Archive for category: Almennt

Alþjóðadagur radíóamatöra er í dag, 18. apríl.

Í dag eiga IARU, alþjóðasamtök landsfélaga radíóamatöra 100 ára afmæli en samtökin voru stofnuð í París árið 1925 þegar saman komu í Sorbonne háskóla u.þ.b. 250 fulltrúar frá 23 þjóðlöndum. Aðildarfélög IARU eru í dag um 180 talsins og fjöldi leyfishafa er yfir 3 milljónir um allan heim.

ÍRA mun halda upp á daginn með því að virkja félagsstöðina í Skeljanesi og verður kallmerkið TF3WARD sett í loftið. Viðskeytið stendur fyrir „World Amateur Radio Day“. Með árlegri virkjun þessa kallmerkis (frá 2020) höfum við fetað í fótspor systurfélaganna á Norðurlöndum (og víðar) sem starfrækja sérstök kallmerki með hliðstæðum viðskeytum til að halda upp á stofndag IARU.

Hamingjuóskir til íslenskra radíóamatöra með daginn!

Stjórn ÍRA.

https://www.iaru.org/on-the-air/world-amateur-radio-day/?fbclid=IwY2xjawJu-pleHRuA2FlbQIxMQABHmh_bugICwnAgn7bJzZx0k6bsEf6DlbGpozClEHBSwbyW-ncShUlw_QOgcur_aem_l7FVsdhjNWEzeLk9mpY7dw

Líkt og undanfarin ár, verður félagsaðstaðan í Skeljanesi lokuð um páskana en fimmtudagur 17. apríl er skírdagur sem er almennur frídagur.

Næst verður opið í Skeljanesi fimmtudaginn 24. apríl. n.k.

Stjórn ÍRA.

Opið hús var í félagsaðstöðunni í Skeljanesi fimmtudaginn 10. mars.

Rætt var um fjarskiptin, m.a. á 6 metrum sem þegar eru byrjaðir að „lifna“ þetta vorið. Einnig var rætt um loftnet, m.a. mismunandi loftnet á VHF og UHF, en sumir félaganna hafa verið að gera tilraunir um endurvarpann á 145.650 MHz með drægni handstöðva sem hafa komið ótrúlega vel út. Einnig ræddu menn um skilyrðin á HF sem ekki hafa verið sérstaklega góð undanfarnar vikur.

Ólafur Örn Ólafsson, TF1OL mætti á staðinn nýkominn úr löngu ferðalagi, m.a. til Kyrrahafslanda. Viðstaddir voru sammála um, að gaman væri að fara þess á leit við hann að mæta eitthvert fimmtudagskvöldið og segja okkur ferðasöguna, en hann hafði með sér HF stöð og loftnet og var QRV frá mörgum fjarlægum löndum.

Sérstakur erlendur gestur félagsins þetta kvöld var John R. Silva, N3AM frá Maryland í Bandaríkjunum. Hann hafði verið í sambandi við Óskar Sverrisson, TF3DC sem sótti hann á hótelið. John er mikill CW maður og var afar ánægður með aðstöðu félagsins og loftnetakost félagsstöðvarinnar. Hann hafði meðferðis QSL kort til TF stöðva sem hann hafði haft samband við og raðaði í QSL hólfin með aðstoð Mathíasar, TF3MH QSL stjóra félagsins.

Þakkir til Sveins Goða Sveinssonar, TF3ID sem lagaði Lavazza kaffi og bar fram meðlæti. Alls mættu 20 félagar og 1 gestur í Skeljanes þetta ágæta fimmtudagskvöld í mildu vetrarveðri í vesturbænum í Reykjavík.

Stjórn ÍRA.

.

Opið hús verður í félagsaðstöðu ÍRA í Skeljanesi fimmtudaginn 10. apríl fyrir félagsmenn og gesti frá kl. 20:00 til kl. 22:00.

Fundarsalur, fjarskiptaherbergi og QSL stofa á 2. hæð verða opin. QSL stjóri verður búinn að fara í pósthólfið og raða kortum.

Góður félagsskapur og nýjustu amatörtímaritin. Sveinn Goði Sveinsson, TF3ID annast kaffiveitingar.

Verið velkomin í Skeljanes!

Stjórn ÍRA.