AFBRAGÐSGOTT ERINDI TF3TNT.

Opið var í félagsaðstöðu ÍRA í Skeljanesi fimmtudaginn 8. maí. Benedikt Guðnason, TF3TNT mætti með erindi kvöldsins sem fjallaði um „Frekari uppbyggingu og framtíðarsýn endurvarpamála“. Þetta var sjöunda erindið á vordagskrá ÍRA 2025 og var mjög vel sótt. 

Erindið var nokkurskonar framhald á fyrra erindi Benedikts frá því í nóvember 2023 sem kallaðist „VHF/UHF endurvarpar; framtíðarsýn“. Þar lýsti hann sýn sinni á hvernig VHF endurvarpar radíóamatöra gætu komið að betra gagni. 

Fyrsti hluti þeirrar áætlunar hefur gengið eftir, þ.e. flutningur á endurvarpanum á Álftanesi á Mýrum upp á fjallið Strút í Borgarfirði. Benedikt sýndi okkur fjölda ljósmynda sem varpa skýru ljósi á þá erfiðleika sem fylgja því að vera með „fjallatoppafjarskiptastöðvar“ þar sem veður eru oft afleit og ísing á vetrum er afar mikið vandamál. Því getur Benedikt unnið að þessum endurvarpamálum radíóamatöra að fyrirtæki hans er með viðhaldssamning við fjöldann allan af aðilum sem eiga og kosta „fjallatoppastöðvar“. Þetta var allt afar fróðlegt. 

Sýn Benedikts er enn frekari tengingar milli endurvarpa radíóamatöra þannig hægt sé að tala frá einum endurvarpa sem útvarpast út um annan. Þá þarf að geta þess að kostnað við viðhald og uppsetningu endurvarpanna hefur Benedikt tekið á sig. Gerður var góður rómur að erindi Benedikts. Á eftir var fjöldi fyrirspurna sem hann leysti vel úr. Þetta var vel lukkuð kvöldstund.

Sérstakar þakkir til Benedikts Guðnasonar, TF3TNT fyrir afbragðsgott og áhugavert erindi. Þess má geta að erindið var tekið upp og hér er vefslóð á það: https://youtu.be/NA2RgazHvXc 

Erlendur gestur félagsins var Sergii Matlash, US5LB sem hefur verið búsettur hér á landi í nokkurn tíma. Alls mættu 31 félagi og 2 gestir þetta ágæta fimmtudagskvöld í mildu vetrarveðri í vesturbænum í Reykjavík.

Stjórn ÍRA.

(Texti: Andrés Þórarinsson, TF1AM varaformaður ÍRA).