Jón Þóroddur Jónsson, TF3JA, neyðarfjarskiptastjóri Í.R.A. hefur óskað eftir birtingu eftirfarandi orðsendingar frá neyðarfjarskiptastjóra IARU svæðis 1 vegna náttúruhamfaranna í Japan. Orðsendingin varðar tíðnir sem notaðar eru til neyðarfjarskipta á vegum systurfélags okkar í Japan og er þess farið á leit við íslenska leyfishafa að virða þessi forgangsfjarskipti hvað varðar notkun 40 metra bandsins. Orðsendingin er birt óstytt hér á eftir á ensku:

The following information has just bee submitted to the IARU-R1 website following information received from Ken Yamamoto, JA1CJP of JARL.

“HF frequencies are now known to be in use by Japanese amateurs as part of their emergency response:

  • 7043 kHz SSB controled by JR3QHQ the Osaka branch manager of JARL He is gathering incident information on radio and forwarding this information onto the internet.
  • 7075 kHz SSB is operated by JL3YSP in Wakayama occasionally.
  • 7030 kHz which is the JARL emergency communication frequency in their bandplan is in use by JA7RL (JARL regional HQ station).

Would all amateurs please make every effort to avoid interfering with emergency communications on these frequencies.”

This information will also be made available on Twitter and Facebook when published. Since 7030 is mentioned I will also post this to the QRP mailing lists as this is a frequency used by them.

73, Greg, G0DUB, IARU Region 1 Emergency Communications Co-Ordinator.


Innskot 12.3.2011 kl. 14:50. Í Japan eru alls um 1,3 milljónir radíóamatöra, þannig að Japanir eru sjálfum sér um nógir hvað varðar neyðarfjarskipti. Samkvæmt IARU er því ekki áformað að sendir verði leyfishafar til neyðarfjarskipta í landinu frá öðrum landsfélögum radíóamatöra.

TF2JB

Áhugasamir um mors og morskennslu ætla að hittast sunnudaginn 13. mars kl. 10:00 og ræða um morskennslu og framhald hennar.

Áður auglýst umræðuþema um reglugerðarmál kl. 10:30 sama dag frestast því að sinni.

Gert er ráð fyrir stuttum fundi og skemmtilegum. Kaffi á könnunni og meðlæti. Mætum öll, 73 Guðmundur, TF3SG

Andrés Þórarinsson, TF3AM.

Næsta fimmtudagserindi félagsins verður haldið fimmtudaginn 10. mars n.k. kl. 20:30. Fyrirlesari kvöldsins er Andrés Þórarinsson, TF3AM, og nefnist erindið “Loftnet sem allir geta smíðað”.

Andrés er félagsmönnum af góðu kunnur. Hann hefur tekið virkan þátt í félagsstöfunum Í.R.A. og m.a. skrifað reglulega greinar í CQ TF, auk þess að hafa kennt á námskeiðum félagsins til amatörréttinda. Hann er mikill keppnismaður og hefur undanfarin ár stundað keppnir, einkum frá sumarhúsi sínu í “TF1” kallsvæði, þar sem hann hefur einnig gert loftnetatilraunir. Andrés mun m.a. skýra frá helstu niðurstöðum þeirra í erindi sínu.

Félagar, fjölmennum! Kaffiveitingar verða í boði félagsins.


Andrés Þórarinsson, TF3AM, er mikill áhugamaður um alþjóðlegar keppnir radíóamatöra. Í 4. tbl. CQ TF 2010 kemst hann skemmtilega að orði og skrifar m.a.: “Ég skal alveg játa það að kontestar (radíókeppnir) heilla mig. Þá gildir að hafa allan búnað í mjög góðu lagi, loftnet vel stillt, tölvan rétt sett upp og tengd við allan búnað, og síðan að sitja stíft við og slá eigið met sé þess kostur. Stóru kontestarnir eru skemmtilegastir, þá gengur mikið á, margir flinkir operatörar í loftinu og jafnmargir afleitir, sumar stöðvar eru hvellsterkar en aðrar heyrast varla, sumir komnir til að slá öll met en aðrir rétt grípa í tækin síðdegis á laugardegi sér til smáskemmtunar. RTTY kontestar eru auðveldastir, hver stöð tekur lítið tíðnisvið og styrkurinn nýtist vel, SSB eru sýnu erfiðari því hver talar ofan í annan og það þarf gott afl, góða heyrn og góða mótun til að það gangi vel. Stóru kontestarnir eru þeir sem skipulagðir eru af ARRL og CQ, svo og IARU, BARTG og þýska félaginu, þá er þátttakan yfirleitt afar góð og hefur farið vaxandi allan síðasta áratug. Besti tíminn til kontesta er yfir dimmari hluta ársins en einungis IARU er á miðju sumri”.

TF2JB

Ársæll Óskarsson, TF3AO.

Ársæll Óskarsson, TF3AO, leiðir umræðuþema dagsins á 4. og næstsíðustu sunnudagsopnun vetrardagskrárinnar, sunnudaginn 6. mars n.k. kl. 10:30. Sæli mun fjalla um notkun RTTY (Radioteletype) á HF-böndunum, en radíóamatörar hafa notað þessa tegnund útgeislunar í fjarskiptum um allan heim í bráðum 60 ár. Fyrst með aðstoð vélbúnaðar (e. teletype machines) en í seinni tíð með notkun tölva.
Félagið býður upp á kaffi og meðlæti.

Fyrirkomulag umræðna í sunnudagsopnunum er hugsað sem afslappað, þ.e. þar sem menn sitja með kaffibolla í stóra sófasettinu og ræða amatör radíó. Tiltekinn leyfishafi sem hefur staðgóða þekkingu á viðkomandi umræðuefni, nú RTTY, leiðir um ræðuna og svarar spurningum. Eftirtalin umræðuþema hafa þegar farið fram: Quad loftnet; Að læra mors; Fæðilínur og nú, RTTY. Á síðustu sunnudagsopnun vetrardagskrár, þann 13. mars n.k., verður umræðuþemað reglugerðarmál.

TF2JB

 

Í.R.A. stendur fyrir kynningu á starfsemi radíóamatöra í Raftækniskólanum / Tækniskólanum á Skólavörðuholti á svokölluðum opnum dögum skólans sem haldnir eru dagana 3. og 4. mars.


Jón Þóroddur Jónsson, verkfræðingur, TF3JA, mun annast kynninguna fyrir hönd félagsins og fer hún fram föstudaginn 4. mars á milli kl. 10-12. Viðburðirnir eru kynntir fyrirfram og þurfa nemendur að skrá sig sérstaklega á hvern viðburð.

Tækniskólinn, skóli atvinnulífsins, er tæplega 2700 nemenda skóli. Hann er samsettur úr alls 10 sérgeindum skólum, þ.e. Byggingartækniskólanum, Hársnyrtiskólanum, Hönnunar- og handverksskólanum, Fjölmenningarskólanum, Flugskóla Íslands, Tæknimenntaskólanum, Upplýsingatækniskólanum, Raftækniskólanum, Skipstjórnarskólanum og Véltækniskólanum.

Sjá nánar: http://www.vatnsendaskoli.is/files/skolinn/taekniskolinn.pdf?PHPSESSID=aa2ef12d9ab47d11c0f9aa05d876792c

 TF2JB

Áður auglýst fimmtudagserindi Jónasar Bjarnasonar, TF2JB og Guðlaugs K. Jónssonar, TF8GX, um viðurkenningarskjöl sem flytja átti fimmtudaginn 3. mars, fellur niður af óviðráðanlegum ástæðum.

Leitast verður við að finna nýjan tíma sem allra fyrst í samráði við fyrirlesara. Almennt opnunarkvöld verður í félagsaðstöðunni við Skeljanes á venjulegum tíma.

TF2JB

Frá prófdegi 2010.

Námskeið til amatörréttinda verður haldið á vegum félagsins Íslenskir radíóamatörar á tímabilinu 7. mars til 27. apríl n.k.
Kennsla fer fram í félagsaðstöðu Í.R.A. við Skeljanes, mánudaga og miðvikudaga frá kl. 19:00-22:00. Kennslu getur þó lokið
fyrr sum kvöld sem er háð kennsluefni hverju sinni.

Ath. að ekki verður af sérstöku kynningarkvöldi 2. mars n.k., heldur mun stutt kynning fara fram í byrjun fyrsta kvöldsins,
þ.e. mánudaginn 7. mars. Öllum er frjálst að mæta það kvöld í félagsaðstöðuna.

Stefnt er að því að sækja um til Póst- og fjarskiptastofnunar að próf verði haldið laugardaginn 14. maí n.k. kl. 10 árdegis.
Sú dagsetning býður upp á þann möguleika að efna til auka- og/eða æfingatíma eftir að formlegri kennslu lýkur.

Þeir sem hafa skráð sig á námskeiðið munu fá tölvupóst frá félaginu í dag, 1. mars, því til staðfestingar. Námskeiðsgjald verður
12.500 krónur. Innifalið eru námskeiðsgögn. Félagsmenn Í.R.A. greiða 9.500 krónur. Þeir sem gerast félagsmenn við skráningu
njóta lægra gjalds. Í lögum félagsins segir, að þeir sem ganga inn eftir 1. ágúst ár hvert greiði hálft félagsgjald. Fólk á aldrinum
16-66 ára greiðir þannig 2000 krónur og fólk yngra en 16 ára (og eldra en 67 ára) 1000 krónur.

Þátttakendum er bent á að kynna sér upplýsingar um strætisvagnaferðir á heimasíðu og tímatöflu þeirra, en viðkomustöð Strætó
er beint fyrir utan húsið. Nokkur spölur er í sölubúðir. Þátttakendum er því bent á að taka með sér nesti (ef þeir svo kjósa) en
félagssjóður býður ávallt upp á kaffi.

Kjartan Bjarnason, TF3BJ, skólastjóri námskeiðsins veitir allar nánari upplýsingar. Tölvupóstur hans er: kjartan@skyggnir.is

Sigurður R. Jakobsson, TF3CW, starfrækti TF3W frá félagsstöð Í.R.A. 18.-19. september. Ljósmynd: TF3LMN.

Sigurður R. Jakobsson, TF3CW, mun starfrækja stöð félagsins í ARRL DX Phone keppninni 5.-6. mars n.k. og nota kallmerkið TF3W. Keppnin hefst kl. 00:00 laugardaginn 5. mars og lýkur kl. 23:59 sunnudaginn 6. mars. Sigurður mun keppa í einmenningsflokki á 14 MHz á hámarksafli (1kW).

Markmið keppninnar er að hafa eins mörg QSO og mögulegt er á þessum tveimur sólarhringum við aðrar amatörstöðvar í W/VE. Mest er hægt að hafa 63 margfaldara á einu bandi. Hvert ríki í Bandaríkjunum og hvert fylki í Kanada telja. Öll ríki í Bandaríkjunum gilda þannig sem margfaldarar nema KH6 og KL7 en “District of Columbia, DC” kemur inn sem margfaldari í keppninni. Í Kanada gilda fylkin: NB (VE1, 9); NS (VE1); QC (VE2); ON (VE3); MB (VE4); SK (VE5); AB (VE6); BC (VE7); NWT (VE8); NF (VO1); LB (VO2); NU (VYØ); YT (VY1); og PEI (VY2).

TF2JB

Við upphaf erindis. Vilhjálmur með fundarmenn á aðra höndina og frumherjana á hina höndina (TF5TP og TF6GI).

Vilhjálmur Þór Kjartansson, TF3DX, flutti leiftrandi áhugavert erindi í félagsaðstöðu Í.R.A. í gærkvöldi, 24. febrúar. Það var sprottið af hönnun hans á sendiloftneti fyrir TF4M á 1,8 MHz.

Vilhjálmur lagði upp með grundvallarspurninguna um lárétta eða lóðrétta skautun og hvernig það tengist þeim vanda sem er samfara hönnun loftneta þegar bylgjulengdin er 160 metrar og ekki reynist unnt að koma þeim hærra en sem nemur 1/8 úr bylgjulengd eða svo. Hann útskýrði einnig áhrifin af jarðleiðni, ekki síst kosti þess að hafa loftnet við sjávarsíðuna eins gert var með umrætt loftnet. Loks drap hann á áhrifin af mismunandi hæð lóðréttra loftneta. Að loknu erindi svaraði Vilhjálmur fjölmörgum spurningum félagsmanna.

Vilhjálmur mun ljúka umfjöllun sinni eftir þrjár vikur með framhaldserindi í Skeljanesi, þ.e. fimmtudaginn 17. mars n.k. kl. 20:30. Þá verður farið í tapsvalda og sjónarmið við hönnun topphatts og mótvægis með nýtni að leiðarljósi. Aðsókn var afburða góð, 36 félagsmenn, sem er besta aðsókn á einn viðburð hjá félaginu frá því flutt var í húsið fyrir réttum 7 árum.

Stjórn Í.R.A. þakkar Vilhjálmi og hvetur félagsmenn til að taka frá fimmtudagskvöldið 17. mars n.k.

Vilhjálmur sýndi margar áhugaverðar “Power Point” glærur með erindinu.

Líkt og sjá má á myndinni þurftu sumir að standa þar sem ekki hafði verið raðað upp nema 30 stólum…

Það hefði mátt heyra saumnál detta…menn einbeittu sér að því að hlusta til að missa ekki af neinu.

Sigurður Óskarsson, TF2WIN og S. Smári Hreinsson, TF8SM, spyrja Vilhjálm út í einstök atriði í kaffihléinu.

Brosmildir verkfræðingar í kaffihléi: Frá vinstri: Sæmundur TF3UA; Kjartan TF3BJ; og Jón Þóroddur TF3JA.

Eru 160 metrar skemmtilegasta bandið? Frá vinstri: Guðmundur TF3SG, Stefán TF3SA og Höskuldur TF3RF.

Vilhjálmur Þór Kjartansson, TF3DX

Næsta fimmtudagserindi á vetrardagskrá félagsins verður haldið fimmtudaginn 24. febrúar n.k. kl. 20:30. Fyrirlesari kvöldsins er Vilhjálmur Þór Kjartansson, TF3DX, og nefnist erindið “Sendiloftnet TF4M á 160 metrum; sjónarmið við hönnun”. Vilhjálmur segir sjálfur, að hann muni leitast við að setja efnið þannig fram, að hvorutveggja höfði til byrjenda sem og þeirra sem eru lengra komnir í loftnetafræðum.

Meðal íslenskra leyfishafa hefur mikið hefur verið rætt um hönnun Vilhjálms á sendiloftneti Þorvaldar, TF4M, á 160 metra bandinu og flestir íslenskir leyfishafar hafa fylgst með frábærum árangri hans í tíðnisviðinu undanfarin misseri. Árangur Þorvaldar hefur verið það góður að annað eins hefur ekki sést hér á landi á 160 metrum, m.a. í alþjóðlegum keppnum (yfir heiminn) sem og í almennri DX-vinnu. Því til vitnis má m.a. nefna, að fyrstu Worked All Zones (WAZ) og DXCCviðurkenningarskjölin á 160 metrum hafa verið gefin út til TF4M í Otradal.

Nú gefst einstakt tækifæri að hlusta á hönnuð loftnetsins sem á þátt í velgengni Þorvaldar. Félagar, mætum stundvíslega! Kaffiveitingar verða í boði félagsins.

Vilhjálmur Þór Kjartansson, TF3DX, við tengikassa fyrir fæðilínu í 160 metra sendiloftnet TF4M haustið 2010.

Erindið hófst kl. 20:30; Sigurður R. Jakobsson og Yngvi Harðarson, TF3Y fengu “contest-style” kynningu.

Erindi þeirra Sigurðar, TF3CW og Yngva, TF3Y í félagsaðstöðunni, fimmtudagskvöldið 17. febrúar var vel heppnað. Fullt hús (32 á staðnum) og góðar umræður. Menn slepptu kaffihléi og þeir félagar töluðu til kl. 22:30. Viðstaddir sóttu sér einfaldlega kaffi á meðan á erindinu stóð (sem gafst ágætlega) og gekk kaffikannan látlaust allt kvöldið.

Fyrri hluti erindisins fjallaði um hnattstöðu Íslands og norðurljósavirknina sem er að meðaltali 243 dagar á ári samanborið við aðeins 10 daga í mið-Englandi, 5 daga í norður-Frakklandi og 1 dag á ári í suður-Frakklandi.

Í seinni hlutanum var farið yfir allar helstu alþjóðlegar keppnir á árinu 2010 á CW, SSB og RTTY og árangur TF stöðva skoðaður, annars vegar með hliðsjón af norðurljósavirkni (í hverri keppni) og hins vegar með samanburði við aðrar stöðvar. Þetta var afar áhugaverður og vel heppnaður hluti erindisins og tóku fundarmenn virkan þátt með umræðum. Í ljós kom, að íslenskar stöðvar hafa í raun staðið sig ótrúlega vel þrátt fyrir allt – en hafa þarf í huga að samkeppnin er ekki einvörðungu ójöfn vegna norðurljósavirkninnar einnar, heldur er ótrúlegur fjöldi erlendra leyfishafa með afburða loftnet sem erfitt væri að setja á vetur hérlendis.

Stjórn Í.R.A. þakkar þeim Sigurði R. Jakobssyni, TF3CW og Yngva Harðarsyni, TF3Y fyrir vel heppnað erindi og Jóni Svavarssyni, TF3LMN, fyrir myndatökuna.

Farið var yfir árangur TF stöðva í flestum alþjóðlegum keppnum á árinu 2010, þ.e. CW, SSB og RTTY.

Hnattstaða Íslands er óneitanlega erfið fyrir okkur á HF.

Menn voru óneitanlega hugsi þegar sýnt var hve erfið hnattstaða okkar er í raun, t.d. í samanburði við Breta og Frakka

TF2JB

Matthías Hagvaag, TF3-Ø35, handleikur QSL kortin fyrir fyrstu DXCC umsókn TF3IRA.

Matthías Hagvaag, TF3-Ø35, hefur að undanförnu yfirfarið QSL kort félagsstöðvarinnar með það fyrir augum að sækja megi um viðurkenningarskjöl fyrir TF3IRA. Í gær, 17. febrúar, skilaði hann af sér tilbúnum umsóknum fyrir DXCC í félagsaðstöðu Í.R.A. í Skeljanesi. Til að byrja með verður sótt um þrjú sérgreind skjöl frá ARRL: DXCC MIXED, DXCC PHONE og DXCC CW. Í framhaldi er hugmyndin að sækja einnig um sérgreint DXCC RTTY viðurkenningarskjal.

Því til viðbótar, hefur verið ákveðið að sótt verði um WORKED ALL ZONES (WAZ), CQ DX AWARD, og WORKED ALL PREFIXES AWARD (WPX) viðurkenningarskjölin frá CQ Magazine. Ákvörðun um fleiri viðurkenningarskjöl, s.s. Worked All Europe Award (WAE) frá DARC verður tekin í samráði við nýjan stöðvarstjóra félagsstöðvarinnar.

Stjórn Í.R.A. þakkar Matthíasi fyrir gott vinnuframlag.