Fréttir – Page 128 – Íslenskir Radíóamatörar

Skeljanes 28. febrúar; nýjar HF stöðvar

Næsta erindi á vetrardagskrá ÍRA er í boði fimmtudaginn 28. febrúar kl. 20:30. Þá mætir Jónas Bjarnason, TF3JB, í Skeljanes með erindið “Kaup á nýrri HF amatörstöð vorið 2019; markaðurinn og ný viðhorf”.

Erindið byggir á grein hans um “Kaup á nýrri HF amatörstöð vorið 2018” sem birtist í 1. tbl. CQ TF, 2018. Á því tæpa ári sem liðið er, hefur markaðurinn þróast og tekið breytingum í ljósi nýrra viðhorfa. Sumpart eru það viðhorf sem eru kunn frá fyrri tímabilum þegar samhengi sólblettaleysis og skilyrða hafa hafa haft áhrif á fjarskiptin og ekki síður í ljósi nýrrar stafrænnar samskiptatækni sem mjög hefur rutt sér til rúms síðustu misseri.

Framtíðin er spennandi í þessum efnum enda eru radíóamatörar þekktir fyrir að notfæra sér nýjustu tækni hverju sinni.

Stjórn ÍRA hvetur félaga til að mæta tímanlega. Kaffiveitingar.

*Myndin er af Expert SunSDR MB1 sem þykir með glæsilegri heimastöðvum radíóamatöra. Fjallað verður m.a. um þessa stöð og fleiri í erindinu í Skeljanesi 28. febrúar.*

24. February, 2019/by TF3JB

Almennt, Fréttir

1850-1900 MHZ HEIMILD ENDURNÝJUÐ 2019

ÍRA barst staðfesting frá Póst- og fjarskiptastofnun (PFS) í dag, 22. febrúar 2019, um heimild til notkunar tíðnisviðsins 1850 – 1900 kHz vegna þátttöku í alþjóðlegum keppnum radíóamatöra á almanaksárinu 2019. Heimildin nær til eftirtalinna 10 keppna:

ALÞJÓÐLEG KEPPNI, TEGUND ÚTGEISLUNAR, DAG- OG TÍMASETNINGAR, FJÖLDI KLST.

CQ World-Wide 160 metra keppnin – CW – 25.-27. janúar, kl. 22-22 – 48 klst.
ARRL DX keppnin – CW – 16.-17. febrúar, kl. 00-00 – 48 klst.
CQ World-Wide 160 metra keppnin – SSB – 22.-24. febrúar, kl. 22-22 – 48 klst.
ARRL DX keppnin – SSB – 2.-3. mars, kl. 00-00 – 48 klst.
CQ WPX keppnin – SSB – 30.-31. mars, kl. 00-00 – 48 klst.
CQ WPX keppnin – CW – 25.-26. maí, kl. 00-00 – 48 klst.
IARU HF World Championship – CW/SSB – 13.-14. júlí, kl. 12-12 – 24 klst.
CQ World-Wide DX keppnin – SSB – 26.-27. október, kl. 00-00 – 48 klst.
CQ World-Wide DX keppnin – CW – 23.-24. nóvember, kl. 00-00 – 48 klst.
ARRL 160 metra keppnin – CW – 6.-8. desember, kl. 22-16 – 40 klst.

Heimildin er veitt með fullu samþykki Vaktstöðvar siglinga sem hefur heimild til notkunar nokkurra tíðna á þessu tíðnisviði. Um þessa notkun gilda sömu kröfur og gilda fyrir tíðnisviðið 1810-1850 kHz í reglugerð, en aukin skilyrði Póst- og fjarskiptastofnunar eru eftirfarandi: (a) Heimildin er einvörðungu veitt þann tíma sem tilgreindar alþjóðlegar keppnir radíóamatöra standa yfir (sjá að ofan); (b) G-leyfishafar hafa heimild til að nota fullt afl, 1kW. N-leyfishafar njóta sömu tíðniréttinda, en aflheimild þeirra miðast við mest 10W.

Leyfishafar skulu sækja sérstaklega um heimild til PFS á hrh@pfs.is eða pfs@pfs.is eins og síðast.

22. February, 2019/by TF3JB

Almennt, Fréttir

MYNDAKVÖLD Í SKELJANESI, DX-LEIÐANGRAR

Fimmtudaginn 21. febrúar var myndakvöld í Skeljanesi og var fyrst sýnd ný DVD mynd frá DX-leiðangri til Miðbaugs Gíneu og Annobon eyju undan vesturströnd Afríku. Í myndbandinu var áhugaverð frásögn frá DX-leiðangri leyfishafa frá Lettlandi, þeirra YL1ZF, YL2GM og YL2KL. Þeir höfðu alls 86 þúsund QSO og þ.á.m. við íslenska leyfishafa. Myndasýningin var í boði Óskars Sverrissonar, TF3DC.

Óskar sýndi okkur einnig úr mynd frá síðasta DX-leiðangri sem farinn var til Peter 1 eyju á Suðurheimsskautslandinu. Myndin veitti góða innsýn í erfiðar aðstæður leiðangursins sem farinn var árið 2006. Alls voru höfð 87 þúsund QSO. Myndin er í eigu félagsins og var gefin á sínum tíma af Brynjólfi Jónssyni, TF5B.

Að lokum fengum við að sjá úr mynd frá frægum DX-leiðangri til Malpelo eyju sem í raun er stór klettur í austur-Kyrrahafi, um 500 km vestur af Kólumbíu. Afar fróðleg mynd, en á sex vikum höfðu þátttakendur yfir 190 þúsund QSO. Þeir settu upp búðir efst á klettinum, sem ekki er nema 1600 metrar á lengd og 700 metrar á breidd.

Bestu þakkir til Óskars Sverrissonar, TF3DC fyrir skemmtilegt myndakvöld í Skeljanesi. Alls mættu 24 félagar þetta vindasama vetrarkvöld í Reykjavík, þar af þrír gestir.

*Skeljanesi 21. febrúar. Óskar Sverrisson TF3DC bauð upp á DVD* myndir þar sem efnið var DX-leiðangrar til fjarlægra staða.

Umræður í leðursófasettinu og í kring eftir myndasýninguna. Frá vinstri: Þórður Adolfsson TF3DT, Vilhjálmur Í. Sigurjónsson TF3VS, Guðmundur Ingi Hjálmtýsson TF3IG, Kristján Benediktsson TF3KB (standandi) og næst myndavél, standandi, Mathías Hagvaag TF3MH og Jón Björnsson TF3PW. Ljósmyndir: TF3JB.

22. February, 2019/by TF3JB

Almennt, Fréttir

Ársskýrsla ÍRA 2018/19

Aðalfundur ÍRA árið 2019 var haldinn 16. febrúar s.l. á Hótel Sögu í Reykjavík. Meðal gagna sem lögð voru fram á fundinum var skýrsla formanns um starfsemi félagsins á liðnu starfsári.

Skýrslan var lögð fram á prentuðu formi. Hún skiptist í 11 kafla og tvo viðauka, auk formála og efnisyfirlits. Hún er alls 136 blaðsíður að stærð.

VEFSLÓÐ Á ÁRSSKÝRSLU ÍRA 2018-2019 ER HÉR FYRIR NEÐAN:

http://www.ira.is/wp-content/uploads/2019/02/20190216-arsskrysla-tf3jb.pdf

Gögn sem lögð voru fram á aðalfundi ÍRA 2019: (1) Dagskrá fundarins; (2) útprentun á lögum félagsins; (3) Skýrsla um starfsemi ÍRA 2018/19; Ársreikningur ÍRA fyrir starfsárið 2018 og Skýrsla Prófnefndar til Aðalfundar ÍRA 2019. Að auki fylgdu með í möppu með aðalfundargögnum, límmiðar með félagsmerki ÍRA. Ljósmynd: Jónas Bjarnason TF3JB.

20. February, 2019/by TF3JB

Almennt, Fréttir

MYNDBAND Í SKELJANESI FIMMTUDAG, 21. FEBR.

Fimmtudaginn 21. febrúar verður sýnt nýtt DVD myndband frá DX-leiðangri til Miðbaugs Gíneu og Annoban, 3C3W & 3CØW sem margir TF leyfishafar náðu sambandi við.

Í myndbandinu er áhugaverð frásögn frá ferðum þeirra YL1ZF, YL2GM og YL2KL til þessara DXCC landa í febrúar og mars 2018. Skemmtileg og fróðleg innsýn í ferðir af þessu tagi.

Þeir félagar hafa verið heiðraðir fyrir vel heppnaðar ferðir, m.a. af SWODXA, The Intrepid DX Group og GDXF, sem „DXpedition of The Year“, „The Intrepid DX Group Award“ og „GDXF Trophy Best DXpedition“.

Góðar kaffiveitingar verða í boði í Skeljanesi og DX-umræður. Viðburðurinn er í boði Óskars Sverrissonar, TF3DC.

19. February, 2019/by TF3JB

Almennt, Fréttir

Þakkir til félagsmanna…

Þakka félagsmönnum símtöl og tölvupósta með góðum orðum og umsögnum um starfsemi félagsins á liðnu starfsári. Þessi jákvæðu viðbrögð í kjölfar aðalfundar 2019 eru okkur í nýrri stjórn, hvatning til góðra verka á komandi starfsári.

Þeir sem ekki áttu þess kost að koma á aðalfundinn á Hótel Sögu á laugardag spyrja um ársskýrsluna, sem afhent var prentuð á fundinum ásamt fleiri gögnum. Skýrslan verður til birtingar hér á heimasíðunni á PDF-formi innan örfárra daga.

Önnur gögn, þ.á.m. fundargerð og ársreikningur verða til birtingar í 2. tbl. CQ TF sem kemur út 31. mars n.k.

73,

Jónas Bjarnson, TF3JB, formaður.

Á*rsskýrsla ÍRA 2018/19 kom út á aðalfundi 2019. Hún skiptist í 10 kafla og tvo viðauka og er alls 136 blaðsíður að stærð.*

18. February, 2019/by TF3JB

Almennt, Fréttir

FRÉTTIR FRÁ AÐALFUNDI ÍRA 16. febrúar 2019

Mynd frá aðalfundi ÍRA 2019 sem haldinn var á Radisson Blu Hótel Sögu við Hagatorg í Reykjavík 16. febrúar. Ljósmynd: TF3KB.

Ný stjórn ÍRA starfsárið 2019/20: Jónas Bjarnason TF3JB formaður, Óskar Sverrisson TF3DC, Jón Björnsson TF3PW, Guðmundur Sigurðsson TF3GS, Georg Manússon TF2LL, Heimir Konráðsson TF1EIN og Sæmundur E. Þorsteinsson TF3UA. Ljósmynd: TF3KB.

Aðalfundur ÍRA 2019 var haldinn 16. febrúar í fundarsal Radisson Blu Hótel Sögu í Reykjavík. Á fundinum fóru fram venjuleg aðalfundarstörf samkvæmt ákvæðum í lögum félagsins.

Embættismenn fundarins voru kjörnir þeir Vilhjálmur Í. Sigurjónsson, TF3VS, fundarstjóri og Sæmundur E. Þorsteinsson, TF3UA, fundarritari. Alls sóttu 37 félagsmenn fundinn samkvæmt skráningu í viðverubók. Fundurinn var settur kl. 13:10 og slitið kl. 14:30.

Eftirtaldir skipa nýja stjórn félagsins fyrir starfstímabilið 2019-2020: Jónas Bjarnason, TF3JB, formaður (endurkjörinn); Óskar Sverrisson, TF3DC (situr sitt síðara kjörtímabil), Georg Magnússon, TF2LL (situr sitt síðara kjörtímabil), Guðmundur Sigurðsson, TF3GS (kjörinn til 2 ára) og Jón Björnsson, TF3PW (kjörinn til 2 ára). Varamenn til 1 árs voru kjörnir þeir Sæmundur E. Þorsteinsson, TF3UA (endurkjörinn) og Heimir Konráðsson, TF1EIN. Stjórnin mun skipta með sér verkum á næstunni.

Skoðunarmenn reikninga voru endurkjörnir þeir Haukur Konráðsson, TF3HK og Yngvi Harðarson, TF3Y og til vara, Vilhjálmur Í. Sigurjónsson, TF3VS. Félagsgjald var samþykkt óbreytt frá fyrra ári, 6500 krónur fyrir starfsárið 2019-2020. Stjórnin mun skipta með sér verkum fljótlega.

Skýrsla stjórnar og önnur aðalfundargögn verða til birtingar innan tíðar hér á heimasíðunni.

17. February, 2019/by TF3JB