,

Póst- og fjarskiptastofnun framlengir heimildir á 500 kHz, 5 MHz og 70 MHz

Í.R.A. hefur borist erindi Póst- og fjarskiptastofnar dags. 13. desember þess efnis, að heimildir til íslenskra leyfishafa um tímabundna notkun tíðna í 500 kHz, 5 MHz og 70 MHz tíðnisviðunum, sem renna áttu út þann 31. desember n.k. hafi verið framlengdar um tvö ár, til 31. desember 2012. Heimildir á 500 kHz og 70 MHz eru framlengdar óbreyttar frá fyrri heimild þann 19. febrúar s.l. Stofnunin gerir þá breytingu hvað varðar 5 MHz, að í stað 8 fastra tíðna áður, er nú veitt 150 kHz heimild í tíðnisviðinu 5.260-5.410 MHz. Þessi breyting er samhljóma beiðni félagsins til stofnunarinnar dags. 13. janúar s.l., nema að afl frá fyrri heimild er samtímis skert úr 200W í 100W.

Nánar til tekið heimilar stofnunin tímabundna notkun á eftirfarandi tíðnum í tilraunaskyni með eftirfarandi skilyrðum:

600 metra bandið Tíðnisviðið 493-510 kHz er heimilað; A1A tegund útgeislunar; og hámarks útgeislað afl 100W.
60 metra bandið Tíðnisviðið 5260-5410 kHz er heimilað; J3E (USB) og A1A tegundir útgeislunar; hámarks bandbreidd 3 kHz; og hámarks útgeislað afl 100W.
4 metra bandið Tíðnisviðið 70.000-70.200 MHz er heimilað; engin skilyrði um tegund útgeislunar en hámarks bandbreidd er 16 kHz; og hámarks útgeislað afl 100W.

Það á við um öll böndin, að þeir leyfishafar sem óska að vinna á umræddum tíðnum þurfa að sækja sérstaklega um það til stofnunarinnar á netfangið: hrh@pfs.is. Tíðnisviðin eru opin opin G-leyfishöfum sem og N-leyfishöfum. Nánar verður fjallað um málið í næsta tölublaði CQ TF, 1. tbl. 2011.

Stjórn Í.R.A. fagnar þessum áfanga fyrir hönd íslenskra leyfishafa.

/by
,

Matthías Björnsson, TF3MF, er látinn.

Matthías Björnsson, TF3MF, er látinn. Fregn þessa efnis birtist í Morgunblaðinu í dag, 11. desember, að hann hafi látist 8. þ.m.

Matthías var handhafi leyfisbréfs nr. 139 og félagsmaður í Í.R.A. í um þrjá áratugi. Hann bjó síðast í Mosfellsbæ en hafði m.a. búið um árabil í Eyjafirði, þar sem hann hafði kallmerkið TF5MF. Matthías var á 89. aldursári.

Stjórn Í.R.A. sendir fjölskyldu Matthíasar hugheilar samúðarkveðjur vegna fráfalls hans.

/by
,

M&M = mánudagur og mors

Vilhjálmur Þór Kjartansson, TF3DX. Ljósmynd: TF3LMN.

Yngvi Harðarson, TF3Y.

Mánudaginn kemur, 13. desember kl. 20:30, verða Yngvi, TF3Y og Villi, TF3DX með ráðabrugg fyrir verðandi og vaxandi morsara í félagsheimilinu í Skeljanesi.
Þetta brugg er eins konar jólaglögg, sem gæti lagt grunn að glöggum morsurum yfir jólin ef vel tekst til.

1. Kynning á morslyklum og handfjötlun þeirra. Handpumpur, þar á meðal afar einföld heimasmíð, pöllur og lyklarar.
2. Heilræði varðandi æfingar og fyrstu lykilspor í loftinu.
3. Framgangsmáti viðskipta, helstu atriði.
4. ákvörðun um innanlandstíðni og tíma, þar sem hægt er að æfa sig í loftinu með reyndara fólki yfir jólin fram á þrettándann, eða Jónsmessu ef verkast vill.

Allir þeir sem hafa áhuga á að komast í loftið á morsi, hvort sem þeir eru tilbúnir til þess nú þegar eða ekki, eru hvattir til að koma.
Allir eldri félagar eru líka velkomnir, þurfa ekki einu sinni að vera orðnir ryðgaðir í morsinu til að mæta.

TF3DX.

/by
,

Gjöf til Í.R.A.

Endurinnrammað pappírsafrit af fyrsta RTTY QSO’i frá Íslandi fyrir rúmum 36 árum.

Félaginu hefur borist að gjöf endurinnrömmun á fyrsta QSO’i sem haft var á RTTY frá íslenskri radíóamatörstöð, TF3IRA, þann 29. mars 1974 kl. 19:14.

Sá sem hafði sambandið frá félagsstöðinni var Kristján Benediktsson, TF3KB og var það við K3KV á 14 MHz.
Móttekið RST var 579; nafnið var John; og QTH nærri Philadelphia í Bandaríkjunum. Sent RST var 599. Kristján notaði Teletype 15 vél ( http://www.baudot.net/teletype/M15.htm )og heimasmíðaðan afmótara (e. demodulator). Þáverandi QTH félagsins var vestast á Vesturgötunni í Reykjavík, sendiafl 30W og loftnet tvípóll.

Þegar þetta fyrsta RTTY samband var haft fyrir rúmum 36 árum notuðu radíóamatörar svokallaðar fjarritvélar (einnig nefndar “telex” eða “teletype” vélar). Vélarnar “hömruðu” stafina á pappír sem á þeim tíma var fáanlegur á lagernum hjá Landssímanum í kjallara Landssímahússins við Sölvhólsgötu. Afar ánægjulegt er, að upphaflega pappírsafritið af QSO’inu hefur varðveist. Þegar eldri ramminn var “opnaður” nýlega til að sækja upphaflega afritið til endurinnrömmunar, kom í ljós að pappírinn hafði verið notaður báðum megin og eru á bakhliðinni (sem reyndar sést ekki) afrit af prófunum Kristjáns, TF3KB, áður heldur en hann fór í loftið þetta kvöld í mars 1974 og kallaði út CQ de TF3IRA. Þetta sýnir að menn nýttu pappírinn vel á þessum tíma. Þess má geta að lokum, að sami félagsmaður kostar endurinnrömmunina nú og kostaði hana áður.

Stjórn Í.R.A. þakkar gjöfina og verður henni komið fyrir í fjarskiptaherbergi Í.R.A. í samráði við stöðvarstjóra.

/by
,

Fimmtudagserindi 9. desember fellur niður

Áður auglýst fimmtudagserindi um viðurkenningarskjöl radíóamatöra sem fyrirhugað var að halda n.k. fimmtudag, 9. desember, fellur niður. Þess í stað verður opið hús í félagsaðstöðunni.

Fyrirhugað er að erindið verði á vetrardagskrá-II á tímabilinu febrúar-apríl n.k. Vetrardagskrá-I er að öðru leyti óbreytt til áramóta.

Beðist er velvirðingar á þessari breytingu.

/by
,

Vel heppnuð erindi 25. nóvember og 2. desember

TF3JA, TF3AO og TF3HP héldu erindi um APRS 2. desember s.l. Ljósmynd: TF3LMN.

TF3DX flutti erindi um sólbletti og radíóbylgjur 25. nóvember s.l. Ljósmynd: TF3LMN.

Jón Þóroddur Jónsson, TF3JA; Ársæll Óskarsson, TF3AO; og Haraldur Þórðarson, TF3HP sameinuðust um að flytja erindi um APRS kerfið og reynsluna af því hér á landi fimmtudagskvöldið 2. desember s.l. Umfjöllunarefnið er áhugavert og kom m.a. fram hjá þeim félögum að APRS kerfið verður að fullu uppsett alveg á næstunni – a.m.k. fyrir áramót.

Vilhjálmur Þór Kjartansson, TF3DX, flutti áhugavert erindi um sólbletti og útbreiðslu radíóbylgna fimmtudagskvöldið 25. nóvember s.l. Margt áhugavert kom fram, m.a. að búast megi við bættum DX skilyrðum á hærri böndunum í stuttbylgjusviðinu á næstu mánuðum. Vilhjálmur fjallaði jafnframt um skilyrðin á lægri böndunum.

Um 20 félagsmenn sóttu hvort erindi um sig.

Stjórn Í.R.A. þakkar ofangreindum aðilum fyrir framlag þeirra.

 TF3JB
/by
,

TF3JA verður með fimmtudagserindið 2. desember

Jón Þóroddur Jónsson, TF3JA. Ljósm.: TF2JB.

Næsta fimmtudagserindi verður fimmtudaginn 2. desember n.k. kl. 20:30.

Fyrirlesari kvöldsins er Jón Þóroddur Jónsson, TF3JA, og nefnist erindið “APRS kerfið og reynsla af því á Íslandi”.

Jón Þórodd þarf vart að kynna þar sem hann hefur mikið starfað innan félagsins s.l. áratugi. Hann starfar innan félagsins í dag sem neyðarfjarskiptastjóri Í.R.A.

Félagar, mætum stundvíslega! Kaffiveitingar og vandað meðlæti verða í boði félagssjóðs í fundarhléi kl. 21:15.

/by
,

TF3DX verður með fimmtudagserindið 25. nóvember

Vilhjálmur Þór Kjartansson, TF3DX. Ljósmynd: TF3LMN.

Næsta fimmtudagserindi á vetrardagskrá félagsins verður haldið fimmtudaginn 25. nóvember n.k. kl. 20:30. Fyrirlesari kvöldsins er Vilhjálmur Þór Kjartansson, TF3DX og nefnist erindið “Sólblettir og útbreiðsla radíóbylgna”.

Vilhjálm þarf vart að kynna félagsmönnum, það mikið hefur hann starfað fyrir félagið s.l. áratugi. Hann starfar innan félagsins í dag sem formaður prófnefndar.

Félagar, mætum stundvíslega! Kaffiveitingar verða í fundarhléi kl. 21:15 og meðlæti verður í boði Mosfellsbakarís, konditoris.

/by
,

Heimasíða, póstlisti og eldri fréttir

Að undanförnu hafa nokkrir félagsmenn lent í vandræðum við að sækja efni og/eða að tengjast vefum Í.R.A. Hér á eftir er stuttlega fjallað um: (1) Aðgang að þeim hluta heimasíðu félagsins sem er lokaður öðrum en félagsmönnum; (2) póstlista Í.R.A.; og (3) leiðbeiningar um hvernig kalla má fram eldri fréttir á heimasíðunni.

Hvað varðar aðgangskóða, má „biðja” tölvuna um að geyma aðgangsorðin og eftir það er aðgangur hraður og öruggur. Undirritaður mælir með þessari aðferð og hefur t.d. ekki átt í vandræðum hvað þetta áhrærir a.m.k. í 2 ár. Ef aðgangskóði er gleymdur eða ef tölvan hefur ekki verið “beðin” um að geyma kóðann, má einfaldlega smella á gluggann sem opnast (ef aðgangur er ekki heimilaður vegna þess að kóðinn er rangur) og biðja um nýjan. Hann mun berast innan fárra mínútna um tölvupóst. Það sama gildir um aðgang að póstlista Í.R.A. Loks eru það fréttirnar. Ástæða er til að útskýra að auðvelt er að nálgast eldri fréttir sem birst hafa á heimasíðunni allt aftur til júnímánaðar 2008. Til skýringar má geta þess, að undanfarin misseri hefur rennsli frétta verið töluvert mikið og hver frétt hefur ekki nema 2 vikna “líftíma”, þ.e. eftir þann tíma hverfur hún af skjánum. En hún fer í sjálfu sér ekki langt, sbr. leiðbeiningar neðar.

(1) Heimasíða. Nýtt 32 blaðsíðna tölublað CQ TF, 4. tbl. 2010 kom út s.l. föstudag (12. nóvember). Ef ofangreindar leiðbeiningar virka ekki, má leita til Sveins Braga Sveinssonar, TF3SNN, um aðstoð og mun hann „kippa” málinu fljótt og vel í lag. Senda má tölvupóst á hann á póstfangið ira@ira.is. Sjá einnig: http://www.ira.is/pages/viewpage.action?pageId=4555515

(2) Póstlisti. Félagsmenn, sem óska eftir aðgangi að Póstlista Í.R.A. geta á sama hátt óskað eftir aðstoð með því að senda Sveini Braga tölvupóst á ofangreint póstfang. Athugið, að aðgangskóði að heimasíðu er annar en sá sem er að póstlista, þar sem póstlistinn er hluti af „Yahoo” en heimasíðan vinnur í „Atlassian Confluence” umhverfi. Ástæða er til að endurtaka, að það góða við þessa kóða er, að eftir að þeir hafa einu sinni verið settir inn í tölvuna, má láta hana muna þá – líkt og t.d. er með heimabanka, aðgang að áskrift dagblaða o.s.frv.

(3) Fréttir. Þegar heimasíða félagsins er opnuð, blasir við orðið „Fréttir” sem er undirstrikað (fyrir neðan bleika kassann „Radíóamatörnámskeið”). Ef bendillinn er færður yfir orðið „Fréttir” og vinstri smellt á músina, kemur upp ný síða og nýjasta fréttin færist til vinstri á síðunni og hægra megin á móti henni birtist mánaðardagatal, þ.e. „Nóvember 2010″ (sem er undirstrikað). Jafnframt birtist lítil ör vinstra megin við orðin „Nóvember 2010″. Ef tvísmellt er á örina, koma upp allar fréttir sem birst hafa á heimasíðunni í nóvembermánuði í tímaröð, þ.e. fyrsta frétt mánaðarins var sett á heimasíðuna 2. dag mánaðarins o.s.frv. Ef áhugi er á að skoða eldri fréttir sem birst hafa á heimasíðunni t.d. í október, er einfaldlega smellt aftur á örina og þá koma upp allar fréttir sem birtust í október o.s.frv. Önnur ör birtist hægra megin við mánaðardagatalið ef t.d. er óskað að fara frá október fram í nóvembermánuð.

Með góðri kveðju frá Hvanneyrarstað,

73 de TF2JB.

/by
,

CQ TF 4. tbl. komið út

Nýjasta hefti félagsblaðsins okkar, CQ TF, er komið út og má nálgast á vef félagsins. Um er að ræða októberheftið, sem er í seinna lagi að þessu sinni en kemur vonandi ekki að sök. Við höfum fengið aðstoð við umbrot og uppsetningu blaðsins, sem hjálpaði til við útgáfuna og fellur lesendum vonandi vel. Skilafrestur janúarheftis er sunnudaginn 19. desember.

Við óskum félagsmönnum ánægjulegs lestrar!

 

/by