Heimasíða ÍRA hefur verið í ólagi að undanförnu. Ölvir Sveinsson, TF3WZ vefstjóri félagsins vinnur að lausn.

Þegar „www.ira.is“ er slegið inn kemur gjarnan það svar sem sést á meðfylgjandi mynd.

Til að opna síðuna þarf að ýta á „Reload“ eða F5 eða slá inn http://www.ira.is

Þess er vænst að viðgerð takist fljótlega.

Stjórn ÍRA.

Uppfærð DXCC staða TF kallmerkja er miðað við 13. ágúst 2022.

Upplýsingar liggja fyrir um a.m.k. 23 íslensk kallmerki sem hafa sótt um og fengið DXCC viðurkenningar til þessa dags.

Líkur benda til, að DXCC viðurkenning Einars Pálssonar, TF3EA hafi verið sú fyrsta sem gefin var út til íslensks leyfishafa. Einar virðist hafa verið virkur strax/fljótlega eftir útgáfu leyfisbréfs, en fyrsta reglugerðin um starfsemi radíóamatöra var gefin út af Póst- og símamálastjórninni 7. febrúar 1947. Til marks um virkni Einars, geta heimildir m.a. um að hann hafi tekið þátt í fyrstu CQ World Wide DX keppninni árið 1948 (bæði í tal- og morshlutanum). 

Einar Pálsson, TF3EA var handhafi leyfisbréfs nr. 1 á Íslandi, fyrsti formaður ÍRA og fyrsti heiðursfélagi ÍRA.

TF kallmerki með DXCC skráningu: Virk skráning (15): TF1A, TF2LL, TF3DC, TF3DT, TF3EK, TF3G, TF3IRA, TF3JB, TF3MH, TF3SG, TF3VS, TF3Y, TF4M, TF5B og TF8GX. Óvirk skráning (3): TF3IM, TF3SV og TF2WLC. Eldri kallmerki með óvirka skráningu (5): TF3AR, TF3EA, TF3SG, TF3ZM og TF5TP.

Stjórn ÍRA.

Elín Sigurðardóttir, TF2EQ ungmennafulltrúi ÍRA er stödd í sumarbúðum YOTA í Króatíu.

Í dag (11. ágúst) kl. 16:00 náði hún sambandi við Ara Þórólf Jóhannesson, TF1A þar sem hann var staddur á Akureyri (IPØ5wp) með ferðastöð sína til fjarskipta um Es’hail 2 / QO-100 gervitunglið.

Ari sagði að hún hafi náð flott í gegn um mikla þyrpingu á bandinu (e. „pile-up“).

Kallmerki Elínar var 9A1ØØQO. Ari Þórólfur sagði að Elín hafi beðið fyrir góðar kveðjur til félaganna heima á Íslandi. Elín ætlar að reyna að vera sem mest í loftinu og sagðist vonast til að hafa sambönd við sem flestar TF stöðvar.

YOTA sumarbúðirnar í Króatíu verða QRV fram á laugardag. Önnur kallmerki þeirra eru m.a. 9A22YOTA, 9A1YOTA, 9A2YOTA, 9A3YOTA, 9A4YOTA, 9A5YOTA og 9A100QO. Sjá nánar vefslóðina: https://www.ham-yota.com/9a-summer-camp-award/

Stjórn ÍRA.

Elín Sigurðardóttir TF2EQ og Ari Þórólfur Jóhannesson TF1A á góðri stundu í Skeljanesi. Ljósmynd: TF3JB.
Daggeir Pálsson TF7DHP og Ari Þórólfur Jóhannesson TF1A. Myndin var tekin í dag (11. ágúst) við ferðaloftnet TF1A á Akureyri. Ljósmynd: Villa, XYL TF1A.

Á fundi í stjórn ÍRA í gær (9. ágúst) var samþykkt að fresta áður auglýstu boði í tilefni 75 ára afmælis félagsins sem vera átti næstkomandi sunnudag.

Ný dagsetning fyrir afmælisfagnaðinn er sunnudagurinn 28. ágúst.

Nánar verður skýrt frá viðburðinum þegar nær dregur.

Stjórn ÍRA.

Myndin er af kallmerki félagsstöðvarinnar TF3IRA við innganginn í Skeljanes. Ljósmynd: TF3JB.

Elín Sigurðardóttir, TF2EQ ungmennafulltrúi ÍRA ferðaðist til Króatíu frá Hollandi á laugardag til að taka þátt í sumarbúðum „Youngsters On The Air“ verkefnisins, en þetta er 10. árið sem efnt er til sumarbúða á vegum YOTA.

Sérstök kallmerki eru virkjuð frá sumarbúðunum; m.a. 9A22YOTA, 9A1YOTA, 9A2YOTA, 9A3YOTA, 9A4YOTA, 9A5YOTA og 9A100QO. Sjá nánar vefslóðina: https://www.ham-yota.com/9a-summer-camp-award/

Elín ætlar að reyna vera sem mest í loftinu og sagðist vonast til að hafa sambönd við sem flestar TF stöðvar eftir því sem skilyrði leyfa.

U.þ.b. 80 þátttakendur eru í sumarbúum YOTA í Króatíu. Búðunum verður formlega slitið á laugardag, 13. ágúst.

Mynd frá fjarskiptaaðstöðu 9A22YOTA í sumarbúðunum. Yfirleitt eru 3 stöðvar í gangi samtímis. Ljósmynd: YOTA.

Félagsaðstaða ÍRA í Skeljanesi verður opin fyrir félagsmenn og gesti kl. 20-22 fimmtudaginn 11. ágúst. Kaffiveitingar.

Fundarsalur, fjarskiptaherbergi TF3IRA og QSL stofa á 2. hæð verða opin og nýjustu tímaritin fyrir radíóamatöra liggja frammi.

Verið velkomin í Skeljanes!

Stjórn ÍRA.

Mynd úr fundarsal í félagsaðstöðu ÍRA í Skeljanesi. Ljósmynd: TF3JB.

Ein af stóru keppnum ársins er Worked All Europe (WAE) keppnin. Morshlutinn verður haldinn helgina 13.-14. ágúst. Þetta er 48 klst. keppni, en þátttaka er leyfð samanlagt í mest 36 klst.

Markmiðið er að hafa sambönd við stöðvar utan Evrópu, þ.e. sambönd innan Evrópu gilda ekki í keppninni.  Skilaboð: RST+raðnúmer. QTC skilaboð gefa punkta aukalega.

Sambönd við hverja nýja DXCC einingu (e. entity) gilda sem margfaldarar, auk sambanda við hvert nýtt kallsvæði í Bandaríkjunum, Kanada, Ástralíu, Nýja Sjálandi, Suður-Afríku,  Japan og Brasilíu, auk kallsvæðanna RA8 og RA9.

Margfaldarar hafa aukið vægi eftir böndum; á 80 metrum fjórir, á 40 metrum þrír og á 20/15/10 metrum tveir. WAE er haldin á vegum landsfélags radíóamatöra í Þýskalandi.

Vefslóð á keppnisreglur: https://www.darc.de/der-club/referate/conteste/wae-dx-contest/en/wae-rules/

Með ósk um gott gengi!

Stjórn ÍRA.

25. Vita- og vitaskipahelgin fer fram eftir tvær vikur – helgina 20.-21. ágúst.

307 skráningar frá 40 þjóðlöndum höfðu borist inn á heimasíðu viðburðarins 7. ágúst.

Enginn íslenskur viti hefur enn verið skráður, en í fyrra (2021) virkjaði Svanur Hjálmarsson, TF3AB kallmerkið TF1IRA frá Knarrarósvita (IS-0001) sem er staðsettur austan við Stokkseyri.

Vefslóð á heimasíðu viðburðarins:  https://illw.net/index.php/entrants-list-2022

Stjórn ÍRA.

Myndin er af Svani Hjálmarssyni, TF3AB þegar hann virkjaði TF1IRA frá Knarrarósvita í fyrra (2021).  Hér er hann við tækin sem hann setti upp í fortjaldi við hjólhýsi sitt við vitann. Ljósmynd: Andrés Þórarinsson TF3AM.

Teknar voru saman upplýsingar um TF kallmerki sem fengu skráningu á þyrpingu (e. cluster) vikuna 30. júlí til 5. ágúst 2022.

Alls fengu 17 íslensk kallmerki skráningu að þessu sinni á FT4, FT8, tali (SSB) og morsi (CW) á 6, 10, 15, 17, 20 og 80 metrum.

Upplýsingarnar eru fengnar á http://www.dxsummit.fi/#/  Sambærilegar síður eru í boði á netinu til samanburðar. Fyrst er skráð kallmerki, þá tegund-/ir útgeislunar og band/bönd:

TF1EIN                  FT8 á 6 metrum.
TF1EM                  FT8 á 6, 17 og 40 metrum.
TF1OL/P               FT8 á 15, 17 og 20 metrum.
TF1VHF/B            CW á 6 metrum.
TF2CT                    FT8 á 17 metrum.
TF2MSN               FT4, FT8 og SSB á 6, 17 og 20 metrum.
TF3D                      CW á 15, 20, 40 og 80 metrum.
TF3JB                     CW á 6, 15, 17, 20 og 30 metrum.
TF3MH                  FT8 á 10 metrum.
TF3PPN                FT8 á 20 metrum.
TF3SG                   CW á 6 og 17 metrum.
TF3VE                    FT4 og SSB á 20 og 80 metrum.
TF3VS                    FT4 og FT8 á 17, 20 og 40 metrum.
TF4M                     CW á 30 metrum.
TF5B                      FT8 á 17 og 20 metrum.
TF7DHP                SSB á 80 metrum.
TF8KY                    SSB á 6 metrum.

Til skoðunar er að taka reglulega saman upplýsingar af þessu tagi.

Stjórn ÍRA.

Daggeir Pálsson TF7DHP var virkur á tímabilinu á SSB á 80 metrum. Myndin er af glæsilegri fjarskiptaaðstöðu hans á Akureyri. Ljósmynd: TF7DHP.

Félagsaðstaða ÍRA í Skeljanesi verður opin fyrir félagsmenn og gesti fimmtudaginn 4. ágúst. Húsið opnar kl. 20:00. Kaffiveitingar.

Fundarsalur, fjarskiptaherbergi TF3IRA og QSL stofa á 2. hæð verða opin og nýjustu tímaritin fyrir radíóamatöra liggja frammi.

Töluvert hefur borist af nýju radíódóti.

Verið velkomin í Skeljanes!

Stjórn ÍRA.

Kallmerki félagsstöðvarinnar TF3IRA er á vegg við innganginn í Skeljanes. Ljósmynd: TF3JB.

TF útileikunum 2022 lauk á hádegi í gær, mánudag 1. ágúst. Viðburðurinn gekk með ágætum í þokkalega góðum skilyrðum.

Yfir 20 TF kallmerki voru í loftinu um allt  land á 160, 60, 80 og 40 metrum. Reglur voru uppfærðar fyrir leikana í ár og fólst meginbreytingin í því að stytta tímabilið úr 3 í 2 sólarhringa og að afnema takmörk á fjölda sambanda. Menn eru sammála um að breytingin hafi komið vel út.

Vefslóð á heimasíðu fyrir leikana: http://eik.klaki.net/cgi-bin/utileikar  Þar má slá inn upplýsingar úr dagbókum. Gögnum má einnig skila á eyðublaði á vefnum (sbr. fyrri pósta) og skila í tölvupósti á ira@ira.is  Gögn þurfa að berast fyrir miðnætti 8. ágúst. Einar Kjartansson, TF3EK, umsjónarmaður leikanna, veitir allar upplýsingar: einar52hjágmail.com

Sérstakar þakkir til Einars Kjartanssonar, TF3EK fyrir gott utanumhald og til félagsmanna fyrir góða þátttöku.

Stjórn ÍRA.

TF3IRA notaði ICOM IC-7300 og IC-7610 stöðvar félagsins í útileikunum. Myndin er af IC-7610. Ljósmynd: TF3JB.

TF útileikarnir eru hálfnaðir á hádegi í dag, sunnudag. Virkni hefur verið góð og skilyrði ágæt um allt land. Leikunum lýkur á morgun (mánudag) á hádegi.

Uppfærðar reglur hafa komið vel út, en megin breytingin felst í því að stytta tímabilið úr þremur í tvo sólarhringa og að afnema takmörk á fjölda sambanda.

Félagsstöðin TF3IRA var virkjuð frá Skeljanesi í gær, laugardag á 40, 60, 80 og 160 metrum. Góð sambönd náðust m.a. við Kristján TF4WD á Sauðárkróki, Andrés TF1AM í Þingvallasveit, Einar TF3EK á Svalbarðseyri, Ólaf Örn TF1OL fyrir utan Stykkishólm – auk margra góðra samanda við aðra leyfishafa sem voru staddir nær.

Loftnetið okkar á 160 metrum kom vel út. Það var notað á 160, 60 og 80M en Hustler 5-BTV stangarnetið á 40M. Ekkert CW samband var haft frá Skeljanesi að þessu sinni.

Félagsmenn eru hvattir til að taka þátt!

Stjórn ÍRA.

ICOM IC-7300 og IC-7610 stöðvar félagsins voru notaðar í TF útileikunum.
Jónas Bjarnason TF3JB við hljóðnemann frá TF3IRA í útileikunum í fjarskiptabergi félagsins í Skeljanesi.
Erling Guðnason TF3E vð hljóðnemann frá TF3IRA í útileikunum í fjarskiptaherbergi félagsins í Skeljanesi.
Meðal félagsmanna sem litu við í Skeljanesi í gær (laugardag): Erling Guðnason TF3E, Kristján Benediktsson TF3KB og Mathías Hagvaag TF3MH. Ljósmyndir: TF3JB nr. 1, 3 og 4. TF3KB nr. 2.