Almennt

Vilhjálmur og John við bifreið Vilhjálms (sjá aðlögunarrásina fyrir 160m fyrir miðri framrúðu). Ljósmynd: TF3LMN.

Vilhjálmur Þór Kjartansson, TF3DX, hefur náð þeim frábæra árangri úr bílnum að undanförnu, að hafa haft sambönd við stöðina T32C, sem er staðsett á Austur-Kiribati í norðurhluta Line eyjaklasans í Kyrrahafi, á samtals 9 böndum, þ.e. 1.8 – 3.5 – 7 – 10 – 14 – 18 – 21 – 24 og 28 MHz. Vilhjálmur sagði, aðspurður, að þetta hafi verið mjög spennandi og bætti við, “…að hefði stöðin mín haft 6 metra bandið, hefði verið mjög gaman að prófa þar líka…”. Þess má geta, að fjarlægðin á milli TF og T32 er tæplega 12 þúsund kílómetrar. Öll samböndin voru höfð á morsi.

Árangur Vilhjálms er einkar athyglisverður hvað varðar lægri böndin, þ.e. 3.5 MHz og 1.8 MHz þar sem sambönd úr farartækjum á þessum tíðnisviðum eru erfið enda bylgjulegndin 80 metrar annarsvegar og 160 metrar hinsvegar og loftnet þar af leiðandi stutt og tapsmikil. Loftnet Vilhjálms eru heimasmíðuð og hann hefur sjálfur sagt að sér reiknist til að nýtnin sé um 2,5% á 160 metrum sem er mjög góð útkoma.

Hann segir nánar um loftnetsbúnaðinn: “Ég er með 2 toppa í takinu, sá styttri er tæpir 2m og sá lengri 3,3m. Með þeim styttri sleppur spólan ein í aðlögunartækinu niður á 160 m, ekki nauðsynlegt að hafa spólu úti þó það sé betra. Með þeim lengri er loftnetið 4,75 m að lengd og nær upp í 6 m yfir götu, um 0,3 m betur ef spóla er í stönginni. Það eru smellitengi á þessu öllu, svo það tekur bara augnablik að breyta loftnetinu”. Þess má geta að lokum, að Vilhjálmur notar 100W stöð í bílnum. Sjá nánar bráðskemmtilega grein eftir hann (með ljósmyndum) um TF3DX/M sem birtist í 1. tbl. CQ TF 2010, bls. 9-11.

Stjórn Í.R.A. óskar Vilhjálmi til hamingju með árangurinn.

Vefslóð fyrir T32C DX-leiðangurinn: http://www.t32c.com/

Jón Ágúst, TF3ZA, sagði að flest sambönd frá JX50 hafi verið höfð á 30, 20 og 17m böndunum.

Jón Ágúst Erlingsson, TF3ZA, flutti afar fróðlegt erindi félagsaðstöðu Í.R.A. í Skeljanesi þann 20. október í máli og myndum
um 10 daga DX-leiðangur sem farinn var til Jan Mayen fyrri hluta júlímánaðar í sumar (2011). Jón var í hópi átta leyfishafa frá
alls sex þjóðlöndum, Bandaríkjunum, Grikklandi, Íslandi, Póllandi, Sviss og Svíþjóð. Kallmerkið JX5O var starfrækt og þrátt
fyrir tiltölulega óhagstæð skilyrði náðu leiðangursmenn alls 17.844 samböndum.

Erindið var vel sótt (28 félagar) líkt eins og sjá má á meðfylgjandi myndum. Margt fróðlegt kom fram, m.a. að meðalhitinn
var um 2°C og kaldara að nóttu til. Veður var yfirleitt rólegt og rakt, en gat verið það rysjótt sem hvorutveggja hafði í för með
sér sandrok og kulda. Tjöldin fuku t.d. ofan af leiðangursmönnum þrisvar sinnum. Jón Ágúst sýndi mikinn fjölda mynda og
fengu fundarmenn góða hugmynd um náttúru eyjarinnar og vakti athygli hversu “æpandi” gróðursnauð hún er. Leiðangurinn
tók sér far með skútu frá Íslandi og tók siglingin um 50 klukkustundir. Aðspurður um hvort hvítabirnir væru ekki algengir á
Jan Mayen, svaraði Jón því til að svo hafi ekki verið undanfarna áratugi. Á hinn bóginn væri ekki hægt að útiloka neitt og
kvaðst hann hafa verið feginn að leiðangurinn hafi verið laus við slíka gesti á meðan dvalið var á eyjunni.

Líkt og áður segir, voru skilyrði fremur léleg, sbr. að aðeins náðust 4 QSO á 6m, ekkert á 10m, 1 QSO á 12m (við TF3EE),
auk þess sem lægri böndin (80 og 160m voru lokuð). 20m bandið gaf bestan árangur, svo og 30m og 17m, auk nokkurra
opnana síðdegis á 15m. Leiðangurinn tók með sér 4 Icom sendistöðvar og 2 Yaesu sendistöðvar, auk 400W RF magnara.
Einnig 2 ljósavélar og 300 lítra af eldsneyti. Loftnet voru 2 HexBeam og lóðrétt stangarloftnet (e. verticals).

Stjórn Í.R.A. þakkar Jóni Ágúst TF3ZA fyrir ánægjulega og fróðlega kvöldstund í Skeljanesi.

Fram kom m.a. að alls náðust 35 QSO við TF-stöðvar, þar af eina sambandið sem náðist á 12 metra bandinu.

Fram kom m.a. að tjöld fuku ofan af leiðangursmönnum í þrígang í miklu hvassviðri og kulda, en hitastig var 2°C.

Erindið var vel sótt og ekki voru til sæti handa öllum líkt og greinilega má sjá á myndinni.

Vilhjálmur Í. Sigurjónsson, TF3VS, býður upp “pöllurnar” góðu (spaðalykilinn) frá Speed-Paddles U.S.A.

Flóamarkaður Í.R.A. að hausti fór fram sunnudaginn 16. október 2011. Alls mættu yfir 35 manns á viðburðinn sem hófst  stundvíslega kl. 13 og stóð yfir fram til kl. 16. Framboð var ágætt, m.a. notaðar UHF stöðvar, mikið af smíðaefni, íhlutir, kassar til smíða, ýmis mælitæki og margs konar aukahlutir, m.a. frá MFJ og Yaesu, auk loftneta fyrir HF, VHF, UHF og SHF böndin frá Mosley, New-Tronics, M2, WiMo og J-Beam. Þá var ágætt framboð af LCD tölvuskjám og sérhæfðum tölvuhlutum. Óhætt er að fullyrða að þeir sem gerðu viðskipti á flóamarkaðnum hafi undantekningarlaust gert góð kaup.

Hápunktur viðburðarins var uppboð á dýrari hlutum og búnaði sem haldið var stundvíslega kl. 14 og annaðist Vilhjálmur Í. Sigurjónsson, TF3VS, það af einskærri snilld. Alls voru 14 “númer” á uppboðinu og sala með ágætum, en hvað mest var boðið í New-Tronics Hustler 6-BTV stangarloftnet fyrir HF-sviðið og valinkunnar gullhúðaðar “pöllur” (spaðalykil) frá Speed-Paddles. Stórt Mosley TA-53-M 4 staka Yagi loftnet fyrir HF-böndin (sem nýtt) seldist þó ekki, þrátt fyrir sanngjarnt ásett verð og sumir uppboðshlutir seldust jafnvel eftir uppboðið, þegar þeir sem komu seint höfðu náð að kynna sér nánar hlutina, sbr. t.d. nýjan Comtex PS30SW-I 13.8VDC/30A spennugjafa (sem færri fengu en vildu). Stefnt er að því að halda flóamarkað að vori í apríl n.k., en félagið á von á umtalsverðu magni af gefins búnaði, tækjum og íhlutum upp úr áramótunum.

Stjórn Í.R.A. þakkar félagsmönnum fyrir góða þátttöku og Jóni Svavarssyni TF3LMN fyrir myndatökuna.

Margt áhugavert og nýtilegt gat leynst í kössunum. Sigurður Smári Hreinsson, TF8SM, kannar málið.

Jón Gunnar Harðarson, TF3PPN; Haraldur Þórðarson, TF3HP; og Gunnar Svanur Hjálmarsson, TF3FIN.

Guðmundur Ingi Hjálmtýsson, TF3IG; Bjarni Magnússon, TF3BM; og Kjartan H. Bjarnason, TF3BJ.

Andrés Þórarinsson, TF3AM; Vilhjálmur Sigurjónsson, TF3VS; Jónas Bjarnason, TF2JB; og Kjartan H. Bjarnason, TF3BJ, skoða “roller” spólur, einangrara, hverfiþétta og fleira áhugavert.

Gísli G. Ófeigsson, TF3G, gjaldkeri félagsins þótti harður í verðlagningunni, en sanngjarn þegar upp var staðið.

Nokkuð magn var eftir af UHF-stöðvum, borðhleðslutækjum og fleiru.

Hluti af dýrari tækjum og búnaði sem voru til uppboðs á flóamarkaðnum.

Eldri mælitæki og margskonar tæki sem flestallt seldist við vægu verði.

Nýjung að þessu sinni var uppboð á völdum hlutum. TF3VS tók það hlutverk að sér og stóð sig frábærlega vel! (Ljósmyndir: TF2JB).

Flóamarkaður að hausti verður haldinn í félagsaðstöðunni við Skeljanes, sunnudaginn 16. október, á milli kl. 13-15. Félagsmenn geta þá komið með hluti sem þeir vilja selja, gefa eða skipta á, auk þess sem félagið mun bjóða hluti sem því hefur áskotnast gefins eða til sölu við hagstæðu verði. Í fyrra (2010) var kynnt til sögunnar sú nýjung að efna til uppboðs á völdum hlutum á flóamarkaðnum. Vilhjálmur Í. Sigurjónsson, TF3VS, tók að sér verkefnið og þótti takast vel upp. Hann hefur samþykkt að hafa með höndum stjórn á uppboðinu á flóamarkaðnum í ár sem efnt verður til á slaginu kl. 14 á sunnudag.

Líkt og kynnt var á heimasíðu og póstlista þann 4. október s.l., er að þessu sinni boðið upp á þá nýjung, að félagsmenn geti skráð fyrirfram, verðmeiri hluti, sem síðan eru til birtingar á þessum vettvangi. Hér á eftir er birtur listi yfir þær skráningar sem borist höfðu til Vilhjálms Í. Sigurjónssonar, TF3VS, til dagsins í dag.

ATH. UPPFÆRÐ SKRÁ M.V. FÖSTUDAGINN 14. OKTÓBER KL. 13:00.

Félagsmenn geta bætt við tækjum/búnaði við þennan lista sem þeim hugnast að setja á uppboðinu með því að gefa sig á tal við Vilhjálm í félagsaðstöðunni fram til kl. 13:30 á sunnudag.

Undirbúningur flóamarkaðarins hefst síðdegis daginn áður (að laugardeginum) á milli kl. 14 og 18 þegar þeim hlutum sem félagið er aflögufært um verður stillt upp, en á þeim tíma geta þeir félagsmenn einnig mætt sem óska að selja/gefa hluti á flóamarkaðnum og stillt þeim upp. Fyrir þá, sem hentar það betur, er einnig í boði að stilla upp hlutum u.þ.b. klukkustund fyrir opnun á sunnudagsmorgninum (þ.e. frá kl. 12). Aðalatriðið er, að allt verði tilbúið kl. 13 þegar flóamarkaðurinn verður opnaður.

Stjórn Í.R.A. hvetur félagsmenn til að nota tækifærið og gera góð viðskipti. Kaffi verður á könnunni.

Til gamans eru birtar hér fyrir neðan tvær ljósmyndir sem teknar voru á stærsta flóamarkaði í Evrópu fyrir radíóamatöra
sem haldinn er árlega í tengslum við “Ham Radio” sýningarnar í Friedrichshafen í Þýskalandi. Flóamarkaðurinn stendur
yfir frá föstudegi til sunnudags.

Vilhjálmur Sigurjónsson, TF3VS.

Vilhjálmur Sigurjónsson, TF3VS, mun stjórna uppboði á flóamarkaðnum 16. október.

Nokkur undanfarin ár hefur Í.R.A. staðið fyrir árlegum flóamarkaði/söludegi innan félagsins. Félagsmenn hafa þá geta komið með hluti sem þeir vilja selja, gefa eða skipta á, auk þess sem félagið hefur boðið hluti sem því hefur áskotnast gefins eða til sölu við hagstæðu verði. Í fyrra (2010) var kynnt til sögunnar sú nýjung að efna til uppboðs á völdum hlutum á flóamarkaðnum. Vilhjálmur Í. Sigurjónsson, TF3VS, tók að sér verkefnið og þótti takast vel upp. Hann hefur nú samþykkt að hafa með höndum stjórn á uppboði á flóamarkaðnum sem efnt verður til í félagsaðstöðunni, sunnudaginn 16. október n.k.

Að þessu sinni er hugmyndin að bjóða upp á nýjung í tengslum við flóamarkaðinn. Það er, að félagsmenn sem hafa áhuga á að selja stöðvar, aukahluti eða verðmeiri búnað, m.a. loftnet, geta nú skráð þá hluti fyrirfram hjá félaginu. Upplýsingunum verður safnað saman frá og með deginum í dag (4. október), og áfram næstu daga, eða til 11. október. Degi síðar, 12. október, verður síðan birtur listi með þessum upplýsingum hér á heimasíðunni, svo menn geti fengið nokkra hugmynd fyrirfram um það, sem verður í boði á flóamarkaðnum. Þeir sem hafa áhuga, geta skráð tæki og búnað hjá Vilhjálmi, TF3VS, með því að senda honum tölvupóst með upplýsingunum á póstfangið: tf3vs(hjá)ritmal.is

_____________________________________________________________________

Dæmi um upplýsingar sem ágætt er að skrá hjá Vilhjálmi:

1. Tegund og gerð: Yaesu FT-840 100W SSB/CW sendistöð fyrir 10-160m böndin.
2. Vinnsluspenna: 13.8VDC.
3. Ástand: Í góðu lagi.
4. Fylgihlutir: 500 Hz kristalsía (fyrir mors), handhljóðnemi, leiðbeiningabók og straumsnúra.
5. Aðrar upplýsingar: Mjög vel með farin.
6. Lágmarksverð: 60 þúsund krónur.
_____________________________________________________________________

Stjórn Í.R.A. hvetur félaga til að nýta tækifærið og koma tækjum/búnaði í verð sem e.t.v. hefur ekki verið notaður í einhvern tíma (eða jafnvel svo árum skiptir). Nú býðst tækifæri til að gera bragarbót á.

F.h. stjórnar,

73, Jónas Bjarnason, TF2JB, formaður.