Nýja fræðsludagskráin heldur áfram.

Á fimmtudag, 19. október mætir Björgvin Víglundsson, TF3BOI í Skeljanes með erindið: „Amatör radíó og stærðfræði“.

Björgvin ætlar að sýna okkur áhugaverðar hliðar á áhugamálinu sem í raun byggir meira og minna á því skemmtilaga fagi, stærðfærði. Vakin er athygli þátttakenda á yfirstandandi námskeiði félagsins í til amatörprófs.

Félagsmenn eru hvattir til að láta þetta tækifæri ekki framhjá sér fara. Veglegar kaffiveitingar.

Stjórn ÍRA.

.

Mynd af félagsaðstöðu ÍRA í Skeljanesi.

Efnt var til ferðar á meðal félagsmanna ÍRA laugardaginn 14. október og var farið á einkabílum til að skoða fjarskiptasafn Sigga Harðar að Skógum undur Eyjafjöllum. Fararstjóri var Andrés Þórarinsson, TF1AM og leiðsögumaður á staðnum Sigurður Harðarson, TF3WS. Að þessu sinni heimsóttu 12 félagar safnið að Skógum.

Lagt var upp frá Reykjavík kl. 10 árdegis í blíðskaparveðri og voru flestir voru komnir aftur til síns heima fyrir kvöldmat.

Mikil ánægja var með móttökurnar á Skógum enda Sigurður með fróðari mönnum um fjarskipti og fjarskiptatæki hér á land undanfarna áratugi.

Þakkir til Sigga fyrir frábærar móttökur.

Stjórn ÍRA.

Sagan á bak við safnið.

Siggi hefur safnað tækjunum í um 50 ár og þau spanna rúmlega 70 ára sögu fjarskipta á Íslandi. Í safninu er m.a. að sjá allar gerðir bílatalstöðva sem notaðar hafa verið á Íslandi sem hann afhenti samgöngusafninu að Skógum til eignar árið 2009. Tækin skipta hundruðum, frá fyrstu morstækjum til „gemsa” og koma frá fjallamönnum, lögreglu, björgunarsveitum, rútufyrirtækjum, leigubílum, almannavörnum og áhugamönnum um fjarskiptatækni.

Árið 1957, þá 13 ára gamall, smíðaði Siggi Harðar fyrsta útvarpstækið sitt og hefur síðan smíðað mörg tæki og sendistöðvar, þar á meðal stærstan hluta endurvarpskerfa Landsbjargar og Ferðafélagsins 4X4, þ.e. þann hluta sem notar eingöngu sólarorku. Það eru yfir 50 sendistöðvar.

Þegar breytingar hafa orðið á fjarskiptatækninni hér á landi, svo sem þegar AM-mótuðum talstöðvum var skipt út fyrir SSB-mótaðar árið1982 – hefur Siggi ávallt haldið eftir eintaki af hverri gerð sem hann hefur komist yfir, stundum með því að komast í geymslur þjónustufyrirtækja þar sem staðið hefur yfir tiltekt. Á þann hátt hafa varðveist margar gamlar talstöðvar sem nú eru í þessu safni. Þessi söfnun hefur einnig spurst út í gegnum tíðina og menn hafa gefið gömul eintök.

Elstu tækin eru frá árinu 1945, frá því er fjarskipti voru gefin frjáls á Íslandi eftir stríðið. Það hefur komið sér vel að kunna skil á sögu þessara tækja að Siggi hefur unnið við þjónustu fjarskiptatækja í yfir 50 ár.

Siggi Harðar er einnig radíóamatör (TF3WS) og hefur starfað í Flugbjörgunarsveitinni frá 16 ára aldri. Vegna þessa hefur hann m.a. öðlast góða yfirsýn yfir fjölbreytta flóru fjarskiptatækja á Íslandi ásamt því að hafa umgengist menn sem hafa reynslu af notkun þeirra.

Á myndina vantar Georg Kulp TF3GZ, Heimi Konráðsson TF1EIN og Sigurð Andrésson. Ljósmynd: TF3WS.
Ljósmyndir 2-7: Georg Kulp TF3GZ.

Félagsstöðin TF3W tók þátt í SSB hluta Scandinavian Activity keppninnar laugardaginn 14. október.

Þátttaka var aðeins hluta úr degi á laugardag og var bundin við 10 metra bandið. Höfð voru tæplega 150 sambönd. Notuð var Icom IC-7300 100W stöð og OptiBeam Yagi loftnet OBDYA9-A sem hvorutveggja komu vel út í ágætum skilyrðum.

Pier Abert Kaspersma, TF3PKN var á hljóðnemanum. Honum til aðstoðar var Jón E. Berg, TF5J.

Bestu þakkir til þeirra Pier og Jóns fyrir að virkja stöðina.

Stjórn ÍRA.

TF3PKN virkjaði félagsstöðina TF3W í SAC SSB keppninni 12. október.
Jón E. Berg TF5J virkjaði einnig félagsstöðina TF3W í SAC SSB keppninni 12. október.

Í gær, 14. október, bættist við innanlandsviðtæki til hlustunar á HF tíðnum yfir netið.

Það er sömu tegundar og þau fyrri, þ.e. af KiwiSDR gerð, staðsett í Örlygshöfn við Patreksfjörð. Vefslóð: http://pat.utvarp.com  Loftnet er stangarloftnet frá AC Marine, gerð KUM-480-2 fyrir tíðnisviðið 0.15-30 MHz.

Árni Helgason, TF4AH stóð að uppsetningu viðtækisins sem áður var staðsett á Bjargtöngum og var tekið þar niður 3. þ.m.

KiwiSDR viðtækin vinna frá 10 kHz upp í 30 MHz. Hægt er að hlusta á AM, FM, SSB og CW sendingar og má velja bandbreidd sem hentar hverri mótun. Allt að átta notendur geta verið skráðir inn á viðtækið samtímis.

Stjórn ÍRA þakkar Árna fyrir verðmætt framlag. Hér um að ræða mikilvæga viðbót fyrir radíóamatöra sem gera tilraunir í þessum tíðnisviðum, auk hlustara og allra sem hafa áhuga á útbreiðslu radíóbylgna.

Stjórn ÍRA.

Bent er á fróðlega grein Ara Þórólfs Jóhannessonar, TF1A um KiwiSDR viðtækin sem birtist í 4. tbl. CQ TF 2020; bls. 41: „Aðgengileg viðtæki á Íslandi yfir netið“. Vefslóð: http://www.ira.is/wp-content/uploads/2020/09/cqtf_34arg_2020_04tbl.pdf

Myndin er af KiwiSDR viðtæki eins og notað er í Örlygshöfn.

Ólafur Örn Ólafsson, TF1OL heimsótti okkur í Skeljanes 12. október með erindið: „Á ferð um 12 DXCC lönd í Evrópu með stöð í bíl sumarið 2023“.

Ferðalagið hófst í lok maí, þegar Ólafur og XYL ferðuðust með Norröna frá Seyðisfirði og lauk í ágúst þegar fjarskiptabifreiðin var sett í vetrargeymslu í Hollandi. Þessi lönd voru heimsótt: Austurríki, Belgía, Bretland, Danmörk, Frakkland, Holland, Ítalía, Lichtenstein, Lúxemborg, Sviss, Svíþjóð og Þýskaland. Eknir kílómetrar voru alls um 5.600.

Tæki um borð voru ICOM IC-7100 100W sendi-/móttökustöð á HF, 6M, 2M og 70cm. Að auki var Ameritron ALS 500M 500W HF magnari. Einnig ICOM 51D handstöð á 2M og 70cm. Loftnet á HF: 8 m. stangarloftnet (AC Marine) og 6 staka Yagi fyrir 50 MHz. Allt virkaði vel og Óli þurfti sjaldan að grípa til RF magnarans.

Alls voru höfð 5.292 sambönd á SSB og FT8. Þau hjón gistu samtals á 47 tjaldsvæðum í 12 löndum og var hvergi amast við 8 metra háu stangarloftnetinu á bílnum, nema á einum stað í Danmörku.

Lifandi frásögn Óla var afar áhugaverð og fróðleg. Hann kryddaði erindið með mörgum skemmtilegum sögum sem tengdust ferðalaginu. Hann benti t.d. á að skilyrðin á HF hafi alls ekki verið best hátt uppi á fjöllum, eins og t.d. í St. Bernard Pass sem er í 2.649 metra hæð. Þvert á móti hafi mun betri skilyrði verið niðri á láglendinu. Þá sagði hann okkur m.a. frá heimsókn á Ham Radio sýninguna í Friedrichshafen í Þýskalandi.

Erindið tók um klukkustund í flutningi og var farið yfir margar glærur með texta og ljósmyndum. Mikið var spurt og Óli svaraði fyrirspurnum strax og eftir erindið var áfram rætt yfir kaffinu. Sérstakar þakkir til Ólafs Arnar Ólafssonar, TF1OL fyrir vel flutt, áhugavert og fróðlegt erindi í máli og myndum.

Alls mættu 36 félagsmenn (þar af 2 gestir) í Skeljanes þetta ágæta fimmtudagskvöld, þ.á.m. var Ómar Magnússon, TF3WK/OZ1OM sem er búsettur í Óðinsvéum í Danmörku.

Stjórn ÍRA.

Ólafur byrjaði erindið stundvíslega kl. 20:30.
Upplýsingar um fjarskiptabúnaðinn.
Yfirlit yfir ferðakostnað.
Fjöldi sambanda eftir löndum.
Ferðalagið sýnt í Danmörku og í Svíþjóð á korti.
Skilyrðin á HF reyndust ekki spennandi þegar komið var upp í fjöllin.
Ferðapunktarnir.
Ómar Magnússon TF3WK/OZ1OM, Andrés Þórarinsson TF1AM og Kjartan Birgisson, TF1ET. Ljósmyndir: TF3JB.

Fjarskiptasafn Sigga Harðar að Skógum verður skoðað á laugardag, 14. október. Sigurður Harðarson, TF3WS verður leiðsögumaður okkar um safnið og svarar spurningum.

Áður auglýstri brottför kl. 13 – hefur verið flýtt til kl. 10:30 frá Skeljanesi til að nýta daginn betur. Allt annað er óbreytt, þ.e. farið verður á einkabílum fá Skeljanesi. Aksturstími austur er ca. 1½ klst.

Hugmyndin er, að félagsmenn geti fengið sæti hjá öðrum og deili eldsneytiskostnaði og að 2-3 (eða fleiri) ferðist í hverjum bíl. Félagsmenn ÍRA fá 35% afslátt inn á safnið og er kostnaður 1.620 krónur á mann. Upplýsingar um safnið:  https://www.skogasafn.is/is/

Freya Café er staðsett innan Samgöngusafnsins. Kaffihúsið sérhæfir sig í heimagerðum kökum og bakkelsi ásamt úrvali af girnilegum veitingum.

Andrés Þórarinsson, TF1AM hefur með höndum skipulagningu fyrir hönd ÍRA. Félagar eru beðnir um að hafa samband við hann og tilkynna þátttöku. Gott er að vita hverjir geta tekið farþega og hverjir óska eftir að fá far. GSM sími Andrésar er 660-6560. Tölvupóstfang: TF3AM@inernet.is

Góðu ferðaveðri er spáð á laugardag. Góða skemmtun!

Stjórn ÍRA.

Scandinavian Activity keppnin (SAC) SSB hluti, verður haldinn um næstu helgi, 14.-15. október. Þetta er 24 klst. keppni sem hefst á hádegi á laugardag og lýkur á hádegi á sunnudag.

Radíóamatörar í Danmörku, Íslandi, Finnlandi, Noregi og Svíþjóð keppa ásamt radíóamatörum á Svalbarða, Bjarnareyju, Álandseyjum, Market Reef, Grælandi og í Færeyjum á móti heiminum og innbyrðis.

Svalbarði og Bjarnareyja – JW
Jan Mayen – JX
Noregur – LA – LB – LC – LG – LI – LJ – LN
Finnland – OF – OG – OH – OI
Álandseyjar –  OFØ – OGØ – OHØ
Market Reef – OJØ
Grænland – OX – XP
Færeyjar – OW – OY
Danmörk – 5P – 5Q – OU – OV – OZ
Svíþjóð – 7S – 8S – SA – SB – SC – SD – SE – SF – SG – SH – SI – SJ – SK – SL – SM

Ísland – TF

Félagsstöðin TF3W verður QRV í keppninni. Félagsmenn sem hafa áhuga á að hjálpa til við að virkja stöðina hafi samband við TF3JB. Skipulag verður rætt í Skeljanesi eftir erindi Ólafs Arnar Ólafssonar, TF1OL á fimmtudag 12. október.

Stjórn ÍRA.

Nýja fræðsludagskráin heldur áfram. Á fimmtudag, 12. október mætir Ólafur Örn Ólafsson, TF1OL í Skeljanes og segir okkur ferðasöguna frá því í sumar í máli og myndum, en þá ferðuðust hann og XYL í 85 daga í bíl um Evrópu. 

Óli flutti fjarskiptabifreiðina með sér frá Íslandi og hafði sambönd frá 11 DXCC löndum. Hann ferðaðist þannig með „sjakkinn“ með sér, sem er vel útbúin fjarskiptabifreið sem er m.a. með innbyggðan tjakk sem hækka má upp í allt að 12,6m hæð sem gefur hin ýmsu möguleika á HF böndunum og hærri tíðnum.

Félagsmenn eru hvattir til að láta þetta tækifæri ekki framhjá sér fara. Veglegar kaffiveitingar.

Stjórn ÍRA.

TF1OL í DX sumarið 2022, staddur skammt frá Dyrhólaey.
TF1OL í VHF/UHF leikunum 2021. Þarna er mastrið í fullri hæð (í 12,6 metrum) yfir þaki bílsins. Ljósmyndir: TF1OL.
Mynd af fjarskiptabifreið Óla í Evrópu í sumar. Ljósmynd: TF1OL.
Mynd til viðbótar af bílnum í Evrópu í sumar. Ljósmynd: TF1OL.

Opið var í félagsaðstöðu ÍRA í Skeljanesi í dag, laugardag 7. október.

Benedikt Sveinsson, TF3T og Guðmundur Sveinsson, TF3SG mættu í Skeljanes kl. 14:00 og sýndu félagsmönnum  Elecraft K4D sendi-/móttökustöð sína. Stöðin var keypt til landsins skömmu fyrir CQ WW morskeppnina í fyrra (2022) og er því innan við ársgömul.

K4D stöðin var sett upp á stóra borðinu í fundarsalnum með stórum Dell borðskjá (snertiskjá) og tengd við OptiBeam OB4-20OWA Yagi loftnet TF3IRA. Benedikt kveikti síðan á tækinu og fjallaði um og sýndi viðstöddum hvernig nota má stöð í þessum gæðaflokki, sem er af svokallaðri „Direct Sampling SDR“ gerð.

K4D er búin stórum 7“ snertiskjá í lit. Allar stillingar eru einfaldar og þótt margir takkar hafi fleiri en eitt hlutverk er staðsetning þeirra hugsuð með tilliti til notkunartíðni sem er til þæginda, bæði dagsdaglega og sérstaklega í keppnum.

Fram kom m.a. að K4D er búin tveimur aðskildum viðtækjum og svokölluðu „Diversity Module“ sem gerir mögulegt að hlusta á tvö merki samtímis. Elecraft, FlexRadio og Apache Labs eru einu framleiðendurnir sem bjóða stöðvar með hreinan aðskilnað á milli tveggja viðtækja, sem tryggir besta mögulega hlustun á veikum DX merkjum.

Tækið er að öllu leyti afar glæsilegt og er í flokki með bestu stöðvum sem er boði eru á markaði fyrir radíóamatöra. K4D kostar um 1 milljóna króna komin til landsins í dag. Upplýsingar: https://ftp.elecraft.com/K4/K4%20Brochure.pdf

Elecraft býður þrjár gerðir af K4 sendi-/móttökustöðvum:

Gerð K4/10-F sem er 10W sendi-/móttökustöð á $4.389.95
Gerð K4-F sem er 100W sendi-/móttökustöð á $4.789.95
Gerð K4D-F sem er 100W sendi-/móttökustöð á $5.789.95

Sérstakar þakkir til Benedikts Sveinssonar, TF3T og Guðmundar Sveinssonar, TF3SG fyrir að koma með tækið í Skeljanes.

Stjórn ÍRA.

.

Benedikt Sveinsson TF3T fjallaði um og sýndi félagsmönnum Elecraft K4D stöð í Skeljanesi 7. október.
Benedikt flutt greinargóðan inngang áður en hann sýndi og útskýrði K4D stöðina fyrir viðstöddum. Myndir: TF3JB.

Félagsaðstaðan í Skeljanesi verður opin á morgun, laugardag 7. október frá kl. 13:30.

Dagskráin hefst kl. 14:00 og mun Benedikt Sveinsson, TF3T mæta á staðinn og kynna Elecraft K4 sendi-/móttökustöð, sem þeir bræður Guðmundur Sveinsson, TF3SG keyptu til landsins í nóvember í fyrra (2022).

Eftir því sem best er vitað er þetta eina eintakið á landinu. K4 og K4D stöðvarnar eru nýjustu afurðir Elecraft í HF stöðvum, en K4 línan var frumsýnd á Dayton Hamvention sýningunni árið 2019 og er verðugur arftaki K3 og K3S stöðvanna.

Í K4 línunni notar Elecraft m.a. CSSB (e. Extended Single Sideband) tæknina (valkvætt) sem þekkist einnig í stöðvum frá FlexRadio. Elecraft fyrirhugar að bjóða 2 metrana og 4 metrana sem aukabúnað í K4 línuna síðar. Búist er við, að flaggskipið K4HD komi í sölu seint á þessu ári eða því næsta.

Félagsmenn eru hvattir til að láta þetta tækifæri ekki framhjá sér fara. Veglegar kaffiveitingar.

Stjórn ÍRA.

Elecraft K4 sendi-/mótttökustöðin er glæisleg.
Mynd af TF3SG við nýju Elecraft K4 stöðina skömmu fyrir CQ WW CW keppnina í fyrra (2022). Ljosmynd: TF3T.

Fyrsta opnunarkvöld félagsins samkvæmt nýrri fræðsludagskrá var 5. október og setti Jónas Bjarnason, TF3JB formaður ÍRA viðburðinn kl. 20:30.

Andrés Þórarinsson, TF1AM varaformaður ÍRA annaðist afhendingu verðlauna í VHF/UHF leikunum 2023 í fjarveru Hrafnkels Sigurðssonar, TF8KY umsjónarmanns og Einar Kjartansson, TF3EK umsjónarmaður annaðist afhendingu verðlauna í TF útileikunum 2023.

Sérstakur gestur félagsins var Íris Lilliendahl, sem færði okkur kaffibrauð og kökur í tilefni þess að eiginmaður hennar, Carl J. Lilliendahl [og félagsmaður ÍRA] hefði orðið 77 ára þennan dag, en hann lést fyrir tæpum þremur árum. Þakkir til Írisar.

Erlendir gestir félagsins voru Greg Zier, KA9VDU og XYL Brenda sem eru búsett í Mcfarland í Wisconsin í Bandaríkjunum. Þetta var í annað skiptið sem þau mættu í Skeljanes, en í millitíðinni höfðu þau farið hringveginn og  voru yfir sig hrifin af af náttúru landsins.

Vel heppnað og skemmtilegt fimmtudagskvöld í Skeljanesi. Þakkir til Andrésar og Einars fyrir afbragðsgóð inngangserindi og hamingjuóskir til félagsmanna sem voru viðstaddir til að taka á móti verðlaunum og viðurkenningum fyrir þessa fjarskiptaviðburði félagsins.

Alls voru 33 í húsi (þar af 3 gestir) í Skeljanesi þetta ágæta haustkvöld í vesturbænum í Reykjavík.

Stjórn ÍRA.

Andrés Þórarinsson TF1AM tekur við 1. verðlaunum í VHF/UHF leikum ÍRA 2023 úr hendi Jóns Björnssonar TF3PW gjaldkera ÍRA.
Óðinn Þór Hallgrímsson TF2MSN tekur við viðurkenningarskjali fyrir 1. sætið í fjölda QSO’a í VHF/UHF leikunum 2023. Óðinn Þór hlaut jafnframt verðlaunagrip fyrir 2. sætið í VHF/UHF leikunum og viðurkenningarskjal fyrir 3. sætið í TF útileikum ársins.
Sigmundur Karlsson TF3VE tekur við viðurkenningarskjali fyrir 2. sætið í fjölda QSO’a í VHF/UHF leikunum 2023.
Eiður Kristinn Magnússon TF1EM tekur við viðurkenningarskjali fyrir 3. sætið í fjölda QSO’a í VHF/UHF leikunum 2023.
Einar Kjartansson TF3EK tekur við viðurkenningarskjali fyrir 2. sætið í TF útileikunum 2023.
Einar Kjartansson TF3EK bregður upp tveimur viðurkenningum Hrafnkels Sigurðssonar TF8KY. Annars vegar er vandaður verðlaunaplatti, grafinn á málmplötu á viðargrunni fyrir bestan árangur og skrautritað viðurkenningarskjal fyrir 1. sætið í TF útileikum ársins. Hrafnkell fékk líka verðlaunagripinn sem sést á borðinu til hægri fyrir 3. sætið í VHF/UHF leikunum 2023.
Sérstakur gestur ÍRA 5. október var Íris Lilliendahl, ekkja Carl J. Lilliendahl TF3KJ. Hún færði félagsmönnum vandað kaffibrauð og kökur í tilefni að Carl hefði orðið 77 ára þennan dag, en hann lést fyrir tæpum þremur árum. Frá vinstri: Erling Guðnason TF3E, Íris Lilliendahl, Sveinn Goði Sveinsson TF3ID, Þorvaldur Bjarnason TF3TB og Einar Kjartansson TF3EK.
Hluti viðstaddra í félagsaðstöðunni sem náðust á ljósmynd. Sitjandi frá vinstri: Guðmundur Birgir Pálsson TF3AK, Gísli Guðnason, Brenda Zier XYL KA9VDU, Greg Zier KA9VDU, Óðinn Þór Hallgrímsson TF2MSN, Sigmundur Karlsson TF3VE, Jón Björnsson TF3PW og Einar Kjartansson TF3EK. Standandi til hægri: Eiður Kristinn Magnússon TF1EM og Andrés Þórarinsson TF1AM.
Mynd af radíódóti sem Sigurður Harðarson TF3WS færði félaginu 5. október. Ljósmyndir: TF3JB.

TRX DX keppnin 2023 hefst á laugardag 7. október kl. 06:00 og lýkur á sunnudag 8. október kl. 18:00. Keppnin fer fram á morsi og tali á 160, 80, 40, 20, 15 og 10 metrum.
Skilaboð TF stöðva: RS(T) + raðnúmer.
https://trcdx.org/img/TRCDXC_rules_eng_2021.pdf

Oceania DX keppnin 2023 hefst á laugardag 7. október kl. 07:00 og lýkur á sunnudag 8. október kl. 07:00. Keppnin fer fram á tali á 160, 80, 40, 20, 15 og 10 metrum.
Skilaboð TF stöðva: RS + raðnúmer.
https://www.oceaniadxcontest.com/

Russian WW Digital keppnin 2023 hefst á laugardag 7. október kl. 12:00 og lýkur á sunnudag 8. Október kl. 11:59. Keppnin fer fram á BPSK63 og RTTY á 160, 80, 40, 20, 15 og 10 metrum.
Skilaboð TF stöðva: RST (Q) + raðnúmer.
https://www.rdrclub.ru/rdrc-news/russian-ww-digital-contest/51-rus-ww-digi-rules

UBA ON keppnin 2023 stendur yfir á laugardag 7. október frá kl. 06:00-09:00. Keppnin fer fram á morsi á 80 metrum.
Skilaboð TF stöðva: RST + raðnúmer.
https://www.uba.be/en/hf/contest-rules/contest

Með ósk um gott gengi.

Stjórn ÍRA.

.

Skemmtileg mynd frá þátttöku TF3IRA í BARTG RTTY keppninni 1976 í fleirmenningsflokki. QTH var félagsaðstaða ÍRA við Vesturgötu. Þátttakendur: Kristinn Andersen TF3KX, Jónas Bjarnason TF3JB, Kristján Benediktsson TF3KB og Sæmundur E. Þorsteinsson TF3UA. TF3JB og TF3UA sitja við Teletype Model 15 og 19 vélar. Félagið var þá nýbúið að fá Teletype 19 vél með strimilgatara og lesara. Fyrir keppnina var sett upp nýtt LW loftnet fyrir sambönd til Evrópu en annað (eldra) LW net var notað fyrir sambönd til Norður-Ameríku. Í keppninni var m.a. haft fyrsta sambandið frá TF3IRA á RTTY á 80 metrum. Ljósmynd: TF3KM. Þakkir til TF3KB fyrir myndina.