Síðasti viðburður á vetrardagskrá ÍRA er jólakaffi félagsins sem haldið verður í félagsaðstöðunni í Skeljanesi fimmtudaginn 20. desember.

Veglegar kaffiveitingar. Húsið verður opnað kl. 20:00 að venju.

Þetta verður jafnframt síðasta opnun félagsaðstöðunnar á þessu ári en hún verður næst opin fimmtudaginn 3. janúar 2019.

Líkt og fram kom í lok APRS erindis Guðmundur Sigurðssonar TF3GS, s.l. fimmtudagskvöld, bauðst Ari Þórólfur Jóhannesson TF1A til að lána strax, búnað til að gera félagsstöðina QRV á APRS.

Og í dag, laugardaginn 15. desember varð sambyggð stafavarpa- og internetgátt fyrir skilaboða- og ferilvöktunarkerfið APRS (e. Automatic Packet Reporting System) QRV frá fjarskiptaaðstöðu ÍRA kl. 15:10.

Búnaður er af gerðinni GW-1000 APRS Total Solution frá CG-Antenna og sendi-/móttökustöð er Icom IC-208H; sendiafl, 15W. Loftnet er J-póll, smíðaður af Vilhjálmi Í. Sigurjónssyni, TF3VS. Kerfið hefur verið prófað og vinnur vel. Kallmerki er TF3IRA-1Ø.

Dagurinn var jafnframt notaður til að endurnýja húsfestingu fyrir Diamond SX-200N VHF/UHF stangarloftnet TF3IRA, sem sett var upp 29. september s.l. – en ekki vannst tími til að endurnýja þá. Georg Kulp TF3GZ gaf félaginu nýja öfluga festingu og gekk frá uppsetningu.

Stjórn ÍRA þakkar þeim Ara Þórólfi Jóhannessyni TF3A, Guðmundi Sigurðssyni TF3GS og Georg Kulp TF3GZ fyrir verðmætt framlag þeirra í efni og vinnu þennan frábæra laugardag.

Aðrir á staðnum: Jónas Bjarnason TF3JB og Mathías Hagvaag TF3MH.

Guðmundur TF3GS og Ari Þórólfur TF1A tengja nýja APRS búnaðinn í fjarskiptaaðstöðunni í Skeljanesi.

Allt á fullu í fjarskiptaherberginu. Guðmundur TF3GS, Georg TF3GZ og Mathías TF3MH skrúfa sundur Diamond loftnetið. Á meðan uppfærir Ari Þórólfur TF1A APRS hugbúnaðinn.

Georg TF3GZ og Mathías TF3MH skrúfa aftur saman Diamond loftnetið eftir skoðun. Niðurstaða: Loftnetið er í góðu lagi.

Diamond loftnetið komið upp á nýja festingu og TF3IRA QRV á VHF/UHF. Loftnetið hægra megin er J-póllinn sem notast fyrir APRS stafvarpann.

Verkefninu lokið. APRS búnaðurinn er staðsettur vinstra megin á borðinu, til hliðar við Yaesu FT-7900 VHF/UHF stöð félagsins.

Guðmundur Sigurðsson, TF3GS, mætti í Skeljanes fimmtudaginn 13. desember og flutti erindi um APRS skilaboða- og ferilvöktunarkerfið (e. Automatic Packet Reporting System).

Hann sagði okkur á lifandi hátt frá APRS sem var fundið var upp og þróað af bandarískum radíóamatör, Robert E. Bruinga WB4APR sem smíðaði og gangsetti fyrsta APRS kerfið fyrir 36 árum (1982), með því að notast við Apple II heimilistölvu.

APRS náði þó fyrst útbreiðslu og vinsældum um áratug síðar (1992) þegar GPS varð aðgengilegt (vegna kostnaðar). Síðastliðinn aldarfjórðung hefur APRS verið stöðugt í þróun og er í dag m.a. grundvöllur staðarákvörðunarkerfa í flugi og á sjó um allan heim.

Guðmundur lýsti vel uppbyggingu APRS sem ferilvöktunarkerfis fyrir radíóamatöra og hvernig t.d. má líka senda stutt textaskilaboð í samskiptum, án aðkomu tölvu. Kerfið er ekki dýrt í uppsetningu og sú reynsla sem íslenskir radíóamatörar hafa aflað nú í meir en áratug sýnir, að koma má upp samtengdu kerfi stafvarpa (e. digipeters) sem veita vöktun á stór-Reykjavíkursvæðinu (og víðar) – allt eftir fjölda stafvarpa og staðsetningu þeirra, en kerfið vinnur á 144.800 MHz í metrabylgjusviði.

Guðmundur svaraði fjölmögum spurningum og eftir kaffihlé sýndi hann búnað sem þarf til uppsetningar á APRS. Hann hlaut að lokum gott klapp fyrir fróðlegt og skemmtilega flutt erindi. Umræður héldu síðan áfram fram undir kl. 23. Alls mættu 24 félagar í Skeljanes þetta frábæra fimmtudagskvöld.

P.s. APRS var fyrst sett upp í Skeljanesi árið 2011, en hefur ekki verið í rekstri í nokkur ár. Fram kom í lok fundar, að TF1A og TF3JB munu lána félaginu búnað svo gangsetja megi APRS á ný frá Skeljanesi.

Guðmundur Sigurðsson TF3GS flutti erindi um APRS í Skeljanesi 13. nóvember.

Salurinn var þétt setinn. Frá vinstri: Þorvaldur Bjarnason TF3TB, Pier Albert Kaspersma TF3PKN, Hans Konrad Kristjánsson TF3FG, Georg Kulp TF3GZ, Einar Kjartansson TF3EK, Óskar Sverrisson TF3DC, Þórður Adolfsson TF3DT, Mathías Hagvaag TF3MH og Georg Magnússon TF2LL.

Frá vinstri: Þorvaldur Bjarnason TF3TB, Georg Kulp TF3GZ, Pier Albert Kaspersma TF3PKN, Wilhelm Sigurðsson TF3AWS, Einar Kjartansson TF3EK og Þórður Adolfsson TF3DT. Næst myndavél: Georg Magnússon TF2LL.

Frá vinstri: Árni Þór Ómarsson TF3CE, Njáll H. Hilmarsson TF3NH, Ari Þórólfur Jóhannesson TF1A, Ágúst H. Bjanason T3OM og Vilhjálmur Í. Sigurjónsson TF3VS.

Að lokum sýndi Guðmundur helstu APRS heimasíðurnar og þann búnað sem til þarf.

Ljósmyndir: TF3JB.

Næsta erindi á vetrardagskrá ÍRA verður í boði fimmtudaginn 13. desember kl. 20:30. Þá mætir Guðmundur Sigurðsson, TF3GS, í Skeljanes með erindi um APRS. APRS er skammstöfun fyrir „Automatic Packet Reporting System“ og hefur verið þýtt sem skilaboða- og ferilvöktunarkerfi.

Aðstaða fyrir sambyggða stafvarpa- og internetgátt fyrir APRS var fyrst útbúin í Skeljanesi 7. apríl 2011 með uppsetningu stafvarpans (e. digipeter) TF3RPG. Fyrsti stafavarpinn hafði verið settur upp í Reykjavík sumarið 2010 með kallmerkið TF3RPF. Vinnutíðni fyrir APRS er á 144.800 MHz.

Guðmundur mun útskýra APRS kerfið, núverandi stöðu þess og hugmyndir um framtíðaruppbyggingu hér á landi.

Stjórn ÍRA hvetur félaga til að mæta tímanlega. Kaffiveitingar.

TF3RPG í Skeljanesi var uppfærður í mars 2013 og kallmerki m.a. breytt í TF3APG. Meðfylgjandi mynd var tekin við það tækifæri. Ljósmynd: TF3JB.

Íslenska kortastofan sendir árlega QSL kort félagsmanna til systurstofnana ÍRA í yfir 90 þjóðlöndum. Ljósmynd: TF3MH.

Áramótaútsending korta frá TF ÍRA QSL Bureau (kortastofu) fer að þessu sinni fram mánudaginn 14. janúar 2019. Áramótaútsending er í raun, þegar nánast öll kort sem safnast hafa upp hjá stofunni, (t.d. til smærri staða) eru “hreinsuð upp” og póstlögð til systurstofnana landsfélaga radíóamatörfélaga um allan heim.

Síðasti skiladagur vegna áramótaútsendingar 2018/2019 er fimmtudagskvöldið 3. janúar 2019. Þau kort sem berast í QSL kassann í Skeljanesi það kvöld verða örugg með að komast í flokkun og til útsendingar í janúar.

Reykjavík 8. desember 2018,

Mathías Hagvaag, TF3MH,
QSL stjóri ÍRA.

Ólafur B. Ólafsson, TF3ML, mætti í Skeljanes fimmtudaginn 6. desember með erindið „6 metrar á sterum – árið 2018 gert upp“.

Ólafur flutti skemmtilegt, afar fróðlegt og myndrænt erindi um stórverkefni sumarsins sem var uppsetning stærsta 50 MHz loftnets hér á landi hingað til, þ.e. 24 elementa – fjögurra samfasaðra 6 elementa einsbands Yagi loftneta.

Hann lýsti vel þeirri gríðarmiklu vinnu sem fylgdi verkefninu á Eyrarbakka sem upphaflega átti að taka nokkra daga, en endaði með að taka heilan mánuð með daglegri viðveru. Hvorutveggja var, að loftnetin sem keypt voru erlendis frá stóðust ekki gæði, auk þess sem umbúnaðurinn kallaði á næstum stöðuga endurhönnun á staðnum. Þá gerði mikið rigningarsumar verkefnið ekki auðveldara.

Ólafur þakkaði Baldvin Þórarinssyni TF3-033 ómetanlega aðstoð við verkefnið og sagði að oft þegar hann hafi verið við það að gefast upp hafi Baldi rekið þá áfram.

Ólafur lýsti síðan ævintýralegum árangri í DX á 6 metrunum þegar „loftnetavirkið“ var tilbúið og farið að virka. Útgeislunin var það þröng, að hann gat hann nánast beint merkinu niður á einstakar sýslur í Japan og sýndi m.a. skjámyndir af merkjarunu japanskra FT8 merkja á bandinu. Hann lýsti einnig vel daglegum opnunum á Bandaríkin (og víðar um heim).

Ólafur sýndi félagsmönnum hvað er mögulegt að gera í DX á 50 MHz með djörfung, áræðni og stórhug í loftnetamálum með „loftnetavirki“ sem gefur 24 dBi ávinning í 20 metra hæð yfir jörðu.

Hann leysti greiðlega úr fjölda fyrirspurna og var að lokum þakkað fróðlegt og vel heppnað erindi með lófaklappi. Alls mættu 32 félagar og 1 gestur í Skeljanes þetta frábæra fimmtudagskvöld.

Þess má geta, að Ólafur vígði nýja aðstöðu félagsins fyrir erindisflutning í fundarsal í Skeljanesi sem m.a. er búin 250 sentímetra breiðu sýningartjaldi.

Skeljanesi 6. desember. Ólafur B. ÓLafsson TF3ML gerir upp árið á 50 MHz.

Með breytingum í fundarsal fer betur um gesti. Frá vinstri, Njáll H. HIlmarsson TF3NH, Jón Björnsson TF3PW, Hrafnkell Sigurðsson TF8KY, Jón Gunnar Harðarson TF3PPN, Guðmundur Ingi Hjálmtýsson TF3IG, Anna Henriksdóttir TF3VB og Vilhjálmur Í. Sigurjónsson TF3VS.

Hluti fundargesta. Aftast frá vinstri: Baldvin Þórarinsson TF3-033, Ari Þórólfur Jóhannesson TF1A, Þórður Adolfsson TF3DT, Garðar Valberg Sveinsson TF8YY, Mathías Hagvaag TF3MH, Þorvaldur Bjarnason TF3TB, Valgeir Pétursson TF3VP, Einar Kjartansson TF3EK, Sigmundur Karlsson TF3VE, Anna Henriksdóttir TF3VB, Vilhjálmur Í. Sigurjónsson TF3VS, Guðmundur Ingi Hjálmtýsson TF3IG, Ársæll Óskarsson TF3AO, Einar Kjartansson TF3EK, Wilhelm Sigurðsson TF3AWS, Óskar Sverrisson TF3DC, Sigurður Óskar Óskarsson TF3WIN og Yngvi Harðarson TF3Y. Ljósmyndir: TF3JB.

Næsta erindi á vetrardagskrá ÍRA verður í boði fimmtudaginn 6. desember kl. 20:30. Þá mætir Ólafur B. Ólafsson, TF3ML í Skeljanes með erindið „6 metrar á sterum – árið 2018 gert upp“.

Sumarið 2018 var viðburðarríkt hjá Ólafi, en þá reisti hann m.a. stærsta 50 MHz loftnet sem sést hefur hér á landi – staðsett hjá færanlegu „fjarskiptavirki“ hans á Eyrarbakka. Hann setti upp 24 element á bandinu, þ.e. fjögur 6 elementa einbands Yagi loftnet, fest á öflugan heimasmíðaðan „H-ramma“ og fösuð saman.

Ávinningur var mikill, eða 24 dBi og hæð frá jörðu 20 metrar í miðju H-rammans. Þess má geta, að „loftnetavirkið“ var reist aðeins örfáa metra frá Atlantshafinu á Bakkanum. Ólafur kemur og segir okkur frá þessu spennandi ævintýri og mörgum fleirum.

Stjórn ÍRA hvetur félaga til að mæta tímanlega. Kaffiveitingar.

Ólafur B. Ólafsson TF3ML í fjarskiptabifreiðinni sumarið 2018. Ljósmynd: Ari Þórólfur Jóhannesson TF1A.

Fjarskiptaaðstaðan á Eyrarbakka sumarið 2018. Ljósmynd: Ari Þórólfur Jóhannesson TF1A.

Mynd af “loftnetavirkinu” á 50 MHz. Ljósmynd: Ari Þórólfur Jóhannesson TF1A.

Þrennt var í gangi í félagsaðstöðunni í gær, laugardaginn 1. desember.

Elín TF2EQ og Árni Freyr TF8RN settu nýja kallmerkið TF3YOTA í loftið og höfðu nær 100 QSO. Þau voru sammála um að móttökur hafi verið góðar og höfðu m.a. sambönd við fjölda annarra kallmerkja sem enda á „YOTA“.

Á neðri hæðinni var haldið áfram með þær breytingar að flytja myndvarpann, færa til húsgögn í fundarsalnum og mála, en vegna góðrar aðsóknar á erindi á vetrardagskrá var núverandi aðstaða orðin of þröng. Bætt aðstaða fyrir erindisflutning verður tilbúin og tekin í notkun n.k. fimmtudag, 6. desember. Þá verður m.a. vígt nýtt sýningartjald.

Radíódót af ýmsu tagi sem félaginu barst m.a. úr dánarbúi Reidars J. Óskarssonar, TF8RO, hefur nú verið sameinað á einn stað í ganginum niðri í Skeljanesi. Verulegur hluti dótsins hefur þegar gengið út, en margt er eftir af nýtilegum hlutum sem félagsmenn geta nýtt sér frítt næstu fimmtudagskvöld.

Elín Sigurðardóttir TF2EQ og Árni Freyr Rúnarsson TF8RN settu TF3YOTA í loftið 1. desember og voru ánægð með viðtökur.

Nýja sýningartjaldið var sett upp í vesturenda salarins. Þar til vinstri, má sjá fundarpúlt félagsins, stól og tölvuaðstöðu fyrir erindisflutning. Eftir þessar breytingar rúmar salurinn nær 40 manns í sæti.

Radíódót úr dánarbúi TF8RO var vistað á tveimur stöðum í forstofu og á gangi í Skeljanesi en hefur nú verið sameinað á einn stað.

(Ljósmyndir: TF3JB).

Á stjórnarfundi í ÍRA þann 13. nóvember s.l. var samþykkt að félagið verði þátttakandi í YOTA verkefni IARU. Í framhaldi var sótt um kallmerkið TF3YOTA til Póst- og fjarskiptastofnunar.

Að sögn Lisu Leenders, PA2LS, ungmennafulltrúa IARU Svæðis 1 og stuðningsaðila „Youngsters on The Air, YOTA“ verður verkefnið rekið í desembermánuði ár hvert og er hugsað til að auka áhuga ungs fólks á amatör radíói. Kallmerki með viðskeytið YOTA verða því áberandi í loftinu í desembermánuði ár hvert, en 2018 er fyrsta árið sem það fer af stað. Flest landsfélög radíóamatöra í IARU eru þátttakendur í verkefninu.

Elín Sigurðardóttir, TF2EQ er frumkvöðull að þátttöku ÍRA og er YOTA verkefnisstjóri félagsins. Þetta verður síðasta verkefnið sem hún tekur að sér fyrir hönd félagsins a.m.k. að sinni, en hún flytur af landi brott um áramót. Aðstoðarverkefnisstjóri ÍRA YOTA verkefnisins, er Árni Freyr Rúnarsson, TF8RN. Hann mun formlega taka við verkefninu frá þeim tíma. Mathías Hagvaag, TF3MH, umsjónarmaður kortastofu ÍRA mun annast QSL mál.

Stefnt er að því að setja kallmekið í loftið í dag, 1. desember 2018.

Árni Freyr Rúnarsson TF8RN og Elín Sigurðardóttir TF2LQ í fjarskiptaherbergi ÍRA í Skeljanesi. Myndin var tekin þegar þau virkjuðu kallmerkið TF3JAM 20. október s.l. þegar skátar fjölmenntu í félagsaðstöðuna á JOTA viðburðinn „Jamboree-On-The-Air“. Ljósmynd: Jónas Bjarnason TF3JB.

Ágúst H. Bjarnason, TF3OM, mætti í Skeljanes fimmtudaginn 29. nóvember og hélt erindið: „Að fjarstýra stöð yfir netið.“

Ágúst var með afar greinargott erindi um reynslu sína í þessum efnum, en hann hefur aðstöðu fyrir loftnet og búnað í sumarhúsi í u.þ.b. 100 km fjarlægð frá heimili sínu í Garðabæ.

Hann notar Kenwood TS-480 stöð og tengibúnað frá RemoteRig. Stöðin er með laustengdu stjórnborði, þannig að RF hlutinn er hafður í sumarhúsinu og stjórnborðið heima. Kosturinn við þetta fyrirkomulag er, að ekki þarf sérstaka tölvu í sveitinni. Ágúst nefndi, að sambærilegt fyrirkomulag sé í boði fyrir fleiri gerðir af stöðvum sem eru með laustengd stjórnborð, t.d. Icom IC-7100. Hefðbundnar stöðvar þurfa hins vegar flestar tölvur á báðum endum.

Meginvandinn hefur verið netþjónustan sem er í boði á landssvæðinu þar sem sumarhúsið er staðsett. Aukin samkeppni og þróun í netbúnaði hefur hins vegar auðveldað málið og gat Ágúst þess, að í dag sé tengingin yfir netið hnökralaus og kostnaður ásættanlegur.

Ágúst hafði með sér fjarstýribúnað í fundarsal og sýndi virkan hans eftir erindið og mátti greinilega heyra að truflanir eru litlar sem engar í sveitinni. Hann fékk fjölda fyrirspurna sem hann leysti greiðlega úr.

Að lokum klappað og Ágústi þakkað fróðlegt og vel heppnað erindi. Alls mættu 24 félagar og 1 gestur í Skeljanes þetta frábæra fimmtudagskvöld.

Ágúst H. Bjarnason TF3OM í Skeljanesi 29. Fjær, Þórður Adolfsson TF3DT. Ljósmynd: Jónas Bjarnason TF3JB.

Sigurður Kolbeinsson TF3-066, Bjarni Sverrisson TF3GB, Vilhjálmur Í. Sigurjónsson TF3VS, Þórður Adolfsson TF3DT, Guðmundur Sigurðsson TF3GS, Ólafur Örn Ólafsson TF1OL, Yngvi Harðarson TF3Y, Jón Björnsson TF3PW, Ágúst Sigurðsson TF3AU, Wilhelm Sigurðsson TF3AWS og Einar Kjartansson TF3EK. Ljósmynd: Jónas Bjarnason TF3JB.

Þorvaldur Bjarnason TF3TB, Njáll H. Hilmarsson TF3NH, Mathías Hagvaag TF3MH, Elín Sigurðardóttir TF2EQ, Óskar Sverrisson TF3DC og Kristján Benediktsson TF3KB. Ljósmynd: Jónas Bjarnason TF3JB.

Næsta erindi á vetrardagskrá ÍRA verður haldið fimmtudaginn 29. nóvember kl. 20:30. Þá mætir Ágúst H. Bjarnason, TF3OM, í Skeljanes með erindi um: „Fjarstýringu á amatörstöð yfir netið“.

Ágúst hefur ekki farið varhluta af auknum truflunum í viðtöku í HF sviðinu hin síðari ár fremur en aðrir leyfishafar búsettir í þéttbýli. Hann býr það vel að hafa til ráðstöfunar sumarhús í uppsveitum Árnessýslu þar sem hann hefur komið fyrir stöð sem hann getur stjórnað yfir netið frá heimili sínu í Garðabæ.

Í sumarhúsinu notar hann endafætt 39 metra langt EFHW 80-10 vírloftnet, sem gerir honum kleift að vinna á 80/40/30/20/17/15/12/10 metra böndunum, án loftnetsaðlögunarrásar. Loftnetið er í um 8 metra hæð yfir jörðu þar sem lægst er.

Hann segir okkur m.a. frá reynslu sinni að nota RemoteRig búnað frá Mike Styrefors, SE2R í sumarhúsinu, þar sem nánast engar truflanir eða suð eru í stuttbylgjusviðinu. Þessi búnaður fær mjög góðar umsagnir á Eham.

Stjórn ÍRA hvetur félaga til að mæta tímanlega. Veglegar kaffiveitingar.

Ágúst H. Bjarnason TF3OM verður í Skeljanesi 29. nóvember. Ljósmynd: Jónas Bjarnason TF3JB.


Úr fjarskiptaherbergi TF3OM heima í Garðabæ. Ljósmynd: Ágúst H. Bjarnason.

TF3OM í fjarskiptaaðstöðunni í sumarhúsinu. Ljósmynd: Ágúst H. Bjarnason.

Helgina 24.-25. nóvember stóð hópur félagsmanna í ströngu í Skeljanesi. Verkefnið var að skipta út turni, Alfa Spid Rak rótor, Fritzel FB-33 loftneti og fæðilínu. Eftirfarandi var gert:

Nýr turn var settur upp – hærri og öflugri. TF2LL gaf og gerði nýjan turn kláran og smíðaði öflugar botnfestingar (fellanlegar) sem og rótorsæti sem er rétt staðsett í turninum. Nýi rótorinn er frá ítalska framleiðandanum Pro.Sis.Tel. af gerðinni PST-61 og stóð félagssjóður straum af kostnaði hans. Nýja loftnetið er breytt OptiBeam OB5-20 einsbands Yagi fyrir 14 MHz. Georg endurvann allar stærðir í samráði við framleiðandann og er nýtt loftnet félagsins í raun 4 elementa OptiBeam OB4-20OWA eftir þær breytingar. Ný fæðilína er „Hardline 1/2“ frá Andrews.

Sex félagar báru hitann og þungann af uppsetningu og frágangi í Skeljanesi um helgina. Það voru Georg Magnússon, TF2LL sem gaf turninn, 4 staka einsbands Yagi loftnet og alla undirbúningsvinnu sem var gríðarlega mikil eða nær 200 tímar – auk vinnu þessa tvo daga. Ólafur B. Ólafsson, TF3ML, sem tengdi og gaf 40 metra langa fæðilínu og kom að undirbúningsvinnu, auk vinnu þessa tvo daga. Þórður Adolfsson, TF3DT sem gaf alla vinnu þessa tvo daga og kom með vörubíl með krana, sem reyndist ómetanlegt framlag. Jón Gunnar Harðarson, TF3PPN, sem gaf alla vinnu þessa tvo daga, en hann annaðist m.a. alla vinnu uppi í turninum. Baldvin Þórarinsson, TF3-Ø33, sem kom að undirbúningsvinnu, auk vinnu þessa tvo daga svo og Ásgeir Bjarnason sem aðstoðaði fyrri daginn.

Stjórnarmenn á staðnum: Jónas Bjarnason, TF3JB; Óskar Sverrisson, TF3DC og Elín Sigurðardóttir, TF2EQ. Einnig: Mathías Hagvaag, TF3MH; Guðmundur Ingi Hjálmtýsson, TF3IG (fyrri dag) og Ari Þórólfur Jóhannesson, TF1A (síðari dag). Gestir: Jón Björnsson, TF3PW (fyrri dag) og Wilhelm Sigurðsson, TF3AWS (síðari dag).

Bóma nýja loftnetsins er 7,5 metrar að lengd, lengsta element er 11,16 metrar og þyngd 60 kg. Ávinningur er 6,3 dbd / 13,6 dBi og 23 dBi F/B. Ari Þórólfur Jóhannesson, TF1A, tengdi RigExpert loftnetsgreini TF2LL við nýja netið eftir uppsetningu og kom það afar vel út, eða með standbylgju 1.1 á 14.175 MHz; 1.3 á 14.000 MHz og 1.2 á 14.350 MHz.

Það var síðan Þórður Adolfsson, TF3DT, sem hafði fyrsta sambandið frá TF3IRA á nýja loftnetinu síðdegis á sunnudeginum við EA9ACE. Skilaboðin voru góð frá Ceuta eða R/S 5/9 plús 20dB.

Stjórn ÍRA þakkar viðkomandi frábært framlag í þágu félagsins.

25. nóvember í Skeljanesi. Nýtt 4 el Yagi loftnet fyrir TF3IRA komið upp á nýjan turn, með nýjum rótor og tengt nýrri fæðilínu.

Turninum lyft í fullri lengd.

Loftnetið komið á turninn.

Jón Gunnar Harðarson TF3PPN uppi í turninum að festa Yagi loftnetið.

Óskar Sverrisson TF3DC rúllar út “hardline” fæðilínunni á meðan hann ræðir við Ásgeir Bjarnason. Fjær: Georg Magnússon TF2LL vinnur við nýja Yagi loftnetið.

Baldvin Þórarinsson TF3-033 gengur frá “hardline” fæðilínunni frá turni í fjarskiptaherbergi TF3IRA.

Kátt á hjalla. Ólafur B. Ólafsson TF3ML, Óskar Sverrisson TF3DC, Þórður Adolfsson TF3DZ og Baldvin Þórarinsson TF3-033.

Þórður Adolfsson TF3DT fjarstýrði krananum á vörubílnum af mikilli leikni. Óskar Sverrisson TF3DC fylgist með. Í fjarlægð: Guðmundur Ingi Hjálmtýsson TF3IG og Ásgeir Bjarnason.

Stund á milli stríða. Georg Magnússon TF2LL og Jón Gunnar Harðarson í stiganum að ganga frá fæðilínunni.

Þórður Adolfsson TF3DT tók fyrsta QSO’ið frá TF3IRA á nýja Yagi loftnetið. Óskar Sverrisson TF3DC fylgist með.

Veðrið var eins og “pantað” báða dagana í Skeljanesi; blankandi logn og hitastigið í kringum frostmarkið.