Almennt

Stjórn ÍRA hefur ákveðið að fresta auglýstum flóamarkaði sem kynntur er á vetrardagskrá að verði haldinn sunnudaginn 8. mars.

Ástæðan er, ríkjandi aðstæður vegna útbreiðslu kórónaveiru sem veldur CONVID-19 sjúkdómi, en tilfellin á Íslandi eru orðin alls 35.

Flóamarkaðir ÍRA hafa, síðustu ár, verið fjölsóttustu viðburðir félagsins og gjarnan hafa komið um og yfir 50 manns í Skeljanes. Ljóst er, þegar slíkur fjöldi mætir í salinn, verða mikil þrengsli. Leitað var til fagaðila um álit vegna þessa í dag og okkur ráðlagt að fresta viðburðinum, sé þess kostur.

Því hefur verið ákveðið að fresta flóamarkaði ÍRA 2020 til sunnudagsins 3. maí n.k. Eins leitt og það annars er að fresta viðburði, er það mat okkar að betra sé að sýna fyrirhyggju í þessu máli.

Stjórn ÍRA.

Opið hús verður í félagsaðstöðu ÍRA í Skeljanesi, fimmtudaginn 5. mars. Að venju verður húsið opnað kl. 20:00.

Góður félagsskapur, kaffi, te og meðlæti og nýjustu tímaritin.

Mathías Hagvaag TF3MH, QSL stjóri ÍRA, verður búinn að flokka nýjar kortasendingar erlendis frá til félagsmanna fyrir opnunartíma.

Stjórn ÍRA.

Ari Þórólfur Jóhannesson TF1A og Jón G. Guðmundsson TF3LM, mættu  í Skeljanes laugardaginn 29. febrúar. Mælitæki voru sett upp í salnum til að mæla VHF og UHF stöðvar bæði fyrir amatörböndin og utan þeirra.

Þrennt var prófað: Afl sendis, næmleiki viðtækis og áberandi sterkar yfirsveiflur (frá 1mW). Allar prófanir voru gerðar í gerviálag.

Félagsmönnum var boðið að mæta á staðinn með eigin stöðvar og komu menn alls með 25 stöðvar (bílstöðvar, handstöðvar og heimastöðvar). Eftirspurn var þannig mjög góð og entist tíminn til að prófa alls 15 stöðvar.

Yfirsveiflur voru mældar upp að 1,5 GHz. Algengt var að sjá yfirsveiflur í kringum 800 MHz og lélegar Kínastöðvar, sem sendu merki fyrir neðan senditíðni (undirsveiflur). Þótt niðurstöður hafi almennt reynst góðar, sagðist Ari vilja benda á að ekki væri að vita hvernig tækin hegða sér t.d. á mismunandi bílnetum. Niðurstöður verða birtar á næstunni þegar búið verður að vinna úr niðurstöðum.

Mælitæki: Rohde & Schwarz CMU-300 Universal Radio Communication Tester (6 GHz), DBD Communications 100W gerviálag (6 GHz) og DAIWA CN-801V VHF/UHF standbylgju- og aflmælir. Aflgjafar: Diamond GSV3000 (25A), QJE PSV30SWIV (30A) og Astron SL-11A (11A).

Innan tíðar verður boðið upp á framhald mælinga í Skeljanesi til að ljúka mælingum á VHF/UHF stöðvum sem bíða, auk þess sem kallað verður eftir fleirum enda mikið um fyrirspurnir.

Stjórn ÍRA þakkar þeim Ara Þórólfi Jóhannessyni TF1A og Jóni G. Guðmundssyni TF3LM fyrir frábæran viðburð.

Alls mættu 30 félagar og 2 gestir þennan ágæta laugardag í Skeljanes, þrátt fyrir mikla snjókomu í vesturbæ Reykjavíkur.

Ari Þórólfur Jóhannesson, TF1A, VHF stjóri félagsins, mætir í Skeljanes laugardaginn 29. febrúar kl. 13:00.

Hann hefur meðferðis vönduð mælitæki, þ.á.m. frá Rhode & Schwartz, til mælinga á stöðvum sem vinna á VHF og UHF. Búnaðurinn getur mælt eiginleika stöðva sem vinna frá 28 til 1300 MHz.

Félagsmönnum er hér með boðið að koma með bílstöðvar og/eða handstöðvar sem vinna í þessum tíðnisviðum og verða gerðar mælingar á viðtækjum, sendum og einnig á loftnetum handstöðva þar á staðnum.

Minnt er á að taka með straumsnúrur og hljóðnema og ef handstöðvar, athugið að hafa þær fullhlaðnar. Aflgjafar og gerviálög (e. dummy loads) verða á staðnum. Mælibúnaðurinn ræður við að mæla stöðvar sem gefa út að lágmarki 1mW og að hámarki 100W.

Jón G. Guðmundsson, TF3LM, mun verða Ara til aðstoðar, en hann skrifaði m.a. áhugaverða grein um prófanir þeirra félaga á yfirsveiflum VHF/UHF stöðva, sem gerðar voru í Skeljanesi haustið 2018.

Opið verður frá kl. 13-16. Í boði verður kaffi og gott meðlæti.

Stjórn ÍRA.

Námskeiðið „Fyrstu skrefin“ verður haldið fimmtudaginn 27. febrúar n.k. í Skeljanesi. Þetta er fyrsta námskeiðið af fjórum í boði á nýrri vetrardagskrá félagsins. Leiðbeinandi er Óskar Sverrisson, TF3DC.

Námskeiðin verða haldin:

• 27. febrúar; fimmtudagur, kl. 17:00.
• 19. mars; fimmtudagur, kl. 17:00.
• 26. mars; fimmtudagur, kl. 17:00.
• 30. apríl; fimmtudagur, kl. 17:00.

Áríðandi er að áhugasamir skrái sig tímanlega hjá Óskari Sverrissyni, TF3DC, í síma 862-3151 eða með tölvupósti til „oskarsv hjá internet.is“ með góðum fyrirvara. Námskeiðið er félagsmönnum að kostnaðarlausu.

Námskeiðið „Fyrstu skrefin“ eru einkum hugsað fyrir nýja leyfishafa sem hafa áhuga á að sækja leiðbeiningar um hvernig best er að standa að því að fara í loftið. Um er að ræða einkatíma (2-3 klst.) með reyndum leyfishafa. Leiðbeinandi kynnir grundvallaratriði og ríkjandi hefðir innan áhugamálsins. Markmið námskeiðsins er að nýr leyfishafi öðlist öryggi í fjarskiptum.

Nýr leyfishafi og leiðbeinandi ræða saman þar sem spurningum er svarað og að því búnu er farið í loftið í fjarskiptaherbergi félagsins. Tímasetning námskeiðs og yfirferð getur að vissu marki verið sveigjanleg með samráði leyfishafa og umsjónarmanns.

Stjórn ÍRA.

Ari Þórólfur Jóhannesson, TF1A, mætti í Skeljanes laugardaginn 22. febrúar og kynnti búnað félagsins til fjarskipta um OSCAR 100 gervitunglið. Félagsmönnum gafst einnig tækifæri til að fara í loftið með tilsögn frá gervihnattastöð TF3IRA.

Í boði var svokallaður „opinn laugardagur“ og var félagsaðstaðan opin frá kl. 10-15 til að gefa sem flestum tækifæri til að nýta viðburðinn. Þetta fyrirkomulag heppnaðist vel og var góð mæting og dreifing yfir daginn.

Menn fóru í loftið, bæði á tali (SSB) og morsi. Menn voru almennt sammála um að þessi upplifun væri mjög sérstök; sterk merki, engar truflanir og góður DX. Sérprentaðar greinar Ara um OSCAR 100 úr CQ TF sem lágu einnig frammi til kynningar.

Alls mættu 24 félagsmenn og 3 gestir í Skeljanes þennan ágæta og sólríka laugardag.

Stjórn ÍRA þakkar Ara fyrir vel heppnaðan viðburð.