100 ÁRA AFMÆLI IARU

Alþjóðasamband radíóamatöra, IARU, International Amateur Radio Union var stofnað í París 23. apríl 1925. Þann 26. apríl 2025 hélt IARU ásamt boðsgestum upp á 100 ára afmælið í veglegu afmælishófi. Viðburðarstjóri var Joel Harrison, W5ZN ritari IARU.

Heillaóskir og ræður fluttu:

Doreen Bogdan-Martin, KD2JTX, aðalritari ITU. Hún talaði um hið mikla og góða samband, sem hefur verið milli radíóamatöra og ITU öll þessi ár. Minnti hún jafnframt á þann mikla áfanga, þegar radíóamatörar öðluðust stöðu radíóþjónustu innan radíóreglugerðar ITU árið 1927 og afhenti IARU að táknrænni gjöf við þessi tímamót, frumritið af þessari samþykkt.

Richard Roderick, K5UR Alþjóðaskrifstofu IARU og forseti ARRL.

Timothy Ellam, KC, VE6SH/G4HUA forseti IARU.

Christiane Seifert, formaður CEPT nefndar um rafræn fjarskipti.

Thomas Ewers, forstjóri evrópsku CEPT fjarskiptastofunnar.

Oscar Leon Suarez, ritari CITEL (Sam-Ameríska Fjarskiptastofan), og

Attila Matas, HB9IAJ, fv. deildarstjóri ITU-R flutti lykilræðu hófsins.
Hann kom mjög víða við og fór yfir margt í þróun alþjóða radíóreglugerðar ITU. Nefndi hann fjölbreyttan þátt radíóamatöra í tækniþróun, neyðarfjarskiptum, og stöðugri aðlögun að nýjum viðfangsefnum og tækifærum. Einnig deildi hann þeirri reynslu sinni, að margir fulltrúar stjórnvalda hefðu snúist til stuðnings við málefni radíóamatöra í radíóreglugerð ITU, eftir að hafa heimsótt og kynnst starfsemi 4U1ITU, klúbbstöðvar ITU. Minnti hann að lokum á hve mikilvægt er fyrir radíóamatöra að vera vel tengdir, fylgjast vel með og vera vel undirbúnir í einu og öllu að því er varðar tíðnimál.

Eftir að formlegum ræðuhöldum lauk, var orðið gefið laust. Íslenski boðsgesturinn Kristján Benediktsson, TF3KB, alþjóðafulltrúi ÍRA notaði tækifærið og flutti heillaóskir og afmæliskveðjur frá Íslenskum radíóamatörum. Afhenti hann við þetta tækifæri forsetum IARU og IARU Svæðis 1 borðfána ÍRA að gjöf, með bestu afmæliskveðjum.

Sérstakar þakkir til Kristjáns Benediktssonar, TF3KB alþjóðafulltrúa ÍRA fyrir að sækja hátíðarhöld IARU í tilefni 100 ára afmælisins og 75 ára afmælis IARU Svæðis-1 í París í aprílmánuði 2025.

Stjórn ÍRA.