Fróðleikspunktar um útgáfu CQ TF

CQ TF er félagsrit ÍRA og hófst útgáfa þess árið 1964. Heitið “CQ TF” er fengið úr fjarskiptamáli radíóamatöra og er þýðing þess “Almennt kall til íslenskra amatörstöðva“. Ritið er umræðuvettvangur og upplýsingamiðill ÍRA ásamt vefsíðum félagsins og póstlista.

Eins og sjá má í meðfylgjandi töflu, féll útgáfa blaðsins niður í nokkur ár, þ.e. 1972, 1974, 1980, 1984-1994 og eftir 3. tbl. 2013 til 2018. Blaðaútgáfa félagsins féll þó ekki alfarið niður sem slík öll þessi ár, þar sem sum þeirra var gefið út sérstakt fréttabréf fremur en formlegt félagsrit, þ.e. Fréttabréf Í.R.A. Fréttabréfið kom sum árin út samhliða CQ TF og var hugmyndin, að fréttabréfið gæti t.d. verið hentugt útgáfuform fyrir fréttamiðlun (ath. þetta var fyrir tilkomu netsins). Útgáfuform var allt frá 4 síðum (A4 einblöðungar brotnir í tvennt). Þá ber að nefna, að annað afbrigði fréttabréfsins kom út (a.m.k. árið 1993) undir nafninu CQ TF Fréttabréf. Hafa ber í huga, að framangreint fyrirkomulag var lengst af við lýði fyrir tilkomu netsins; en CQ TF var fyrst sett á netið í febrúar 2000.

Á tímabilinu 1964-1973 var CQ TF oftast í kringum 10 blaðsíður að stærð. Upp úr 1975 vex útgáfunni ásmegin og blaðsíðum fjölgar. Fyrsta “stóra” blaðið kom síðan út í mars 1976. Það var 42 blaðsíður. Sá blaðsíðufjöldi varð ekki “sleginn” út fyrr en með blaði í janúar 2009 sem var 52 bls. að stærð. Jafn stórt blað kom reyndar einnig út í október sama ár, og svo á ný í janúar 2010. “Minnsta” tölublað CQ TF kom út í febrúar árið 1970; það var 3 blaðsíður. Stöðugleiki ríkti í útgáfunni frá 1997 til 2006, en þá var blaðið (að mestu) gefið út í stærðinni A5 og blaðsíðufjöldi (oftast) 16 blaðsíður; á þessum árum komu út 5 tölublöð á ári. Frá upphafi hefur CQ TF oftast komið út í febrúar og desembermánuðum (13 sinnum hvorn mánuð) en sjaldnast í apríl, ágúst og nóvember (3 sinnum hvern þessara mánaða).

Á tímabilinu 1964-2013 hafa 13 leyfishafar verið ritstjórar: Brynjólfur Jónsson (TF5BW/TF5B) í 10 ár; Jónas Bjarnason (TF3JB/TF2JB) í 6 ár; Kristinn Andersen (TF3KX) og Páll Gröndal (TF3PI), í 5 ár; Jón Þ. Jónsson (TF3JA) og Kristján Benediktsson (TF3KB), í 3 ár; Ágúst H. Bjarnason (TF3OM) og Haraldur Þórðarson (TF3HP), í 2 ár; Sigurbjörn Þór Bjarnason (TF3SB) og Sæmundur Þorsteinsson (TF3UA) í 2 ár; Birgir Baldursson (TF3BB), Guðmundur Löve (TF3GL) og Guðmundur Sveinsson (TF3SG) í 1 ár.

Langsamlega flest tölublöð komu út í tíð Brynjólfs Jónssonar (TF5BW/TF5B) eða 50 talsins. Næstur kemur TF3KX sem gaf út 18 tölublöð CQ TF.

CQ TF var gefið út á prentuðu formi til og með 2. tbl. 2012. Frá og með 3. tbl. 2012 einvörðungu á rafrænu formi á heimasíðu ÍRA.

Ný stjórn ÍRA sem tók við eftir aðalfund 2018 samþykkti á sínum fyrsta fundi þann 20.3.2018, að ráðist skuli í útgáfu blaðsins á ný. Það gekk eftir og kom 1. tbl. CQ TF út á stafrænu formi á heimasíðu félagsins þann 29. apríl 2018. Þar með var brotið blað í útgáfusögu félagsins þar sem CQ TF kom út á ný eftir 5 ára hlé. 2. tbl. starfsársins kom síðan út þann 15. júlí 2018. Fyrirhugað er að út komi 4 tölublöð á starfsárinu 2018/19.

Uppfærður texti 16.7.2018, Jónas Bjarnason, TF3JB

Ritstjórar CQ TF frá 1964-2018
ÚtgáfuárRitstjóri og ábyrgðarmaðurKallmerkiTbl.
1964-1965Páll GröndalTF3PI2
1966-1967Ágúst H. BjarnasonTF3OM2
1966-1967Páll GröndalTF3PI2
1970Birgir Baldursson (sk)TF3BB3
1971Sigurbjörn BjarnasonTF3SB2
1973Kristján BenediktssonTF3KB1
1975Jón Þóroddur JónssonTF3JA1
1975-1979Jónas BjarnasonTF3JB6
1981-1982 Kristján BenediktssonTF3KB3
1983Jónas BjarnasonTF3JB1
1995Kristinn AndersenTF3KX1
1996-1997 Haraldur ÞórðarsonTF3HP3
1997-2007 Brynjólfur JónssonTF5BW50
2007-2008Jón Þóroddur JónssonTF3JA5
2009Guðmundur Löve (afleysingar)
TF3GL2
2009-2013
Kristinn Andersen (frá 2. tbl.)TF3KX19
2012-2013Sæmundur ÞorsteinssonTF3UA2
2013Jónas BjarnasonTF3JB1
2013Guðmundur SveinssonTF3SG1
2018-Sigurbjörn Þór BjarnasonTF3SB2

CQ TF de ÍRA / 1964-1983

CQ TF-Fréttabréf ÍRA og CQ TF / 1979-2013

CQ TF Félagsblað ÍRA / 2018-