.

.

Georg Kulp, TF3GZ gerði góða ferð í Bláfjöll í dag, 29. janúar.

Verkefnið var að hækka og snúa loftneti VHF endurvarpans TF3RPB, til að reyna að losna við truflanir sem hafa komið inn á stöðina að undanförnu, en mikið RF svið er á fjallinu og þegar ísing er mikil ber meira á truflunum.

Loftnetið var hækkað u.þ.b. um ¼ λ og gerð breyting á bestri stefnu, ca. úr norðaustri í austur.

Georg var ánægður með ferðina og sagði að nú þurfi félagarnir að vera duglegir að prófa endurvarpann til að staðfesta að truflanir hafi minnkað/horfið og verkefnið hafi tekist.

Bestu þakkir til Georgs fyrir ferð á fjallið um hávetur.

Stjórn ÍRA.

.

.

.

.

.

Loftnetaskógurinn í Bláfjöllum er í 690 metra hæð yfir sjávarmáli. Loftnetið fyrir VHF endurvarpann TF3RPB er lengst til hægri á myndinni. Það er frá Kathrein; tveir lóðréttir „folded“ tvípólar sem eru fasaðir saman. Georg þurfti að berja ísinguna af netinu, en sjá má hvernig það var aðkomu á minni ljósmyndinni. Ljósmyndir: Georg Kulp TF3GZ.

Ágætu félagsmenn!

Mér er ánægja að tilkynna um útkomu 1. tbl. CQ TF 2021 sem nú kemur út á stafrænu formi hér á heimasíðunni.

73 – TF3SB, ritstjóri CQ TF.

Vefslóð á nýja blaðið: http://www.ira.is/wp-content/uploads/2021/01/cqtf_35arg_2021_01tbl.pdf

CQ WW DX morskeppnin 2021 fer fram um helgina. Keppnin hefst á föstudag 29. janúar kl. 22:00 og lýkur á sunnudag 31. janúar kl. 22:00. Markmiðið er að ná eins mörgum samböndum og unnt er við aðrar stöðvar radíóamatöra um allan heim á keppnistímanum.

QSO punktar. QSO við TF stöðvar 2 punktar; innan Evrópu 5 punktar; utan Evrópu 10 punktar og við /MM stöðvar 5 punktar.

Margfaldarar:

  • Einingar á DXCC lista.
  • Lönd á WAE lista: GM (Hjaltlandseyjar), IG9/IH9 (Lampedusa og Pantelleria eyjar), IT, JW (Bjarnareyja), TA1 (Evrópuhluti Tyrklands) og 4U1VIC.
  • 48 ríki Bandaríkjanna (e. contiguous states) og „District of Columbia (DC)“.
  • 14 fylki Kanada: VO1, VO2, NB, NS, PEI (VY2), VE2, VE3, VE4, VE5, VE6, VE7, VE8 (NWT), VY1 (YUK), VY0.

Leyfilegt tíðnisvið í keppninni á IARU Svæði 1 (okkar svæði) er 1810-2000 kHz. Ath. að G-leyfishafar sem ætla að vinna á 1850-1900 kHz á fullu afli þurfa að hafa sótt um tíðni- og aflheimildir til PFS (sbr. fyrri tilkynningu dags. 23. janúar s.l.). Keppnisreglur: https://www.cqww.com/

Með ósk um gott gengi!

Stjórn ÍRA.

ÍRA bárust jákvæð svör frá Póst- og fjarskiptastofnun (PSF) í desember s.l. við ósk félagsins um endurnýjun heimilda á 160 metrum og 4 metrum.

Um er að ræða tíðnisviðið 1850-1900 kHz í tilgreindum alþjóðlegum keppnum. Gildistími er til eins árs; 1.1. til 31.12.2021. Og hins vegar tíðnisviðið 70.000-70.250 MHz. Gildistími er til tveggja ára, 1.1.2021 til 31.12.2022.

Leyfishafar þurfa að sækja um og endurnýja sérheimildir til PFS, þar sem eldri heilmildir féllu úr gildi 31. desember s.l. Senda má tölvupóst til  hrh [hjá] pfs.is eða pfs [hjá] pfs.is  áður en sendingar eru hafnar. Tilgreina skal, að sótt sé um heimild(ir) fyrir nýtt tímabil (sbr. ofangreint).

Tilgreindar alþjóðlegar keppnir á 160 metrum:

CQ WW 160 metra keppnin, CW, 29.-31.1.2021.
ARRL International DX keppnin,  CW, 20.-21.2.2021.
CQ WW 160 metra keppnin, SSB, 26.-28.2.2021.
ARRL International DX keppnin,  SSB, 6.-7.3.2021.
CQ WW WPX keppnin, SSB, 27.-28.3.2021.
CQ WW WPX keppnin, CW, 29.-30.5.2021.
IARU HF World Championship, CW/SSB, 10.-11.7.20212.
CQ WW DX keppnin, SSB, 30.-31.10.2021.
CQ WW DX keppnin, CW, 27.- 28.11.2021.
ARRL 160 metra keppnin, CW, 3.-5.12.2021.

Stjórn ÍRA.

Myndin er af Icom IC-7600 HF/50MHz stöð sem m.a. hefur 100W sendi á 160 metrum.
Myndin er af Icom IC-7100 HF/VHF/UHF stöð sem m.a. hefur 50W sendi á 4 metrum.

Hermann Georg Karlsson, TF3KC, hefur haft sitt síðasta QSO; merki hans er hljóðnað.

Samkvæmt upplýsingum frá Frímanni Birgi Baldurssyni, TF1TB, andaðist hann í Landsspítalanum í Fossvogi þann 3. nóvember s.l.

Hermann var á 78. aldursári; handhafi leyfisbréfs nr. 137.

Um leið og við minnumst Hermanns með þökkum og virðingu færum við fjölskyldu hans innilegustu samúðarkveðjur.

Fyrir hönd stjórnar ÍRA,

Jónas Bjarnason, TF3JB
formaður

ÍRA stóð fyrir þremur fjarskiptaviðburðum á árinu 2020. Um er að ræða: (1) Páskaleikana sem haldnir voru 11.-12. apríl; (2) VHF/UHF leikana sem haldnir voru 10.-12. júlí ; og (3) TF útileikana sem haldnir voru 1.-3. ágúst.

Líkt og flestum er kunnugt tókst ekki að afhenda verðlaun og viðurkenningar á árinu 2020 vegna Covid-19 faraldursins. Vonir eru bundnar við að nú rofi til með tilslakanir á næstunni, svo hægt verði að opna félagsaðstöðuna í Skeljanesi, þar sem skýrt verður formlega frá úrslitum og umsjónarmenn viðburðanna munu afhenda viðurkenningar.

Glæsilegir verðlaunagripir verða til afhendingar fyrir 1.-3. sætin í Páskaleikunum og fyrir 1.-3. sætin í VHF/UHF leikunum, auk þess sem sérstök viðurkenningarskjöl verða nú afhent í fyrsta skipti í VHF/UHF leikunum. Þá verður sérstakur ágrafinn verðlaunaplatti afhentur fyrir 1. sætið í TF útileikunum, auk þess sem viðurkenningarskjöl verða veitt fyrir fyrstu 5 sætin.

Þessu til viðbótar voru framleidd glæsileg verðlaun fyrir nýtt Íslandsmet í lengd fjarskiptasambands á 1.2 GHz tíðnisviði í VHF/UHF leikunum (nú annað árið í röð). Þau verða til afhendingar á aðalfundi 2021.

Marko-Merki ehf., og Brynjólfur Jónsson, TF5B fá þakkir fyrir framleiðslu verðlaunagripa og skrautritun viðurkenningarskjala.

Stjórn ÍRA.

Verðlaun og viðurkenningar sem bíða afhendingar. Viðurkenningarskjöl fyrir 1.-5. sætið í TF útileikunum (rauðbrúnir rammar). Viðurkenningarskjöl fyrir bestu ljósmyndina sem tekin var í VHF/UHF leikunum og fyrir skemmtilegustu færsluna á Fésbókinni í VHF/UHF leikunum (svartir rammar). Verðlaunagripir fyrir 1.-3. sæti í VHF/UHF leikunum (aftast). Þar fyrir framan eru verðlauna-gripir fyrir 1.-3. sætin í Páskaleikunum. Fremst má síðan sjá verðlaun fyrir nýtt Íslandsmet í vegalengd fjarskiptasambands á 1.2 GHz í VHF/UHF leikunum. Á milli þeirra er ágrafinn veggplatti á viðargrunni sem veittur er fyrir 1. sætið í TF útileikunum. Ljósmynd: TF3JB.

Stjórn ÍRA hefur ákveðið að félagsaðstaðan í Skeljanesi verði lokuð áfram vegna Covid-19 faraldursins.

Ástæðan er ný reglugerð heilbrigðisráðherra um tímabundna takmörkun á samkomum vegna farsóttar sem tekur gildi á morgun, 13. janúar og gildir til 17. febrúar n.k.

Þrátt fyrir að takmarkanir á samkomum séu nokkuð rýmkaðar (mest 20 manns) er óbreytt ákvæði þess efnis að tryggja skuli a.m.k. 2 metra á milli einstaklinga sem ekki eru í nánum tengslum.

Vonir eru bundnar við að slakað verði á kröfum vegna faraldursins með nýrri reglugerð ráðherra sem er að vænta eftir miðjan febrúar n.k. (eða fyrr). Gangi mál á besta veg horfum við til að geta opnað á ný fimmtudaginn 18. febrúar.

Það er von okkar að þessari ákvörðun fylgi ríkur skilningur.

Stjórn ÍRA.

Á hverju ári eru haldnar fjölmargar ráðstefnur og sýningar fyrir radíóamatöra um allan heim. Þrjár eru stærstar sem eiga það sameiginlegt að vera, hver um sig, alþjóðlegur vettvangur áhugamálsins. Þetta eru Ham Radio í Friedrichshafen í Þýskalandi, Dayton Hamvention í Ohio í Bandaríkjunum og Tokyo Ham Fair í samnefndri höfuðborg Japans.

Dayton Hamvention sýningunni 2021 sem fyrirhugað var að halda 21.-23. maí n.k., hefur nú verið aflýst þann 11. janúar vegna Covid-19 faraldursins. Menn líta til næsta árs, 2022. Þetta verður 2. árið í röð sem aflýsa þarf sýningunni, sem annars hefur verið haldin árlega, óslitið frá 1952.

Verulegar líkur eru á að Ham Radio sýningunni í Friedrichshafen 2021, sem fyrirhugað er að halda 25.-27. júní n.k., verði einnig aflýst – en það hefur ekki verið ákveðið þegar þetta er skrifað. Verði henni ennfremur aflýst, verður það 2. árið í röð sem aflýsa þarf sýningunni, sem annars hefur verið haldin árlega, óslitið frá árinu 1975.

Óvissa ríkir ennfremur um Tokyo Ham Fair sem fyrirhugað er að halda 2.-3. október n.k.

Um 30 þúsund gestir heimsækja Dayton Hamvention ár hvert en sýningin hefur verið haldin óslitið frá árinu 1952 (ef frá eru talin 2020 og 2021). Ljósmynd: ARRL.

Til fróðleiks voru teknar saman upplýsingar um TF kallmerki sem fengu skráningu á þyrpingu (e. cluster) vikuna 3.-9. janúar 2021. Kallmerki birtast þar hafi leyfishafi haft samband og/eða heyrt í viðkomandi TF kallmerki og skráð það, auk þess sem hlustarar setja inn skráningar.

Þessa viku voru skilyrði ekkert sérstök á HF þannig að yfirleitt er meiri virkni hér á landi sem annars staðar ef böndin eru „lifandi“. Upplýsingarnar eru fengnar á vefsíðunni: http://www.dxsummit.fi/#/  Taka ber fram, að fleiri sambærilegar síður eru í boði á netinu og sem skoða má til samanburðar.

Samkvæmt ofangreindu voru 14 TF kallmerki skráð þessa viku. Flestar stöðvarnar voru virkar á stafrænum mótunum og RTTY, en einnig á morsi (CW) og tali (SSB). Stöðvarnar voru virkar á 15, 17, 20, 40, 60 og 80 metrum.

Fyrst er skráð kallmerki, þá tegund útgeislunar og band/bönd sem kallmerki fær skráningu á:

TF1A – SSB – 80 metrar
TF1AM – RTTY – 15 og 20 metrar
TF1EIN – FT8 – 80 metrar
TF1OL – FT8 – 60 metrar
TF2CT – FT4 – 40 og 80 metrar
TF2MSN – RTTY/FT8 – 17, 30 og 60 metrar
TF3AO – RTTY – 15 og 20 metrar
TF3IG – FT4 – 20 metrar
TF3JB – FT8 – 30 metrar
TF3LB – CW/FT8 – 15, 17 og 30 metrar
TF3MH – FT8 – 30 metrar
TF3PPN – FT8 – 17 metrar
TF3VG – FT8 – 17 metrar
TF5B – FT8 – 17, 30 og 40 metrar

Til skoðunar er að taka reglulega saman upplýsingar af þessu tagi.

Stjórn ÍRA.

Myndin er af Reyni Björnssyni TF3JL, þegar hann tók þátt í TF útileikunum 2020 á morsi frá félagsstöðinni TF3IRA í Skeljanesi ásamt fleiri félagsmönnum. Ljósmynd: TF3JB.

Brynjólfur Jónsson, TF5B hafði alls 30.103 QSO á árinu 2020. Samböndin voru öll höfð á FT8 samskiptareglum undir MFSK mótun. Fjöldi DXCC eininga varð alls 156 og fjöldi staðfestra DXCC eininga alls 151. Forskeyti voru alls 1.956 og CQ svæði 39.

Þess má geta að Billi missti niður hluta loftneta sinna um miðjan desember 2019 og varð ekki að fullu QRV á ný fyrr en í maímánuði (2020) þegar voraði á ný. Sjá má myndir af loftnetum hans eftir óveðrið og eftir að þau höfðu verið viðgerð og enduruppsett á bls. 42 í 3. tbl. CQ TF 2020. Vefslóð: http://www.ira.is/wp-content/uploads/2020/06/cqtf_34arg_2020_03tbl.pdf

Flest sambönd voru höfð á 30 metrum, eða 8.729. Þrjú bönd voru með ámóta mikinn fjölda sambanda, þ.e. 40 metrar 5.159 QSO; 20 metrar 6.391 QSO og 17 metrar 5.128 QSO.

Skipting sambanda: Evrópa 23.819 QSO, N-Ameríka 2.982 QSO, Asía 2.643 QSO, Afríka 140 QSO, S-Ameríka: 263 QSO og Eyjaálfa: 256 QSO.

Loftnet TF5B eftir viðgerð í maí 2020. Fritzel Fritzel FB-33, 3 staka Yagi loftnet fyrir 14, 21 og 28 MHz; Fritzel tvípóll fyrir 10, 18 og 24 MHz; Hamstick tvípóll (láréttur) fyrir 3.5 MHz; Hamstick tvípóll (láréttur) fyrir 1.8 MHz og Diamond X-30 stangarloftnet fyrir 144/430 MHz. Ljósmynd: Brynjólfur Jónsson TF5B.