinn TF1RPB í Bláfjöllum QRV á ný

Hustler G6-144B loftnetið sem tengt er við TF1RPB. Ljósmynd: TF3WS.

TF1RPB (“Páll”) varð QRV á ný frá Bláfjöllum í dag, 9. nóvember, um kl. 13:00. Sigurður Harðarson, TF3WS, lagði á fjallið í morgun og tengdi Zodiac endurvarpann á ný. Hann hefur verið endurforritaður hvað varðar útsendingartíma (e. time-out) og er hann nú stilltur á 4 mínútur. Til upprifjunar eru vinnutíðnir endurvarpans þessar: 145.150 MHz RX / 145.750 MHz TX.

Í framhaldi uppsentingarinnar, voru gerðar prófanir, m.a. við Heimir Konráðsson, TF1EIN, sem var staddur í bíl í Hveragerði, Jónas Bjarnason, TF2JB, á Hvanneyri í Borgarfirði (heimastöð) og Ara Þór Jóhannesson, TF3ARI, í Reykjavík (heimastöð). Prófanirnar komu mjög vel út.

Stjórn Í.R.A. færir Sigurði Harðarsyni, TF3WS, sérstakar þakkir fyrir frábæra aðstoð.

/by
,

Loksins auðvelt að panta prentun á QSL kortum

Ársæll Óskarsson, TF3AO.

Ársæll Óskarsson, TF3AO, gerðist fyrir nokkru fulltrúi UX5UO Print prentsmiðjunnar í Úkraínu hér á landi. Prentsmiðjan er í eigu Gennady V. Treus, UX5UO, sem hefur verið leyfishafi frá 1967. Gennady segir á heimasíðu fyrirtækisins http://www.ux5uoqsl.com/ að hann hafi prentað QSL kort fyrir alls 11.830 mismunandi kallmerki í 300 DXCC löndum (m.v. 1.11. s.l.).

Í nýlegu símtali við Sæla kom fram, að hann mun bjóða mönnum að panta hjá sér kort og greiða í íslenskum krónum. Dæmi úr verðlista:

Teg. Bureau: Framhlið: 2 litir: rauður/svartur, blár/svartur eða grænn/ svartur. Bakhlið: Auð. Verð: 36 EUR/1000; ca. pr. stk. 7,85 IKR.
Teg. Ecomic: Framhlið: Litur með mattri áferð. Bakhlið: Grátt letur eða auð. Verð: 49 EUR/1000; ca. pr. stk. 10,51 IKR
Teg. Luxury: Framhlið: Litur með glans áferð. Bakhlið: Grátt letur eða auð. Verð: 59 EUR/1000; ca. pr. stk. 12,55 IKR.

Innifalið í áætluðu verði er 25,5% virðisaukaskattur og flutningur til Íslands. Verð er miðað við gengi EUR kr: 155.

Þetta er þjónusta sem hefur vantað hér á landi og á Sæli þakkir skildar fyrir framtakið.

/by
,

Þátttakan frá TF í CQWW SSB DX keppninni um s.l. helgi

Sigurður R. Jakobsson, TF3CW, náði frábærum árangri í CQWW SSB DX keppninni sem haldin var helgina 30.-31. október s.l. Hann hafði nær 3.200 QSO, 36 svæði og 160 DXCC einingar á 27 klst. þátttöku á 14 MHz. Hann vann frá eigin QTH í Garðabæ, notaði QRO afl og 4 stika Yagi einsbandsloftnet í bylgjulengdar hæð. Niðurstaðan (e. claimed score) er rúmlega 1 milljón stiga. Þetta er frábær árangur, ekki síst þegar litið er til þess hve skilyrðin á bandinu versnuðu þegar leið á síðari daginn. Hamingjuóskir til Sigurðar með árangurinn.

Aðrar TF stöðvar sem vitað er að hafi tekið þátt í keppninni eru: TF1AM, TF2JB, TF2LL, TF3AO, TF3IG, TF3SG, TF3Y, TF5B og TF8GX. Af þeim höfðu fjórar stöðvar skilað inn keppnisdagbókum í eftirmiðdaginn í dag (laugardag): TF3AO (15m, QRO afl, 37.931 stig); TF3IG (öll bönd, QRO afl, 15.456 stig); TF3SG (160m, QRO afl, 84.360 stig); og TF3Y (öll bönd, QRO afl, 310.284 stig). Samkvæmt þessu hafa a.m.k. 9 TF stöðvar tekið þátt í keppninni.

Tæpar þrjár vikur eru í CW-hluta keppninnar 2010 og verður hún haldin helgina 27.-28. nóvember n.k.

/by
,

Vel heppnað fimmtudagskvöld í Skeljanesi

Það kom þegar í ljós við upphaf erindisins að TF3ARI bjó bæði yfir reynslu og þekkingu á umfjöllunarefninu.

Þrátt fyrir frostkalt kvöld í Reykjavík fimmtudaginn 4. nóvember 2010, mættu 22 leyfishafar í félagsaðstöðu Í.R.A. í Skeljanesi til að hlýða á erindi Ara Þórólfs Jóhannessonar, TF3ARI, um gervitungl radíóamatöra. Þetta yfirgripsmikla efni var sérlega vel afgreitt frá hendi Ara og þegar í upphafi var ljóst að þar fór maður sem talaði af reynslu og þekkingu á umfjöllunarefninu. Ari fjallaði m.a. um helstu gervihnetti sem senda má í gegnum frá Íslandi og benti á sérstöðu okkar (hvað varðar tilgreinda gervihnetti) til samskipta annarsvegar við Evrópustöðvar og hins vegar við stöðvar í Norður-Ameríku.

Þar sem ekki hefur verið mikil virkni frá Íslandi undanfarin misseri, segir hann mikinn áhuga vera á samböndum við TF stöðvar sem eru QRV um gervihnetti. Ari sýndi m.a. netta 5W handstöð með ca. 40 cm löngu loftneti af gerðinni TG-UV2 frá Quansheng, sem hann hefur notað til að hafa DX sambönd um AO-51 gervihnöttinn. Hann sýndi jafnframt áhugavert handloftnet sem lítur út eins og regnhlíf og brjóta má saman þannig að lítið fer fyrir þegar það er ekki í notkun (sjá mynd 1). Erindið er góður undirbúningur yfir þá félagsmenn sem hafa hug á að verða QRV gegnum gervihnetti og/eða hafa í hyggju að sækja verkleg námskeið sem eru framundan á vetrardagskránni um “Hvernig sambönd eru höfð um gervitungl”.

Bestu þakkir til Ara fyrir ánægjulega og fróðlega kvöldstund.

Höskuldur Elíasson, TF3RF; Guðmundur Ingi Hjálmtýsson, TF3IG; Sigurður Óskar Óskarsson, TF2WIN; Jón Gunnar Harðarson, TF3PPN; Vilhjálmur Í. Sigurjónsson, TF3VS; Matthías Hagvaag, TF3-035; Reynir Björnsson, TF3JL; og Einar Ívar Eiríksson, TF3ZE.

Jón Þóroddur Jónsson, TF3JA; Benedikt Sveinsson, TF3CY; Haraldur Þórðarson, TF3HP; Guðmundur Sveinsson, TF3SG; og Sveinn Bragi Sveinsson, TF3SNN.

Umræður héldu áfram í kaffihléi. Frá vinstri: Ari Þórólfur Jóhannesson, TF3ARI; Vilhjálmur Í. Sigurjónsson, TF3VS; Einar Ívar Eiríksson, TF3ZE; Jón Gunnar Harðarson, TF3PPN; og Samúel Þór Guðjónsson, TF2SUT.

TF2JB

/by
,

TF3ARI verður með fimmtudagserindið

Ari Þór Jóhannesson, TF3ARI. Ljósmyndin er tekin í janúar s.l. er hann flutti vel heppnað erindi um hvernig fjarstýra má HF stöð milli heimsálfa yfir netið. Ljósmynd: TF3LMN.

Næsta fimmtudagserindi á vetrardagskrá félagsins verður haldið fimmtudaginn 4. nóvember n.k. kl. 20:30. Fyrirlesari kvöldsins er Ari Þór Jóhannesson, TF3ARI og nefnist erindið “Fjarskipti um gervitungl radíóamatöra”.

Ari hefur verið QRV á VHF/UHF tíðnum um gervihnetti radíóamatöra um árabil og hefur m.a. nýlega gert áhugaverðar tilraunir með DX-sambönd með einfaldri 5W handstöð á FM tegund útgeislunar um Amsat-OSCAR 51 gervitunglið. Hann mun m.a. fjalla um helstu nýjungar í þessum efnum, svo sem nýja kínverska tunglið sem er QRV 2-3 klst. á dag yfir Evrópu, fyrirbærið “Link budget” sem veitir áhugaverða sýn á hvers vegna loftnet gervitungla eru ekki höfð stærri en raunin er (þ.e.með meiri ávinning). Þá mun hann útskýra hvers vegna fjarskipti um gervihnetti eru auðveldari frá úthöfunum heldur en frá stöðvum sem eru staðsettar á landi o.m.fl. Þess má geta að Ari starfar sem sérfræðingur í gervihnattafjarskiptum og er með verkefni um allan heim.

Samkvæmt framangreindu hefur Ari Þór frá mörgu áhugaverðu að segja. Mætum stundvíslega. Kaffiveitingar verða í boði félagsins í fundarhléi kl. 21:15. Meðlæti er að þessu sinni í boði Geirabakarís í Borgarnesi.

/by
,

Fróðlegt erindi TF3CY um EME á 50 MHz

Frá vinstri: Yngvi Harðarson, TF3Y; Jón Gunnar Harðarson, TF3PPN; Sigurður Elíasson; Guðmundur Sveinsson, TF3SG; Halldór Christensen, TF3GC; Benedikt Sveinsson, TF3CY; Jón Þóroddur Jónsson, TF3JA; og Stefán Þórhallsson, TF3S. Ljósmynd: Gísli G. Ófeigsson, TF3G.

Frá vinstri: Benedikt Sveinsson, TF3CY; Jón Þóroddur Jónsson, TF3JA; Stefán Þórhallsson, TF3S; Heimir Konráðsson, TF1EIN; og Andrés Þórarinsson, TF3AM. Ljósmynd: Sveinn Bragi Sveinsson, TF3SNN.

Benedikt Sveinsson, TF3CY, flutti áhugavert erindi um EME-tilraunir sínar í sumar, fimmtudagskvöldið 28. október. Benedikt vann m.a. það afrek að verða fyrstur íslenskra radíóamatöra til að hafa samband með því að nota tunglið til að endurkasta merki frá Íslandi á 50 MHz í júlí s.l. Fyrsta sambandið var við stöð í Bandaríkjunum. Í ágúst s.l. bætti Benedikt svo um betur og náði EME-sambandi við stöð á Nýja Sjálandi á 50 MHz. Fram kom ennfremur, að hann hefur einnig í huga að gera EME-tilraunir á 2 metra bandinu. Erindið var fróðlegt og skemmtilega flutt. Benedikt sagði jafnframt stuttlega frá DX-leiðangri þeirra feðga (TF3CY, TF3SG og TF3T) út í Grímsey um síðustu helgi.

Bestu þakkir Benedikt fyrir áhugavert erindi.

TF2JB

/by
,

CQWW SSB DX keppnin 2010 um næstu helgi

CQWW SSB DX keppnin 2010 verður haldin um helgina 30.-31. október n.k. Hún hefst á miðnætti á föstudagskvöld og endar á miðnætti á sunnudagskvöld. Keppnin er ein af þessum stóru tveggja daga keppnum þar sem allir keppa á móti öllum. Reglurnar má sjá hér: http://www.cqww.com/rules.htm

Fyrir þá sem ekki ætla að taka þátt af alvöru í keppninni (sem er í góðu lagi), þarf vart þarf að taka fram, að í keppnum af þessu tagi eru starfræktar fjölmargar stöðvar frá “sjaldgæfum” löndum um heiminn og þessir tveir sólarhringar eru því mikill „veiðitími” fyrir þá radíóamatöra sem t.d. safna löndum fyrir DXCC og WAZ viðurkenningarskjölin o.s.frv.

Þegar þetta er skrifað er félagsstöðinni TF3IRA óráðstafað í keppnina. Félagsmenn sem áhuga hafa á að starfrækja stöðina í keppninni geta sett sig í samband við Svein Braga Sveinsson, TF3SNN, stöðvarstjóra.

TF2JB

/by
,

Benedikt, TF3CY, verður með fimmtudagserindið

Benedikt Sveinsson, TF3CY. Myndin er tekin í Skeljanesi 31. júlí s.l.

Næsta fimmtudagserindi á vetrardagskrá Í.R.A. verður haldið fimmtudaginn 28. október kl. 20:30. Fyrirlesari kvöldsins verður Benedikt Sveinsson, TF3CY, og mun hann m.a. svara spurningunni: Hvernig hefur maður EME QSO á 50 MHz?

Benedikt hafði fyrstu EME samböndin sem höfð hafa verið frá Íslandi á 50 MHz þann 12. júlí s.l. við W7GJ annnars vegar og W1JJ hins vegar. QTH var við sjávarsíðuna á Seltjarnarnesi (nærri Gróttu), sendiafl var 100W og tegund útgeislunar var JT65A. Nokkru síðar, þ.e. 11. ágúst hafði Benedikt síðan fyrsta EME sambandið sem haft hefur verið frá Íslandi við ZL á 50 MHz. Það var við ZL3NW. QTH var jörðin Hliðsnes á Álftanesi. Hann notaði Kenwood TS-570D sendi-/móttökustöð, heimasmíðaðan 600W RF-magnara (en Benedikt fékk sérstaka heimild PFS til að nota QRO afl á 50 MHz til EME-tilrauna). Tegund útgeislunar var sem áður, JT65A. Hann notaði heimasmíðað 10 stika Yagi loftnet á 15,5 metra langri bómu.

Samkvæmt framangreindu hefur Benedikt frá mörgu áhugaverðu að segja. Mætum stundvíslega. Kaffiveitingar verða í boði félagsins í fundarhléi kl. 21:15.

 TF2JB
/by
,

Turninn reistur, hamingjuóskir TF2LL!

Mannvirkið lætur ekki mikið yfir sér séð úr fjarlægð, en er óneitanlega glæsilegt. Ljósmynd: TF3IG.

Unnið við að reisa turninn og ganga frá loftnetum 21. október s.l. Ljósmynd: TF3IG.

Unnið við OP-18-6 loftnetið 21. október s.l. sem er ansi stórt í hlufalli við manninn. Ljósmynd: TF3IG.

Glæsileg sjón! OP-18-6 loftnetið er neðar og OP-1 ofar. Ljósmynd: TF2JB.

Georg Magnússon, TF2LL, stendur við nýuppsteypta undirstöðu turnsins þann 12. júní s.l. Ljósmynd: TF2JB.

Stjórn Í.R.A. fór í vettvangsferð í Borgarfjörðinn í gær, laugadaginn 23. október. Farið var í heimsókn til Georgs Magnússonar, TF2LL, sem hafði reist nýja loftnetsturninn sinn tveimur dögum fyrr. Um er að ræða 28 metra þrístrendan turn, að stærstum hluta heimasmíðaðan. Hann er reistur á öruggri undirstöðu (sjá mynd að ofan) og fóru 13 rúmmetrar af steypu í mótin. Á turninum eru tvö loftnet, annars vegar OptiBeam 18-6 fyrir 40-10 metra böndin og Optibeam 1-80 sem er fyrir 80 metrana. Turninn má nota fyrir fleiri loftnet, þar sem út frá honum má strengja víraloftnet, t.d. fyrir 160 metrana. Rótorinn er næst stærsta gerðin frá Prosistel og er hann staðsettur í botni turnsins og snýr sérsmíðuðu drifskafti fyrir loftnetin. Snjöll lausn er, að kaplarnir upp í loftnetin eru þræddir í gegnum drifskaftið. Það hefur m.a. í för með sér að Georg er laus við slaufur/lykkjur út frá fæðingu loftnetanna sem eru þekktar fyrir að hafa valdið vandræðum.

Optibeam OB-18-6 er 18 stika Yagi loftnet fyrir sex bönd, þ.e. 40/20/17/15/12 og 10 metrana. Bómulengd er 12 metrar. Lengsta stikan er 14,6 metrar og eiginþyngd loftnetsins er 115 kg. Loftnetið er 3 stika á 40m, 4 stika á 20-17-15 og 12 metrunum og 7 stika á 10 metrunum. Uppgefinn ávinningur á bandi, yfir tvípól: 4,8 / 7,3 / 7,5 / 7,8 / 7,0 / 7,7 dB. Optibeam OB-1-80 er styttur tvípóll á 80 metrunum. Hann er 17,6 metrar á lengd og vegur 25 kg. Í fæðipunkti eru rafliðar og spólur sem skipta á milli neðri og efri hluta bandsins. Georg hefur jafnframt fest kaup á loftneti fyrir 6 metrana frá OptiBeam, OB-5-6 sem gefur 8,8 dB ávinning yfir tvípól. Fyrirhugað er að setja það loftnet upp á annan turn (sem hann hefur þegar aflað sér).

Stjórn Í.R.A. þakkar Georg og Steinunni konu hans fyrir frábærar móttökur og óskar honum innilega til hamingju með glæsilegan turn og loftnet.

Comment frá TF4M

Til hamingju með glæsilegt mastur og góð loftnet Georg !

73 Þorvaldur, TF4M

Comment frá TF3SG

Þetta er sannanlega stórkostlegt mannvirki Georg og innilega til hamingju.

73

Guðmundur, TF3SG,

/by
,

Vetraráætlun 2010, vel heppnuð námskeið 12. og 18. október

G. Svanur Hjálmarsson TF3FIN, Stefán Arndal TF3SA og Vilhjálmur Sigurjónsson TF3VS. Ljósmynd: TF3JA.

Smíðanámskeið-II var haldið í gær mánudaginn 18. október í félagsaðstöðu Í.R.A. við Skeljanes. Verkefni kvöldsins var að setja saman viðmót (e. interface) til notkunar á milli tölvu og sendi-/móttökustöðvar, m.a. til fjarskipta á PSK31, RTTY og SSTV tegundum útgeislunar. Leiðbeinandi var (sem fyrr) Vilhjálmur Sigurjónsson, TF3VS. Mikill áhugi var í smíðahópnum og stóðu menn ekki ekki upp frá lóðboltunum fyrr en nokkru eftir miðnætti.

Námskeið til kynningar á “Win-Test” keppnisdagbókarforritinu (það fyrra af tveimur) var haldið þriðjudaginn 12. október í félagsaðstöðu Í.R.A. við Skeljanes. Leiðbeinandi var Yngvi Harðarson, TF3Y. Fullbókað var í námskeiðið en mest eru teknir fimm þátttakendur þar sem hluti þess er verklegur. Mikill áhugi var á efninu og yfirgáfu menn ekki Skeljanesið fyrr en klukkan var farin að halla í miðnætti.

Stjórn Í.R.A. þakkar þeim Vilhjálmi og Yngva fyrir sérstaklega góðan undirbúning og vandaða framsetningu.

Gísli Ófeigsson TF3G; Georg Magnússon TF2LL; Jónas Bjarnason TF2JB, Stefán Arndal TF3SA, Benedikt
Sveinsson TF3CY og Yngvi Harðarson TF3Y. Ljósmynd: TF3LMN.

TF2JB

/by