Sigurður R. Jakobsson, TF3CW.

Í ágústhefti CQ tímaritsins 2011 eru birtar niðurstöður úr CQ World-Wide SSB CW keppninni sem fram fór helgina 30.-31. október 2010. Ágæt þátttaka var frá TF, en alls sendu sjö stöðvar inn keppnisdagbækur. Þessar stöðvar deilast á alls sex keppnisflokka (sbr. upplýsingar í meðfylgjandi töflu).

Sigurður R. Jakobsson, TF3CW, var með afgerandi bestan árangur á meðal TF stöðva í keppninni, með nær 1 milljón stiga og yfir 3 þúsund QSO, en hann keppti á 14 MHz. Yngvi Harðarson, TF3Y, varð í efsta sæti í keppnisflokknum “öll bönd hámarks útgangsafl” eða með 287 þúsund stig og 905 QSO. Í öðru sæti varð Andrés Þórarinsson, TF3AM, með nær 269 þúsund stig (og í raun með fleiri QSO og margfaldara heldur en Yngvi en óhagstæðara hlutfall QSO stiga). Ársæll Óskarsson, TF3AO, var með 3. bestan árangur á meðal TF stöðva, en hann hafði 363 QSO á 21 MHz.

Keppnisflokkur

Kallmerki

Árangur

QSO

CQ svæði

DXCC einingar

Öll bönd – einmenningsflokkur, hámarks útgangsafl TF3Y*

287,272

905

45

104

Öll bönd – einmenningsflokkur, hámarks útgangsafl TF3AM

268,640

1057

47

183

Öll bönd – einmenningsflokkur, lágafl (100W) TF8GX*

45,510

219

31

80

Öll bönd – einmenningsflokkur, hámarks útgangsafl, aðstoð TF3IG*

7,840

111

21

59

14 MHz – einmenningsflokkur, hámarks útgangsafl TF3CW* 996,853

3028

34

109

21 MHz – einmenningsflokkur, hámarks útgangsafl, aðstoð TF3AO*

17,689

363

9

40

1.8 MHz – einmenningsflokkur, hámarks útgangsafl TF3SG*

19,527

206

15

54

*Bestur árangur í viðkomandi keppnisflokki (innan TF) og handhafi viðurkenningarskjals.

Hamingjuóskir til þátttakenda með árangurinn.

65 ár verða liðin frá stofnun félagsins Íslenskir radíóamatörar, Í.R.A., þann 14. ágúst n.k. Í tilefni þess hefur verið ákveðið að halda kaffiboð fyrir félagsmenn og fjölskyldur þeirra á afmælisdaginn (sem ber upp á sunnudag) í félagsaðstöðunni við Skeljanes í Reykjavík. Byrjað verður kl. 14 og lýkur viðburðinum kl. 17. Boðið verður upp á íslenskar vöfflur og pönnukökur með þeyttum rjóma og vanilluís. Það er von stjórnar félagsins að sem flestir félagsmenn sjái sér fært að renna við í Skeljanesinu og þiggja þjóðlegar kaffiveitingar.
F.h. stjórnar Í.R.A.,
Jónas Bjarnason, TF2JB,
formaður.

Í garðinum hjá TF3DX og TF3GD. Formleg afhending rits Í.R.A., Siðfræði og samskiptasiðir radíóamatöra. Frá vinstri: Vilhjálmur TF3DX; Guðrún TF3GD; John ON4UN; Jónas TF2JB; og Kristján TF3KB. Ljósmynd: TF3LMN.

John Devoldere, ON4UN, gerði góðan stans á landinu í nokkrar klukkustundir í gær (4. ágúst) á leið sinni vestur um haf. Þetta var einkaheimsókn til Vilhjálms Þórs Kjartanssonar, TF3DX og konu hans, Guðrúnar Hannesdóttur, TF3GD. Undirritaður átti þess kost að hitta John á heimili þeirra hjóna ásamt Kristjáni Benediktssyni, TF3KB. Við það tækifæri var honum formlega afhent eintak af ritinu Siðfræði og samskiptasiðir radíóamatöra sem er þýðing Vilhjálms Í. Sigurjónssonar, TF3VS, á riti þeirra John Devoldere, ON4UN og Mark Demeuleneere, ON4WW, Ethics and Operating Procedures for the Radio Amateur. Fram kom, að íslenska þýðingin, sem Í.R.A. gaf út þann 13. ágúst 2009 var annað tungumálið sem ritið var þýtt á yfir heiminn. Það hefur nú verið þýtt á alls 28 tungumál.

John, ON4UN, færði Í.R.A. nýjustu útgáfu bókar sinnar “ON4UN’s Low-Band DXing” að gjöf. Ljósm.: TF3LMN.

Við sama tækifæri færði John félaginu nýjustu útgáfu af bók sinni “ON4UN’s Low-Band DXing.” Um er að ræða 5. útgáfu bókarinnar. John áritaði bókina með eftirfarandi texta: „To all Í.R.A. members. Enjoy the book and good luck on the low bands. Iceland: 4. August 2011, John Devoldere, ON4UN”.

Vilhjálmur sýnir John áhugaverða ljósmynd úr amatörstarfinu. Ljósmynd: TF3LMN.

Vilhjálmur og John við bifreið Vilhjálms (sjá aðlögunarrásina fyrir 160m fyrir miðri framrúðu). Ljósmynd: TF3LMN.

Undirritaður óskar að þakka þeim Vilhjálmi og Guðrúnu fyrir frábærar móttökur og tækifærið að eiga þess kost að hitta
John, ON4UN, sem er goðsögn í lifanda lífi á meðal radíóamatöra. Einnig þakkir til Kristjáns, TF3KB, IARU tengiliðar félagsins sem og til og Jóns Svavarssonar, TF3LMN fyrir mjög góðar ljósmyndir.

Jónas Bjarnason, TF2JB,
formaður Í.R.A.

Stutt kynning. John Devoldere, ON4UN, hefur verið leyfishafi í tæpa hálfa öld og mikið starfað fyrir amatörhreyfinguna, m.a. sem formaður og stjórnarmaður í eigin landsfélagi radíóamatöra í Belgíu, UBA, sem og á alþjóðlegum vettvangi, t.d. innan IARU Svæðis 1. Hann er rafmagnsverkfræðingur að mennt og hefur skrifað fjölda greina og bóka í gegnum tíðina sem snerta áhugamál radíóamatöra, einkum um loftnet, skilyrði til fjarskipta og notkun tíðnisviðanna 3.5 MHz og 1.8 MHz. Hann er jafnvígur á morsi og tali og mikill keppnismaður og margverðlaunaður sem slíkur og verið reglulegur þátttakandi í stærstu alþjóðlegum keppnum radíóamatöra í gegnum tíðina. Hann var kosinn á heiðurslista keppnismanna af CQ tímaritinu árið 1997 (e. CQ Contest Hall of Fame). John er handhafi DXCC viðurkenningarskjals nr. 1 yfir heiminn á 80 metrum og handhafi Worked All Zones Award (WAZ) viðurkenningarskjals nr. 3 yfir heiminn á 160 metrum. Miðað við síðustu uppfærslu ARRL fyrir 160 metra bandið, er hann með skráður með staðfestar 312 DXCC einingar (e. entities). Það tryggir honum bestan árangur í Evrópu og 10. bestan árangur yfir heiminn.

Framkvæmdanefnd Vita- og vitaskipahelgarinnnar 2011. Frá vinstri: TF3JA, TF8SM og TF3SNN. Ljósm.: TF2JB. (Myndin hér að ofan var tekin í Skeljanesi á fyrsta vinnufundi nefndarinnar í fyrra þann 5. ágúst 2010).

Hin árlega Vita- og vitaskipahelgi verður haldin helgina 20. til 21. ágúst n.k. Í ljósi víðtæks áhuga félagsmanna hefur stjórn félagsins samþykkt að styðja það að viðburðurinn verði haldinn við Garðskagavita, annað árið í röð. Til að fylgja þeirri ákvörðun eftir (að höfðu samráði) var ákveðið að framlengja umboð framkvæmdanefndar síðustu Vita- og vitaskipahelgar sem var valin á félagsfundi í fyrra og þótti standa sig mjög vel. Þeir sem skipa framkvæmdanefnd Vita- og vitaskipahelgar 2011 eru: Sveinn Bragi Sveinsson, TF3SNN (formaður); Sigurður Smári Hreinsson, TF8SM; og Jón Þóroddur Jónsson, TF3JA (sjá mynd að ofan). Meginhlutverk nefndarinnar er að annast undirbúning viðburðarins. Að venju mun félagið leggja til tæki og búnað sem nefndin telur nauðsynlegan.

Nánar verður fjallað um undirbúning viðburðarins, aðstöðuna og fyrirkomulag á staðnum þegar nær dregur. Nefndarmenn munu taka á móti ábendingum félagsmanna og svara fyrirspurnum, en einnig má sjá upplýsingar á heimasíðu Ayr Amateur Radio Group í Skotlandi sem stendur fyrir Vita- og vitaskipahelgunum: http://illw.net/

Stjórn Í.R.A. býður nefndarmenn velkomna til starfa.

Á þriðja tug leyfishafa tóku þátt í 32. TF útileikunum sem haldnir voru um verslunarmannahelgina. Þátttaka var frá kallsvæðum TF1, TF2, TF3, TF4, TF5, TF8, TF9 og TFØ; einvörðungu vantaði stöðvar frá kallsvæðum 6 og 7.

Bjarni Sverrisson, TF3GB.

Kristinn Andersen, TF3KX.

 

 

 

 

 

 

 

 

 

 

Líkt og undanfarin ár voru nokkrir íslenskir leyfishafar, sem eru búsettir á Norðurlöndunum, meðal þátttakenda. Skilyrðin voru nokkuð góð, en mismunandi eftir dögum (og tíma dags) eins og eðililegt er. Menn voru QRV innan sem utan settra viðmiðunartímabila þátttöku og mikið um að skipst væri á QTC’um. Flest samböndin fóru fram á tali (SSB) en verulegur hluti fór einnig fram á morsi (CW).

Bjarni Sverrisson, TF3GB, safnar saman dagbókum vegna útileikanna og fékk fyrstu dagbókina senda í tölvupósti þegar um hádegisbilið í gær (mánudag). Frestur til að skila fjarskiptadagbókum er annars til 31. ágúst n.k. Tölvupóstfang Bjarna er: tf3gb (hjá) islandia.is. Fyrir þá sem senda gögnin í pósti, er utanáskriftin: Bjarni Sverrisson, TF3GB, Hnjúkaseli 4, 109 Reykjavík.

Kristinn Andersen, TF3KX, ritstjóri CQ TF, skrifaði á póstlista félagsins í morgun: “Fyrir CQ TF væri frábært að fá línur frá einhverjum ykkar sem tókuð þátt og þá líka myndir, ef einhverjir eiga. Gott er að gera slíkt fyrr heldur en seinna, áður en fyrnist yfir helgina! Sendið mér þá á netfangið: cqtf (hjá) ira.is”.

Stjórn Í.R.A. þakkar félagsmönnum þátttökuna og hvetur menn til að skila dagbókum fljótt og vel og gleyma ekki CQ TF,
ef myndir leynast í handraðanum.

 

Heimasmíðaður 100W sendir á 500 kHz

Heimasmíðaður 100W sendir á 500 kHz. Sjá: http://www.500kc.com/N4ICK/index.htm

Stjórn Í.R.A. hefur samþykkt að mæla með því að íslenskir leyfishafar taki upp tíðniskiptingu systurfélags okkar í Noregi (NRRL) á 600 og 60 metrum. Eins og staðan er í dag, búa radíóamatörar í flestum löndum í IARU Svæði 1 við takmarkaðar heimildir á þessum böndum, þ.e. heimildir á 600 metrum eru ekki samræmdar og á 60 metrum eru heimilaðar á bilinu frá 5-8 fastar tíðnir. Vegna þessa er ekki í gildi niðurskipting á þessum tíðnisviðum frá hendi IARU Svæðis 1.

Með tilliti til þess að á Íslandi og í Noregi er samræmd tíðniúthlutun, þ.e. á 5260-5410 kHz (60 metrum) annarsvegar og á 493-510 kHz (600 metrum) hinsvegar, þykir skynsamlegt að samræma skipulag notkunar í löndunum. Fyrir liggur, að þessi niðurskipting geti orðið vísir að nýrri tíðniskipan IARU Svæðis 1 þegar þar að kemur (sbr. að gert er ráð fyrir stafrænum teg. útgeislunar, sem enn eru ekki heimilaðar í TF og LA). Í ljósi þessa er mælt með eftirfarandi niðurskiptingu tíðnisviðanna:


Tíðnisviðið 493-510 kHz (600 metrar)

Viðmiðunartíðni

Teg. útgeislunar

Teg. notkunar

500 kHz

Mors (A1A) Almenn kalltíðni

503 kHz

Mors (A1A) Almenn samskipti


Tíðnisviðið 5260-5410 kHz (60 metrar)

Viðmiðunartíðni

Teg. útgeislunar

Teg. notkunar

Tilgreint tíðnisvið fyrir mismunandi teg. útgeislunar

5310 kHz

Mors (A1A) Almenn kalltíðni 5305-5315 kHz (eingöngu mors)

5335 kHz

QRP, allar teg. útgeislunar Almenn kalltíðni 5330-5340 kHz (allar teg. útgeislunar, en QRP afl)

U5355 kHz

Stafrænar teg. útgeislunar Almenn kalltíðni 5350-5360 kHz (stafrænar teg. útgeislunar)

5375 kHz

Tal (J3E, USB) Almenn kalltíðni 5375-5390 kHz (eingöngu tal)

5403,5 kHz

Tal (J3E, USB) Almenn kalltíðni, DX


Þess er farið á leit, að eftirtaldar fastar tíðnir (sendiaflestur á USB) séu sem minnst notaðar, þar sem sumar þessara tíðna eru ennþá einu möguleikar annarra leyfishafa í öðrum löndum í IARU Svæði 1 til að vinna í tíðnisviðinu.

5280 kHz 5278.5 kHz
5290 kHz 5288.5 kHz
5332 kHz 5330.5 kHz
5348 kHz 5346.5 kHz
5368 kHz 5366.5 kHz
5373 kHz 5371.5 kHz
5400 kHz 5398.5 kHz


Íslenskir leyfishafar þurfa að sækja sérstaklega um heimild til Póst- og fjarskiptastofnunar til að gera tilraunir í ofangreindum tíðnisviðum. Núgildandi heimildir okkar gilda til 31.12.2012.

(1) 493-510 kHz. Heimild er bundin við notkun á morsi (A1A tegund útgeislunar). Hámarks leyfilegt útgangsafl er 100W á víkjandi grundvelli.
(2) 5260-5410 kHz. Heimild er bundin við notkun á morsi (A1A) og tali (J3E, USB tegund útgeislunar). Hámarksbandbreidd merkis er 3 kHz. Hámarks leyfilegt útgangsafl er 100W á víkjandi grundvelli.
Heimildir í þessum tíðnisviðum eru veittar með þeim fyrirvara að komi til truflana á annarri fjarskiptastarfsemi, en þá verður að hætta sendingum strax. Kallmerki skal notast við upphaf og endi fjarskiptasambands og með viðeigandi reglulegu millibili á meðan fjarskiptasamband varir. N-leyfishafar og G-leyfishafar njóta sömu réttinda. Sækja má um heimild á tölvupósti til PFS á hrh@pfs.is.

Fyrir þá sem vilja fræðast um þessi nýju tíðnisvið er bent á greinar um 500 kHz og 5 MHz böndin sem birtust í 2. tbl. CQ TF 2010, bls. 18 annarsvegar, og bls. 22 hinsvegar. Ath. að til þess að meðfylgjandi hlekkur opnist, þarf viðkomandi félagsmaður að vera með skráðan aðgang. Sækja má um aðgang ti félagsins á tölvupóstfangið ira hjá ira.is

Til glöggvunar, er hér sýnt nákvæmara kort yfir kallsvæðaskiptingu Íslands með megináherslu á TFØ.

Skilgreining á hálendissvæðinu TFØ er eftirfarandi:

Lokað svæði sem umlykur óbyggðir og miðhálendi landsins, að undanskildum mannvirkjabeltum. Lokaða svæðið og mannvirkjabeltin eru skv. skilgreiningu samvinnunefndar um svæðisskipulag miðhálendisins. Í mannvirkjabeltum mið-hálendisins gildir venjuleg kallsvæðaskipting eftir staðsetningu miðað við stjórnsýslumörk.

Sjá hér: http://www.ira.is/tf-svaedaskiptin/

Bestu þakkir til Kristjáns Benediktssonar, TF3KB.

TF útileikarnir fara núna fram um verslunarmannahelgina í 33. sinn. Þar gefast tækifæri til að eiga fjarskipti viða um landið, allir sem skila inn upplýsingum um radíósambönd fá viðurkenningu fyrir þátttökuna og verðlaunaskjöldur verður veittur þeim sem nær flestum stigum. Útileikarnir standa frá 00z á laugardegi til 24z á mánudegi, en aðalþátttökutímabil eru:

Kl. 17-19 á laugardag
kl. 09-12 á sunnudag
kl. 21-24 á sunnudag
kl. 08-10 á mánudag

Nánari upplýsingar um útileikana má finna í júlíhefti CQ TF og á vef ÍRA. Fyrir viðurkenningar þarf að senda radíódagbækur (á pappír eða rafrænt) til Bjarna Sverrissonar, TF3GB, ekki síðar en 31. ágúst nk., en Bjarni veitir jafnframt upplýsingar um útileikana ef þarf:

Bjarni Sverrisson, TF3GB
Hnjúkaseli 4
109 Reykjavík
Netfang: tf3gb@islandia.is

Að sjálfsögðu eru myndir og frásagnir úr útileikunum alltaf vel þegnar!

Matthías Hagvaag, TF3-Ø35 og Guðlaugur K. Jónsson, TF8GX í félagsaðstöðu Í.R.A. 21. júlí. Ljósmynd: TF2JB.

Matthías Hagvaag, TF3-Ø35 og Guðlaugur K. Jónsson, TF8GX, mæltu sér mót í félagsaðstöðu Í.R.A. í Skeljanesi fimmtudaginn 21. júlí. Matthías lagði þá fyrir Guðlaug (sem er trúnaðarmaður ARRL vegna DXCC-umsókna hér á landi) síðustu kortin vegna umsóknar um DXCC á morsi fyrir félagsstöðina TF3IRA. Með þeirri umsókn hefur nú verið sótt um þrjár gerðir af DXCC viðurkenningarskjölum fyrir félagsstöðina, þ.e. fyrir mors (CW), tal (Phone) og blandað (Mixed). Fjöldi eininga (e. entities) að baki hverri umsókn eru alls 103, 103 og 127. Fljótlega verður fjórðu umsókninni bætt við, sem er fyrir RTTY sambönd.

Matthías hefur þegar hafið vinnu við að taka saman kort fyrir “Worked All Zones” eða “WAZ” viðurkenningarskjalið. Reglur fyrir það hafa verið þýddar á íslensku og má lesa þær með að smella á eftirfarandi hlekk: http://www.cq-amateur-radio.com/cq_awards/cq_waz_awards/cq_waz_rules_icelandic.pdf

Stjórn Í.R.A. þakkar þeim Matthíasi og Guðlaugi fyrir aðkomu að verkefninu.

Júlíhefti félagsblaðsins okkar, CQ TF, er komið út og er aðgengilegt félagsmönnum á vef ÍRA

Póst- og fjarskiptastofnun hefur kallað eftir samráði við hagsmunaaðila um nýja tíðnistefnu til næstu fjögurra ára, þ.e. 2011-2014. Skjal stofnunarinnar þessa efnis, auk sérstaks umræðuskjals um farnetsþjónustur og úthlutun tilheyrandi tíðnisviða var birt á heimasíðu PFS þann 1. júlí s.l. Frestur er gefinn til að skila umsögnum og athugasemdum til 19. ágúst n.k. Stjórn Í.R.A. mun fjalla um þann hluta stefnu Póst- og fjarskiptastofnunar sem varðar radíóamatöra sérstaklega, á fundi sem haldinn verður fljótlega.

Inntak erindis stofnunarinnar er eftirfarandi (ath. hér birt stytt):

PFS kallar eftir samráði: Tíðnistefna PFS og sérstakt umræðuskjal um farnetsþjónustur og úthlutun tilheyrandi tíðnisviða

Póst- og fjarskiptastofnun (PFS) birtir nú stefnu sína um stjórnun tíðnisviðsins fyrir árin 2011 – 2014 og kallar eftir samráði við hagsmunaaðila um skjalið. Með því vill stofnunin hvetja til umræðu og skoðanaskipta um framtíð tíðnimála. Sérstakt umræðuskjal er sett fram um farnetsþjónustur og úthlutun tilheyrandi tíðnisviða sem er einnig fjallað um í tíðnistefnunni.

Óskar stofnunin eftir umsögnum hagsmunaaðila um bæði skjölin. Frestur til að skila umsögnum og athugasemdum er til kl. 12:00 föstudaginn 19. ágúst 2011. Senda skal umsagnir í tölvupósti á netfangið thorleifur(hjá)pfs.is. Óskað er eftir að vísað verði til númers þeirra töluliða tíðnistefnunnar sem umsagnir eiga við um. Stofnunin áskilur sér rétt til að birta efni innsendra umsagna, þó án þess að birta nöfn umsagnaraðila.
_____________________________________________________________________________________________________________________________________


Á blaðsíðu 27 í tíðnistefnu Póst- og fjarskiptastofnunar er þessi texti um starfsemi radíóamatöra:


6.11 Radíóáhugamannaþjónusta. Þjónusta fyrir radíóáhugamenn (radíóamatöra) er viðurkennd af hálfu ITU með formlegri þjónustuskilgreiningu í fjarskiptareglum og sérstaklega úthlutuðu tíðnisviði fyrir þá. Það er mat PFS að auka þurfi fræðslu og eftirlit með þessari þjónustu og meta hvort ástæða sé til að endurskoða hámarkssendistyrk sem leyfður er í þéttbýli Þá verður metið hvort ástæða er til að gera kröfur um tiltekna lágmarksfjarlægð loftnets frá íbúðarhúsnæði m.t.t. alþjóðlegra viðmiða.

6.12 Eftirlit með tíðnisviðinu.

  • PFS hyggst auka frumkvæðiseftirlit með tíðnisviðinu. Stofnunin hefur á síðustu árum bætt tækjakost sinn sem gerir henni kleift að fylgjast með að tíðninotkun sé í samræmi við tíðniheimildir og þau skilyrði sem þar eru sett.
  • PFS mun styrkja enn frekar upplýsingakerfi stofnunarinnar til að auðvelda utanumhald mikilvægra upplýsinga um tíðniúthlutanir og staðsetningarupplýsinga fjarskiptavirkja.
  • Sérstakt tillit verður tekið til mikilvægra fjarskipta við úthlutun tíðna og staðsetningu fjarskiptavirkja. Þannig verði komið í veg fyrir hugsanlegar truflanir á mikilvægum fjarskiptum. Með mikilvægum fjarskiptum er t.d. átt við öryggisfjarskipti og flugfjarskipti.

Spurningar: Hver er skoðun hagsmunaaðila á eftirliti PFS með tíðnisviðinu? Er þörf á þessari auknu áherslu?

Annað
Er eitthvað annað sem hagsmunaaðilar vilja koma á framfæri varðandi tíðnistefnuna?

Tíðnistefnu PFS (27 bls.) má nálgast á þessum hlekk: http://www.pfs.is/default.aspx?cat_id=112&module_id=220&element_id=3259

IARU HF Championship keppnin fer fram dagana 9. og 10. júlí 2011. Þetta er sólarhringskeppni sem hefst á hádegi á laugardegi og lýkur á hádegi á sunnudegi. Þetta er aðgengileg keppni (t.d. án ákvæðis um hvíldartíma o.fl.) og tilvalin fyrir þá sem hafa áhuga á að stíga sín fyrstu skref á þessu sviði. Hér á eftir er gerð grein fyrir keppnisreglum og er vert að kynna sér þær vel.

  • Keppnin er opin öllum radíóamatörum.
  • Markmiðið er að hafa sambönd við eins margar stöðvar radíóamatöra eins og frekast er unnt um allan heim á 160, 80, 40, 20, 15 og 10 metra böndunum.
  • Keppnin er sólarhringskeppni og hefst kl. 12:00 á hádegi laugardaginn 9. júlí og lýkur kl. 12:00 á hádegi sunnudaginn 10. júlí. Þátttaka er heimil allt tímabil keppninnar og hvorki er áskilið að einmenningsstöðvar né fjölskipaðar stöðvar geri hvíldarhlé á þátttöku. Flokkar þátttöku eru þrír: „Einmenningsstöðvar”, „Fjölskipaðar stöðvar með einn sendi” og „Flokkur stöðva landsfélaga í IARU – „HQ” stöðvar”.

I. EINMENNINGSSTÖÐVAR

  • Tal (SSB) einvörðungu. Velja má um þátttöku í 3 flokkum: Háafli, lágafli eða QRP.
  • Mors (CW) einvörðungu. Velja má um þátttöku í 3 flokkum: Háafli, lágafli eða QRP.
  • Tal og mors (SSB/CW)i. Velja má um þátttöku í 3 flokkum: Háafli, lágafli eða QRP.
  • Háafl: Yfir 150W útgangsafl; lágafl allt að 150W útgangsafl; og QRP allt að 5W útgangsafl.

a. Einn aðili hefur öll QSO og skráir allar upplýsingar í keppnisdagbók.
b. Óheimilt er að nota upplýsingar á þyrpingu (e. spotting nets), “packet” eða fjölrása afruglara (e. multi-channel decoders) s.s. “CW skimmers”. Einmenningsstöðvar sem uppvísar verða af slíkri notkun verða skráðar í keppnisflokk með fjölskipuðum stöðvum með einn sendi.
c. Ætíð ber að starfa innan heimilda sem radíóamatörum eru veittar í reglugerðum um starfsemi þeirra í hverju þjóðlandi.
d. Aðeins er heimilt að hafa eitt merki í loftinu á hverjum tíma.

II. FJÖLSKIPAÐRAR STÖÐVAR MEÐ EINN SENDI

  • Einn flokkur er í boði, tal og mors (SSB/CW).

a. Dvelja verður að lágmarki í 10 mínútur á tilteknu bandi og á tiltekinni tegund útgeislunar, áður en skipt er um band eða tegund útgeislunar.
b. Aðeins er heimilt að hafa eitt merki í loftinu á hverjum tíma.
c. Óheimilt er að nota aðra sendi-/móttökustöð sem einvörðungu safnar margföldurum.
d. Ætíð ber að starfa innan heimilda sem radíóamatörum eru veittar í reglugerðum um starfsemi þeirra í hverju þjóðlandi.
e. Stöðvar sem virða ekki reglu um lágmarksdvöl á bandi og/eða á tiltekinni tegund útgeislunar, verða skráðar úr keppni og keppnisdagbækur þeirra notaðar eru til samanburðar (e. checklog).

III. FLOKKUR STÖÐVA LANDSFÉLAGA IARU

a. Slíkum stöðvum er heimilt að hafa eitt merki í loftinu á tiltekinni tegund útgeislunar á tilteknu bandi, samtímis. Það er, á 160m CW, 160m SSB; 80m CW, 80m SSB; 40m CW, 40m SSB; 20m CW, 20m SSB; 15m CW, 15m SSB; 10m CW, 10m SSB).
b. Allar „HQ” stöðvar skulu starfa innan sama ITU svæðis (e. zone).
c. Landsfélögunum er aðeins heimilt að nota eitt „HQ” kallmerki á hverju framangreindra banda.
d. Ætíð ber að starfa innan heimilda sem radíóamatörum eru veittar í reglugerðum um starfsemi þeirra í hverju þjóðlandi.

Samskiptin
a. „HQ” stöðvar aðildarfélaga IARU senda RS(T) skilaboð ásamt bókstöfum sem er skammstöfun fyrir viðkomandi aðildarfélag (skammstöfunin fyrir TF3HQ er t.d. „IRA”). Klúbbstöð alþjóðaskrifstofu IARU (NU1AW) telst til flokks “HQ” stöðva. Stjórnarmenn í IARU og stjórnarmenn í stjórnarnefndum hinna þriggja svæða IARU (I, II og III) senda “AC” og „R1″, „R2″ eða „R3″ (í stað skammstöfunarkóða), eftir því sem við á.
b. Allar aðrar stöðvar í keppninni senda RS(T) skilaboð ásamt númeri fyrir viðkomandi ITU svæði (Ísland er í ITU svæði 17).
c. Til að QSO teljist fullgilt fyrir QSO punkta, þarf að skrá allar upplýsingar í keppnisdagbók.

Gild sambönd
a. Heimilt er að hafa samband við sömu stöð einu sinni á tiltekinni tegund útgeislunar á tilteknu bandi.
b. Stöðvar sem keppa í flokki þar sem bæði tal og mors eru í boði (SSB/CW) er heimilt að hafa samband við sömu stöð einu sinni á tilteknu bandi og tiltekinni tegund útgeislunar.
c. Aðeins þau sambönd sem fara fram innan þeirra tíðnisviða sem almennt eru skilgreind til notkunar fyrir viðkomandi tegund útgeislunar á tilteknu bandi, veita QSO punkta.
d. Á sérhverju bandi er heimilt að hafa samband við sömu stöð einu sinni á tali (innan tilgreinds tíðnisviðs) og einu sinni á morsi (innan tilgreinds tíðnisviðs).
e. Sambönd sem ekki eru höfð á sömu tegund útgeislunar eða á sama bandi (e. cross mode og cross band) veita ekki QSO punkta. Það sama gildir um sambönd um endurvarpsstöðvar.
f. Í þeim þjóðlöndum, þar sem svo háttar að keppnisstöðvum er úthlutað tilgreindu tíðnisviði í bandskipulagi, ber að virða slíkt skipulag.
g. Notkun talsíma, internets eða hjálparmiðla af því tagi, í því skyni að auðvelda eða koma á sambandi við tiltekna stöð/stöðvar, stríðir gegn keppnisreglum og markmiði keppninnar.
h. Það sama gildir um: “self-spotting techniques on packet or other mediums”.

QSO stig
a. Sambönd sem höfð eru við stöðvar innan eigin ITU svæðis (hjá TF innan ITU svæðis 17) þ.m.t. sambönd við „HQ” stöðvar aðildarfélaga landsfélaga í IARU eða við stjórnarmenn í IARU og í stjórnarnefndum IARU svæðanna þriggja, veita 1 stig.
b. Sambönd við stöð í sama ITU svæði en á öðru meginlandi veita 1 stig.
c. Sambönd innan eigin meginlands (en við stöð á öðru ITU svæði) veita 3 stig.
d. Sambönd við annað meginland og annað ITU svæði veita 5 stig.

Margfaldarar
a. Heildarfjöldi ITU svæða og heildarfjöldi klúbbstöðva aðildarfélaga IARU sem haft hefur verið samband við er lagður saman á hverju bandi (ath. ekki eftir tegund útgeislunar). Sambönd við stjórnarmenn í IARU (og svæðunum) geta gefið mest 4 margfaldara á bandi („AC”; „R1″; „R2″; og „R3″).
b. Sambönd við IARU klúbbstöðvar og stjórnarmenn í IARU gilda ekki sem margfaldarar.
c. Sambönd við stjórnarmenn í IARU og sambönd við stjórnarmenn í stjórnarnefndum IARU svæðanna, gilda aðeins sem margfaldari ef þær stöðvar eru starfræktar af viðkomandi leyfishafa og þær keppa í flokki einmenningsstöðva.

Niðurstaða
Samanlagður fjöldi QSO stiga er margfaldaður með samanlögðum fjölda margfaldara.

Innsending keppnisgagna
a. Keppnisgögn þurfa að vera póststimpluð eða send í tölvupósti eigi síðar en 30 dögum eftir lok keppninnar.
b. Keppnisdagbækur á rafrænu formi þurfa að vera á svokölluðu „Cabrillo” formi.
c. Keppnisdagbækur á rafrænu formi, sem sendar eru í tölvupósti, ber að setja í viðhengi.
d. Keppnisdagbækur sem skilað er á rafrænu formi þurfa að hafa kallmerki (sem notað var í keppninni) í skráarheiti.
e. Keppnisdagbók skal færð í tímaröð en ekki skipt upp eftir böndum eða tegund útgeislunar.
f. Keppnisdagbækur sem sendar eru í tölvupósti skal senda sem viðhengi á IARUH@iaru.org.
g. Keppnisdagbækur sem skilað er á rafrænu formi þurfa að hafa kallmerki sem notað var í keppninni skráð í innihaldslínu tölvupósts (e. subject line of the email).
h. Keppnisdagbækur sem eru sendar á disklingi í pósti, skulu sendar á eftirfarandi póstfang: IARU HF Championship, IARU International Secretariat, Box 310905, Newington, CT 06111-0905 U.S.A.
i. Keppnisdagbækur sem eru sendar á disklingi í pósti, þarf að merkja greinilega með kallmerki stöðvar, nafni keppni, þátttökuflokki og dagsetningu.
j. Þátttakendum er heimilt að umskrá dagbækur sem færðar hafa verið á pappír á „Cabrillo” form. Þá skal slá inn upplýsingar um eitt QSO í einu og nota hjálparforrit sem sækja má á vefsíðuna: www.b4h.net/cabforms.
k. Keppnisdagbækur færðar á pappír, skulu færðar í tímaröð en ekki skipt upp eftir böndum eða tegund útgeislunar. Þær þurfa að veita greinilegar upplýsingar um sérhvert QSO samkvæmt eftirfarandi: Band, tegund útgeislunar, dagsetningu, tíma (GMT), kallmerki, upplýsingar um keppnisskilaboð (send og móttekin), margfaldara og QSO punkta.
l. Í keppnisdagbók á pappír skal merkja við margfaldara í fyrsta skipti sem þeim er náð á hverju bandi.
m. Keppnisdagbókum, sem færðar eru á pappír, og innihalda yfir 500 QSO, skulu fylgja sérstök yfirlitsblöð keppninnar eða ljósrit af þeim (þau má sækja á heimasíðu keppninnar) og gera grein fyrir tvíteknum samböndum (e. dups). Slík sambönd skulu skráð í stafrófsröð og skipt eftir böndum og tegund útgeislunar.
n. Öll sambönd sem skráð eru í keppnisdagbækur á pappír, skulu færðar í tímaröð en ekki skipt eftir böndum eða tegund útgeislunar.
o. Keppnisdagbækur á pappír ber að póstleggja til IARU International Secretariat, Box 310905, Newington CT 061111-0905, U.S.A.
p. Keppnisdagbókum á pappír skal fylgja sérstakt yfirlitsblað frá keppninni (eða gott ljósrit) þar sem skráðar eru nauðsynlegar upplýsingar um keppnina.

Viðurkenningarskjöl
a. Viðurkenningarskjöl verða veitt fyrir bestan árangur í hverjum keppnisflokki á sérhverju ITU svæði, sérhverri DXCC einingu og í sérhverri deild ARRL.
b. Landsfélögum IARU verða veitt viðurkenningarskjöl fyrir þátttöku klúbbstöðva þeirra svo og stjórnarmönnum í IRAU og stjórnarmönnum í stjórnarnefndum svæða IRAU.
c. Viðurkenningarskjöl þeirra þátttakenda sem hafa a.m.k. 250 QSO og 75 margfaldara verða sérgreind, því til staðfestingar.

Skilyrði þátttöku
a. Þeir leyfishafar sem senda inn keppnisdagbækur veita sjálfvirkt heimild fyrir því að dagbækur þeirra megi gera opinberar sé það ákvörðun keppnishaldara.
b. Sérhver leyfishafi skuldbindur sig að fara eftir keppnisreglum og að starfa innan heimilda sem þeim eru veittar í reglugerðum um starfsemi radíóamatöra í viðkomandi þjóðlandi. Ennfremur samþykkja þátttakendur að hlíta niðurstöðum viðurkenningarnefndar ARRL sem starfar í umboði alþjóðaskrifstofu IARU.

Frávísun úr keppni
a. Þátttakendum sem senda inn keppnisdagbækur með reiknaðri heildarniðurstöðu punkta, sem við yfirferð er skert um meir en 2%, kann að verða vísað úr keppni.
b. Þátttakendum sem senda inn keppnisdagbækur á pappír með reiknaðri heildarniðurstöðu punkta, sem við yfirferð er skert m meir en 2%, kann að verða vísað úr keppni.
c. Refsing fyrir sérhvert tvítekið samband og fyrir sérhvert kallmerki sem ekki er rétt móttekið/skráð í keppnisdagbók, hefur í för með sér frádrátt á 3 samböndum.
d. Refsing fyrir sérhvert kallmerki sem ekki er rétt móttekið/skráð í keppnisdagbók á rafrænu formi, er metið til frádráttar á einu sambandi.

Hlekkur heimasíðu keppninnar og keppnisreglur á ensku: http://www.arrl.org/iaru-hf-championship
Hlekkur fyrir keppnisdagbók á pappír: http://www.arrl.org/files/file/Contest%20Logs/iarulog.pdf
Hlekkur fyrir samantektarblað á pappír: http://www.arrl.org/files/file/Contest%20Logs/iaruhf.pdf


Fyrirspurnum má beina til TF2JB (tölvupóstfang: jonas hjá hag.is).