CQ World Wide DX SSB keppnin fór fram 24.-25. október s.l. 7 TF stöðvar skiluðu gögnum, 4 í jafn mörgum keppnisflokkum og 3 samanburðar-dagbókum (check-log).

Bráðabirgðaniðurstöður (e. raw scores) liggja fyrir frá keppnisnefnd samkvæmt áætlaðri stöðu í viðkomandi keppnisflokki yfir heiminn (H) og áætlaðri stöðu yfir Evrópu (EU). Endanlegar niðurstöður verða birtar í maíhefti CQ tímaritsins 2021.

TF8TY, einmenningsflokkur, 20 metrar, háafl – 150/H; 61/EU.
TF3T, einmenningsflokkur, 80 metrar, háafl – 26/H; 19/EU.
TF8KY, einmenningsflokkur, öll bönd, háafl – 538/H; 232/EU.
TF2MSN, einmenningsflokkur, öll bönd, lágafl – 421/H; 268/EU.

Samanburðardagbækur bárust frá TF3IRA (TF3DC op.), TF3SG og TF3VS.

Hamingjuóskir til viðkomandi.

Stjórn ÍRA.

https://cqww.com/raw.htm?mode=ph

.

Benedikt Sveinsson TF3T var með bestan árangur TF stöðva í CQ WW DX SSB keppninni 2020. Hann keppti í einmenningsflokki, 80 metrum, háafli. Meðfylgjandi mynd var tekin í fjarskiptaherbergi TF3IRA í Skeljanesi fyrir nokkrum árum. Ljósmynd: TF3JB.

CQ WOLRD WIDE DX SSB keppnin fór fram 24.-25. október s.l. Gögnum var skilað inn fyrir 7 TF kallmerki í 4 keppnisflokkum, auk samanburðardagbóka:

TF8TY, einmenningsflokkur, 20 metrar, háafl.
TF3T, einmenningsflokkur, 80 metrar, háafl.
TF8KY, einmenningsflokkur, öll bönd, háafl.
TF2MSN, einmenningsflokkur, öll bönd, lágafl.

TF3IRA (TF3DC op.), samanburðardagbók (check-log). 
TF3SG, samanburðardagbók (check-log).
TF3VS, samanburðardagbók (check-log).

Bráðabirgðaniðurstöður munu liggja fyrir fljótlega en endanlegar niðurstöður verða birtar í CQ tímaritinu í maí n.k.

Skilyrðin á HF hafa verið áhugaverð að undanförnu. Hærri böndin ættu að lifna frekar næstu daga, en Flux‘inn (SFI) stendur í 88 í dag (29. október). Spáð er sama gildi fyrir tvo næstu daga, föstudag og laugardag. Þetta hæsta gildi í þrjú ár!

Sólblettafjöldi stendur í dag í 36 samanborið við 22 í gær og 11 í fyrradag (þriðjudag).

https://www.solarham.net/

Í byrjun mánaðarins hannaði Vilhjálmur Í. Sigurjónsson, TF3VS nýtt QSL kort fyrir kallmerki ÍRA, TF3WARD og var Mathías Hagvaag, TF3MH QSL stjóri félagsins með í ráðum.

Ákveðið var að prenta upplag af kortinu til bráðabirgða til að afgreiða fyrirliggjandi beiðnir og fékk Mathías kortin afhent í dag, 28. október. Ársæll Óskarsson, TF3AO mun síðan hafa milligöngu um prentun kortsins hjá Gennady, UX5UO í vor.

Kallmerkið verður næst virkjað 18. apríl 2021 á Alþjóðadag radíóamatöra og er til skoðunar að félagsstöðin verði jafnvel QRV fleiri daga heldur en eingöngu á afmælisdaginn sjálfan.

Mathías Hagvaag TF3MH QSL stjóri ÍRA var ánægður með kortin og sagði þau væru vel nothæf til að byrja með. Ljósmynd: TF3JB.

Stærsta keppnishelgi ársins er framundan, CQ WW DX SSB keppnin 2020.

Nýjasta skilyrðaspáin frá NOAA er ekki beint uppörvandi því hún gerir ráð fyrir 5 í K-gildi. Það jákvæða í stöðunni er þó, að eldri spár höfðu spáð segulstormi (þ.e. K-6 og hærra).

Bjartsýnisviðhorfið er að spár ganga ekki alltaf eftir.

https://www.swpc.noaa.gov/products/27-day-outlook-107-cm-radio-flux-and-geomagnetic-indices

Stjórn félagsins hefur ákveðið að félagsaðstaða ÍRA í Skeljanesi verði lokuð næstu þrjá fimmtudaga, þ.e. 22. og 29. október og 5. nóvember n.k. Engin starfsemi verður í húsnæðinu á okkar vegum, þar til annað verður ákveðið.

Ástæðan er ný reglugerð heilbrigðisráðherra um takmörkun á samkomum vegna farsóttar sem tekur gildi á morgun, 20. október með gildistíma til 10. nóvember n.k. Hertar sóttvarnarreglurnar snúast m.a. um fjöldatakmörkun m.v. 20 manns og að tryggja skuli að hægt sé að hafa 2 metra á milli einstaklinga sem ekki eru í nánum tengslum.

Sá möguleiki hefur verið ræddur að bjóða upp á starfsemi á vegum félagsins á netinu verði farsóttin mikið lengur þetta alvarleg. En fari allt á besta veg verður auglýst opnun á ný fimmtudaginn 12. nóvember.

Það er von okkar að þessari ákvörðun fylgi ríkur skilningur.

Stjórn ÍRA.

CQ WOLRD WIDE DX SSB keppnin 2020 er framundan, helgina 24.-25. október n.k. Þetta er stærsta SSB keppni ársins og er búist við allt að 50 þúsund þátttakendum. Reiknað er með, að vegna batnandi skilyrða og fyrir áhrif COVID-19 verði met þátttaka í ár.

Um er að ræða 48 klst. viðburð sem hefst kl. 00:00 laugardaginn 24. október og lýkur kl. 23:59 á sunnudaginn 25. október. Keppnin fer fram á 160, 80, 40, 20, 15 og 10 metrum. Í boði eru fjölmargir keppnisriðlar, bæði fyrir einmennings- og fleirmenningsþátttöku (sjá reglur).

Íslenskir leyfishafar hafa heimild til að nota tíðnisviðið 1850-1900 kHz á víkjandi grunni í tilraunaskyni í tilgreindum alþjóðlegum keppnum, þ.á.m. í þessari keppni. G-leyfishafar mega jafnframt nota allt að 1kW (fullt afl). Sjá nánari upplýsingar í Ársskýrslu ÍRA 2020, bls. 93-94.Vefslóð:  http://www.ira.is/wp-content/uploads/2020/02/15022020-Ársskýrsla-2019-20-pdf.pdf

Stjórn ÍRA óskar félagsmönnum góðs gengis.

Keppnisreglur:  https://www.cqww.com/rules.htm

Scandinavian Activity Contrest (SAC) SSB keppnin 2020 fór fram helgina 10.-11. október s.l. Þrjár TF stöðvar skiluðu inn gögnum í þremur keppnisflokkum. Ekki er gerður greinarmunur í röðun innan keppnisflokka hvort aðstoð var nýtt eða ekki.

Samkvæmt bráðabirgðaniðurstöðum (claimed score) eru niðurstöður eftirfarandi:

2. sæti – TF3W (TF3CW op.); einmenningsflokkur, 20M, háafl.
4. sæti – TF3T; einmenningsflokkur, 80M, háafl.
76. sæti – TF8KY; einmenningsflokkur, Öll bönd, háafl.

Hamingjuóskir til viðkomandi.

Stjórn ÍRA.

https://www.sactest.net/blog/result/region_results.php?&mode=SSB&region=73&claimed=1

Stjórn ÍRA tók á móti góðri gjöf til félagsins í gær, 16. október. Um er að ræða 25-30 lítra af þakmálningu.

Félagsmaður okkar, Gunnar Bergþór Pálsson, TF2BE hafði samband og sagðist eiga þakmálningu afgangs. Hann sagðist hrifinn af framtaki félaganna við að mála húsið í Seljanesi í sumar og óskaði að leggja sitt af mörkum og gefa félaginu þakmálningu ef ske kynni að hugmyndir væru uppi um að mála þakið líka. Á meðfylgjandi mynd hafði verið tekið á móti gjöfinni og málningardósirnar undirbúnar til flutnings í Skeljanes.

Stjórn ÍRA þakkar velvilja og góðan stuðning Gunnars.

Húsið í Skeljanesi eftir að framhliðin var máluð í sumar. Hugmyndin er að hefjast handa við að mála þakið í vor. Ljósmynd: TF3JB.

Ari Þórólfur Jóhannesson, TF1A og Georg Kulp, TF3GZ gerðu góða ferð í Bláfjöll 15. október.

Verkefni dagsins var að ganga endanlega frá nýju LW loftneti sem sett var upp á fjallinu 8. október s.l. fyrir KiwiSDR viðtæki TF3GZ sem þar er staðsett.

Viðtækið, sem upphaflega var sett upp þann 27. júní s.l., er nú laust við truflanir en mikið RF svið er á staðnum. Lausnin var m.a. að setja sérstaka síu á loftnetið. Viðtækið hefur nú truflanafría viðtöku á tíðnisviðinu frá 1,6 til 30 MHz.

Þakkir til þeirra félaga Ara og Georgs fyrir dugnaðinn og frábært framlag. Gott viðtæki yfir netið á þessum stað er mikilvæg viðbót fyrir radíóamatöra sem gera tilraunir í þessum tíðnisviðum, auk hlustara og allra sem hafa áhuga á útbreiðslu radíóbylgna.

Stjórn ÍRA.

.

Bent er á áhugaverða grein Ara um viðtæki yfir netið í nýjasta hefti CQ TF, bls. 41. Vefslóð: http://www.ira.is/wp-content/uploads/2020/09/cqtf_34arg_2020_04tbl.pdf

.

Á myndinni til vinstri má sjá síuna sem rætt er um í textanum: Mynd: TF3GZ.

Frágangur á LW loftnetinu uppi í turninum. Unun’in er fest á þverslána. Ljósmynd: Georg Kulp TF3GZ.
Unun frá Ultimax 100 er notuð til að taka sýndarviðnámið niður í fæðipunkti fyrir viðtækið. Ljósmynd: Georg Kulp TF3GZ.
Mynd úr tengikassanum fyrir KiwiSDR viðtækið í Bláfjöllum. Ljósmynd: Georg Kulp TF3GZ.