Fræðsludagskrá ÍRA heldur áfram fimmtudaginn 27. nóvember í félagsaðstöðunni í Skeljanesi.
Í boði verður erindi Jóns Atla Magnússonar, TF2AC „Allt um DMR (Digital Mobile Radio)”. Húsið opnar kl. 20:00 og Jón Atli byrjar stundvíslega kl. 20:30.
QSL stjóri verður búinn að fara í pósthólfið og flokka kortasendingar og Sveinn Goði Sveinsson, TF3ID lagar kaffi og tekur fram meðlæti.
félagsmönnum bent á að láta erindið ekki framhjá sér fara, en DMR endurvarpi (TF3DMR) var settur upp í Skeljanesi 28. ágúst s.l. Nýir leyfishafar eru sérstaklega boðnir velkomnir.
Stærsta alþjóðlega keppni ársins 2025 á morsi, CQ World Wide DX CW keppnin fer fram helgina 29.-30. nóvember.
Þetta er 2 sólarhringa keppni; 48 klst. og engin tímatakmörk og í boði eru yfir 60 mismunandi keppnisflokkar.
Markmiðið er að ná eins mörgum samböndum og hægt er við aðra radíóamatöra um allan heim – í eins mörgum löndum (DXCC einingum) og á eins mörgum CQ svæðum og frekast er unnt. Keppt er á 1.8, 3.5, 7, 14, 21 og 28 Mhz.
Stjórn félagsins hvetur félagsmenn til þátttöku og að skila inn radíódagbókum að henni lokinni. Alls var skilað inn keppnisgögnum fyrir 9 TF kallmerki í fyrra (2024).
Stefnt er að því að virkja félagsstöðina, TF3W í keppninni og eru áhugasamir beðnir um að hafa samband á ira@ira.is
Opið hús var í félagsaðstöðu ÍRA í Skeljanesi fimmtudaginn 20. nóvember.
Rætt var m.a. um skilyrðin á HF, sem hafa verið mjög góð að undanförnu. Fram kom, að menn hafa verið að bæta við nýjum DXCC einingum á böndunum. Þá er áhugi er fyrir þátttöku í stærstu morskeppni ársins, CQ World Wide DX CW keppninni sem fram fer helgina 29.-30. nóvember n.k. Góðar líkur eru til að félagsstöðin TF3W verði virkjuð í keppninni og er vonast er til að skilyrði verði hagstæð.
Jón Atli Magnússon, TF2AC afhenti Baofeng UV-5R mini VHF/UHF handstöðvarnar sem Hrafnkell Eiríksson, TF3HR annaðist hópinnkaup á fyrir nýja leyfishafa. Stöðvarnar fengust við góðu verði (Eur 25) og eru með 2/5W sendiafl á FM; með litaskjá, „Bluetooth“ o.fl. Þá mætti Wilhelm Sigurðsson, TF3AWS með ný kínversk mælitæki og sýndi viðstöddum.
Mathías Hagvaag, TF3MH QSL stjóri félagsins raðaði innkomnum kortum, en töluvert hefur nýlega borist af kortum frá QSL stofum hinna ýmsu landsfélaga.
Þakkir til Sveins Goða Sveinssonar, TF3ID fyrir að laga frábært kaffi og taka til meðlæti sem og til þeirra Einars Sandoz, TF3ES og Kristján Benediktssonar, TF3KB fyrir ljósmyndir.
Alls mættu 20 félagar og 1 gestur í Skeljanes þetta ágæta fimmtudagskvöld í mildu vetrarveðri í vesturbænum í Reykjavík.
Límmiðar með félagsmerkinu eru aftur fáanlegir. Stærð er 11,5cm á hæð og 6,5cm á beidd. Hvorttveggja eru fáanleg merki til límingar innaná (t.d. á bílglugga) og til límingar utaná.
Samkvæmt ákvörðun stjórnar verða límmiðarnir afhentir frítt tveir saman (þ.e. einn af hvorri tegund) á opnunarkvöldum í félagsaðstöðu ÍRA í Skeljanesi.
Próf Fjarskiptastofu til amatörleyfis var haldið Í Háskólanum í Reykjavík laugardaginn 1. nóvember 2025.
Alls hafa 16 af þeim 19 sem stóðust prófið þegar sótt um og fengið úthlutað kallmerki hjá Fjarskiptastofu þann 18. nóvember 2025, samkvæmt neðangreindum lista:
Ástvaldur Hjartarson, Reykjavík, TF3ASH. Bjarni Freyr Þórðarson, Hafnarfjörður, TF4IR. Björn Bjarnason, Hafnarfjörður, TF3OSO. Gísli Freyr Þórðarson, Reykjavík, TF1TF. Guðmundur Freyr Hallgrímsson, Akranes, TF2EE. Gunnar Örn Vopnfjörð Þorsteinsson, Hafnarfjörður, TF4RT. Hákon Víðir Haraldsson, Hafnarfjörður, TF1HV. Hermann Karl Björnsson, Hafnarfjörður, TF3HKB. Kristinn Fannar Pálsson, Reykjavík, TF1KFP. Markus Johannes Pluta, Reykjavík, TF3MJP. Ólafur Jón Throddsen, Reykjavík, TF3KEX. Páll Axel Sigurðsson, Reykjavík, TF3PAS. Sigurjón Ingi Sölvason, Reykjanesbær, TF8YA. Sveinbjörn Halldórsson, Reykjavík, TF1SH. Valgeir Rúnarsson, Garðabæ, TF1VR. Ævar Gunnar Ævarsson, Seltjarnarnes, TF1WLF.
Nýir leyfishafar eru boðnir velkomnir í loftið!
Nýir leyfishafar eru beðnir um að hafa í huga að ekki er heimilt að fara í loftið fyrr heldur en formleg heimild hefur borist frá Fjarskiptastofu.
Fyrirhugað er að ÍRA verði með sérstaka móttöku og dagskrá fyrir hópinn í félagsaðstöðunni í Skeljanesi eftir að úthlutun kallmerkja [til allra] er lokið.
Stjórn ÍRA.
Myndin er af þátttakendum í prófi Fjarskiptastofu til amatörleyfis í Háskólanum í Reykjavík 1. nóvember 2025. Ljósmynd: Jón Svavarsson, TF3JON.
http://ira.is/wp-content/uploads/2016/11/website_head_ira_logo_arial.png00TF3JBhttp://ira.is/wp-content/uploads/2016/11/website_head_ira_logo_arial.pngTF3JB2025-11-18 10:02:552025-11-19 19:00:26ALLS ERU KOMIN 16 NÝ KALLMERKI.
NRAU er sameiginlegur vettvangur landsfélaga radíóamatöra á Norðurlöndunum. Aðildarfélög eru: Experimenterende Danske Radioamatører, EDR (Danmörku), Føroyskir Radio-amatørar FRA (Færeyjum), Íslenskir radíóamatörar ÍRA (Íslandi), Norsk Radio Relæ Liga NRRL (Noregi), Suomen Radioamatööriliitto SRAL (Finnlandi) og Föreningen Sveriges Sändareamatörer, SSA (Svíþjóð).
Samtökin voru stofnuð árið 1935 af Norðurlandafélögunum fjórum, EDR, NRRL, SRAL og SSA. ÍRA og FRA gerðust aðilar síðar, þ.e. eftir að ÍRA var stofnað 1946 og eftir að FRA var stofnað 1965.
Í tilefni 90 ára afmælis NRAU mun EDR (danska félagið) virkja kallmerkið OZ90NRAU frá kl. 00:00 1. desember til kl. 23:59 þann 7. desember. Vefslóð: https://www.qrz.com/db/OZ90NRAU
Félagsaðstaða ÍRA í Skeljanesi verður opin fyrir félagsmenn og gesti fimmtudaginn 20. nóvember á milli kl. 20 og 22.
Fundarsalur, fjarskiptaherbergi TF3IRA og QSL stofa á 2. hæð verða opin. Góður félagsskapur og nýjustu amatörtímaritin liggja frammi.
Mathías Hagvaag, TF3MH QSL stjóri TF-ÍRA Bureau verður búinn að fara í pósthólf félagsins, flokka kort og raða í hólfin og Sveinn Goði Sveinsson, TF3ID annast kaffiveitingar.
Verið velkomin í Skeljanes!
Stjórn ÍRA.
Mynd úr fundarsal í félagsaðstöðu ÍRA við Skeljanes. Ljósmynd: TF3JB.
APRS stöð félagsins, TF3IRA-1 varð QRV á ný í hádeginu í dag (15. nóvember) en hún hafði verið úti um 2 vikna skeið vegna bilaðs loftnets, auk þess sem vatn hafði komist í fæðilínuna.
Georg Kulp, TF3GZ gerði góða ferð í Skeljanes í morgun, 15. nóvember og setti upp Diamond SX-200N lofnetið á nýjum stað, sbr. ljósmynd. Núverandi staðsetning er mun hærri frá jörðu en sú fyrri, auk þess sem ný fæðilína er aðeins um 5 metrar í stað 30 metra áður.
Sérstakar þakkir til Georgs Kulp, TF3GZ fyrir að taka loftnetið niður, gera við það og setja aftur upp á betri stað.
Opið var í félagsaðstöðu ÍRA í Skeljanesi fimmtudaginn 13. október. Á dagskrá var 4. erindið á fræðsludagskrá félagsins haustið 2025 sem var í umsjá Benedikts Sveinssonar, TF3T: „Keppnisstöðin TF3D á Stokkseyri; endurbætur og keppnir”.
Benedikt sagði frá fjarskiptastöð þeirra bræðra, Benedikts, TF3T og Guðmundar Sveinssonar, TF3SG sem er rétt fyrir norðan Eyrarbakka og kallast Mýri. Þetta er gömul norðurljósaathugunarstöð, sem var hluti af heimsathugunarkerfi; en þessi stöð var lögð niður.
Þeir bræður fengu stöðina til afnota með fjölda mastra árið 2021 og hafa byggt upp góða keppnisstöð á amatörböndum, þ.e. 160m, 80m, 40m, 20m, 15m og 10m. Því fylgja loftnetaskiptarar, samkeyrslubúnaður, Beverage-hlustunarloftnet fyrir lægri böndin og auðvitað, umfangsmikil smíði loftneta, uppsetning þeirra og viðhald.
Mest er gaman, sagði Benedikt vera að sitja í stöðvarhúsinu og taka þátt í keppnum, og það geta tveir unnið samtímis. Fjarstýribúnaður til staðar þannig að það má vinna að heiman.
Benedikt sýndi fjöldann allan af myndum og útskýrði loftnetssmíði, uppsetningu og viðhald og það var alveg ljóst að verkefnið hefur tekið verulega á.
Erindi Benedikts var vel tekið og margir voru með spurningar. Á eftir spunnust umræður um loftnet, smíði alla og efnisval.
Sérstakar þakkir til Benedikts Sveinssonar, TF3T fyrir áhugavert erindi og vel flutt. Ennfremur þakkir til Georgs Kulp, TF3GZ fyrir ljósmyndir og Sveins Goða Sveinssonar, TF3ID fyrir að annast kaffiveitingar.
Alls mættu 27 manns í Skeljanes þetta vel heppnaða fimmtudagskvöld, þ.á.m. 5 nýir radíóamatörar sem bíða eftir kallmerkjum: Björn Bjarnason, Hermann Karl Björnsson, Kristinn Fannar Pálsson, Markus Johannes Pluta og Sveinbjörn Antonsson. Ennfremur þrír sem fengu amatörleyfi fyrir ári (2024): Jón Atli Magnússon, TF2AC, Gunnar B. Guðlaugsson, TF5NN og Guðjón Már Gíslason, TF3GMG.
