Archive for category: Fréttir

Ákveðið hefur verið að Í.R.A. standi fyrir námskeiði til amatörréttinda sem haldið verður í Reykjavík á tímabilinu frá
7. mars til 11. maí n.k. Námskeiðinu lýkur með prófi hjá Póst- og fjarskiptastofnun laugardaginn 14. maí.
Þeir sem ekki hafa þegar skráð sig geta gert það til 28. febrúar n.k. (sjá annars staðar á heimasíðunni).

Í.R.A. efnir til sérstaks kynningarkvölds miðvikudaginn 2. mars n.k. kl. 20:00 í félagsaðstöðunni við Skeljanes.
Þar verður fyrirkomulag námskeiðsins nánar kynnt og leiðbeinendur verða til svara um einstaka hluta þess. Miðað er við að
dagskránni ljúki um kl. 21. Þangað er öllum frjálst að mæta og mun félagið bjóða upp á kaffiveitingar.

Skólastjóri námskeiðsins er Kjartan H. Bjarnason verkfræðingur, TF3BJ. Hann er reyndur leyfishafi og hefur sinnt mörgum
trúnaðarstörfum fyrir félagið í gegnum tíðina.

Nú styttist í næsta smíðanámskeið, sem verður haldið þriðjudagskvöldin 8. og 15. febrúar n.k. fari af stað. Að þessu sinni verður smíðaður lyklari sem byggir á K10 rásinni frá K1EL. Reiknað er með að smíðin taki bæði kvöldin. Verð á efni og íhlutum er 5.000 krónur. Áformað er að smíða lyklarann og setja í hentugan kassa sem hafi alla hnappa og tengi sem þarf, hljóðgjafa og rafhlöðu auk tengis fyrir veituspennu. Svo vill til að Vilhjálmur Í. Sigurjónsson, TF3VS (leiðbeinandi á námskeiðinu) á rásir sem Steve, K1EL, sérforritaði fyrir hann, sem hafa íslensku stafina þ, æ og ö í kennsluham. Lyklari þessi er afar fjölhæfur, stilliviðnám með hnappi setur hraðann, hann hefur 4 minnishólf, ýmsar stillingar og þar að auki tvo kennsluhami, bæði til að æfa hlustun og einnig sendingu (hvort sem er með tveggja spaða lykli eða venjulegum einföldum).

Á meðfylgjandi mynd má sjá tvo svona lyklara sem voru smíðaðir af TF3VO og TF3VHN. Annar er með innbyggðri rafhlöðu tengdur einföldum lykli en hinn spaðalykli og utanáliggjandi rafhlöðu. Þeir hafa báðir heimasmíðaða spaða áfasta en þeir hafa ekki reynst vel og verður ekki reiknað með slíkum frágangi núna. Allt um lyklarann má sjá á síðu Steve: www.k1el.com

Þar sem fjöldi er takmarkaður, eru væntanlegir þátttakendur beðnir um að skrá sig sem fyrst á tölvupóstfangið: tf3vs hjá ritmal.is til þess að hægt sé að útvega allt efni og undirbúa rafrásina áður en smíðakvöldin hefjast.

Í.R.A. hefur borist erindi Póst- og fjarskiptastofnar dagsett fimmtudaginn 6. janúar 2011 þess efnis, að íslenskum leyfishöfum er veittur aðgangur að tíðnisviðinu 1850-1900 kHz í tilgreindum alþjóðlegum keppnum radíóamatöra. Í annan stað er G-leyfishöfum nú heimilt að nota fullt afl í sviðinu (þ.e. 1kW). Erindi Póst- og fjarskiptastofnunar er í samræmi við beiðni félagsins þessa efnis, sem send var stofnuninni þann 30. desember s.l.

Heimildin er tímabundin, þ.e. gildir fyrir almanaksárið 2011. Hún er veitt á víkjandi grundvelli (forgangsflokkur 2). Þeir leyfishafar sem óska að vinna í umræddu tíðnisviði í einhverri neðangreindra keppna framangreindri aflheimild, þurfa að sækja um það sérstaklega til stofnunarinnar hverju sinni, á netfangið: hrh hjá pfs.is.

Heimild PFS gildir um eftirfarandi tilgreindar alþjóðlegar keppnir í meðfylgjandi töflu (í tímaröð eftir mánuðum):

Stjórn Í.R.A. fagnar þessum áfanga fyrir hönd íslenskra leyfishafa.