Jón Þ. Jónsson, TF3JA

Jónas Friðgeirsson, TF3JF

Sigurður Óskarsson, TF2WIN

 

 

 

 

 

 

 

Ari Þ. Jóhannesson, TF3ARI

Henry A. Hálfdánarson, TF3HRY

Jón Svavarsson, TF3JON

 

 

 

 

 

 

 

 

Næsta erindi á vetrardagskrá Í.R.A. verður haldið fimmtudaginn 2. maí kl. 20:30 í félagsaðstöðunni í Skeljanesi. Starfshópur félagsins um neyðarfjarskipti mun gefa félagsmönnum stöðuskýrslu um verkefnið, en hópurinn skilar endanlegum tillögum til stjórnar í síðasta lagi þann 13. maí n.k.

Starfshópinn skipa: Jón Þóroddur Jónsson, TF3JA, neyðarfjarskiptastjóri Í.R.A. og formaður; Sigurður Óskar Óskarsson, TF2WIN, fulltrúi stjórnar; Ari Þórólfur Jóhannesson, TF3ARI; Henry Arnar Hálfdánarson, TF3HRY; Jón Svavarsson, TF3JON; og Jónas Friðgeirsson, TF3JF.Starfshópurinn var skipaður af stjórn Í.R.A. á stjórnarfundi þann 17. september s.l.

Þetta verður jafnframt síðasti viðburðurinn á vetrardagskrá 2013. Stjórn Í.R.A. hvetur félagsmenn til að mæta stundvíslega.

Námskeið Í.R.A. til amatörprófs gengur vel.

Athygli þátttakenda á námskeiði Í.R.A. til amatörprófs er vakin á því að PowerPoint glærur frá kennslukvöldum nr. 15 og 16 sem fram fóru 5. og 9. apríl s.l., hafa verið settar inn á vefsvæði prófnefndar á heimasíðu félagsins. Kennari: Andrés Þórarinsson, TF3AM.

Um er að ræða 4 PowerPoint skjöl: Bylgjuútbreiðsla; Bylgjuútbreiðsla, dæmi; Loftnet og fæðilínur; og Loftnet ogfæðilínur, dæmi. Glærurnar má nálgast á eftirfarandi vefslóð: http://www.ira.is/namsefni/

Ath. að þær eru vistaðar neðst í neðri kaflanum (neðst á síðunni) undir fyrirsögninni: Skjöl til hliðsjónar.

Þakkir til Andrésar Þórarinssonar, TF3AM.

Starfshópur Í.R.A. um fjaraðgang í Skeljanesi 18. apríl. Frá vinstri: Yngvi Harðarson TF3Y formaður, Vilhjálmur Þór Kjartansson TF3DX og Kristján Benediktsson TF3KB. Ljósmynd: TF3SB.

Þann 18/9 2012 skipaði stjórn Í.R.A. starfshóp til að gera tillögur um stefnumótun félagsins hvað varðar fjaraðgang að teknu tilliti til alþjóðlegrar leiðsagnar sem er til mótunar um þessar mundir. Starfshópurinn kynnti fyrsta hluta skýrslu sinnar í félagsaðstöðunni í Skeljanesi þann 18. apríl. Fyrsti hluti varðar afstöðu hópsins til fjaraðgangs íslenskra leyfishafa.

Ágætar umræður urðu eftir kynningu þessa 1. áfanga skýrslunnar og sátu nefndarmenn fyrir svörum hvað vaðar einstök efnisatriði. Skýrslan er til almennrar kynningar á póstlista félagsins.

Stjórn Í.R.A. þakkar starfshópnum fyrir vandaða vinnu og góða kynningu.

Nýtt hefti félagsblaðs Í.R.A., CQ TF, er komið út. Hér er aprílheftið 2013 á ferðinni. Njótið lestrarins!

Blaðið hefur verið sent félagsmönnum í tölvupósti. Hafi einhver ekki fengið blaðið er hann vinsamlegast beðinn um að hafa samband við undirritaðan.

Eintak af blaðinu (í aukinni upplausn) hefur verið sett inn á vefsíðu CQ TF á heimasíðunni til niðurhals.

73 de Jónas Bjarnason, TF3JB,
gestaritstjóri 2. tbl. CQ TF 2013.

(jonas.bjarnason.hag(hjá)gmail.com)

Ákveðið hefur verið að félagsaðstaða Í.R.A. við Skeljanes verði lokuð fimmtudaginn 25. apríl n.k. sem er sumardagurinn fyrsti. Næsti opnunardagur félagsaðstöðunnar verður fimmtudaginn 2. maí, en þá lýkur vetrardagskrá félagsins á yfirstandandi starfsári með stöðuskýrslu starfshóps Í.R.A. um neyðarfjarskipti (nánar kynnt þegar nær dregur).

Stjórn Í.R.A. óskar félagsmönnum og fjölskyldum þeirra gleðilegs sumars.

Myndin er tekin á námskeiði Í.R.A. til amatörprófs sem haldið er í Háskólanum í Reykjavík.

Námskeið Í.R.A. til amatörprófs gengur vel. Aðeins eru eftir 4 kennsludagar, auk upprifjunardags., en próf Póst- og fjarskiptastofnunar til amatörleyfis verður haldið laugardaginn 4. maí kl. 10:00 árdegis. Prófstaður: Kennslustofa Tækni- og verkfræðideildar Háskólans í Reykjavík, V108.

Vakin er athygli á að próf Póst- og fjarskiptastofnunar til amatörleyfis er opinbert próf og öllum opið. Þátttaka í námskeiði Í.R.A. til amatörprófs er þar af leiðandi ekki nauðsynlegur undanfari þess að sitja prófið. Ástæða er þó til að hvetja áhugasama til að skrá sig sem fyrst, hyggi þeir á þátttöku í prófinu.

Senda má tölvupóst til Póst- og fjarskiptastofnunar: hrh(hjá)pfs.is eða til umsjónarmanns Í.R.A. með námskeiði félagsins: ira(hjá)ira.is Ath. að þátttakendur í yfirstandandi námskeiði Í.R.A. til amatörprófs þurfa ekki að skrá sig sérstaklega.

Fyrir hönd stjórnar Í.R.A.,

Jónas Bjarnason, formaður.

Nýr starfshópur. Kristján Benediktsson TF3KB, Yngvi Harðarson TF3Y formaður starfshópsins, Jónas Bjarnason TF3JB (gestur á fundinum) og Vilhjálmur Þór Kjartansson TF3DX. Ljósmynd: Sölvi Tryggvason.

Næsta erindi á vetrardagskrá Í.R.A. verður haldið fimmtudaginn 18. apríl kl. 20:30 í félagsaðstöðunni í Skeljanesi. Starfshópur félagsins um fjaraðgang mun gefa félagsmönnum stöðuskýrslu um verkefnið. Þess skal getið, að starfshópnum voru ekki settar tímaskorður í vinnu sinni, enda mikilvægt að tekið sé tillit til alþjóðlegrar leiðsagnar sem er í mótun um þessar mundir.

Starfshópinn skipa þeir Yngvi Harðarson, TF3YH, formaður; Kristján Benediktsson, TF3KB og Vilhjálmur Þór Kjartansson, TF3DX. Þeir voru skipaðir af stjórn Í.R.A. á stjórnarfundi þann 17. september s.l.

Stjórn Í.R.A. hvetur félagsmenn til að mæta stundvíslega.

Alþjóðadagur radíóamatöra er þann 18. apríl n.k. Þann mánaðardag árið 1925 voru alþjóðasamtök landsfélaga radíóamatöra (International Amateur Radio Union, I.A.R.U.) stofnuð fyrir 89 árum.

Einkunnarorðin eru að þessu sinni: „Amatör radíó: önnur öld neyðarfjarskipta gengur í garð” (e. Amateur Radio: Entering Its Second Century of Disaster Communications). Aðildarfélög I.A.R.U. eru í dag starfandi í 166 löndum heims með rúmlega 4 milljónir leyfishafa.

Stjórn Í.R.A. óskar félagsmönnum til hamingju með daginn!

Yngvi Harðarson TF3Y vinnur við forritun loftnets og rótors félagsstöðvarinnar TF3IRA.

Síðasta sunnudagsopnun á yfirstandandi vetrardagskrá verður haldin sunnudaginn 14. apríl n.k. Yngvi Harðarson, TF3Y segir frá reynslu sinni af SteppIR Yagi loftnetum, en hann hefur um nokkurra ára skeið átt og notað eitt slíkt. Æ fleiri íslenskir leyfishafar hafa fest kaup á SteppIR loftnetum síðustu misseri eða keypt loftnet frá helsta samkeppnisaðila SteppIR, UltraBeam á Ítalíu.

Húsið verður opnað kl. 10 árdegis og er miðað við að dagskrá standi yfir frá kl. 10:30-12:00.

Stjórn Í.R.A. hvetur félagsmenn til að mæta stundvíslega. Í boði verður rjúkandi Merrildkaffi og nýbökuð vínarbrauð frá Björnsbakaríi á Seltjarnarnesi.

__________

SteppIR loftnetin boðuðu í raun „byltingu” í útfærslu og smíði loftneta fyrir HF böndin þegar þau voru fyrst kynnt á Dayton Hamvention sýningunni í Ohio vorið 2001. Útfærsla SteppIR á loftnetum sínum byggir á því að stökin (e. element) eru sett saman úr holum fíberrörum í tilteknum lengdum og inni í rörunum eru ræmur úr leiðandi efni sem ýmist eru styttar eða lengdar með því að stýra litlum mótorum frá stjórnkassa í fjarskiptaherbeginu. Loftnetin eru þannig stytt eða lengd hverju sinni, allt eftir hvaða tíðni menn ætla að vinna á. Þar af leiðandi eru engar gildrur notaðar sem tryggir aukinn ávinning. Auk stefnuvirkra Yagi loftneta, framleiðir SteppIR tvípóla, stangarloftnet og nú síðast nýja CrankIR línu fyrirtækisins, sem er að koma á markað um þessar mundir. Þetta eru tiltölulega ódýr og einföld og tapslítil ferðaloftnet sem eru handstillt (í resónans) á eitt band í einu.

Það er Fluidmotion Inc., í Bandaríkjunum sem framleiðir SteppIR loftnetin. Þetta er ungt fyrirtæki og var stofnað árið 2001 af þremur leyfishöfum: Mike Mertel K7IR, Jim Thomas K7IRF og John Mertel, WA7IR. Vefslóð á heimasíðu: http://www.steppir.com

Erling Guðnason, TF3EE

Jónas Bjarnason, TF3JB

Guðlaugur Kristinn Jónsson, TF8GX

 

 

 

 

 

 

 

 

Erling Guðnason, TF3EE; Jónas Bjarnason, TF3JB; og Guðlaugur Kristinn Jónsson, TF8GX flytja næsta erindi á vetrardagskrá félagsins, sem haldið verður fimmtudaginn 11. apríl kl. 20:30 í félagsaðstöðunnni við Skeljanes. Þeir félagar munu segja frá og kynna, í máli og myndum, stærstu árlegu amatörsýningarnar sem haldnar eru í heiminum, þ.e. Dayton Hamvention í Ohio í Bandaríkjunum, Ham Radio í Friedrichshafen í Þýskalandi og Tokyo Ham Fair í Japan.

Þess má geta, að allir þrír hafa komið oftar en einu sinni á Ham Radio sýninguna í Þýskalandi, en auk þess hefur Erling sótt Tokyo Ham Fair í Japan og Guðlaugur Kristinn, Dayton Hamvention í Bandaríkjunum.

Stjórn Í.R.A. hvetur félagsmenn til að mæta stundvíslega.

________

Árlega eru haldnar fjölmargar ráðstefnur og sýningar fyrir radíóamatöra um allan heim. Flestar eru svæðisbundnar og sérhæfðar en nokkrar eru mjög stórar og þar er markmiðið að gera sem flestum til hæfis. Þrjár þær stærstu eru haldnar í Bandaríkjunum, Evrópu og Japan. Nánast öll hugsanleg áhugasvið innan radíótækninnar og fjarskiptanna eru þar til umfjöllunar, auk þess sem framleiðendur sýna nýjustu tæki og búnað, sem oft er jafnframt til sölu á sérstöku sýningarverði ef menn eru tilbúnir til að ganga frá viðskiptum á staðnum. Undirritaður hafði um langan tíma haft áhuga á að sækja annað hvort Dayton Hamvention eða Ham Radio í Friedrichshafenen en af ýmsum ástæðum hafði ekki orðið af því. Síðan kom óvænt upp að mér bauðst að ferðast með þremur öðrum amatörum á Ham Radio 2008.

Textinn að ofan er tekinn úr inngangi ferðasögu TF3JB á sýninguna í Friedrichshafen árið 2008. Lesa má frásögnina í heild í 3. tbl. CQ TF 2009, bls. 27-34 á neðangreindri vefslóð.

Blaðið má finna hér: http://www.ira.is/cq-tf/

Námskeið Í.R.A. til amatörprófs gengur vel.

Námskeið Í.R.A. til amatörprófs gengur vel og var mikill hugur í þátttakendum þegar tíðindamaður leit við í kennslustofu V108 í Háskólanum í Reykjavík í gær, föstudaginn 6. apríl. Þá urðu kennaraskipti þegar Andrés Þórarinsson, TF3AM við við kennslu af Hauki Konráðssyni, TF3HK. Þetta var 15. kennslukvöldið (af 22), en námskeiðinu lýkur með prófi til amatörleyfis á vegum Póst- og fjarskiptstofnunar laugardaginn 4. maí n.k.

Leiðbeinendur á námskeiðinu eru þeir Andrés Þórarinsson TF3AM; Ágúst Sigurðsson TF3AU; Haukur Konráðsson TF3HK; Henry Arnar Hálfdánarson TF3HRY; Hörður Mar Tómasson TF3HM, Kristinn Andersen TF3KX; Sæmundur E. Þorsteinsson TF3UA; Vilhjálmur Þór Kjartansson TF3DX; og Þór Þórisson TF3GW.

Vilhjálmur Þór Kjartansson TF3DX, formaður prófnefndar Í.R.A. vann skipulag námskeiðsins. Umsjónarmaður f.h. Í.R.A. er Jónas Bjarnason TF3JB. Námskeiðið er haldið í Háskólanum í Reykjavík og er fjöldi þátttakenda átján.

Yngvi Harðarson TF3Y

Áður auglýst sunnudagsopnun félagsaðstöðunnar sunnudaginn 7. apríl fellur niður, en verður þess í stað haldin viku síðar, þ.e. sunnudaginn 14. apríl kl. 10:30-12:00. Yngvi mun tala um reynslu sína af SteppIR 2E Yagi loftnetinu.

Viðburðurinn verður auglýstur á ný þegar nær dregur.