,

CQ World Wide SSB keppnin 2018 um helgina


CQ World Wide SSB keppnin 2018 verður haldin 27.-28. október. Keppnin er 48 klst. keppni og hefst kl. 00:00 á laugardag og lýkur kl. 23:59 á sunnudag.

CQ WW fer fram á 160, 80, 40, 20, 15 og 10 metrum. Í boði eru fjölmargir keppnisriðlar, bæði fyrir einmennings- og fleirmenningsþáttöku (sjá reglur).

Þátttaka var góð frá okkur í fyrra (2017); þá sendu 11 TF kallmerki inn keppnisdagbækur: TF2LL, TF2MSN, TF3AO, TF3CW, TF3DC, TF3DT, TF3JB, TF3SG, TF3T, TF3W og TF8KY, auk TF1VS sem sendi inn viðmiðunardagbók.

70 ár eru liðin frá fyrstu keppninni sem haldin var árið 1948. Þá voru 2 íslenskir leyfishafar á meðal þátttakenda í talhlutanum, þeir Einar Pálsson, TF3EA og Sigurður Finnbogason, TF3SF.

Keppnisreglur: https://www.cqww.com/rules.htm

Heimasíða keppninnar: http://www.cqww.com/

/by
,

TF3LM Í SKELJANESI Á FIMMTUDAG

Jón G. Guðmundsson, TF3LM, heimsækir okkur í Skeljanes fimmtudaginn 25. október.

Hann segir m.a. frá niðurstöðum mælinga á yfirsveiflum VHF/UHF stöðva sem gerðar voru nokkra laugardaga í sumar í félagsaðstöðunni.

Félagsmenn fjölmennið, dagskráin hefst stundvíslega kl. 20:30. Vandaðar kaffiveitingar.

Stjórn ÍRA.

Jón G. Guðmundsson TF3LM við vinnu utanhúss í Skeljanesi þann 29. september s.l. Ljósmynd: Jónas Bjarnason TF3JB.

/by
,

Formaður SRAL í heimsókn hjá ÍRA

Merja „Memma“ Koivaara, OH1EG, heimsótti ÍRA 20. október ásamt dóttur sinni Sini Koivaara, OH1KDT. Memma er formaður Suomen Radioamatooriliitto, SRAL, systurfélags ÍRA í Finnlandi.

Þær mæðgur komu einmitt í Skeljanes síðdegis laugardaginn 20. október, þegar JOTA viðburðurinn stóð sem hæst og voru yfir sig hrifnar af því hve mikið var um að vera.

TF3JB og OH1EG áttu góðan fund, ræddu sameiginleg málefni og hagsmuni félaganna, m.a. WRC-19. Memma þakkaði móttökurnar og bað fyrir kveðjur til félagsmanna.

Skeljanesi 20. október. Vala Dröfn Hauksdóttir TF3VD og Merja “Memma” Koivaara, OH1EG, formaður SRAL. Ljósmynd: Jónas Bjarnason TF3JB.

/by
,

JOTA 2018 – LÍF OG FJÖR Í SKELJANESI

Líf og fjör var í Skeljanesi laugardaginn 20. október þegar skátar fjölmenntu á staðinn. Tilefnið var JOTA „Jamboree-On-The-Air“. JOTA er, þegar skátar tala við aðra skáta í heiminum um fjarskiptastöðvar í tíðnisviðum radíóamatöra undir eftirliti og með aðstoð þeirra.

Skilyrði til fjarskipta voru ágæt enda voru höfð sambönd um allan heim, þ.á.m. við Ástralíu.

Samhliða því að virkja kallmerkið TF3JAM, var boðið upp á smíðar úr einföldum íhlutum, auk þess sem eldri skátar höfðu sambönd um JOTI „Jamboree-Over-The-Internet“.

Verkefnið var undir stjórn radíóskátanna Völu Drafnar Hauksdóttur TF3VD, Elínar Sigurðardóttur TF2EQ og Árna Freys Rúnarssonar TF8RN.

Samanlagður fjöldi þátttakenda og félagsmanna á staðnum var yfir 40 talsins. Viðburðurinn fór fram frá kl. 9 árdegis til kl. 19 síðdegis.

Vinsælt var hjá yngri hópnum að lóða saman einföld og hagnýt verkefni undir leiðsögn.

Mathías Hagvaag TF3MH settist við borðið með kaffibollann og var fljótlega farinn að gefa góð ráð og leiðbeina.

Elín Sigurðardóttir TF2EQ og Árni Freyr Rúnarsson TF8RN virkjuðu kallmerkið TF3JAM í fjarskiptaherbergi félagsins.

Þegar fréttist af samböndum vð Hawai og Ástralíu, vildu allir fara í loftið og tala við aðra skáta hinum megin á hnettinum

Stund á milli stríða. Arnlaugur Guðmundsson, Vala Dröfn TF3VD og Árni Freyr TF8RN fá sér hressingu. Á myndinni má sjá örbylgjuofninn sem var notaður við tilraunir og voru m.a. “soðin” egg í bland við álpappír. Þetta var mjög vinsælt atriði hjá krökkunum.

Eldri hópurinn kom sér fyrir í sófasettinu og hafði m.a. JOTI sambönd.

Óskar Sverrisson TF3DC varaformaður ÍRA afhenti Völu Dröfn TF3VD eintak af 3. tbl. CQ TF 2018, en mynd af henni og Önnu TF3VB prýddi forsíðuna.

/by
,

Frábær ferðasaga á fimmtudegi

Anna Henriksdóttir, TF3VB, mætti í Skeljanes fimmtudaginn 18. október og sagði ferðasögu þeirra Völu Drafnar Hauksdóttur, TF3VD, með YL-leiðangri til eyjunnar Noirmoutier í Frakklandi 25.-31. ágúst.

Þær stöllur voru hluti af 14 kvenna hópi frá Frakklandi, Þýskalandi, Sviss og Íslandi sem virkjuðu kallmerkið TM65YL (IOTA EU-064). Hópurinn hafði alls yfir 5000 QSO þrátt fyrir óhagstæð skilyrði á böndunum.

Anna sagði frá ferðinni í máli og myndum. Henni tókst afburða vel upp og fengu viðstaddir góða innsýn í heim kvenamatöra, franska menningu og amatör radíó í Frakklandi.

Var lengi klappað í lok erindisins eftir greið svör við spurningum félagsmanna. Vala Dröfn, TF3VD átti ekki heimagengt að þessu sinni. Mæting var góð og hvert sæti setið. Alls voru 29 félagar í húsi og 1 erlendur gestur þetta frábæra fimmtudagskvöld.

Anna Henriksdóttir TF3VB sagði okkur ferðasögu þeirra Völu Drafnar Hauksdóttur TF3VD til Frakklands í ágúst s.l. Á myndinni má sjá Bjarna Sverrisson TF3GB, Ölvir Sveinsson TF3WZ, Höskuld Eíasson TF3RF, Stefán Arndal TF3SA og Arnþór Wilhelm Sigurðsson TF3AWS.


Anna Henriksdóttir TF3VB og Sigurbjörn Þór Bjarnason TF3SB ritstjóri CQ TF ræða málin. Ljósmyndir: Jónas Bjarnason TF3JB.

/by
,

Laugardagur: Skátar koma í Skeljanes

Skátar koma í Skeljanes laugardaginn 20. október. Húsið verður opið frá kl. 10 árdegis.

Það er JOTA „Jamboree-On-The-Air“ viðburðurinn sem verður haldinn í 61. sinn þessa helgi.

JOTA er, þegar skátar tala við aðra skáta í heiminum um fjarskiptastöðvar í tíðnisviðum radíóamatöra undir eftirliti og með aðstoð þeirra. Búist er við þátttöku um einnar milljónar skáta og 25 þúsund radíóamatöra í a.m.k. 150 þjóðlöndum.

Þær Elín Sigurðardóttir TF2EQ og Vala Dröfn Hauksdóttir TF3VD annast verkefnið.

/by
,

Ferðasaga frá Frakklandi – 18. október

Anna Henriksdóttir TF3VA og Vala Dröfn Hauksdóttir TF3VD heimsækja okkur í Skeljanes fimmtudaginn 18. október.

Þær segja okkur ferðasöguna frá DX-leiðangri til L´Île de Noirmoutier í Frakklandi 25. – 31. ágúst 2018 í máli og myndum. Þar voru þær stöllur í hópi 12 annarra YL‘s sem virkjuðu kallmerkið TM64YL.

Félagsmenn fjölmennið, dagskráin hefst stundvíslega kl. 20:30. Vandaðar kaffiveitingar.

Stjórn ÍRA.

Anna Henriksdóttir TF3VB og Vala Dröfn Hauksdóttir TF3VD í fjarskiptaherbergi TF3IRA. Ljósmynd: Sigurbjörn Þór Bjarnason TF3SB.

/by
,

Vetrardagskrá ÍRA hófst 11. október 2018

Vetrardagskrá ÍRA hófst 11. október með því að Jónas Bjarnason, TF3JB, formaður félagsins bauð viðstadda velkomna. Einar Kjartansson, TF3EK, umsjónarmaður TF útileikanna kynnti úrslit 2018 og Óskar Sverrisson, TF3DC, varaformaður félagsins, afhenti viðurkenningar.

Niðurstöður fyrir þrjú efstu sætin:

1. Georg Magnússon, TF2LL, 728 heildarstig.
2. Einar Kjartansson, TF3EK, 320 heildarstig.
3. Hrafnkell Sigurðsson, TF8KY, 294 heildarstig.

Nánari umfjöllun verður í næsta blaði félagsins, CQ TF.

Þá heimsótti Elísabet Shishmolina, RA1AUW, okkur í Skeljanes á fimmtudagskvöldið. Hún er dóttir Mikhail, UA1AUW, sem hefur haft sambönd við mörg TF kallmerki, m.a. í keppnum. Þau feðgin eru búsett í Sankti Pétursborg í Rússlandi. Beth var mjög hrifin af félagsaðstöðu ÍRA og áhugasöm um starfsemina. Hún bað fyrir góðar kveðjur til félagsmanna.

Loks kom Sigurður Óskar Óskarsson, TF2WIN, færandi hendi með tvo kassa af margskonar radíódóti frá Þór Þórssyni, TF1GW, sem viðstaddir máttu eiga. Vel gekk að koma þessum hlutum út.

Mæting: 25 félagar og 1 gestur.

Georg Magnússon TF2LL með verðlaunaskjöldinn fyrir 1. sætið í TF útileikunum 2018. Óskar Sverrisson TF3DC annaðist afhendingu hans og viðurkenningarskjals. Georg fékk jafnframt afhenda verðlaunaskildi fyrir 1. sætið í leikunum árin 2015 og 2017, sem ekki höfðu verið afhendir í tíð fyrri stjórnar.

Einar Kjartansson, TF3EK, varð í 2. sæti í TF útileikunum 2018. Óskar Sveirrisson TF3DC annaðist afhendingu viðurkenningarskjals. Á myndinni má einnig sjá þá TF3DT, TF2LL og TF1EIN.

Hrafnkell Sigurðsson, TF8KY, varð í 3. sæti í TF útileikunum 2018. Óskar Sverrrisson TF3DC annaðist afhendingu viðurkenningarskjals. Á myndinni má einnig sjá þá TF8TY, TF3VE, TF3DT, TF3WK og TF3EK.

Skeljanesi 11. október 2018. Frá vinstri: Njáll H. Hilmarsson TF3NH, Elísabet Shishmolina RA1AUW, Arnþór Wilhelm Sigurðsson TF3AWS og Þórður Adolfsson TF3DT. Ljósmyndir: TF3JB.

/by
,

Rýmkun tíðniheimildar á 70 MHz í höfn

ÍRA hefur borist erindi frá Póst- og fjarskiptastofnun í dag 9. október 2018 þess efnis, að íslenskum leyfishöfum er veitt heimild til notkunar á tíðnisviðinu 70.000-70.250 MHz.

Fyrri heimild frá 19.2.2010 var fyrir 70.000-70.200 MHz. Þessi breyting kemur í kjölfar beiðni félagsins um rýmkun tíðniheimildar.

Þá er almenn heimild til okkar  á 70 MHz framlengd til 31.12.2020.

Stjórn ÍRA fagnar þessum jákvæða áfanga sem er einkar mikilvægur fyrir þá radíóamatöra sem stunda tilraunir í sviðinu.

/by
,

3. tölublað CQ TF komið út

Ágætu félagsmenn!

Mér er ánægja að tilkynna um útkomu 3. tölublaðs CQ TF 2018, sem nú kemur út á stafrænu formi hér á heimasíðunni.

Margir hafa lagt hönd á plóg og mörgum ber að þakka, en sér í lagi TF3VS sem annaðist umbrotsvinnu.

CQ TF er að þessu sinni 57 blaðsíður að stærð.

Blaðið má finna hér: http://www.ira.is/wp-content/uploads/2018/10/cqtf_32arg_2018_03tbl.pdf

73 – TF3SB, ritstjóri CQ TF.

Forsíða CQ TF – 32. árg. 2018, 3. tbl

/by
,

TF3EK verður í Skeljanesi 11. október

Fyrsti viðburður á nýrri vetrardagskrá ÍRA verður haldinn í félagsaðstöðunni fimmtudaginn 11. október. Þá mætir Einar Kjartansson TF3EK á staðinn  og kynnir úrslit í TF útileikunum 2018 og veitir viðurkenningar félagsins.

Síðan er hugmyndin að ræða stuttlega hvort menn vilja eitthvað breyta núverandi fyrirkomulagi eða keppnisreglum fyrir leikana 2019, en þá verða liðin 40 ár frá því fyrstu TF útileikarnir voru haldnir.

Stjórn ÍRA hvetur félagsmenn til að mæta tímanlega. Kaffiveitingar verða í boði félagssjóðs.

Myndin var tekin í Skeljanesi 26. júlí s.l. þegar Einar Kjartansson TF3EK kynnti TF útileikana 2018. Ljósmynd: TF3JB.

/by
,

NÁMSKEIÐ TIL AMATÖRPRÓFS FRESTAST

ÍRA auglýsti eftir áhuga á að taka þátt í námskeiði til amatörprófs þann 17. september. Tíu dögum síðar var fresturinn framlengdur til 2. október. Fyrirspurnir voru nokkrar, en aðeins tveir skráðu sig. Þetta kemur ekki á óvart þar sem námskeiðshald hefur verið mjög þétt undanfarin misseri.

Í ljósi þessa hefur verið ákveðið, í samráði við prófnefnd og umsjónarmann námskeiða, að falla frá námskeiðshaldi nú, en stefna þess í stað að námskeiði eftir áramót.

Þegar nær dregur, mun félagið því auglýsa á ný eftir áhuga á að taka þátt í námskeiði til amatörprófs, sem myndi hefjast 12. febrúar og ljúka með prófi PFS, annaðhvort 4. eða 11. maí 2019.

Stjórn ÍRA.

/by