Félagsaðstaða Í.R.A. er til húsa að Skeljanesi í Reykjavík. Ljósmynd: Vilhjálmur Í. Sigurjónsson, TF3VS.

Þann 7. apríl s.l. var útbúin sérstök aðstaða vegna uppsetningar á sambyggðri stafavarpa- og internetgátt fyrir skilaboða- og ferilvöktunarkerfið APRS (Automatic Packet Reporting System) í fjarskiptaaðstöðu félagsins í Skeljanesi. Aðstaðan er á sérstöku borði sem sett var upp á milli fjarskiptaborða A og B í stöðvarherbergi. Stafavarpinn (e. digipeter) mun nota kallmerkið TF3RPG og vinna á 144.800 MHz og verður QRV á næstunni. Fyrir er stafavarpi sem staðsettur er í Hraunbæ í Reykjavík og settur var upp til reynslu sumarið 2010 með kallmerkið TF3RPF og verður hann rekinn áfram. Að auki, er rekin sambyggð stafavarpa- og internetgátt af TF8TTY í Reykjanesbæ, sem einnig verður rekin áfram. Ennfremur er fyrirhugað að setja upp APRS stafavarpa á Akureyri.

Meginrök fyrir uppsetningu kerfisins í fjarskiptaaðstöðu Í.R.A., er að tryggja fyrirkomulagið til frambúðar með öruggari samfellu í rekstri kerfisins. Sá hópur félagsmanna, sem einkum stendur að baki APRS verkefninu, eru þeir Jón Þóroddur Jónsson, TF3JA; Ársæll Óskarsson, TF3AO; Haraldur Þórðarson, TF3HP, Samúel Þór Guðjónsson, TF2SUT, Róbert Harry Jónsson, TF8TTY, Þórður Ívarsson, TF5PX og Þór Magnússon, TF3TON. Að auki hafa þeir LA6IM (TF8BK) og TF3WP (DF8WP) komið að verkefninu.

Nánari upplýsingar um APRS: http://en.wikipedia.org/wiki/Automatic_Packet_Reporting_System
Til að fylgjast með umferð: http://aprs.fi/

TF2JB

Jónas Bjarnason, TF2JB.

Næsta erindi á vetrardagskrá félagsins verður haldið fimmtudaginn 7. apríl n.k., kl. 20:30 í félagsaðstöðunni í Skeljanesi. Fyrirlesari er Jónas Bjarnason, TF2JB, og nefnist erindið QRV á amatörböndum erlendis? Erindið er með sama heiti og fyrirsögn greinar sem birtist í 4. tbl. CQ TF 2010. Í meginatriðum verður gengið út frá efni sem birtist í greininni, sem og nýju efni úr handriti að óbirtri framhaldsgrein.

Leitast verður við að svara nokkrum algengum spurningum, s.s. “Hvaða lönd eru í boði?”, “Er munur á hvort um er að ræða svokallað “CEPT” land eða ekki?, “Ef um er að ræða CEPT-land, í hve langan tíma gildir leyfið?”, “Hvaða gögn þarf ég að hafa handbær?”, “Er munur á hvort leyfishafi er handhafi íslensks N-leyfis eða G-leyfis?”, “Hvaða kallmerki er mér heimilt að nota?”, “Get ég farið í loftið frá heimastöð leyfishafa í gistilandinu?”.

Stjórn Í.R.A. hvetur félagsmenn til að taka frá næstkomandi fimmtudagskvöld og mæta stundvíslega. Kaffiveitingar verða í boði félagsins.


CEPT er skammstöfun fyrir Conference Européenne de Administrations des Postes et de Telecommunications.
Íslensk þýðing: Samtök stjórnvalda á sviði pósts og fjarskipta í Evrópu.

TF2JB

Henry Arnar Hálfdánarson, TF3HRY, fjallaði um tíðnisviðin frá 600 metrum og neðar. Ljósmynd: TF3LMN.

Henry Arnar Hálfdánarson, TF3HRY, flutti áhugavert og fróðlegt erindi í félagsaðstöðu Í.R.A. fimmtudaginn 31. mars s.l. Erindið nefndi hann Loftnet og útgeislun á lægri böndum. Hann fjallaði að mestu um 500 kHz bandið (600 metrana). Eftir inngang um loftnetafræðina, benti Henry á áhugaverðar loftnetslausnir fyrir leyfishafa sem áhugasamir eru um bandið (og jafnvel um enn lægri bönd), þótt þeir hafi ekki góðar aðstæður til uppsetningar loftneta. Í ljós kom, að margt er hægt að gera í þeim efnum þótt verið sé að kljást við “reactive” loftnet, háa spennu, litla nýtni o.s.frv. Hann hafði ýmsa áhugaverða íhluti meðferðis sem notast til smíða á loftnetum á þessum tíðnum. Henry Arnar svaraði fjölda spurninga í lok erindisins. Alls mættu um 25 manns í Skeljanesið að þessu sinni.

Stjórn Í.R.A. þakkar Henry Arnari Hálfdánarsyni, TF3HRY, fyrir vel heppnað erindi og Jóni Svavarssyni, TF3LMN, fyrir myndatökuna.

Myndin var tekin skömmu áður en erindi hófst á ný eftir kaffihlé. Sjá má umræður og áhuga í hverju andliti.

Margt forvitnilegt kom upp úr tösku fyrirlesara. Valdemar G. Valdemarsson, skoðar einn þeirra hluta.

TF3SA og TF3RF. TF3RF: “Já, spólurnar eru engin smásmíði þegar komið er svona langt niður á böndin…”.

TF2JB

Með tilvísan til 16. gr. félagslaga er hér með boðað til aðalfundar Í.R.A. laugardaginn 21. maí 2011. Fundurinn verður haldinn í Princton fundarsal Radisson Blu hótel Sögu við Hagatorg í Reykjavík og hefst stundvíslega kl. 13:00. Dagskrá er samkvæmt 18. gr. félagslaga.

Bent er á, að samkvæmt ákvæði í 26. gr. laganna þurfa tillögur að lagabreytingum að berast stjórn félagsins fyrir 15. apríl n.k. Með tillögum að breytingum skal fylgja skrifleg greinargerð þar sem gerð er grein fyrir ástæðum tillagnanna og væntanlegum áhrifum þeirra


Fyrir hönd stjórnar,

Jónas Bjarnason, TF2JB,
formaður Í.R.A.

Yngvi Harðarson, TF3Y.

Í.R.A. gengst fyrir síðara hraðnámskeiði vetrardagskrár til kynningar á “Win-Test” keppnisdagbókarforritinu þriðjudaginn 5. apríl n.k. kl. 18:30-21:00. Námskeiðið er tveggja kvölda og verður síðari námskeiðsdagurinn viku síðar, eða 12. apríl á sama stað og tíma. Leiðbeinandi verður sem áður, Yngvi Harðarson, TF3Y. Áhugasamir eru beðnir um að skrá sig sem fyrst á póstfangið “ira hjá ira.is” þar sem fjöldi er takmarkaður og síðast var full bókað. Námskeiðið er ókeypis fyrir skuldlausa félaga Í.R.A.

Win Test forritið.

Hlekkur á heimasíðu Win-Test: http://www.win-test.com/

TF2JB

Fregnir bárust nýlega frá NRRL þess efnis, að Tormod Bøe, LA7OF, formaður Norsk Radio Relæ Liga (NRRL), sé látinn. Hann var 71 árs að aldri. Jarðarförin fer fram í dag, þriðjudaginn 29. mars 2011. Stjórn Í.R.A. hefur sent svohljóðandi samúðarkveðju:


Islandske radiomatörer minnes NRRL president Thormod Bøe LA7OF ved hans bortgang med takk for hans store innsats for radio-amatørsaken og varme tanker for hans kjære vennskap. Dyp medfølelse til XYL Brit og den øvrige familie.


Jónas Bjarnason, TF2JB,
formaður.

Henry Arnar Hálfdánarson, TF3HRY, stillir Collins 75S-3C viðtækið í fjarskiptaherberginu. Ljósmynd: TF3AM.

Næsta erindi á vetrardagskrá félagsins verður haldið fimmtudaginn 31. mars n.k., kl. 20:30 í félagsaðstöðunni í Skeljanesi. Fyrirlesari kvöldsins er Henry Arnar Hálfdánarson, TF3HRY, og nefnist erindið Loftnet og útgeislun á lægri böndum. Henry mun einkum fjalla um amatörböndin frá 500 kHz og neðar. Hugmyndin er, að velta fyrir sér “praktískum” lausnum á því hvað meðal radíóamatörinn getur gert á þessum böndum, þar sem verið er að kljást við “reactive” loftnet, háa spennu, litla nýtni o.s.frv. Henry mun fjalla um þann ramma sem takmarkar hvað flestir leyfishafar geta gert í garðinum hjá sér og sýna fram á að í raun er ýmislegt hægt að gera.

Stjórn Í.R.A. hvetur félagsmenn til að taka frá næstkomandi fimmtudagskvöld og mæta stundvíslega í Skeljanesið. Kaffiveitingar verða í boði félagsins.

TF2JB

Þór Þórisson, TF3GW, flutti fróðlegt erindi um “EchoLink” þann 24. mars.

Þór Þórisson, TF3GW, flutti áhugavert og fróðlegt erindi í félagsaðstöðu Í.R.A. fimmtudaginn 24. mars. Erindið nefndi hann Reynslan af rekstri EchoLink á Íslandi. Þór er mikill áhugamaður um fyrirbærið og setti m.a. upp tengingu fyrir “EchoLink” hér á landi þegar árið 2006. Hann er ábyrgðar- og rekstrar aðili “EchoLink” þjónustu sem er í boði til leyfishafa á 145.350 MHz.

Í erindi sínu útskýrði Þór m.a. hvernig EchoLink vinnur. Um er að ræða tengingu tveggja amatörstöðva (eða fleiri) sem nota tveggja metra bandið. Merkin fara yfir netið þannig að annar leyfishafinn getur t.d. verið staddur hérlendis og hinn erlendis, í raun hvar sem er í heiminum. Forsendan er, að hvor leyfishafi um sig hafi aðgang að endurvarpa með nettengingu og búi yfir upplýsingum um svokallað “node” númer sem er 6 tölustafir. “EchoLink” hugbúnaðurinn kom fyrst fram árið 2002 og er skráður samkvæmt einkaleyfi, en radíóamatörum er heimilt að nota hann frítt. Hönnuður hugbúnaðarins er Jonathan Taylor, K1RFD. Talið er, að fjöldi radíóamatöra sem nota “EchoLink” í heiminum sé í dag um 200 þúsund, þar af eru um 5 þúsund QRV hverju sinni. Þór svaraði fjölda spurninga í lok erindisins. Alls mættu um 20 manns í Skeljanesið í þetta sinn.

Fram kom m.a. að um 200 þúsund radíóamatörar eru QRV á EchoLink í heiminum. Ljósmynd: TF3LMN.

Þór náði strax sambandi á 2 metra handstöðinni við radíóamatör í Odense í Danmörku um EchoLink búnaðinn.

Bestu þakkir til Þórs Þórissonar, TF3GW, fyrir erindisflutninginn og til Jóns Svavarssonar, TF3LMN, fyrir myndatökuna.

TF2JB

Vilhjálmur Þór Kjartansson, TF3DX, fjallaði af innlifun um loftnetafræðina og fangaði hugi viðstaddra.

Vilhjálmur Þór Kjartansson, TF3DX, flutti síðari hluta erindis síns um Sendiloftnet á 160 metrum; sjónarmið við hönnun fimmtudagskvöldið 17. mars s.l. Þeir sem lögðu leið sína í Skeljanesið urðu ekki fyrir vonbrigðum frekar en þegar fyrri hluti erindisins var fluttur þann 24. febrúar s.l. Vilhjálmur fór á kostum og beinlínis fangaði hugi viðstaddra með faglegri og áhugaverðri framsetningu. Umfjöllunarefnið, var sem fyrr, sprottið af hönnun hans á sendiloftneti fyrir Þorvald Stefánsson, TF4M á 1,8 MHz.

Vilhjálmur setti efnið þannig fram, að hvorutveggja hentaði byrjendum og þeim sem lengra eru komnir í fræðunum.

Fyrst rifjaði Villi upp helstu niðurstöður úr fyrri hlutanum, síðan hvernig útgeislað svið er í réttu hlutfalli við flatarmálið undir straumferlinum. Það skýrði hvers vegna geislunarviðnám í stuttum loftnetum stígur með lengd þeirra í öðru veldi. Því næst fjallaði hann um raunhæfa straumgleypa og hvernig hallandi vírar í topphatti vinna að hluta gegn straumnum í lóðrétta leggnum. Það leiðir til þess geislunarviðnámið fer að falla aftur ef þeir eru síkkaðir of mikið. Síðan útskýrði Villi kúplað tapsviðnám frá jörð í mótvægisvíra, og hvernig það minnkar þegar þeim er lyft. Hann tók dæmi af 1,8 MHz loftneti TF4M um öll þessi atriði, og sýndi að nóg var að nota 2 víra uppi og aðra 2 niðri ef rétt væri farið að. Mælingar í haust (2010) bentu til að nýtnin væri milli 80 og 90%.

Myndin sýnir aðeins hluta þeirra sem gerðu sér ferð í Skeljanesið þetta fimmtudagskvöld; mæting var alls 28 manns.

Stjórn Í.R.A. þakkar Vilhjálmi, TF3DX, fyrir afar vel heppnað erindi og Gísla G. Ófeigssyni, TF3G, fyrir myndatökuna.

TF2JB

Minnt er á að skilafrestur efnis í aprílhefti CQ TF er nk. sunnudag, 27. marz. Í góðu lagi er að senda ritstjóra punkta, ábendingar og efni, sem ritstjóri getur unnið úr frekar. Og myndir eru auðvitað alltaf velkomnar og “segja meira en þúsund orð”.

Efni má senda ritstjóra, Kristni Andersen – TF3KX:

cqtf@ira.is
GSM 825-8130