Fjarskiptastofa hefur nýlega úthlutað eftirfarandi TF kallmerkjum:
TF3SP – Dariusz „Darek“ Wójcik (SP8GGV). Hann er búsettur í Reykjavík.
TF4CT – Miroslaw „Mirek“ Pruszko (SQ4CTS). Hann er búsettur á Hellu á Rangárvöllum.
Við bjóðum þá velkomna í loftið.
Stjórn ÍRA.
Félagsaðstaða ÍRA í Skeljanesi verður opin fyrir félagsmenn og gesti fimmtudaginn 12. febrúar kl. 20:00-22:00.
Fundarsalur, fjarskiptaherbergi TF3IRA og QSL stofa á 2. hæð verða opin. Góður félagsskapur og nýjustu amatörtímaritin liggja frammi.
QSL stjóri verður búinn að fara í pósthólf félagsins, flokka kort og raða í hólfin. Sveinn Goði Sveinsson, TF3ID mun annast kaffiveitingar.
Verið velkomin í Skeljanes!
Stjórn ÍRA.
APRS stöð TF3IRA-1 notar Icom IC-208H stöð á QRG 144.800 MHz. Sendiafl er mest 50W. VHF/UHF stöð TF3IRA er Yaesu FT-7900E. Sendiafl er mest 50W á VHF og 45W á UHF. Stöðvarnar sitja á sitt hvorri Yaesu SMB-201 borðfestingunni sem hafa innbyggðar viftur.
CQ WW RTTY WPX CONTEST.
Keppnin stendur yfir laugardag 14. febrúar kl. 00:00 til sunnudags 15. febrúar kl. 23:59.
Hún fer fram á RTTY á 80, 40, 20, 15 og 10 metrum.
Skilaboð: RST + raðnúmer.
https://cqwpxrtty.com/rules.htm
ASIA-PACIFIC SPRING SPRINT CW CONTEST.
Keppnin stendur yfir laugardag 8. febrúar kl. 12:00 til sunnudags 15. febrúar kl. 24:00.
Hún fer fram á CW á 160, 80, 40. 20, 15, 10 og 6 metrum.
Skilaboð: RST + (ríki í USA/fylki í Kanada/DXCC eining) + nafn + (SKCC nr./“NONE“)
https://www.skccgroup.com/operating_activities/weekend_sprintathon
KCJ TOPBAND CONTEST.
Keppnin stendur yfir laugardag 14. febrúar kl. 12:00 til sunnudags 9. febrúar kl. 12:00.
Hún fer fram á CW á 160 metrum.
Skilaboð JA stöðva: RST + 2 bókstafir fyrir stjórnsýslusvæði.
Skilaboð annarra: RST + CQ svæði.
https://kcj-cw.com/j_index.htm
DUTCH PACC CONTEST.
Keppnin stendur yfir laugardag 14. febrúar kl. 12:00 til sunnudags 15. febrúar kl. 12:00.
Hún fer fram á CW og SSB á 160, 80, 40. 20, 15 og 10.
Skilaboð PA stöðva: RS(T) + 2 bókstafir fyrir landssvæði í Hollandi.
Skilaboð annarra: RS(T) + raðnúmer.
http://veron.nl/vereniging/commissies-en-werkgroepen/traffic-bureau/hf-contesten/pacc-contest/
Með ósk um gott geng!
Stjórn ÍRA.
.
ÍRA barst jákvætt svar frá Fjarskiptastofu (FST) í dag, 3. febrúar við ósk félagsins um endurnýjun heimildar til notkunar tíðnisviðsins 1850-1900 kHz á auknu afli vegna þátttöku í tilgreindum alþjóðlegum keppnum á almanaksárinu 2026. Sjá meðfylgjandi töflu neðar. G-leyfishafar hafa heimild til að nota fullt afl, eða allt að 1kW á tíðnisviðnu 1850-1900 kHz.
Heimildin er veitt með fullu samþykki Vaktstöðvar siglinga sem hefur forgang til notkunar tíðna á þessu tíðnibili. Um þessa notkun gilda að öðru leyti sömu kröfur og fyrir tíðnisviðið 1810-1850 kHz í reglugerð, en aukin skilyrði Fjarskiptastofu eru eftirfarandi: Aflheimild er einvörðungu veitt þann tíma sem tilgreindar alþjóðlegar keppnir standa yfir.
G-leyfishafar sem ætla að nýta sér þessa undanþágu skulu tilkynna það til fst@fst.is eða bjarni@fjarskiptastofa.is
Ath. að það nægir að senda eina umsókn sem þar með gildir fyrir allar 14 keppnirnar á árinu 2026.
Sérstakar þakkir til Fjarskiptastofu fyrir vinsamlega afgreiðslu.
Stjórn ÍRA.
LABRE-RS DIGI CONTEST.
Keppnin stendur yfir laugardag 7. febrúar kl. 00:00 til sunnudags 8. febrúar kl. 20:59.
Hún fer fram á FT4 og FT8 Digi á 80, 40, 20, 15 og 10 metrum.
Skilaboð: 4 stafa Maidenhead reitur (e. grid square).
http://labre-rs.org.br/labre-rs-digi-contest/
10-10 INT. WINTER CONTEST, SSB.
Keppnin stendur yfir laugardag 7. febrúar kl. 00:01 til sunnudags 8. febrúar kl. 23:59.
Hún fer fram á SSB á 10 metrum.
Skilaboð 10-10 félaga: Nafn + 10-10 fél.númer + (ríki í USA/fylki í Kanada/DXCC eining).
Skilaboð annarra: Nafn + 0 + (ríki í USA/fylki í Kanada/DXCC eining).
http://www.ten-ten.org/qso-party-rules/
MEXICO RTTY INTERNATIONAL CONTEST.
Keppnin stendur yfir laugardag 7. febrúar kl. 12:00 til sunnudags 8. febrúar kl. 23:59.
Hún fer fram á RTTY á 80, 40, 20, 15 og 10 metrum.
Skilaboð stöðva í Mexíkó: RST + fylki í Mexíkó.
Skilaboð annarra: RST og raðnúmer.
https://rtty.fmre.mx
F9AA CUP, CW.
Keppnin stendur yfir laugardag 7. febrúar kl. 12:00 til sunnudags 8. febrúar kl. 12:00.
Hún fer fram á CW á 80, 40, 20, 15, 10 og 2 metrum.
Skilaboð: RST + raðnúmer.
https://www.site.urc.asso.fr/index.php/om-yl/concours/trophee-f9aa
EUROPEAN UNION DX CONTEST.
Keppnin stendur yfir laugardag 7. febrúar kl. 12:00 til sunnudags 8. febrúar kl. 12:00.
Hún fer fram á RTTY á CW og SSB á 160, 80, 40, 20, 15 og 10 metrum.
Skilaboð stöðva í Evrópusambandinu: RS(T) + 2 bókstafir og 2 tölustafir (sjá lið 7 í reglum)
Skilaboð annarra: RS(T) + ITU svæði (TF = 17).
http://www.eudx-contest.com/rules/
Með ósk um gott gengi!
Stjórn ÍRA.
Ný fræðsludagskrá ÍRA vorið 2026 hefst fimmtudaginn 5. febrúar í félagsaðstöðunni í Skeljanesi.
Í boði verður erindi Georgs Magnússonar, TF2LL ”Fjarskipti á sjó; ýmis furðufyrirbæri”. Húsið opnar kl. 20:00 og Georg byrjar stundvíslega kl. 20:30.
QSL stjóri verður búinn að fara í pósthólfið og flokka kortasendingar og Sveinn Goði Sveinsson, TF3ID lagar kaffi og tekur fram meðlæti.
Nýir leyfishafar eru sérstaklega boðnir velkomnir.
Verið velkomin í Skeljanes!
Ágæti félagsmaður!
Minnt er á aðalfund ÍRA sunnudaginn 15. febrúar 2026.
Fundurinn verður haldinn í safnaðarheimili Neskirkju við Hagatorg í Reykjavík og hefst stundvíslega kl. 14:00.
Dagskrá er samkvæmt 19. gr. félagslaga.
Reykjavík 25. janúar 2026,
f.h. stjórnar ÍRA,
Jónas Bjarnason, TF3JB
formaður
Opið hús var í félagsaðstöðu ÍRA í Skeljanesi fimmtudagana 22. og 29. janúar.
Að vanda var margt til umræðu yfir kaffinu, enda er áhugamálið margþætt. Nú, þegar veðráttan hefur að mestu verið „vorleg“ það sem af er nýju ári og dag er tekið að lengja, eru menn farnir að hugsa sér til hreyfings hvað varðar uppsetningu loftneta. Margir velta fyrir sér stangarnetum, en eins m.a. kom fram, þarf gjarnan að staga þau, nema þegar um glertrefjastangir er að ræða. Til samanburðar var bent á augljósa kosti þess að setja upp endafæddan vír/víra, eða jafnvel tvípóla sé þess kostur. Hins vegar var jafnframt bent á, að stutt bílnet á HF böndunum sem hafa svalahandrið (úr leiðandi efni) sem mótvægi – geti komið ótrúlega vel út í DX ef aðstæður bjóða ekki upp á annað.
Margir velta jafnfram fyrir sér kaupum á tækjum og búnaði, enda ger engi dollars hagkvæmt eða um 120 kr. samkvæmt meðalgengi Seðlabanka. Evra hefur einnig farið lækkandi og stóð í 144,80 krónum 30. janúar.
Fimmtudaginn 29. janúar kom Hrafnkell Eiríksson, TF3HR síðan með á staðinn og sýndi mönnum heimasmíðað 3 staka Yagi handloftnet fyrir 2 metra bandið sem er einfalt og ódýrt. Áhugavert net með góðan ávinning sem getur gefið skemmtilega möguleika.
Mathías Hagvaag, TF3MH QSL stjóri félagsins raðaði innkomnum kortum, en töluvert hefur borist af sendingum frá QSL stofum landsfélaganna, enda áramótauppgjör hjá þeim eins og hjá okkar QSL stofu. Þakkir til Sæmundar E. Þorsteinssonar, TF3UA og Georgs Kulp, TF3GZ fyrir ljósmyndir og til Sveins Goða Sveinssonar, TF3ID fyrir að laga frábært kaffi og taka til meðlæti.
Mæting var ágæt bæði fimmtudagskvöldin eða á bilinu 20-26 félagar að meðtöldum gestum í mildu vetrarveðri í vesturbænum í Reykjavík.
Stjórn ÍRA.
